“Manam pitapas manchakunichu”

“Guerra hatarimuptinpas ñoqaqa manapunimriki hukmanyallasaqchu” (SAL. 27:3).

KAY VERSICULOKUNAPA NISQANMAN HINAQA, ¿IMATAQ YANAPAWASUN KALLPANCHASQA KANAPAQ?

Salmo 27:1

Salmo 27:4

Salmo 27:11

1. ¿Ima tapukuykunata kutichinapaqmi Salmo 27 capitulon yanapawasun?

¿IMANASQATAQ Diosmanta willakuyninchikqa astawan ñawparichkan sasallaña tiempokunapi kawsaptinchikpas? ¿Imanasqataq qollqemanta sasachakuykuna kaptinpas tiemponchiktawan kallpanchikta servichikunchik Diosmanta willakunapaq? ¿Imanasqam hamuq tiempomanta runakuna iskayrayaptinkupas ñoqanchikqa mana manchakunchikchu? Kay tapukuykunatam kutichin Davidpa qellqasqan Salmo 27 capitulon.

2. ¿Imaynam runakunaqa tarikunku manchakuywan kaspankuqa, ichaqa imanasqam ñoqanchikqa mana manchakunchikchu?

² Davidmi kay Salmo takita kaynata nispan qallarin: “Tayta Diosmi kanchaykuwaqniyqa [hinaspa] salvaykuwaqniyqa, manam pitapas manchakunichu. Tayta Diosmi amparaqnillayqa, manam pitapas manchakunichu”, nispa (Sal. 27:1). Manchakuyqa pitapas hukmanyachinmanmi, astawanraqmi llumpay manchakuyqa. Ichaqa Jehová Diosta manchakuyqa manamá chaynachu nitaq katkatatanapaqchu (1 Ped. 3:14). Diospi lliw amparakuqkunaqa “segurom kawsakunqa”, ‘manam mana allinmantapas manchakunqachu’ (Pro. 1:33; 3:25). Qatiqninpi qawasun imanasqa chayna kasqanmanta.

DIOSMI KANCHAYKUWAQNIYQA HINASPA SALVAYKUWAQNIYQA

3. ¿Imaynanpim ninchik Jehová Dios kanchayninchik kasqanmanta, ichaqa imatam rurananchik?

³ “Diosmi kanchaykuwaqniyqa” nispa Davidpa rimasqanqa, qawachinmi pantay yachachikuykunamanta Jehová Dios horqowasqanchikta (Sal. 27:1). Kanchay kaptinqa purisqanchik ñanpi imapas urmananchikpaq kaqkunatam qawayta atinchik. Ichaqa manamá chaykunataqa chinkachinchu, aswanmi yanapawanchik qawaspa  allinta purinapaq. Chaynallataqmi Jehová Diospas, kay tiempopi tukuy imapas pasakusqan imanasqa chayna kasqanmanta hinaspa cuidakunamanta willawanchik. Palabranwanmi allinpuni yachachikuykunatapas qowanchik, ichaqa kasukunanchikmi yanapawananchikpaqqa. Chaynata ruraspam Salmo qellqaqpa nisqanman hina yachayniyoq kasun, paymi nirqa: “Enemigoykunamantapas mastaraqmi yachayniyoqta ruraykullawanki [. . .]. Llapallan maestroykunamantapas aswan mastaraqmi entiendellani”, nispa (Sal. 119:98, 99, 130).

4. a) ¿Imanasqam Davidqa mana iskayrayaspan nirqa: “Tayta Diosmi salvaykuwaqniyqa”, nispa? b) ¿Haykapitaq sutilla qawakunqa Jehová Dios salvaqninchik kasqanqa?

