Kaytam willakun Max Lloyd

Huk tutam 1955 watapi, huk misionerowan Paraguay nacionpi predicachkaptiyku achka runakuna wasita muyuriramurqaku, hinaspankum kaynata qayaykachakurqaku: “¡Diosniykum yawarmanta kachkan, ichaqa gringokunapa yawarnintam munachkan!”, nispanku. ¡‘Gringokunaqa’ ñoqallaykumá karqaniku! Ichaqa, ¿imaynatam chaymanqa chayarurqaniku?

QALLARINAPAQ, ñoqaqa Australia nacionpim nacerqani, chaypim Jehová Diosqa yachachiwarqa munayninta ruranaypaq. 1938 watapim, Testigokunamanta Enemigos niq qellqata taytay chaskirqa ingles rimaypi. Unayñam taytaywan mamayqa mana allinchu kachkarqaku pastorninkuwan, payqa Bibliapi wakin willakuykunatam cuento hinalla kasqanmanta nirqa. Huk watamantañataqmi tayta-mamayqa Jehová Diospa testigon kanankupaq bautizakururqaku. Chaymantapacham familiaykuwan kuska Diospa munayninta puntapi churarqaniku. Lesley sutiyoq paniymi chaymanta bautizakururqa, payqa pichqa wata mayorniymi karqa. Ñoqañataqmi 1940 kaq watapi bautizakurqani, 9 wataypi kachkaspay.

Enteron Pachapi iskay kaq hatun guerra pasaruptinmi, Australia nacionqa manaña munarqachu qellqanchikkuna rurakunanta nitaq cheqechisqa kanantapas. Chaymi warmacha kasqaymantapacha Bibliallawan iñisqaykunata defiendeyta yacharurqani. Bibliataqa sapa kutim escuelayman apaq kani imanasqa banderata mana saludasqaymanta hinaspa guerrapi mana mayqan nacionman sayapakusqaymanta willakunaypaq (Exo. 20:4, 5; Mat. 4:10; Juan 17:16; 1 Juan 5:21).

Achka estudiaqmasiykunam mana ñoqawanqa hukllawakuqkuchu, Alemania nacionmanta wateqaq runa kasqayta piensaspanku. Chay tiempopiqa escuelapim warmakunaqa qawaq kaniku peliculakunata, ichaqa manaraq qallarichkaptinmi sayarispayku nacionpaq takita takinayku karqa. Ñoqa mana hatariptiymi, iskay otaq kimsa warmakuna chukchaymanta hatarichiwayta munaqku. Hinaptinmi, iñiyniyrayku escuelamanta qarqosqa karqani, ichaqa hinallam wasiypi estudiarqani cartantakama.

MUNASQAYTA HAYPASQAY

Taksallaraq kaspaymi munarqani 14 watayman chayaspay, tukuy tiempoywan Dios serviyta. Ichaqa tayta-mamaymi niwarqa llamkaytaraq tarinaypaq. Niwarqataqmi wasiykupi yachasqay cuartomanta paganaypaq, ichaqa niwarqam 18 watayman chayaruptiy precursor kanaypaq saqewanankumanta. Achka kutipim rimaq kaniku hayka qollqetaña ganasqaymanta. Ñoqaqa willaqmi kani precursor kanaypaq llapanta huñuy munasqaymanta, paykunam ichaqa cuartoymanta hinalla mañawaqku.

Precursor karuptiymi tayta-mamayqa ñoqawan rimaspanku niwarqa qosqay qollqeta bancopi  huñusqankumanta. Hinaspam qopuwarqa pachayta hinaspa predicanaypaq necesitasqaykunata rantikunaypaq. Chay rurasqankuwanmi yachachiwarqa kikiymanta imatapas ruranaypaq. ¡Allinniypaqmi chayqa karqa!

Tayta-mamayqa precursorkunatam wasiypi qepakunankupaq niq, paniy Lesleytawan ñoqatam gustawaqku paykunawan predicaq lloqsiy. Semana tukuytañataqmi wasin-wasin hinaspa callekunapi predicaq kaniku, hinaspapas wasinkupim yachachiq kaniku. Chay tiempopi iñiqmasinchikkunaqa 60 horatam sapa killa predicaqku. Mamaykum qatipakunapaq karqa, payqa yaqa sapa killam chay rurayta atiq.

