¡Yanqataq Diablopa toqllanman wichiykuwaq!

‘Diablopa pantachikuyninmanta lluptiychik’ (2 TIM. 2:26).

¿IMA NIWAQTAQ?

¿Ima tapukuykunatam sonqonchikpi rurakunanchik rimapakuq kaspanchikqa?

¿Imatam yachachwan Pilatomantawan Pedromanta, runakunapa hikutawasqanchikman mana wichiykunapaq?

¿Imataq yanapawachwan ñawpaqpi huchallikurusqanchikmanta ñakakusqanchik mana ñitiruwananchikpaq?

1, 2. ¿Satanaspa ima toqllankunamantam kay yachachikuypi qawasun?

DIABLOQA wateqachkanmi Diospa serviqninkunataqa. Ichaqa manamá llapanpiqa wañuchinanpaqchu. Aswanqa toqllawan animalkunata hapiq runakuna hinam kawsaqllata hapiruyta munawanchik chaynapi munasqanta ñoqanchikwan rurananpaq (leey 2 Timoteo 2:24-26).

² Animalkunata hapiq runaqa, imaymana toqllakunatam servichikunman kawsaqllata hapirunanpaq. Ichapas pampa lawman lloqsirachimuspan toqllarunman otaq imatapas allinta paka-pakaykuspan churarunman chaylla hapirunanpaq. Chaynallataqmi Satanaspas mana musyaylla toqllankunata churawanchik kawsaqllata hapiruwananchikpaq. Chay toqllankunapi mana wichiykunapaqmi, allinta qawakunanchik hinaspapas kasukunanchikmi Satanaspa toqllan kasqanmanta lliw musyachiwasqanchikkunata. Kay yachachikuypim qawasun Satanaspa allin servichikusqan kimsa toqllankunamanta: 1) mana allinta piensaspa rimaymanta, 2) manchakuymantawan runakuna hikutawasqanchikmanta, hinaspa 3) ñawpaqpi huchallikuruspa ñakakusqanchikmanta. Qatiqnin yachachikuypiñataqmi qawasun iskay toqllankunamantawan.

QALLUNCHIKQA NINA HINAM

3, 4. ¿Imam pasanman llutanpi rimaptinchikqa? Rimamusqanchik iskay cristianakunamanta rimariy.

³ Ima animalpas uchkunpi pakakuruptinqa, chay animalta hapiqkunaqa muyuriqninpi pastokunatam kañanku chaynapi lloqsiramuptin hapirunankupaq. Yaqa chaynallatam Satanaspas rurayta munan. Payqa congregacionpim “nina ratachiyta” munan chaynapi Diospa llaqtanmanta karunchakuspanchik toqllanman wichiykunanchikpaq. ¿Imaynatam mana musyakuspalla chay toqllanpi wichiykuchwan?

⁴ Santiagom nirqa siminchikqa otaq qallunchikqa nina  hina kasqanmanta (leey Santiago 3:6-8). Imatapas llutanpi rimaspaqa, congregacionpim “ninata ratarachichwan”. ¿Imaynam chayqa kanman? Piensarisun kaypi: huñunakuyninchikpim willakunmanku huk kaqnin iñiqmasinchik precursora kasqanmanta. Huñunakuy tukuruptinñataqmi iskay cristianakuna chay willakuymanta rimanku. Huk kaqninmi kusikun chay iñiqmasin precursora karusqanmanta. Hukninñataqmi rimapakun hinaspam nin allin qawanallankuta munaspan precursora karusqanmanta. ¿Mayqantataq amistadniki kananpaq akllayta munawaq? ¿Mayqantaq qallunwan congregacionpi “ratachichkanman”? Chayqa sutillamá kachkan.

5. ¿Imatam rurachwan rimasqanchikkunawan pitapas mana hukmanyachinapaq?

