“Pagoykichiktaqa chaskinkichikmi”

ASA sutiyoq reymi tropankunapiwan Judea orqomanta richkarqaku lamar qochapa kasqan pampaman. Hatun orqopa waqtanta richkaptinkum Asaqa qonqayllamanta admirasqallaña sayarurqa. ¡Uray pampapim Etiopia nacionniyoq tropakuna kachkarqaku! Paykunaqa yaqa huk millonmi kachkarqaku, Asapa tropankunañataqmi yaqa 500 waranqalla.

Chaylla guerra karunanta yachaspanqa, ¿imatam Asaqa puntata rurarqa? ¿Tropankunapa kamachiqninkunawanchu rimarirqa? ¿Kallpancharqachu tropankunata? ¿Icha familianmanchu cartata apachirqa? Manamá. Chayna sasachakuypi tarikuspanqa, chayllam Diosta mañakurqa.

Mañakusqanmanta chaynataq qepata ima pasakusqanmanta manaraq yachachkaspa, qawasun imayna runa kasqanmanta. ¿Imanasqam Diosta mañakurqa? ¿Dios yanapaykunantachu suyarqa? ¿Imatam yachachiwanchik kay willakuyqa, serviqninkunaman Jehová Dios bendicionkuna qosqanmanta?

¿ASAQA IMAYNA RUNATAQ KARQA?

Israelwan Juda nacion iskayman rakikurusqanmanta 20 wataña pasaruptinmi, Juda nacionpi kaqkunaqa taytacha-mamachakunata yupaychayman wichiykurqaku. Cristianokunapa tiemponmanta ñawpaqtaraqmi, 977 watapi, Asa rey kaspan kamachikuyta qallaykuptinqa palaciopi kaqkunapas Canaan nacionpa taytacha-mamachankunataña yupaycharqaku. Bibliapim ichaqa willawanchik rey Asapa imakuna rurasqanmanta, ninmi: “Rey Asam allinta rurarqa yupaychasqan Tayta Diospa munasqanman hina. Tuñirachirqam huklaw nacionniyoq runakunapa taytachankupa altarninkunatapas chaynataq moqokunapi kaq capillakunatapas. Adorananku rumi pilarkunatapas pakiparuspam qorururqataq Asera sutiyoq mamachakunatapas”, nispa (2 Cro. 14:2, 3). Chaymantapas, “nacionmantam mariconkunata wischurqa”, paykunaqa diosninkuta yupaychaspankum qarimasillankuwan kakuqku. Rey Asaqa manataqmi taytacha-mamachakunallatachu chinkachirqa, aswanqa llaqtapi runakunatam kamachirqa “abuelonkupa yupaychasqan Tayta Diosta maskaspa yachachikuyninkunatapas hinaspa kamachisqankunatapas kasukunankupaq” (1 Rey. 15:12, 13; 2 Cro. 14:4).

Cheqap yupaychayta Asapa chaninchasqantam Jehová Diosqa allinpaq hapirqa, chaymi unay watakuna hawka kawsakuyta qorqa. Chayraykum Asaqa nirqa: “[Jehová Diosta] maskaptinchikmi qoykuwanchik kay nacionninchikpi hawkayayta”, nispa. Chayna hawka kawsakuspankum Juda nacionpa murallankunata allicharqaku. Bibliapas ninmi: “Chay llaqtakunata allinta allichaspamá qespirachirqaku”, nispa (2 Cro. 14:1, 6, 7).

PELEANANKU PAMPAPI

Yachamusqanchikman hinam rey Asaqa Diosman sonqo karqa, chaymi kay kutipipas manaraq achkallaña runakunawan peleachkaspan Jehová Diospa yanapakuyninta maskarqa. Asaqa yacharqam iñiywan ruraqkunata Dios yanapananmanta. Yacharqataqmi Diospa yanapakuyninwan maynaña hatun otaq atiyniyoq enemigontapas atipananmanta. Yacharqataqmi Jehová Diospa sutin yanqachasqa kananmantapas, chaymi mañakurqa: “Yupaychasqayku Dios Taytalláy, yanapaykullawaykuyá, qanmanmi hapipakamuykiku, qampa sutikipim hamuniku kay achka-achka soldadokunapa contranpi. Dios Taytalláy, qanmi Diosniykuqa kanki, amayá qamqa piwanpas vencechikuychu”, nispa (2 Cro. 14:11). Kaynata nichkanmanpas hinam karqa: “Jehová Diosllayku Cus nacionniyoq runakunam atacachkasunki. Amayá munaychu llaqtaykita  llapa runakuna vencerunankutaqa chaynataq sutikitapas penqayman churarunankutaqa”, nispa. Diosqa uyariykurqam mañakusqantaqa, chaymi Biblia nin: “Diosmi Cus nacionniyoq runakunata vencerurqa Asapa hinaspa Juda runakunapa qayllanpi chaymi Cus nacionniyoq runakunaqa ayqekurqaku”, nispa (2 Cro. 14:12).