⁴ Salmo 27:1 nisqanpi allinta yuyaymanaptinchikqa, yaqapaschá Davidqa yuyarirqa Jehová Dios ñawpaqpi librasqanmanta. Huk kutipim librarqa leonmanta hinaspa ukumarimantapas. Librarqataqmi hatunkaray Goliat runamantapas. Achka kutipi lanzanwan rey Saul wañurachiyta munaptinpas librarqam (1 Sam. 17:37, 49, 50; 18:11, 12; 19:10). Chaychá Davidqa mana iskayrayaspan nirqa: “Tayta Diosmi salvaykuwaqniyqa”, nispa. Hichpaykamuq ‘hatu-hatun ñakariy’ punchawkunapipas, Jehová Diosqa serviqninkunatam waqaychanqa. Hinaptinmi paykunapaqpas Jehová Diosqa libraqnin kanqa (Apo. 7:14; 2 Ped. 2:9).

YUYARISUN IMAYNA YANAPAWASQANCHIKMANTA

5, 6. a) ¿Imaynatam ñawpaqpi Dios yanapawasqanchikmanta yuyariyqa kallpanchawasun? b) ¿Imaynatam kallpanchawanchik ñawpaq tiempopi llaqtanta Dios librasqanmanta yuyariyqa?

⁵ Qarinchakuq kanapaqmi Salmo 27:2, 3 (leey) nisqan sutillata qawachiwanchik ima yanapawananchikmanta. Davidqa yuyarirqamá Jehová Dios ñawpaqpi imayna yanapasqanmanta (1 Sam. 17:34-37). Chayna yuyarisqanmi allintapuni yanaparqa llumpay sasachakuykunatapas atipananpaq. Qampas, ¿yuyarinkichu ñawpaqpi Jehová Dios imayna yanapasusqaykita? ¿Kallpanchasunkichu chayna yuyarisqayki? Haykapipas llumpay sasachakuypi tarikuspa, ¿tukuy sonqoykiwan Diosta mañakurqankichu hinaspa qawarqankichu yachaytawan kallpa qosusqaykita? ¿Yuyankichu Diosta tukuy sonqoykiwan servinaykipaq imapas harkasusqayki chinkasqanmanta? Otaq ¿yuyarinkichu astawan Diosmanta willakunaykipaq ‘punku hina kichakusqanmanta’? (1 Cor. 16:9.) ¿Imaynam tarikunki chaykunata yuyarispayki? Chaykunata yuyariyqa anchatam  yanapasunki ima sasachakuypiña tarikuptikipas atipanaykipaq (Rom. 5:3-5).

⁶ ¿Imaynam tarikuchwan sichu huk gobierno Jehová Diospa llaqtanta chinkarachiyta munaptinqa? Kay tiempokunapipas wakin gobiernokunaqa chay ruraytam munarqaku, ichaqa manamá atirqakuchu. Jehová Dios ñawpaq tiempopi llaqtan librasqanmanta yuyarispaqa, manam hamuq punchawkunapi ima sasachakuyña hamuptinpas manchakusunchu (Dan. 3:28).

CHANINCHAY CHEQAP YUPAYCHAYTA

7, 8. a) Salmo 27:4 nisqanman hinaqa, ¿imatam Davidqa Jehová Diosta mañakurqa? b) ¿Imataq Diospa hatun templonqa, hinaspa imaynatam chaypi yupaychachkanchik?