⁵ ¿Imatam rurachwan rimasqanchikkunawan pitapas mana hukmanyachinapaq? Jesusmi nirqa: “Runaqa riman sonqonpi huntallaña kaqkunamantam”, nispa (Mat. 12:34). Hinaptinqa, allinmi kanman sonqonchikpi imakuna kasqanmanta puntata qawakuyninchikqa. ¿Tukuytachu ruranchik piwanpas hinalla mana hukmanyasqa kanapaq? Ichapas uyarisun huk kaqnin iñiqmasinchik iñiyninpi ñawparinanpaq kallpanchakusqanmanta, ¿yaqachu iskayrayasun tukuy sonqonwan chay rurasqanmanta? ¿Piensasunchu allin qawasqa kanallanpaq chayna kallpanchakusqanta? Iñiqmasinchikkunapa rurasqankumanta iskayrayaq kaspaqa, kaytam yuyarinanchik: Satanaspas Job tukuy sonqonwan Dios yupaychasqantam iskayrayachirqa (Job 1:9-11). Hinaptinqa, iñiqmasinchikmanta mana allinta rimanamantaqa tapukunanchikmi imanasqa rimapakusqanchikmanta. ¿Cheqaptapunichu rurasqanqa iskayrayanapaq hina, icha kay tukupay tiempokunapi runakunapa hinachu kuyakuyninchik chinkarun? (2 Tim. 3:1-4.)

6, 7. a) ¿Imakunataq tanqawachwan iñiqmasinchikkunamanta rimapakunapaq? b) ¿Imaynam kananchik pipas ñoqanchikmanta rimapakuptinku?

⁶ ¿Imakunaraqtaq tanqawachwan iñiqmasinchikkunamanta rimapakunapaq? Ichapas munanchik imapas rurasqanchikmanta alabawananchikta otaq pimantapas aswan reqsisqa kayta. Wakinpiqa ichapas rimapakuchwan hatunchakuq kasqanchikrayku otaq envidiakusqanchikrayku. Chayna kaptinqa yanqachakuruchwanmi.

⁷ Wakinpiqa iñiqmasinchik mana allinta niruwaptinchikmi paymanta rimapakuyta qallaykuchwan hinaspam piensachwan chay allin kasqanta. Chayna mana allinwan kutichiptinchikqa, astawanraqmi ninaman yantata hinachkachwan. Manataqmi Diospa munaynintaqa rurachkachwanchu, aswanqa Satanaspatam (2 Tim. 2:26). Chaymi allin kanman Jesusta qatipakuyninchikqa, Bibliam nin: “Insultaptinkupas manam kutipakurqachu [. . .], payqa allin arreglo ruraq derechonpi Diospa makinmanmi churakurqa”, nispa (1 Ped. 2:21-23). Jesusqa manamá  iskayrayarqachu Jehová Dios tiempollanpi allichananmantaqa. Ñoqanchikpas Jesus hinam Jehová Diospi hapipakunanchik. Iñiqmasinchikkunata kallpanchanapaq qallunchikta servichikuspaqa, yanapakuchkanchikmi ‘hawkalla kawsananchikpaq’ (leey Efesios 4:1-3).

MANCHAKUYMANTAWAN RUNAKUNA HIKUTAWASQANCHIKMANTA

8, 9. ¿Imanasqam Pilatoqa Jesusta wañuchinankupaq kamachirqa?

⁸ Toqllapi hapisqa animalqa, manam ima ruraytapas atinñachu. Chaynallataqmi manchakuq hinaspa hikutachikuq runapas, manañam llapanpiqa imatapas kikillanmantañachu ruran (leey Proverbios 29:25). Qatiqninpi qawasun iskay runakunamanta, paykunaqa manchakuspankum hinaspa hikutasqa kaspankum mana allin rurayman wichiykurqaku.

⁹ Roma nacionniyoq kamachikuq Pilatoqa yacharqam judiokuna Jesusta yanqamanta tumpasqankuta, chaymi mana ima ruraytapas munarqachu. Jesusmantam nirqa: “Wañunanpaq hinaqa manam ima faltantapas tarinichu”, nispa. Chayna kaptinpas, wañuchinankupaqmi kamachirqa. ¿Imanasqa? Runakunata manchakusqanraykum (Luc. 23:15, 21-25). Judiokunam qayaykachakurqaku: “Payta kachaykuspaqa manam Rey Cesarpa amistadninchu kanki”, nispanku (Juan 19:12). Yaqapaschá Pilatoqa Jesusta kachaykuptin kamachikuq kasqanmanta horqorunankuta otaq wañurachinankuta manchakurqa. Runakunata manchakuspan hinaspa hikutachikuspanmi Diablopa munayninta rurarurqa.

10. ¿Imanasqataq Pedroqa Jesusta qepancharurqa?

