Diosmanta willakuypim yanapakunku: Ecuador nacionpi

ITALIA nacionmanta, Bruno sutiyoq mozoqa Jehová Diospa testigonmi, payqa iskayrayarqam ima rurananmanta. Colegionmanta allin notayoq lloqsiptinmi, familianwan profesorninkunaqa hikutarqaku universidadpi estudiananpaq. Ichaqa ñawpaqtam Diosman qokuspan nirqa Dios serviyta puntapi churananmanta. Chaynaqa, ¿imatataq rurarqa? Kikinmi nin: “Jehová Diosman qokuspaymi nirqani mañakusqayman hina ruranaymanta hinaspa payta puntapi churanaymantapas. Nirqanitaqmi payta servispay achka rurayniyoq kanaymantapas”, nispa.

 Pisi tiempollamantam, Bruno iñiqmasinchikqa Ecuador nacionman astakururqa. ¿Imaynam payqa tarikurqa? Ninmi: “Jehová Diosqa mañakusqaymantapas aswan mastaraqmi qowarqa”, nispa. Ecuador nacionman chayaruptinqa achka mozo-sipaskunam Diosta astawan servinankupaq pay hina chayman astakurusqaku.

JEHOVÁ DIOSPA INVITASQANTA CHASKIQ MOZO-SIPASKUNA

Bruno iñiqmasinchikqa, waranqantin mozo-sipaskuna hinam Jehová Diospa kayna invitasqanta chaskirqa: “Kunanyá pruebawaychik ¿manachum ñoqaqa cielokunapa ventananta kichaykuspay bendicionniyta qomusqaykichik llimparinankama?” (Mal. 3:10). Brunowan waranqantin mozo-sipaskunaqa Diosta kuyasqankuraykum, predicaqkunapa mana ancha kasqan nacionman astakurqaku tiemponkuta, kallpankuta hinaspa kapuqninkutapas servichikunankupaq.

Yanapakunankupaq huk law nacionman chayaruspankuqa, chayllam musyakunku ‘achkallaña cosechanapaq kasqanmanta, cosechaqkunam ichaqa aslla’ (Mat. 9:37). Alemania nacionmanta Jaqueline sutiyoq iñiqmasinchikmi, Ecuadorpi Betel wasiman kaynata nispam qellqarqa: “Iskay wata masninñam kaypi servichkani, hinaspapas 13 runakunatam Bibliamanta yachachini, paykunamanta tawaqa huñunakuykunamanmi hamunku. ¡Ancha kusisqamá kachkani!”, nispa. Canadá nacionmanta Chantal sutiyoq iñiqmasinchikpas ninmi: “2008 watapim  Ecuador nacionman astakurqani, chay risqay lawpiqa huk congregacionllam karqa. Kunanmi ichaqa kachkan kimsa congregacionkuna hinaspa kimsa chunka masnin precursorkunapas. ¡Anchatam kusikuni achka runakuna iñiyninkupi ñawparisqankumanta! Qayninpakunallam ritillaña orqopa kasqan llaqtaman astakurqani, chayqa kachkan 2.700 metro altopim. Chay lawpi 75.000 runakuna yachaptinpas, huk congregacionllam kachkan. Willakusqaykuta runakuna uyariptinkum, Diosta kusisqa servichkani”, nispa.

SASACHAKUYKUNATAM ATIPARQAKU

Huk law nacionpi Diosta serviyqa sasaniraqmi. Wakin mozo-sipaskunam manaraq nacionninkumanta lloqsichkaspanku sasachakuykunapi tarikurqaku. Estados Unidosmanta, Kayla iñiqmasinchikmi nin: “Wakin iñiqmasiykunaqa allinniypaq piensaspankum harkawarqa. Manam entienderqakuchu imanasqa huk law nacionman rispay predicanaymanta. Chaykunam wakinpiqa iskayrayachiwaq sichu allin rurasqaymanta”, nispa. Chayna kaptinpas, Kaylaqa astakurqam. Paymi willakun ima yanapasqanmanta, ninmi: “Anchatam Diosta mañakurqani hinaspam congregacionpi yuyayniyoq turi-ñañaykunawan rimarqani, chaymi qawachiwarqa Jehová Diosqa munaynin ruraqkunata yanapasqanmanta”, nispa.

Wakinkupaqqa sasam karqa huk rimayta rimayninkuqa. Irlanda nacionmanta Siobhan sutiyoq iñiqmasinchikmi nin: “Hukmanyasqam tarikurqani rimayninkuta mana qespichiyta atispay. Pacienciakuytam yacharqani, kallpanchakunaytaqmi karqa rimayninkuta yachanaypaq, rimayta pantaspaypas asinaytaqmi karqa”, nispa. Estonia nacionmanta Anna iñiqmasinchikpas ninmi: “Chiri yakuwan bañakunaymantaqa hinaspa rupaypiwan allpallaña wayrapi amañanaymantaqa, aswan sasam karqa castellano rimayta yachayqa. Pantasqaykunawan hukmanyanaymantaqa, rimay yachasqaykunapim piensaq kani”, nispa.

Llakikuypas hapiwanchiktaqmi. Estados Unidosmanta Jonathan iñiqmasinchikmi nin: “Yanapakuq risqaymanta qepallatam, familiaykunamantawan amistadniykunamanta anchata llakikurqani. Ichaqa runakunaman Diosmanta willasqay hinaspa Bibliata sapaypi estudiasqaymi, llakikuyniyta atipanaypaq yanapawarqa. Predicasqaypi tukuy ima pasawasqanmi hinaspa congregacionpi amistadkuna rurasqaymi kusisqataña tarichiwarqa”, nispa.