TASMANIA LAWPI PRECURSOR KASQAY

Puntataqa Australia nacionpa Tasmania islanpim precursor karqani, chaypim paniywan qosan karqaku. Ichaqa manapas unaymantam 15 kaq Galaad Escuelaman rirqaku. Llumpay manchapakuq kasqayraykum hinaspa haykapipas huk lawman mana lloqsisqayraykum, wakinqa nirqaku manapas kimsa killamanta kutikunaypaq. Ichaqa manaraq watapim, 1950 kaq watapi siervo de compañía kanaypaq niwarqaku, kunanñataqmi sutichakun congregacionpi ancianomasinkunawan ruranankupaq yanapaq nispa. Chaymantañataqmi huk iñiqmasinchikwan precursor especial karqani.

Kamachiwarqakum cobre horqona karu llaqtachaman rinaykupaq, chaypiqa manam Testigokunaqa karqachu. Tardeykuqtam carrowan chayarurqaniku hinaspam puñurqaniku mawka puñuna wasipi. Paqarinnintintam, predicaspayku vecinokunata tapurqaniku sichu maypipas samapakunaykupaq wasi kasqanmanta. Yaqa tutaykuqtañam huk runa niwarqaku, iglesia presbiterianapa waqtanpi sacerdotekunata yanapaq runapa wasin kasqanmanta. Niwasqankuman hinam chay sacerdotekunata yanapaqwan rimarqaniku hinaptinmi payqa wasinpi kanaykupaq niwarqaku. Hukmanmi karqa chay runapa wasinmanta sapa punchaw predicanaykupaq lloqsiyqa.

Chay llaqtapi runakunam ichaqa allinta chaskiwaqku hinaspa Bibliamantapas yachayta munaqku. Ichaqa iglesiapi punta apaqkunam ñoqaykumanta yacharuspanku samachiwaqniyku runata kamachirqa qarqowanankupaq. ¡Kaqmantam samapakunaykupaq wasiqa mana karqachu!

Paqarinnintintam chawpi punchaw pasaykama predicarqaniku hinaspam samapakunapaq wasita maskarqaniku. Ichaqa manam tarirqanikuchu hinaspam pelota haytaqkunapa gradasnin ukupi maletaykuta pakaruspa hinalla predicarqaniku. Ña tutaykamuchkaptinpas, hinalla predicayta tukunaykupaqmi tantearqaniku. Huk kaqnin wasipim huk runa niwarqaku wasinpa qepa lawninpi iskay cuartochakunapi qepakunaykupaq.

CONGREGACIONKUNA WATUKUSQAYKUWAN GALAAD ESCUELAMAN RISQAYKU

Pusaq killaña chaypi kachkaptiymi, Australia Betel wasimanta niwarqa congregacionkunataña watukunaypaq. 20 watallaypiraq kasqayraykum, anchata admirakurqani. Congregacionkunata watukunaypaq yachachisqa kasqay qepamanmi qallaykurqani  iñiqmasinchikkunata kallpanchanaypaq congregacionkuna watukuyta. Yaqa llapallankum ñoqamanta aswan mayorkunaña karqaku, ichaqa manam mayqanninkupas mana allinpaq hinaqa hapiwaqchu, aswanmi imam rurasqayta chaninchaqku.

Congregacionman watukuspayqa, wakinpim riq kani hatun carrowan, hukpiñataq taksa carrowan, wakinpiñataqmi pasajerokunata apaq motowan, chaypi rispayqa huknin makiypim apaq kani maletayta hukninpiñataqmi predicanaypaq maletinta. Iñiqmasinchikkunapa wasinpi samapakuspaymi anchata kusirikuq kaniku. Huk iñiqmasinchikpam karqa wasin manaraq qespichisqa, chaywanpas munarqam wasinpi samapakunaypaq. ¡Chay semanam puñurqani bañakunanpa kasqanpi! Chayna kaptinpas, iñiyniykupiqa anchatam kallpanchanakurqaniku.

1953 watapiñataqmi huk cartata chaskirurqani 22 Galaad Escuelaman invitasqa kanaypaq. Ancha kusisqa kaspaypas llakisqataqmi tarikurqani. ¿Imanasqa? Paniymi qosantin 1950 watapa 30 julio killanpi misionerokuna kaptinku Pakistán nacionman rinankupaq kamachisqa karqaku. Ichaqa chaypi manaraqpas wata kachkaptinkum Lesley onqorurqa hinaspam wañukurqa. Chayna llaki pasaruwaptinkuqa ¿imaynataq tayta-mamayqa tarikunman karqa sichu ñoqa astawanraq huklaw nacionman pasakuptiyqa? Taytaymi niwarqa: “Jehová Diospa munasqanman hinayá maypipas serviy”, nispa. Chaymantaqa manañam taytaywanqa tuparqaniñachu, payqa 1960 watapa ñawpaqnintam wañukurqa.

