“¡ÑOQAQA manam wasin-wasin riytaqa atiymanchu!” Chaynatam ninku Bibliata achka estudiaq runakuna, mana reqsisqanku runakunaman chayllaraq predicananku kaptin. Ichaqa qallariypi kaqtaqa runakunapa qayllanpi Bibliamanta allin yachachiq huk peregrinom otaq llaqtan-llaqtan puriq cristianom nirqa.

Religionninkuta saqeqkunamanta Zion’s Watch Tower (La Torre del Vigía de Sión) qellqata leeq runakunam anchata munarqaku Bibliamanta yachay munaqkunawan huñunakuyta. Chay qellqaqa kallpancharqam allin iñiyniyoq runakunata maskanankupaqwan sapa kuti huñunakuspa Bibliata estudianankupaq. Yaqa 1894 watapim Sociedad Watch Tower nisqaqa qallaykurqa llaqtan-llaqtan puriqkunata kachayta yachay munaqkunaman rinankupaq. Chay allin experienciayoq llaqtan-llaqtan puriqkunaqa karqaku allin humilde, allin llamkaq, Bibliamanta allin yachaq chaynataq Jesuspa wañukusqanpi iñiq cristianokunam. Paykunaqa watukuqku huk otaq iskay punchawllam, ichaqa achka llamkayniyoqmi karqaku. Achka runakunam Biblia Estudiaqkunaña karqaku llaqtan-llaqtan puriqpa yachachikuyninta uyarinankupaq invitacionkunata aypuspanku. Hugo Riemer iñiqmasinchikmi huk escuelapi tutakama discurso qosqan qepallanman, Bibliamanta tapukuykunata chawpi tuta pasaykama kutichirqa, chaymantam payqa Diospa Llaqtanpi Punta Apaq karqa. Pisipasqa kaspanpas kusisqallañam nirqa chay huñunakuy “ancha sumaq” kasqanmanta.

Zion’s Watch Tower qellqam nirqa, llaqtan-llaqtan puriqkunapa watukusqankuqa anchatam iñiqkunata huñunakuykunawan kallpancharqa, chay huñunakuykunaqa apakuq huk kaqninkupa wasinpim. Chay muyuriqninkunallapi yachaq Biblia Estudiaqkunaqa riqkum yachachikuykunata uyariq hinaspa tapukuykuna rurakusqanmanpas. Hinaptinmi kuyakuyninkuta qawachinankupaq alistakuqku. Maude Abbott sutiyoq iñiqmasinchikqa taksachanmantam riq huñunakuykunaman, huk kutipi llapallanku patiopi huñunakuruspanku hatun mesapi mikusqankumanta yuyarispanmi nin: “Achkallaña miski mikuykunam karqa, karqataqmi tukuy rikchaq tantakunawan pastelkunapas. Saksanaykukamam mikurqaniku, chaymantañataqmi yaqa las dosta huk yachachikuyta uyarirqaniku. Ichaqa, ¡puñuywanmi aysachikurqaniku!”, nispa. Iskay wataña llaqtan-llaqtan puriq Benjamin Barton iñiqmasinchikmi huk kutipi nirqa: “Sichu chay miskillaña [. . .] munachiwasqankuta mikuruspayqa [. . .], unayñach saqeruyman karqa llaqtan-llaqtan puriyniytaqa”, nispa. Tiempopa risqanman hinam, Brooklyn oficinamanta huk cartata apachimurqa kuyakuywan wasinkupi chaskikuq cristianakuna llaqtan-llaqtan puriqkunaman “mana achka qollqepaq mikuykunallata qonankupaq” chaynataq “hawkalla puñunankupaq” hinallata qonankupaqpas.

Llaqtan-llaqtan puriqkunaqa allin yachayniyoqmi karqaku, dibujokunatawan makinkupi imapas kaqkunatam sumaqta servichikuqku yachachiyninku sumaq kananpaq. R. H. Barber iñiqmasinchikmi sapa yachachikuyninpi sumaqta yachachiq. W. J. Thorn iñiqmasinchikqa ancha kuyakuqllañam karqa, nisqankuman hinaqa “ñawpaq tiempopi Diospa serviqnin hinam” rimaq. Huk kutipis payqa Ford nisqa carropi richkaptinku qonqaymanta kaynata qaparirqa: “¡Sayaychik!”, nispa. Hinaspanmi utqayllaman pampaman pawaykuspan waytakunata pallaruspan Diospa unanchasqankunamanta yachachiyta qallaykurqa riqmasinkunaman.