 Huk law nacionpi yachayqa manam nacionninchikpi hinachu. Canadá nacionmanta Beau iñiqmasinchikmi nin: “Kikinchikpa nacionninchikpiqa manam llakikunchikchu yakumanta nitaq achkimantapas. Kaypim ichaqa wakin kutipi mana kanchu”, nispa. Achka nacionkunapim runakunaqa wakcha kanku, carrokunapipas ñitiy-ñitiyllañam rinku, achkataqmi mana leeyta yachankuchu. Austria nacionmanta Ines sutiyoq iñiqmasinchik chay sasachakuykunata atipananpaqqa, runakunapa imayna kasqanpi astawan reparasqanmi yanaparqa, paymi nin: “Runakunaqa yanapakuq, kuyakuq, chaskikuq hinaspa humildem kanku. Astawanraqmi chayna kanku Diosmanta yachay munaq runakunaqa”, nispa.

“LLIMPARINANKAMA” BENDICIONKUNA

Qawasqanchikman hinaqa, kay mozo-sipaskunaqa llapallankum kallpanchakurqaku Ecuador nacionpi yanapakunankupaq. Paykunaqa qawarqakum “mañakusqanchikmantapas hinaspa piensasqanchikmantapas aswan llimparichkaqtaraq” Jehová Dios qosqanta (Efe. 3:20). Arí, paykunaqa manamá iskayrayankuchu Jehová Dios ‘bendicionninta llimparinankama qokuq’ kasqanmantaqa (Mal. 3:10). Qawasunchik imatam ninku Dios servisqankumanta.

Brunom nin: “Ecuador nacionman chayaspayqa, puntatam servirqani Amazonas lawpi. Chaymantañataqmi Betel wasipi oficinakunata astawan ruraptinku yanapakurqani, kunanñataqmi chaypi llamkani. Italia nacionpi kaspayraqmi tantearqani Jehová Dios serviyta puntapi churanaymanta hinaspa payta servispay achka rurayniyoq kanaymantapas”, nispa.

Beaumi nin: “Jehová Dioswan amistadniymi astawan yapakururqa, Ecuador nacionpiqa astawanmi Dios serviyta atini. Reqsirurqanitaqmi reqsiy munasqay lawkunatapas”, nispa.

Annam nin: “Manam haykapipas piensarqanichu misionerakunapa rurasqankuta ruraytaqa. Kunanmi ichaqa yachani atikusqanmanta. Jehová Diosqa yanapawachkanmi, ancha kusisqam tarikuni runakunata yanapaspay, Huñunakuna Salonkunata ruraypi yanapakuspay hinaspa mosoq amistadkunata armaspaypas”, nispa.

Elkem nin: “Austria nacionniypim Jehová Diosta mañakurqani Bibliamanta yachay munaq huk runallatapas tarinaypaq. Ichaqa, kaypiqa 15 runakunatam Bibliamanta yachachichkani. Iñiyninkupi ñawparisqankuta qawaspaymi anchata kusikuni”, nispa.

Joelpas ninmi: “Ancha kusikunapaqmi mana reqsisqayki nacionpi Diosta serviyqa. Astawanmi yachanki Jehová Diospi hapipakuyta hinaspapas kusikunkitaqmi yanapasusqaykita qawaspayki. Estados Unidosmanta chayaramuptiyqa 6 testigokunallam karqaku, wata pasaytañataqmi 21 karqaniku, Jesuspa wañukusqan punchawta yuyarinapaq huñunakuypiñataqmi 110 runakunaña karqaniku”, nispa.

¿IMATATAQ QAMQA RURANKI?

Bautizasqaña kaspaykiqa, ¿atiwaqchu mana ancha Testigokunapa kasqanman astakuyta? Chaypaq allinta tanteanayki kaptinpas, Jehová Diostawan runamasinchikta kuyasqaykim astawanqa yanapasunki. Chay kuyakuyniki kaptinqa, Diosta mañakuy yanapasunaykipaq. Chaymantapas, willakuwaqmi tayta-mamaykiman hinaspa congregacionpi ancianokunamanpas. Qampas atiwaqmi huklawman astakuspa mana ancha Testigokunapa kasqanpi yanapakuytaqa.

[3 kaq paginapi suti rikuylla kaq willakuy]

“Anchatam Diosta mañakurqani hinaspam congregacionpi yuyayniyoq turi-ñañaykunawan rimarqani, chaymi qawachiwarqa munayninta ruraqkunata Jehová Dios yanapasqanmanta.” (Estados Unidosmanta, Kayla)

[6 kaq paginapi dibujokuna hinaspa recuadro]

Imakunatam rurawaq huk law nacionpi Diosmanta willakunaykipaq

• Kallpanchakuy Bibliata sapa kuti estudianaykipaq

• Qaway 2011 agosto killapi lloqsimuq Diospaq Llamkayninchik qellqapa, 4-6 paginakunata

• Rimay huk law nacionpi Diosta serviqkunawan

• Astawan yachay huk law nacionpa imayna kasqanmantawan costumbrekunamanta

• Chay nacionpa rimayninta tumpallatapas yachay

[6 kaq paginapi dibujo hinaspa recuadro]

Imakunatam wakinkuqa ruranku mantienekunankupaq

• Nacionninkupim iskay-kimsa killakunata llamkanku

• Wasinkuta otaq tiendankutam alquilakunku

• Internet nisqantakamam llamkanku

[4 hinaspa 5 kaq paginakunapi fotokuna]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)