⁷ Qarinchakuq kanapaqqa yanapawasuntaqmi cheqap yupaychayta chaninchayninchikpas (leey Salmo 27:4). Davidpa tiemponpiqa ‘Diospa templonqa’ otaq wasinqa karpallam karqa. Ichaqa hina Davidmi tukuyta rurarqa churin Salomonña Diospaq templota hatarichinanpaq. Tiempopa risqanman hinaqa, Jesuspa nisqanman hinam chay templopiqa manaña Diosta yupaychanankuchu karqa (Juan 4:21-23). Hebreos 8-10 capitulonkamam Pabloqa nirqa ‘mana runakunapa rurasqan’ huk templo rikurisqanmanta, kayqa hatun templowanmi sutichakun. Chaypim Dios yupaychayta atichwan. Pabloqa nirqataqmi Jesuspa bautizakusqan qepaman chay templo rikurinanmanta. Chayqa pasakurqa cristianokunapa tiemponpi 29 kaq watapim (Heb. 10:10). Kay hatun temploqa Diospa tukuy rurasqanmi, chaynapi Jesuspa wañukusqanpi iñispa Diosman asuykunapaq. ¿Imaynatam chay hatun templopi Diosta yupaychanchik? Yupaychanchikmi ‘cheqap sonqowan mana iskayrayaspa’ Diosta mañakuspa, Diosmanta willakuspa, huñunakuykunapi iñiqmasinchikkunata kallpanchaspa chaynataq familiawan Diosta yupaychaspapas (Heb. 10:22-25). Arí, cheqap yupaychayta chaninchayqa yanapawasunmi kay sasallaña tukupay tiempokunapi.

⁸ Enteron Pachapim Jehová Diospa serviqninkunaqa paymanta astawan willakuchkanku, wakinpiqa huk rimaykunata yachaspanku otaq mana ancha testigokunapa kasqanman astakuspanku. Paykunaqa rurasqankuwanmi salmista hina mañakunku Dios yanapananmanta hinaspa imaña kaptinpas payta servinankupaq (leey Salmo 27:6).

HAYKAPIPAS DIOSQA YANAPAWASUNMI

9, 10. ¿Imatam niwanchik Salmo 27:10 nisqanqa?

⁹ Davidqa mana iskayrayaspanmi Diospi hapipakusqanmanta kaynata nin: “Dios Taytalláy, ñoqataqa mamayña saqeruwaptinpas, ñoqataqa taytayña saqeruwaptinpas, ñoqataqa qamllañam uywakullawanki”, nispa (Sal. 27:10). 1 Samuel 22 capitulonpi willakuyqa sutillatam qawachiwanchik Davidpa tayta-mamanqa haykapipas mana saqesqanmanta. Kunan tiempopim ichaqa Jehová Diospa achka serviqninkuna tayta-mamankupa qepanchasqan karqaku, chayna kaptinpas Diospa llaqtanpim waqaychasqa tarikunku.

¹⁰ Jehová Diosqa atinmá saqesqa serviqninkunata waqaychaytaqa, ¿chaychu mana yanapaykuwachwan ima sasachakuykunapi tarikuptinchikpas? Familianchik ima mikunankumanta llakikuspaqa, amayá iskayrayasunchu Jehová Dios yanapawananchikmantaqa (Heb. 13:5, 6). Payqa allintapunim yachan serviqninkuna ima necesitasqankumantaqa.

11. ¿Imapim tukunman Jehová Diospi hapipakusqanchikqa? Rimarimuy Victoriamanta.

¹¹ Rimasun Victoriamanta, payqa Liberia nacionniyoq Biblia estudiaqmi. Iñiyninpi ñawparichkaptinmi paywan kawsaq runaqa kimsa warmachayoqta saqerurqa. Mana wasiyoq chaynataq mana llamkayniyoq kachkaspanpas, payqa bautizakururqam. Chay qepallamanmi 13 watanpi kaq warmachan  qollqeta tarikurqa wayqachapi huntata. Mana munapayanankupaqmi yupayllapas-yuparqakuchu, aswanqa utqayllam chay dueñoyoq soldadota qayarurqaku. Chay soldadoñataqmi nirqa: “Llapallan runakuna Jehová Diospa testigonkuna hina kaptinqa, allin kawsakuychá kanman”, nispa. Hinaptinmi Victoriaqa Bibliapi qawachirqa hamuq tiempopi sumaq kawsakuymanta. Qollqen kutichipusqanmanta admirakuspanmi chay soldadoqa achka qollqeta Victoriaman rakiykurqa. Arí, testigokunaqa allin runakuna kasqanchikwanmi reqsichikunchik Jehová Diospi hapipakusqanchikrayku.