Llaqtan-llaqtan puriqkunaqa achka sasachakuykunapim tarikurqaku, aswanraqmi yuyaqyayman yaykuspankuqa. Chayna kaptinpas, wakinkunaqa astawanraqmi sasachakurqaku wasin-wasinña predicanankupaq niptinku.  1924 watapa 15 de marzo killanpi ingles rimayllapi lloqsimuq La Torre del Vigía nisqa qellqam, kaynata willakurqa: “[Cheqap cristianokunapa] ancha allin rurayninkuqa Diospa Munaychakuyninmanta willakuymi. Chaypaqmi llaqtan-llaqtan puriqkunaqa kamachisqa kachkanku”, nispa.

Wakin llaqtan-llaqtan puriqkunaqa piñakururqakum, hinaspankum saqerurqaku chay rurayninkuta, wakinkuqa religionninkutam hatarichiyta qallaykurqaku. Robie D. Adkins iñiqmasinchikmi willakun huk llaqtan-llaqtan puriq llumpayta hukmanyaruspan kayna nisqanta: “Ñoqaqa huñunakuqkunapa ñawpaqninmanta yachachiyllatam atini. ¡Manapunim wasin-wasinqa riymanchu!”, nispa. Adkins iñiqmasinchikqa nintaqmi: “1924 watapi Columbus (Ohio) llaqtapi asambleapim kaqmanta rikurqani. Chaypim payqa sachapa sikinpi mana puñusqa hina sayachkasqa. Kusisqallaña iñiqmasinchikkunapa chawpinpi kachkaspanpas payqa piñasqallañam kachkarqa. Chaymantaqa manañam rikurqaniñachu Jehová Diospa llaqtanmanta lloqsikusqanrayku”, nispa. Paymantaqa “achka iñiqmasinchikkunam waqtanta kusikuyllawanña pasaqku, libronkutapas carronkuman apaspanku” hinaspapas wasin-wasin predicayta munaspanku (Hech. 20:20, 21).

Llaqtan-llaqtan puriqkunaqa iñiqmasinkuna hina wasin-wasin predicayta manchapakuspankupas, kallpanchakuspankum wasin-wasin predicayta qallaykurqaku. Alemania nacionmanta llaqtan-llaqtan puriq Maxwell G. Friend (Freschel) iñiqmasinchikmi wasin-wasin predicaymanta nin: “Llaqtan-llaqtan purinaypaqwan wasin-wasin predicanaypaq kamachiwasqanqa ancha kusikuymi karqa ñoqapaqqa”, nispa. Llaqtan-llaqtan puriq John A. Bohnet iñiqmasinchikpas nirqataqmi wasin-wasin predicanankupaq kamachisqankuta iñiqkuna kusikuywan chaskisqankumanta. Paypa nisqanman hinaqa, yaqa llapallankum kusisqallaña Diosmanta willakuyta munarqaku.

Ñawpaqmantaraqmi llaqtan-llaqtan puriq iñiqmasinchikkunaqa allintapuni yanapakurqaku. Allin experienciayoq Norman Larson iñiqmasinchikmi nin: “Taksachaymantam yacharqaniña llaqtan-llaqtan puriqkunapa watukusqankuqa ancha chaninniyoq kasqanta. [. . .] Paykunaqa cheqap ñanpi kanaypaqmi yanapawarqaku”, nispa. Kunanpas congregacionkuna watukuq ancianokunaqa hinallam yanapawachkanchik, “¡wasin-wasin riytaqa atinim!” nispa ninanchikpaq.

[32 kaq paginapi suti rikuylla kaq willakuy]

Llaqtan-llaqtan puriqkunapa watukusqankuqa ancha kusikunapaqmi karqa

[31 kaq paginapi foto]

1905 watapi Benjamin Barton iñiqmasinchikqa 170 lawkunatam watukunan karqa

[32 kaq paginapi foto]

Walter J. Thorn iñiqmasinchikqa ancha kuyapayakuqmi karqa, chaymi kuyakuywan suticharqaku Papay nispa

[32 kaq paginapi foto]

J. A. Browne iñiqmasinchikqa 1902 watapim llaqtan-llaqtan puriq kaspan Jamaica nacionman rirqa aslla iñiqkunata kallpanchaq

[32 kaq paginapi foto]

Llaqtan-llaqtan puriqkunaqa iñiqkunapa iñiyninkutawan huk sonqolla kanankupaqmi kallpanchaq hinaspa Diospa llaqtanpi hapipakunankupaqpas