Chay qepamanmi Australiamanta pichqa iñiqmasinchikkunawan pasarqaniku Nueva York llaqtaman, chaymanqa chayarqaniku soqta semanapim. Barcopi Bibliata leestin, estudiastin chaynataq pasajerokunaman predicastinmi rirqaniku. South Lansing (Nueva York) sutiyoq llaqtaman manaraq richkaspaykum, huklaw nacionniyoqkunapaqwan asambleaman rirqaniku, chaymi apakurqa Yankees sutiyoq Estadiopi, 1953 watapa julio killanpi. Chay asambleapim karqaku yaqa 165.829 runakuna.

Tukuy hinastinmanta yaqa 120 kaqkunaqa Escuelayku tukuruptinmi yachakurqaniku mayman kamachisqa kanaykuta. Yacharuspallaykum Bibliotecapi kaq mapakuna qawaq kallparqaniku kachawasqanku llaqtata astawan reqsinaykupaq. Ñoqaqa Paraguay nacionmanmi rinay karqa, yachasqayman hinaqa chay nacionpiqa sapa kutim gobiernopa contranpi hatariqku. Chayman chayaruspay punta kaq puñusqay tutapim hawapi uyarirqani runakunapa chaqwa rurasqankuta. Achikyaramuptinmi wakin misionerokunata tapurqani ima pasakusqanmanta. Paykunañataqmi asispanku niwarqaku: “Chay uyarisqaykiqa gobiernopa contranpi hatariqkunapa chaqwa rurasqankum karqa. Punkuman lloqsispayki qaway”, nispa. ¡Hawaman lloqsiykuptiymi sapa esquinapi soldadokuna kachkasqaku!

MANA QONQANAPAQ HINA KAQ

Huk punchawmi congregacionkunata watukuq ancianota riysirqani karu llaqtapi kaq iñiqmasinchikkunata watuspayku La Sociedad del Nuevo Mundo en acción nisqa videota qawachinaykupaq. Chayman chayanaykupaqqa 8 otaq 9 horatam rirqaniku,  puntatam trenpi chaymantañataq caballokunapa aysasqan carretapi, chaymantañataqmi toropa aysasqan carretapi, chaypa hawanpiñataqmi aparqaniku videota qawanaykupaq motorkunata. Paqarinnintintam rirqaniku animalkunata uywasqanku lawman hinaspam invitarqaniku runakunata chay tuta video qawaq hamunankupaq. Chunka pichqayoq runakunam hamururqaku chay videota qawaq.

Yaqa iskay chunka minutollaraq qawachkaptiykum huk kaqnin niykuwarqaku wasi ukuman chaylla yaykunaykupaq, chay nisqanta kasukuspaykum lliwta pakaruspayku yaykururqaniku. Chaypi kachkaptiykum qonqayllamanta achka runakuna balakunata toqyachispanku kaynata qayaykachakustin chayaramurqaku: “Diosniykum yawarmanta kachkan, ichaqa gringokunapa yawarnintam munachkan!”, nispanku. “Gringokunaqa” ñoqallaykum karqaniku. Chay runakunaqa kasqaykumanmi yaykumuyta munarqaku, ichaqa videota qawaqkunam harkarurqaku. Chay runakunaqa yaqa achikyaqtañam kutikurqaku balankunatapas toqyachistin, hinaspa chay llaqtaman kutiptiyku qarqowaykuta munaspanku.

Iñiqmasinchikkuna chay pasakusqanmanta policiakunaman willaykuptinkum hamururqaku iskay caballoyoq llaqtaman apawanankupaq. Sachakunapa kasqanta pasaptiykum policiaqa ñawpariykuspam armanta hapiykuspa imapas kasqanta kaylawman-waklawman qawakachaspa pusawarqaku. Chaypim yacharurqani caballoyoq kayqa allinpuni kasqanta, chaymi tiempopa risqanman hina huk caballota rantirurqani.

ACHKA MISIONEROKUNAM CHAYARAMURQAKU

Chay llaqtakunapi sacerdotekuna harkakuchkaptinkupas hinallam Diosmanta willakuyqa ñawparirqa. 1955 watapim pichqa misionerokuna chayaramurqaku, paykunamanta hukninmi karqa Canadá nacionniyoq Elsie Swanson sutiyoq sipas, payqa 25 kaq Galaad Escuelamantam lloqsimurqa. Payqa Jehová Diostam servirqa tayta-mamankuna mana yanapachkaptinpas, paykunaqa manam haykapipas testigochu karqaku. Huk kutipim Elsiewan Betelpi tuparurqaniku, chaypim qeparqa huklaw llaqtaman cambianankukama. 1957 watapa 31 diciembre killanpim paywan casarakururqaniku hinaspam rirqaniku Paraguay nacionpa sur lawninpi misionerokunapaq wasipi yachanaykupaq.

