Diospa munaychakusqanpi kanapaq hinayá kawsasun

“Vidaykichikyá kachun Jesucristomanta allin noticia uyarisqaykichikman hina” (FILI. 1:27).

¿IMATAM NIWAQ?

¿Pikunataq Diospa Munaychakusqanpi kayta atinmanku?

¿Ima kimsa kaqkunatam rurananchik Diospa Munaychakusqanpi kanapaq?

¿Imaynatam qawachiwaq Diospa kamachikuyninkunata cheqaptapuni kuyasqaykita?

1, 2. ¿Imanasqam Filipos cristianokunaqa Pablopa nisqanta allinta entienderqaku?

APOSTOL Pablom Filipos cristianokunaman kaynata nirqa: “Vidaykichikyá kachun Jesucristomanta allin noticia uyarisqaykichikman hina”, nispa (leey Filipenses 1:27). Griego rimaypi “vidaykichik” niq rimayqa tikrakunmantaqmi “huk llaqtayoq hina kawsaychik” nispa. Chay rimaytaqa paykunaqa allintam entienderqaku. ¿Imanasqa? Filipos llaqtaqa ancha reqsisqa llaqtakunamanta huk kaqninmi karqa, hinaspam chaypi yachaq runakunaqa Roma nacionniyoq hinaña karqaku. Filipos runakunawan Roma nacionpa munaychakusqan huk llaqtapi runakunaqa, anchatam kusikuqku Roma nacionniyoqña kasqankurayku hinaspa leyninkunawan waqaychasqa kasqankumanta.

² Filipos llaqtapi cristianokunaqa aswan kusisqaraqmi kananku karqa, Pablopa nisqanman hina “hanaq pacha llaqtayoq” kasqankurayku (Fili. 3:20). Arí, paykunaqa Diospa Munaychakuyninpi kanankupaqmi akllasqa karqaku, chaymi pimantapas aswan allin waqaychasqa kananku karqa (Efe. 2:19-22).

3. a) ¿Pikunataq Diospa Munaychakusqanpi kayta atinmanku? b) ¿Imamantam kay yachachikuypi qawasun?

³ Huk llaqtayoq hina kawsanankupaq Pablopa nisqanqa, Jesuswan kamachimunankupaq suyakuyniyoq cristianokunapaqmi astawanqa karqa (Fili. 3:20). Chayna nisqanqa allintaqmi kay Pachapi kawsanankupaq suyakuyniyoq cristianokunapaqpas. ¿Imanasqa? Lliw cheqap cristianokunapas Jehová Diosllatam servinku, hinaspapas paykuna hinam kamachikuyninkunatapas kasukunku (Efe. 4:4-6). Achka runakunam kunan tiempopiqa ancha reqsisqa llaqtaman ripukuspanku tukuyta ruranku chay llaqtayoqña kanankupaq. Astawanraqchá ñoqanchikqa tukuyta rurananchik Diospa Munaychakusqanpi kanapaqqa. Kayta astawan chaninchanapaq,  qatiqninpi tupachisun huk llaqtayoq kanapaq hinaspa Diospa Munaychakusqanpi kanapaqpas imakuna ruranamanta. Qawasuntaqmi Diospa Munaychakusqanpi kanapaq kimsa yanapakuykunamantapas.

HUK LLAQTAYOQ KANAPAQ IMAKUNA RURANAMANTA

4. ¿Imataq Bibliapa nisqanman hina chuya rimayqa, hinaspa imaynatam qawachinchik chay rimayta yachasqanchikta?

⁴ Chay llaqtapa rimaynintam yachana. Wakin gobiernokunaqa chay llaqtayoq kayta pipas munaptinqa chay llaqtapa rimayninta yachanankupaqmi kamachinku. Wakinkuqa chay llaqtayoqña karuspankupas, unaytaraqmi sasachakunku allinta rimanankupaq. Ichapas utqayllaman yacharunku imayna qellqana kasqantaqa, ichaqa sasachakunkuraqmi allintapuni rimanankupaq. Diospa Munaychakusqanpi kanapaqpas, Bibliapa nisqanman hinam ‘chuya rimayta’ yachananchik (leey Sofonias 3:9 *). ¿Imataq chuya rimayqa? Chay rimayqa Bibliapa nisqanman hina Diosmantawan munayninmanta cheqap yachachikuymi. Chay chuya rimayta yachasqanchiktam qawachinchik Diospa kamachisqanman hina kawsaspa. Diospa Munaychakusqanpi kay munaqkunaqa, yaqapaschá utqayllaman yacharunmanku Bibliapa wakin yachachikuyninkunata. Ichaqa bautizakurusqanku qepamanpas hinallam kallpanchakunanku allintapuni chuya rimayta yachanankupaq. ¿Imaynata? Chaypaqqa hinallam llapanchik kallpanchakunanchik Bibliamanta yachasqanchikman hina kawsanapaq.