Kunan tiempopipas, Diosta serviqkunaqa tukuy sasachakuykunatam atipananchik. Ichaqa manam peleachkaq hinachu atipanakunchik, kasukuptinchikqa hinaspa sutinta hatunchaptinchikqa Jehová Diosqa yanapaykuwasunpunim. Yaqapaschá mayqanninchikpas sasachakuchkanchik runakunapa qalaypaq mana allin kawsasqankuwan, pantaq kasqanchikwan otaq iñiyninkupi familianchik hukmanyasqankuwanpas. Iñiyninchikta imaña harkaptinpas, Asapa mañakusqanmanta yachaymi yanapawasunchik. Payqa Jehová Diospa yanapakuyninwanmi atiparqa, kaymi qawachiwanchik pipas paypi confiaqtaqa yanapaykunanmanta. Manam pipas Jehová Diostaqa harkanmanchu yanapaykuwananchikmantaqa.

KALLPANCHASQANMANTAWAN YUYARICHISQANMANTA

Venceramusqanmanta Asa kutimuptinmi, Diosmanta willakuq Azarias tariparqa kallpanchananpaq hinaspa yuyarichinanpaq, nirqam: “Rey Asapiwan Juda casta runakuna hinaspa Benjamin casta runakuna, qamkunaqa llapallaykichikyá uyariwaychik: Tayta Diosmi yanapasunkichik payta qatiptikichikqa, maskaspaykichikqa tarinkichikmi, qepanchakuptikichikmi ichaqa paypas qepanchakurusunkichiktaq”, nispa. Nirqataqmi: “Aswanqa kallpanchakuspayá ama hukmanyaychikchu, pagoykichiktaqa chaskinkichikmi llamkasqaykichikmanta”, nispa (2 Cro. 15:1, 2, 7).

Kayna nisqanqa kallpanchawanchikmi. Chaynaqa, Jehová Diosta tukuy sonqonchikwan serviptinchikqa yanapawasunmi. Yanapaykuwananchikpaq mañakuptinchikpas payqa uyariykuwasunpunim. Azariasqa nirqam: “Kallpanchakuspayá ama hukmanyaychikchu”, nispa. Ima sasachakuykunatapas atipanapaqqa qarinchakuqmi kananchik, ichaqa yachanchikmi Jehová Diospa yanapakuyllanwan atipay atisqanchikta.

Asapa abuelan Maaca sutiyoqqa ‘Asera sutiyoq mamachatam rurarachirqa’. Chayraykum Asaqa reina kasqanmanta horqorachirqa. Chaymantapas, chay mamacha rurachisqantam kañaykurqa (1 Rey. 15:13). Mana manchakuspan rurasqanmantaqa Jehová Diosqa bendecirqam. Chaynataqmi ñoqanchikpas tukuy sonqonchikwan Jehová Diospi hapipakunanchik, kamachikuyninkunatapas kasukunanchiktaqmi ayllunchikkuna Diosta manaña kasukuq kaptinkupas. Chaynata ruraptinchikqa, Jehová Diosmi bendeciwasunchik.

Asata Jehová Dios bendecisqanmanta hukninmi karqa, paywan Jehová Dios kasqanta qawaspanku mana allin ruraq israelitakuna Juda llaqtaman astakusqanku. Paykunaqa cheqap yupaychayta chaninchasqankuraykum wasinkutapas saqerqaku Jehová Diospa serviqninkunawanña kuska kanankupaq. Chaynaqa, Asawan Juda llaqtaqa “abuelonkupa yupaychasqan Tayta Diosta tukuy sonqonkuwan hinaspa tukuy vidankuwan maskanankupaqmi prometekurqaku”. “Tukuy voluntadwan maskaspankum Tayta Diosta tarirqaku chaynapim pay qorqa hawkayayta tukuy hinastinpi” (2 Cro. 15:9-15). ¡Anchatamá kusikunchik cheqap yupaychayta kuyaq runakunata qawaspaqa!

Diosmanta willakuq Asariasqa nirqataqmi: “Qepanchakuptikichikmi ichaqa [Diospas] qepanchakurusunkichiktaq”, nispa. Amayá chayna pasawananchiktaqa haykapipas saqekusunchu, chaykunata  ruraptinchikqa mana allinpim tukunman (2 Ped. 2:20-22). Bibliapiqa manam willawanchikchu imanasqa Asaman chay willakuyta qosqanmantaqa, reymi ichaqa chaytaqa mana kasukurqachu.

