Yachayniyoq kay ‘Allin kaq consejokunata’ maskaspa

Vidanchiktam tupachinku lamar qochanta illaywan. Ichaqa achka runakunam risqankupi yanqachakururqaku runakunapa yachaynin mana anchata yanapasqanrayku (Sal. 107:23, 27). ¿Imaynatam kay tupanachiyqa yanapawachwan?

Ñawpaq tiempopi buqueta manejanankupaqqa anchatam yachananku karqa. Chaypaqqa unay wataña buque manejaqkunamantam yachananku karqa (Hech. 27:9-11). Chay tiempopi achka dibujokunam qawachin chay buque manejaqkuna wakiqninkunamantapas aswan hatun dibujasqa kasqanta. Lamar qochapa chawpinpi buqueta manejanapaqqa, allintam yachana karqa wayrakunamanta, lucerokunamanta hinaspa hukkunamantapas. Bibliaqa ninmi chay buque manejaqkuna ‘yachayniyoq’ kasqankuta (Eze. 27:8).

Kunan tiempopi sasachakuyninchikkunapas rikchakunmanmi ñawpaq tiempopi buque manejaqkunapa sasachakuyninman. ¿Imaynatam chay sasachakuykunata atipachwan?

¿IMAYNATAM ‘ALLIN KAQ CONSEJOKUNATA’ TARICHWAN?

Vidanchikta lamar qochanta illaywan tupanachisqanchikmanta piensaspa, qawasun Bibliapa nisqanta, ninmi: “Yachayniyoq runapas uyarispanmi aswan yachayniyoqraq kanqa. Allin entiendeq runapas uyarispanmi allin kaq consejota apakunqa”, nispa (Pro. 1:5, 6). Hebreo rimaypi ‘allin kaq consejo’ ninanqa qawachinmi, ñawpaq tiempopi buque manejaq yachayniyoq kasqanmanta. Qawachintaqmi buqueta allinta apasqantapas.

Sasa kaptinpas llapanchikmi kallpanchakunanchik, “allin kaq consejota” chaskinapaq chaynapi vidanchikpi allinta kawsanapaq. Chaypaqqa, Proverbios libropa nisqanman hinam, “yachaywan”, ‘entendimientowan’ hinaspa allin ‘tanteowan’ tukuyta rurananchik (Pro. 1:2-6; 2:1-9). Manataqmi qonqananchikchu Diospa yanapakuyninta maskaytapas, mana allin ruraq runakunapas munasqankuta haypanankupaqmi yachanku imayna rurayta (Pro. 12:5).

Chaynaqa allinpunim Diospa Palabranta estudiayninchik, chaynapi Jehová Diosmanta allinta yachanapaq hinaspa churin Jesucristomantapas, payqa allintapunim Taytanpa imayna kasqanta qatipakurqa (Juan 14:9). Chaymantapas huñunakuykunapim allin yachachikuykunata chaskinchik. Yanapawanchikmantaqmi allin yachayniyoq iñiqmasinchikkunawan tayta-mamanchikpas (Pro. 23:22).

ÑAWPAQMANTARAQ TANTEASUN

‘Allin kaq consejoqa’ ancha allinmi llumpay sasachakuykunapi tarikuptinchikqa. Chayna sasachakuykunapi  tarikuspanchikqa iskayrayaytam qallaykuchwan hinaspa mana allinpipas tukuruchwan (Sant. 1:5, 6).

‘Allin kaq consejo’ nisqa rimaytaqa servichikunkutaqmi guerramanta rimaspapas. Bibliam nin: “Consejachikuspaykim guerrataqa ruranki. Achkaqwan consejachikuspam vencenki”, nispa (Pro. 20:18; 24:6).

Guerrapi imayna peleananmanta allinta tanteaq runa hinam, ñoqanchikpas allinta tanteananchik iñiyninchikpi mana yanqachakurunapaq (Pro. 22:3). Piensasun kaypi, qanmi tanteachkawaq mosoq llamkayta otaq aswan allin llamkayta chaskinaykipaq. Chaypaqqa piensanaykimá hayka qollqeta chaskinaykimanta hinaspa llamkaynikiman rinaykipaqwan kutimunaykipaq hayka tiempota servichikunaykimantapas. Piensanaykitaqmi sichu llamkayniki Bibliapa nisqanman hina kasqanmanta otaq Dios serviynikita harkarunanmantapas (Luc. 14:28-30).

Loretta sutiyoq iñiqmasinchikmi allin llamkayniyoq karqa mikuykuna rantikuq tiendapi. Chay tienda huklawman astakuptinmi, kay iñiqmasinchiktaqa nirqaku chay tiendapi llamkaptin astawan paganankumanta. Patronninkunam nirqaku: “Kunanqa achka qollqetañam chaskinki. Yacharunikuñam chay lawpi huñunakunaykipaq Salonpas kasqanmanta”, nispa. Iñiqmasinchikmi ichaqa musyakururqa chay lawpi llamkaspanqa Dios serviyninpi mana yanapananmanta, payqa munarqam astawan Dios serviyta. Chaymi iñiqmasinchikpa patronnin paypi confiaptinpas, payqa llamkayninta saqenanpaq nirqa. Loretta iñiqmasinchikqa yaqa iskay chunka watañam precursora kachkan, chaytaqa rurarqa “allin kaq consejota” otaq Diospa Palabranta kasukuspanmi. Dioswan amistadninpas allin takyasqam kachkan hinaspapas achka runakunatam yanaparqa Diosta servinankupaq.

‘Allin kaq consejoqa’ yanapakuntaqmi familiapipas. Churi-wawakunata educayqa unay watakunapaqmi chaymi tayta-mamakunaqa Dios serviyninkupi hinaspa hukkunapipas allinta tanteananku, chaymantam kanqa lliw familianpa hamuq tiempopi imayna kasqanqa (Pro. 22:6). Diosta serviq tayta-mamakunaqa tapukunmankum: “Rimasqaykuwan hinaspa imayna kawsasqaykuwan, ¿allintachu Bibliapa yachachisqankunata churi-wawaykunaman yachachichkaniku chaynapi hatunyaspanku yachaywan imatapas ruranankupaq? ¿Yachachinikuchu imayna kawsasqaykuwan churi-wawayku kapuqllankuwan kawsanankupaq hinaspa astawan Diosta servinankupaq?”, nispa (1 Tim. 6:6-10, 18, 19).

Kusisqa kawsakunapaqqa manam tukuy imayoq kaymantachu. Rey Salomonmi chayta allinta yachaspan Diospa yanapakuyninwan kaynata qellqarqa: “Dios respetaq runakunaqa payta respetasqankuraykum allin kanqaku”, nispa (Ecl. 8:12). Arí, kaymi qawachin “allin kaq consejota” tarinapaqqa Diospa Palabranpi maskanamanta (2 Tim. 3:16, 17).

[30 kaq paginapi dibujo]

Buque manejaq ancha allin kasqanta qawachinankupaqmi, wakiqninkunamantapas aswan hatunta dibujaqku

[Reqsikunchikmi]

Su concessione del Ministero per i Beni e le Attività Culturali. Manam kay dibujotaqa imaraykupas copianachu.