5. ¿Imanasqam kay tiempokunapi Diospa llaqtanmanta allinta yachanapaq kallpanchakunanchik?

⁵ Chay llaqtamantam allinta yachana. Huk llaqtayoq kayta munaspaqa, chay llaqtapa imayna kasqanmantam allinta yachana. Diospa Munaychakusqanpi kanapaqpas kallpanchakunanchikmi chay gobierno imayna kasqanmanta yachanapaq. Rimasun Jerusalen templopi Diosta serviq Coreypa mirayninkunamanta. Paykunaqa anchatam kuyarqaku Jerusalenpi templotaqa, kusikuywantaqmi Jerusalen llaqtamantapas willakuqku. Rumikunawan sumaq hatarichisqa kasqanmanta willakunankumantaqa, astawanraqmi willakuqku chay llaqta ‘hatu-hatun Rey’ Jehová Diospa llaqtan kasqanmanta. Chaypimá cheqap yupaychayqa apakuq. Chaypitaqmi Diospa Kamachikuyninkunatapas yachachiqku. Jehová Diosqa chay llaqtatamá Rey hina kamachispan llakipayakuynintapas qawachirqa (leey Salmo 48:1, 2, 9, 12, 13). ¿Qampas paykuna hinachu munanki kay tiempokunapi Jehová Diospa llaqtanmanta allinta yachaspa willakuyta? Astawan yachaspaykiqa hinaspa  Jehová Dios imayna yanapasqanmanta qawaspaykiqa, astawanmi Diospa Munaychakuyninpi hapipakunki, munankitaqmi willakuytapas (Jer. 9:24; Luc. 4:43).

6. ¿Imanasqam Jehová Diospas gobiernokuna hina munan kamachikuyninkunamanta yachaspa kasukunanchikta?

⁶ Chay llaqtapa kamachikuyninkunatam yachana. Wakin gobiernokunaqa munankum chaypi yachaq runakuna kamachikuyninkunamanta yachaspanku kasukunankuta. Jehová Diospas munanmi Munaychakusqanpi kayta lliw munaqkunapas kamachikuyninkunamanta yachaspanku kasukunankuta (Isa. 2:3; Juan 15:10; 1 Juan 5:3). Runakunapa kamachikuyninkunaqa manamá llapanpichu allinpuniqa. Ichaqa, “Diospa tukuy yachachikuyninqa [otaq kamachikuyninqa] mana imaniraqllapas fallayoqmi” (Sal. 19:7). ¿Anchatachu kuyanki Diospa kamachikuyninkunata, hinaspa sapa punchawchu Bibliata leenki? (Sal. 1:1, 2.) Diospa kamachikuyninkunamanta yachanapaqqa, kikinchikpunim kallpanchakunanchik yachanapaq. Manam pipas ñoqanchikpa rantinchikpiqa ruranmanchu.

DIOSPA KAMACHIKUYNINKUNATAM KUYANA

7. ¿Pipa kamachikuynintam ñoqanchikqa kasukunchik?

⁷ Diospa Munaychakusqanpi kayta munaspaqa, kamachikuyninkunamanta yachaspapas kuyananchiktaqmi. Kunan tiempopi runakunaqa ninkum llaqtankupi kamachikuykunata kasukusqankuta. Ichaqa, mana allinpaq hinata qawaspankuqa otaq mana pipas rikuptinkuqa manam kasukunkuchu. Paykunaqa yaqa llapanpim runakuna ‘qawanallankupaq allintaqa ruranku’ (Col. 3:22). Ñoqanchikmi ichaqa kusikuywan Diospa kamachikuyninkunata kasukunchik mana pi rikuwachkaptinchikpas. ¿Imanasqa? Chay kamachikuykuna qowaqninchikta kuyasqanchikraykum (Isa. 33:22; leey Lucas 10:27).

8, 9. ¿Imaynatam yachawaq Diospa kamachikuyninkunata cheqaptapuni kuyasqaykita?

⁸ ¿Imaynatam yachawaq Diospa kamachikuyninkunata cheqaptapuni kuyasqaykita? Piensariy kaypi: sichu pipas nisunkiman imayna pachakusqayki otaq imayna allichakusqayki mana allin kasqanta, ¿ima niwaqtaq? Yaqapaschá Diospa llaqtanpi manaraq kachkaspaykiqa, hukmankunata otaq munapayanapaq hinata pachakuq kanki. Diosmanta yachayta qallaykuspam ichaqa, sutin hatunchasqa kananpaq hina pachakuyta qallaykurqanki (1 Tim. 2:9, 10; 1 Ped. 3:3, 4). Kunanqa ichapas piensawaq allichakuynikiqa allinña kasqanmanta. Ichaqa, ¿imatam niwaq imayna allichakuyniki congregacionpi kaqkunata hukmanyachisqanmanta huk anciano nisuptikiqa? ¿Kutipakuwaqchu? ¿Piñapakuspachu mana kasukuwaq? Jehová Diosqa kamachinmi Jesusta qatipakunanchikpaq (1 Ped. 2:21). Kaymantam apostol Pablo nirqa: “Sapakamayá runamasinchikta agradasun paypa allinninpaq ruraspa chaynapi iñisqanpi wiñananpaq. Manam Cristopunipas kikillantachu agradakurqa”, nispa (Rom. 15:2, 3). Yuyayniyoq cristianoqa iñiqmasinkunawan hawkalla kananpaqmi hinaspa wakinkunata mana hukmanyachinanpaqmi kasukun (Rom. 14:19-21).

