Kuyakuyqa piñakuytam tanichin

HUK payacham piñarikurqa, Países Bajos nacionmanta George hinaspa Manon señoran payman Diosmanta willaptinku. Paykunaqa yacharurqakum iskay kutikama chay payacha viuda qeparusqanmanta hinaspa qari wawan wañukusqanmantawan tullu nanaywan onqosqanmantapas. Parlaptinku tumpata hawkayaruspanpas, manam kuyakuynintaqa qawachirqaku.

Ichaqa chay payacha sapallan hinaspa piñasqa kasqanraykum, George iñiqmasinchikqa señoranta nirqa waytakunata apaspanku kaqmanta kutinankupaq. Chaytamá rurarqaku, chaymi Rie sutiyoq payachaqa anchata kusikurqa. Chay watukusqan punchawpi mana parlayta atiptinkupas, chay payachaqa nirqam huk punchawña watukamunankupaq. Ichaqa chay nisqan punchawpi kutiptinkum, mana pipas wasinpiqa karqachu. Achka kutikama rispankupas manamá tarirqakuchu. Iñiqmasinchikkunaqa piensaytañam qallaykurqaku paykunamanta pakakusqanta.

Huk punchawmi George iñiqmasinchikqa chay payachata wasinpi tarirurqa. Hinaptinmi payachaqa willakurqa chay punchaw hospitalman risqanrayku wasinpi mana kasqanmanta. Chaymantapas nirqam: “Ichaqa manam yachankichikchu pasakuptikichik ima rurasqaymantaqa. ¡Diospa Palabrantam leerqani!”, nispa. Hinalla parlaptinkum, payqa Biblia estudiayta munarqa.

Bibliata estudiasqanman hinam, manaña piñakuqllañachu karqa aswanmi kuyapayakuq hinaspa kusisqallaña karqa. Wasinmanta mana lloqsiyta atispanpas, payqa watukuqnin runakunamanmi Bibliapi yachasqankunamanta willakuq. Onqosqanraykum mana anchachu huñunakuykunaman riq, ichaqa anchatam kusikuq iñiqmasinchikkuna watukuptinku. Payqa 82 watanpim iskay punchaw asambleapi bautizakururqa.

Rie sutiyoq payachapa wañukusqan qepallatam, huk poesia qellqasqanta tarirurqaku. Chay qellqasqanpim qawachirqa payayay tiempopi sapallan kayqa llumpay sasa kasqanmanta, hinaspam nirqa kuyakuq kay ancha allin kasqanmanta. Manon iñiqmasinchikmi nin: “Chay poesia qellqasqanqa sonqoymanmi chayaruwarqa, ancha kusisqam kachkani kuyakuyniykuta qawachinaykupaq Jehová Dios yanapawasqankumanta”, nispa.

Arí, Jehová Diospa kuyakuq kasqanmi kallpanchawanchik ñoqanchikpas kuyakuq kanapaq (Efe. 5:1, 2). Diosmanta willakusqanchikpas allinmi kanqa ‘sumaq sonqolla kaptinchikqa’ (2 Cor. 6:4, 6).