12. ¿Imatam qawachinchik sasachakuyña kaptinpas Jehová Diospi hapipakuspaqa? Thomasmanta rimarimuy.

¹² Piensariytaq Sierra Leona nacionniyoq manaraq bautizasqa Thomaspipas. Payqa colegiopim profesor hina llamkayta qallaykurqa, ichaqa yaqa huk wata hinam pagonta mana qorqakuchu. ¿Imatam ruranan karqa chaskinanpaqqa? Payqa colegiopi encargakuq sacerdotewanmi rimanan karqa. Chay sacerdoteqa nirqam testigokunapa lliw iñisqankuqa colegiopi yachachisqankuwan mana tupasqanta, hinaspam nirqa llamkayta munaspanqa Bibliapa yachachisqanman hina iñisqanta qepanchananpaq. Thomasqa llamkaynintawan debesqanku qollqeta saqespanmi, telefonokunatawan radiokuna allichaypi llamkayta tarirurqa. Qawasqanchikman hinaqa, tukuy imata Unanchaq hinaspa Waqaychawaqninchik Diospi hapipakuyqa ancha allinmi imamantapas mana manchakunapaq.

13. ¿Imaynam kachkan mana ancha kapuqniyoq nacionkunapi Diosmanta willakuyqa?

¹³ Mana ancha kapuqniyoq nacionkunapim iñiqmasinchikkunaqa Diosmanta astawan willakunku. ¿Imanasqa? Huk kaqnin Betel wasimantam kaynata qellqamurqaku: “Mana llamkayniyoq runakunam aswan tiempoyoq kasqankurayku astawanqa Bibliamanta estudiayta munanku. Iñiqmasinchikkunapas astawanmi tiempochakunku Diosmanta willakunankupaq. Wakchayaypa kasqan lawpi runakunaqa, astawanraqmi tukupay tiempopi kawsasqanchikmanta yachanku Bibliapa willakusqanta kikinkupuni qawasqankurayku”, nispa. Huk nacionpim sapa predicaqkuna kimsa runakunata Bibliamanta yachachinku. Chay nacionpi 12 masnin wataña yachaq huk misionerom nin: “Achka iñiqmasinchikkunaqa kapuqllankuwan kawsasqankuraykum, astawan tiempochakunku runakunaman Diosmanta willakunankupaqwan yachachinankupaq”, nispa.

14. ¿Imaynatam Jehová Diosqa llaqtanta waqaychanqa?

¹⁴ Jehová Diosqa nirqam llaqtanta imapipas yanapananmanta hinaspa waqaychananmantapas, ñoqanchikqa manam chaymantaqa iskayrayanchikchu (Sal. 37:28; 91:1-3). “Hatu-hatun ñakariymanta” librakuqkunaqa achkallaña runakunam kanqaku  (Apo. 7:9, 14). Chaymi nichwan chay runakunaqa kay tukupay tiempopi mana chinkachisqa kanankumanta. Paykunaqa yanapasqam kanqaku ima sasachakuytapas aguantanankupaq chaynapi Jehová Dioswan amistadninku mana yanqachakunanpaq. Hatu-hatun ñakariy punchawpa tukuyninpipas, Jehová Diosqa libranqam llaqtantaqa.

“ÑANNILLAYKIPIÑAYÁ QAMQA PUSALLAWAY”

15, 16. ¿Imaynatam yanapawanchik Jehová Diospa nisqankunata kasukuyqa? Willarimuy precursor iñiqmasinchikmanta.