⁹ Kunanñataq qawasun warmi-qari puñuytawan casarakuy vidata imayna qawanamanta. Diospa Munaychakusqanpi kayta mana munaqkunaqa, ichapas qaripura casarakuyta hinaspa millakuypaq qalalla kaqkunata qawaytapas allinpaq hapinku. Piensankutaqchá huchapakuywan divorciakuyqa sapakamamanta kasqanta. Diospa Munaychakusqanpi kayta munaqkunam ichaqa chaykunataqa qepanchanku. Ichapas wakinkunaqa manaraq cristiano kachkaspanku mana allinkunapi purirqaku,  kunanmi ichaqa warmi-qari puñuytawan casarakuy vidataqa Jehová Diospa qosqanta hina qawanku. Kuyankutaqmi Diospa kamachikuyninkunatapas, entiendenkutaqmi huchapakuypi puriqkuna Diospa Munaychakusqanman mana yaykunankuta (1 Cor. 6:9-11). Ichaqa yachankutaqmi runapa sonqonqa pantachikuqllaña kasqanta (Jer. 17:9). Chayraykum agradecekunku allinta kawsanankupaq yanapakuykuna chaskisqankumanta.

IMAPAS WILLAKUYKUNATAM KASUKUNA

10, 11. ¿Ima allin willakuykunatam Diospa Munaychakuyninqa niwanchik, hinaspa imatam qamqa chaymanta piensanki?

¹⁰ Gobiernokunaqa lliw runakunamanmi willakunku ima mikuykuna otaq ima hampikuna mana allin kasqanmanta, chaynapi llaqtapi runakuna wañurunankumanta harkasqa kanankupaq. Mana willakuspankuqa kikinkuchá huchayoq kanmanku. Chaynallataqmi Jehová Diospa Munaychakuyninpas imakunamantapas allintapuni willakuykunata qowanchik. Piensariy kaypi: Jehová Diospa llaqtanqa achka watañam willawachkanchik Internetpi millakuypaq qalalla kaqkunata qawayqa iñiyninchikpaq mana allin kasqanmanta. ¡Anchatamá agradecekunchik chay willakuykuna qowasqanchikmantaqa!

¹¹ Chayllaraqmi Internetpi rikuriramun piwanpas parlanapaq mosoq yanapakuykuna, chaytaqa achkallaña runakunam kunanqa servichikunku. Chayta servichikunapaqqa allintapunim tanteana. ¿Imanasqa? Chaykunaqa aparuwachwanmi mana allin runakunawan amistadta ruranapaq (1 Cor. 15:33). Chayraykum Jehová Diospa llaqtanqa, chaykunaman mana wichiykunapaq allin willakuykunata qowanchik. ¿Yaqachu qellqanchikkunapi chaykunamanta willakuq yachachikuykunata llapanta leerurqankiña? Ima hampitapas imapaq allin kasqanta mana yachachkaspa tomaruspaqa yanqachakuruchwanmi. Chaynataqmi yanqachakuruchwan chay yachachikuykunata manaraq leechkaspa chay Internetpi piwanpas parlanapaq kaqkunaman yaykuspaqa. *

12. ¿Imanasqataq mana allinchu kanman imapas willakuykunata mana kasukuyqa?

¹² Diospa llaqtanpa willakusqankunata mana kasukuqkunaqa kikillankum yanqachakunku, yanqachankutaqmi familiankutapas. Wakinkunaqa qalalla kaqkuna qawaymanmi otaq millakuypaq kaqkuna ruraymanmi qokurunku, piensankum Dios mana rikusqanta. ¡Manamá ima rurasqanchiktapas Jehová Diosmantaqa pakayta atichwanchu! (Pro. 15:3; leey Hebreos 4:13.) Imaynam gobiernokunapas mana allin ruraqkunata chay llaqtankupi mana kanankupaq harkanku, chaynallataqmi Diospas mana allin ruraqkunatawan mana wanakuqkunataqa Munaychakuyninman mana yaykunankupaq harkan (1 Cor. 5:11-13). * Ichaqa, Jehová Diosqa kuyapayakuyninpim chay runakunata yanapayta munan, chaypaqmi llaqtanpi punta apaqkunata servichikun (Gal. 6:1). Wanakuspanku kutirikuqkunaqa, kaqllamantam Diospa Munaychakusqanpi kanankupaq suyakuyniyoq kanku (2 Cor. 2:5-8). ¡Ancha kusikunapaqmá kuyakuq Diosta serviyqa!