Chay wasiqa mana yakuyoqmi karqa, chayraykum mana karqachu duchapas, lavadorapas nitaq bañopas. Patioykupa cantonpim ichaqa karqa yakuyoq uchku. Refrigeradoraykupas mana kasqanraykum sapa punchaw mikuytapas rantiq kaniku. Chay pasasqayku tiempokunaqa kusisqam casado vidaykupi  kawsakurqaniku, congregacionpi iñiqmasinchikkunatapas anchatam kuyarqaniku.

1963 watapim mamayta watukuq Australia nacionman rirqaniku. Ichaqa, 10 watamantaña rikuwasqanraykum pisi tiempollamanta sonqonwan onqorurqa. Paraguay nacionman kutinayku kachkaptinmi aswan llakikuyraq pasaruwarqaku; mamaymi hospitalpi karqa, manam pipas cuidananpaq karqachu. Achka kutikama Diosta mañakuspaykum tantearurqaniku mamayta wañukunankama cuidanaykupaq. Paymi wañukurqa 1966 watata, chay watakunapiqa tukuy tiempoykuwanmi Diosta servirqaniku.

Ancha kusikunapaqmi karqa achka watakuna Australiapi congregacionkunata watukusqayqa chaynataq Ancianokunapaqwan siervo ministerialkunapaq Escuelapi yachachisqaypas. Chaymantañataqmi, Australia nacionpi Betel wasimanta Encargakuqkunamanta huk kaqnin kanaypaq cambiaruwarqaku. Chay qepamanñataqmi huk Betel wasi rurakunanpaq tanteasqa kaptin, ñoqa cuentallikunaypaq churaruwarqaku. Achka experienciayoq llamkaqkunapa yanapakuyninwanmi Betelqa sumaqta qespirurqa.

Chaymantañataqmi Australia nacionpi predicacionmanta encargakuq kanaypaq churaruwarqaku. Niwarqakutaqmi huklaw nacionkunapi kaq Betel wasikunata watukuq kanaypaqpas, chaypi llamkaqkunata kallpanchanaypaq. Wakin nacionkunapim iñiqmasinchikkunata reqsirqani Jehová Diosta servisqankurayku achka wataña otaq chunkantin watakunaña carcelpi kasqankuta. Paykunamanta yachasqaymi iñiyniypi astawan kallpanchawarqa.

KUNANÑATAQMI BROOKLYN LAWPI SERVICHKANIKU

2001 watapi huklaw nacionpi kaq Betelta watukusqaymanta kutiramuptiymi huk carta suyawachkasqa, chay cartapim Brooklyn (Nueva York) llaqtaman astakunaykupaq invitawarqaku, Estados Unidos nacionpi Betel wasimanta Encargakuqkunapa parten kanaypaq. Elsiewanmi Jehová Diosta mañakurqaniku, hinaspaykum chay niwasqankuta kusikuywan chaskikurqaniku. Yaqa chunka hukniyoq masnin watañam pasarun, kunanpas hinallam kaypi kachkaniku.

Ancha kusikunapaqmi Jehová Diospa imapas munasqanta ruray munaq warmiwan kayqa. Yaqa 80 wataykupiñam kachkaniku, sanollataqmi kachkanikupas. Anchatamá munaniku wiñaykama Jehová Diospa yachachikuyninkunata hinalla chaskiyta hinaspa munayninta ruraqkunawan kuska Diospa bendicionkunata chaskiytapas.

[19 kaq paginapi suti rikuylla kaq willakuy]

Wakinpim riq kani hatun carrowan, hukpiñataq taksa carrowan, wakinpiñataqmi pasajerokunata apaq motowan, chaypi rispayqa huknin makiypim apaq kani maletayta hukninpiñataqmi predicanaypaq maletinta

[21 kaq paginapi suti rikuylla kaq willakuy]

Anchatamá munaniku wiñaykama Jehová Diospa yachachikuyninkunata hinalla chaskiyta

[18 kaq paginapi fotokuna]

Ichoqpi: Australiapi congregacionkunata watukuq kaspay

Alleqpi: Tayta-mamay hinaspa ñoqa

[20 kaq paginapi foto]

1957 watapa 31 diciembre killapi casarakusqayku