“Munasqaymi rurakururqa”

Yaqa chunka pichqan wata ñawpaqtaqa precursoram Emiliaqa karqa, ichaqa chay ruraynintam saqenan karqa. Kunanñataqmi chay tiempokunapi kusisqallaña servisqanta yuyarispan kaqllamanta precursora kayta munan.

Ichaqa llamkaynin llumpayta tiemponta qechusqanraykum payqa hukmanyasqa tarikun. Huk kutipim Emiliaqa pesapakurqa llamkaqmasinkunapa qayllanpi kaynata nispan: “¡Mayna allinchá kanman as horallata llamkaptiyqa!”, nispa. Llamkayninmanta encargakuq warmi uyariruspanmi, tapurqa sichu chay nisqan cheqap kasqanmanta hinaptinmi payñataq nirqa cheqap kasqanta. Iñiqmasinchikqa chay llamkayninpi patronninmanmi chaytaqa mañakunan karqa, chay llamkaypi pipas kananpaqqa tukuy tiemponwanmi llamkanan karqa. Emiliaqa patronninwan rimananpaqmi tantearurqa hinaspam Jehová Diosta mañakurqa qarinchakuspan mana manchakuq kananpaq.

Chay punchaw chayaramuptinmi, Emiliaqa mana manchakuspan patronninta sumaqllata mañakurqa as horallata llamkananpaq. Nirqataqmi mana llamkasqan horakunapi runakunata yanapananpaq kallpanchakusqanta. Paymi nirqa: “Jehová Diospa testigon kaspaymi runakunaman Bibliamanta yachachini. Kunan tiempopi runakunapa imayna kawsasqankuqa mana allinllañam, chaymi Bibliamanta yachachinata necesitanku. Manamá munanichu samasqay horakunapi imapas rurasqay kaypi llamkayniyta yanqachanantaqa, ichaqa munaymanmi aswan tiempoyoq kaspay runakunata yanapayta. Chayraykum munayman as horallata llamkayta”, nispa.

Patronninqa sumaqta uyariykuspanmi nirqa paypas runakunapa allinninpaq haykapipas llamkay munasqanmanta. Hinaspam nirqa: “Chayna kaptinqa, nisqaykiman hinayá kachun. Ichaqa pisillam pagoykiqa kanqa”, nispa. Emiliaqa manamá chay nisqanwanqa iskayrayarqachu, aswanmi as qollqellawan kawsakunanmanta nirqa. Nirqataqmi: “Ñoqaqa astawanmi munani runakunata yanapayta”, nispa. Patronninñataqmi nirqa: “Admirakunim mana imallapaq runamasinta lliw yanapaqkunata qawaspay”, nispa.

Kunanqa Emiliaqa semanapim tawa punchawllata llamkan, chay llamkayninpiqa manam mayqen llamkaqmanpas chayna tiempotaqa qorqachu. Hinaspapas admirakunapaq hinam pagontaqa yaparurqaku, hinaspam ñawpaq chaskisqanta hina chaskin. Chaymi kikin kaynata nin: “Kaqllamantam precursora kachkani, munasqaymi rurakururqa”, nispan.

Qampas, ¿yaqachu piensarqanki tiempoykita allichaspayki precursor kanaykipaq?

[32 kaq paginapi suti rikuylla kaq willakuy]

Patronninmi nirqa: “Admirakunim mana imallapaq runamasinta lliw yanapaqkunata qawaspay”, nispa