‘LOCO HINAM RURARQANKI’

36 watamanña Asa kamachichkaptinmi, Israel llaqtapi kamachikuq rey Baasa mana allinkunata Juda llaqtapa contranpi rurarqa. Payqa Rama llaqtapa murallankunatam 8 kilometrota allicharachirqa Jerusalenpa norte lawninpi, yaqapaschá chaytaqa rurarqa runankuna Asata mana yanapananta munaspan hinaspa cheqap yupaychanankutapas harkakuspan. Etiopia tropakunawan rurasqanpi hinaqa, manam Jehová Diospa yanapakuynintaqa maskarqachu, aswanmi runakunapa yanapakuyninta. Asaqa Siria nacionpi kamachikuqmanmi qori-qollqeta apachirqa hinaspam nirqa Israel nacionpa contranpi churakunanpaq. Ichaqa nacionninpi wakin llaqtakunata venceruptinmi, rey Baasaqa Rama llaqtamanta pasakurqa (2 Cro. 16:1-5).

Jehová Diosqa Asapa mana allin rurasqanmantam willakuq Hananiwan willachirqa. Asaqa yuyarinmanmi karqa ñawpaqta Jehová Dios imayna yanapasqanmanta chaynataq Hananipa kayna nisqantapas: “Diosqa qawamuchkanmi llapallan kay pachapi pasaqkunata chaynapi paypa qayllanpi allin sonqoyoqkunaman atiyninta qawachinanpaq”. Asamanqa yaqapaschá pipas mana allinta consejarqa. Otaq piensarqachá Baasatawan tropankunata kikillan vencerunanmantapas. Imayna kaptinpas payqa manam Jehová Diospiqa hapipakurqachu, aswanqa runakunapa piensasqallanpim. Chaymi Hanani nirqa: “Loco hinam Aram nacionniyoq reymanqa hapipakurqanki, kunanmantaqa guerrallañam kanqa qampa contraykipi”, nispa (2 Cro. 16:7-9).

Hananitam rey Asa carcelarachirqa nisqankunawan piñakuruspan (2 Cro. 16:10). ¿Yaqachu Asaqa piensanman karqa achka watakunaña Diosman sonqo kaspan mana pipas qaqchananmanta? ¿Icha yuyaqña kasqanraykuchu imamantapas qonqapakuchkarqa? Bibliaqa manamá chaykunamantaqa willawanchikchu.

39 watamanña rey Asa kamachichkaspanmi chakinwan onqorurqa. Chay willakuypim niwanchik: “Diosta mana mañakuspanmi hampiqkunallawan hampichikurqa”, nispa. Kaykunam qawachiwanchik chay tiempopaqqa, Dios yupaychayninpi mana allinña kasqanmanta. Yaqapaschá chayna kasqanrayku wañukurqa 41 watamanña kamachichkaspan (2 Cro. 16:12-14).

Chayna kaptinpas, qawasqanchikman hinaqa allin kayniyoq kasqankunapiwan cheqap yupaychayta kuyasqanmi aswanqa karqa mana allinkuna rurasqankunamantaqa. Manam haykapipas Jehová Diosta yupaychaytaqa saqerqachu (1 Rey. 15:14). Kaypi qawasqanchikman hinaqa, ¿imatam yachachwan Asapa vidanmanta? Yuyarinanchikmi ñawpaq watakunapi imaynata Dios yanapawasqanchikmanta, chaykuna yuyarisqanchikmi yanapawasun ima sasachakuykuna kaptinpas payman asuykunanchikpaq. Chaymantapas, Amataq piensasunchu achka watakunaña Diosta servisqanchikrayku Bibliapa consejonkunata manaña necesitasqanchikta. Dios serviyninchikpi imapipas pantaruptinchikqa kikinmi corregiwasun. Sichu pay corregiwananchikta munaspaqa, humillakuspam chaskikunanchik. Hinaspapas, paypi tukuy sonqonchikwan hapipakuptinchikqa ñoqanchikwanmi payqa haykapipas kanqa. Enteron Pachatam payqa qawachkan tukuy sonqowan payta kuyaq runakunata maskaspan. Jehová Diosqa kallpantam servichikun pitapas favoreceykunanpaq. Chaynatam Asawan rurarqa, chaynallataqmi ñoqanchikwanpas ruranqa.

[9 kaq paginapi suti rikuylla kaq willakuy]

Kasukuptinchikqa Jehová Diosqa yanapawasunpunim

[10 kaq paginapi suti rikuylla kaq willakuy]

Mana manchakuqmi kananchik Diospa munasqanta ruranapaqqa