 YACHACHIKUYNINKUNATAM CHANINCHANA

13. ¿Imaynatam cheqap cristianokunaqa qawachinku chaskisqanku yachachikuykuna chaninchasqankuta?

¹³ Achka gobiernokunam kallpanchakunku escuelakunata ruraspanku leeytawan qellqayta runankunata yachachinankupaq. Chay yanapakuykunamantam cristianokunaqa agradecekunku. Ichaqa astawanraqmi chaninchanku Jehová Diospa llaqtanpi tukuy yachachikuykuna chaskisqankuta. Jehová Diosqa llaqtanwanmi runakunata yanapan leeytawan qellqayta yachanankupaq. Chaymi tayta-mamakunata nin warmachankuman qellqanchikkunamanta leepunankupaq. Sapa killataqmi allin yuyayniyoq confianza sirvienteqa Llaqta Cuidaq hinaspa ¡Despertad! qellqakunawan Bibliamanta allinta yachachiwanchik. Sapa punchaw iskay otaq kimsa paginakunata leespaqa, killapi lliw chaskisqanchik qellqakunatam leeyta tukusunchik.

14. a) ¿Imayna yachachikuytam chaskinchik? b) ¿Ima yanapakuykunatam servichikurqanki Familiawan Diosta Yupaychana Tutapaq?

¹⁴ Diospa Munaychakusqanpi kayta munaqkunaqa, sapa semanam huñunakuykunapi yachachisqa kanku. Rimasun Diosmanta Yachachinapaq Escuelamanta. Kay huñunakuyqa yaqa 60 watañam cristianokunata yanapachkan Bibliamanta allinta yachachinankupaq. ¿Ñachu qamqa chay escuelapiña kachkanki? Kay watakunallapim confianza sirvienteqa achka kutita niwarqanchik Familiawan Diosta Yupaychanapaq Tutata ruranapaq. Kayqa yanapakunmi familianchik kallpanchasqa kananpaq. ¿Yaqachu qellqanchikkunapi chayta imayna ruranapaq yanapakuykunata servichikurqanki? *

15. ¿Ima ruraytaq aswan chaninniyoq?

¹⁵ Achka runakunam rurasqankuwan qawachinku ima gobiernotapas yanapasqankuta. Wakinpiqa wasin-wasin rispankuraqmi runakunata ninku yanapaykunankupaq. Diospa Munaychakusqanpi kay munaqkunapas enteron Pachapim wasin-wasinpas chaynataq ñankunapipas kusikuywan Diosmanta willakunku. Arí, huknin yachachikuypi qawamusqanchikman hinaqa Llaqta Cuidaq qellqam ima qellqamantapas enteron Pachapi aswan aypusqa kachkan, kayqa Jehová Diospa Munaychakuynin willakusqa kananpaqmi rurasqa kachkan. Chay ruraymi ima ruraymantapas aswan chaninniyoqqa. Hinaptinqa, ¿kallpanchakunkichu chay ruraypi yanapakunaykipaq? (Mat. 28:19, 20.)

16. ¿Imaynatam qawachichwan Jehová Diospa Munaychakusqanpi kay munasqanchikta?

¹⁶ Ñam Jehová Diospa Munaychakuyninqa kay Pachapi lliw gobiernokunata chinkachinqaña. Chayaramuspanqa tukuy imapim yanapawasunchik. Chaypiqa, ¿yaqachu kasukuq kasunchik? Kunanmi kallpanchakunanchik kasukuq kananchikpaqqa. Imapaqpas tanteaspaqa tukuytayá rurasun Jehová Dios hatunchasqa kananpaq, qawachisuntaqyá Diospa Munaychakusqanpi kawsanapaq hina kawsasqanchiktapas (1 Cor. 10:31).

[Willakuykuna]

[Kay yachachikuypa tapukuyninkuna]

[14 kaq paginapi suti rikuylla kaq willakuy]

¿Kasukunkichu Internet nisqata allinta tanteaspa servichikunapaq willakuykunata?

[12 kaq paginapi dibujo]

¿Coreypa mirayninkuna hinachu qampas cheqap yupaychaytawan Diospa llaqtanmanta allin yachayta kuyanki?

[15 kaq paginapi dibujo]

Familiawan Diosta Yupaychanapaq Tutaqa familiaykitam yanapanqa Diospa Munaychakusqanpi kawsanankupaq