¹⁵ Diospa favorninta chaskinapaqqa hinallam Diospa kamachikuyninkunamanta yachananchik. Davidmi nirqa: “Taytalláy, wateqaqniyraykuyá yachaykachillaway. Alli-allintañayá kawsaykachillaway. Ñannillaykipiñayá qamqa pusallaway”, nispa (Sal. 27:11). Kaypi nisqanta kasukuspaqa, Diospa llaqtanpa lliw niwasqanchiktam mana iskayrayaspa chaylla kasukunanchik. Achka iñiqmasinchikkunam kusisqaña kawsakunku manaña llumpayta manukuspanku, paykunaqa kasukurqakum kapuqllankuwan kawsakunankupaq Diospa llaqtan nisqanta. Achkallaña kapuqniyoq kasqankurayku manaña tiempoyoq kanankumantaqa, paykunaqa astawanmi libre kanku Diosmanta willakunankupaq. Chaymi sapakama kaynata tapukuchwan: “¿Utqayllamanchu kasukuni sasa kasukunapaq hina kaptinpas Bibliapa nisqantawan qellqanchikkunapi allin yuyayniyoq confianza sirvientepa niwasqanchikta?”, nispa (Mat. 24:45).

¹⁶ Jehová Dios hinalla yachachiwananchikta hinaspa ñanninkunapi pusawananchikta saqekuspaqa, manamá imamantapas manchakusunchu. Estados Unidosmanta huk precursormi, llamkayninpi encargakuqta mañakurqa huk llamkayta qonanpaq chaynapi señoranwan precursor hina Diosta hinalla servinankupaq. Chay encargakuqmi ichaqa nirqa titulon mana kaptinqa haykapipas mana chay llamkayniyoq kananmanta. Sichu chaynapi qam tarikuwaq karqa, ¿ñakakuwaqchu karqa precursor kasqaykirayku chay llamkaypaq mana estudiasqaykimanta? Iskay semana pasaruptillanmi chay encargakuqqa qarqorachikurqa, hinaptinmi huk encargakuqña chay iñiqmasinchikta tapurqa imapi llamkay munasqanmanta. Payñataqmi nirqa señoranpiwan tukuy tiemponkuwan Jehová Dios servisqankuta hinaspa chay rurayninkuta mana saqey munasqankumantapas. Manaraq rimayta tukuchkaptinmi chay encargakuqqa nirqa: “¡Musyarqaniñam wakin runakuna hina mana kasqaykita! Taytay wañukunanpaqña kachkaptinmi iskay testigokuna sapa punchaw hamuqku Bibliata leepunankupaq. Chayta qawaspaymi nikurqani haykapipas huk testigota yanapanay kaptinqa yanapaykunaymanta”, nispa. Paqarinnintinmi chay iñiqmasinchiktaqa churarurqaku ñawpaq encargakuq runa mana churay munasqan llamkayman. Chaynaqa, Diospa munayninta puntapi churaptinchikqa Jehová Diosqa qowasunmi imapas pisipuwaqninchiktaqa (Mat. 6:33).

SUYAKUYWAN IÑIYQA ANCHA ALLINMI

17. ¿Imataq yanapawasun hamuq punchawpi sasachakuykuna kaptin atipanapaq?

¹⁷ Iñiyniyoq hinaspa suyakuyniyoq kayqa ancha allinmi, chayna kasqanmantam Davidqa kayna nisqanwan sutillata qawachirqa: “¡Imaynaraq kayman kay pachapiraq kawsaspay Jehová Diospa allin rurasqanta qawanaypaq mana iñispayqa!”, nispa (Sal. 27:13, NM). Kaypi piensariy: ¿Imaynaraq kachwan suyakuyninchik mana kaptinqa chaynataq Salmo 27 nisqanpi kaqkunata mana chaninchaspanchikqa? Chaynaqa, hinallayá Diosta mañakusunchik kallpata qowananchikpaq chaynataq hatu-hatun ñakariy punchawpi waqaychaykuwananchikpaqpas (leey Salmo 27:14).

[Kay yachachikuypa tapukuyninkuna]

[23 kaq paginapi dibujo]

Jehová Dios ñawpaqpi yanapasqanmanta yuyarisqanmi Davidta kallpancharqa

[25 kaq paginapi dibujo]

Qollqemanta sasachakuypi tarikuspapas, ¿atichwanchu Diosmanta astawanraq willakuyta?