¹⁰ Apostol Pedroqa Jesuspa allin amistadninmi karqa. Payqa manam runakunapa qayllanpipas Jesus Mesias otaq Cristo kasqanmantaqa iskayrayarqachu (Mat. 16:16). Manataqmi qepancharqachu achka qatiqninkuna Jesusta saqeruptinkupas (Juan 6:66-69). Chaymantapas, Jesusta enemigonkuna hapirunankupaq kachkaptinkum, Pedroqa espadanta horqoykuspan harkayta munarqa (Juan 18:10, 11). Ichaqa huk kutipim manchakuspan Jesusta qepancharurqa. Chay kutipiqa runakuna manchakuywanmi atiparachikurqa hinaspam mana atirqachu qarinchakuyta (Mat. 26:74, 75).

11. ¿Imakunata ruranapaqmi hikutasqa kachwan?

¹¹ Cristianokunaqa imaymanawanmi hikutasqa kachwan Diospa cheqnisqan mana allinkunata ruranapaq. Ichapas llamkayninchikpiqa patronninchik otaq llamkaqmasinchikpas hikutawachwan mana allinta ruranapaq. Colegiopi estudiaqmasinchikkunapas hikutawachwanmi examenkunapi copiakunapaq, millakuypaq kaqkunata qawanapaq, cigarrota pitanapaq, drogakunapaq, sinkakunapaq otaq huchapakunapaqpas. Hinaptinqa, ¿imatam rurachwan chayna hikutasqa kaspanchik manchakuyman mana wichiykunapaq?

12. ¿Imatam yachachwan Pilatomantawan Pedromanta?

¹² ¿Imatam yachachwan Pilatomantawan Pedromanta? Pilatoqa manamá Jesucristomantaqa allintachu yacharqa. Yachaspaqa-yacharqachá mana wakin runakuna hina kasqanmanta hinaspa yanqa tumpasqankumanta. Manataqmi Jehová Diostaqa kuyarqachu nitaq humildepas karqachu, chaymi Diabloqa toqllanpi chaylla wichiykachirqa. Pedrom ichaqa Jesucristomantaqa allinta yacharqa, Diostapas kuyarqataqmi. Chayna kaptinpas, wakinpiqa kikillanpim hapipakurqa, manataqmi wakinpiqa qarinchakurqachu, chaymi runakunawan hikutarachikurqa. Yuyariy, wañuchinankupaq Jesusta manaraq hapichkaptinkum kikinpi hapipakuspan nirqa: “Llapallanku qanmanta penqakuptinkupas ñoqaqa manam penqakusaqchu”, nispa (Mar. 14:29). Pedroqa sasachakuykunatam atipayta atinman karqa salmistapa nisqanman hina Diospi hapipakuspanqa, paymi nirqa: “Diosmi yanapawaqniyqa, manam manchakusaqchu. Runapa imapas rurawanantaqa manam manchakusaqchu”, nispa (Sal. 118:6). Wañukunanpaqña  tutapim, Jesusqa Pedrotawan iskay apostolninkunata Getsemani huertapa sapaq lawninman pusarqa. Paykunaqa rikchasqalla kanankumantaqa puñukururqakum. Jesusñataqmi rikchachispan nirqa: “Rikchaspayá Diosta mañakuychik ama tentasqa kanaykichikpaq”, nispa (Mar. 14:38). Chaywanpas Pedroqa kaqmantam puñukururqa, chaymanta qepamanñataqmi runakunata manchakuspan Jesusta qepancharurqa.

13. ¿Imataq yanapawasun runakuna hikutawasqanchikman mana wichiykunapaq?

¹³ Pilatomantawan Pedromantaqa kaytapas yachachwanmi: runakunata mana manchakunapaq hinaspa hikutawasqanchikman mana wichiykunapaqqa, Diospa Palabranmantam allinta yachananchik, humildem kananchik, Jehová Diostam kuyananchik hinaspapas kikillanchikpi hapipakunamantaqa Diospim hapipakunanchik. Cheqap yachachikuyman hina iñiyninchik allin takyasqa kaptinqa, mana iskayrayaspam chaynataq mana manchakuspam iñiyninchikmanta willakusun. Chaymantapas manam runakunataqa manchakusunchu nitaq paykunawanqa hikutachikusunchu. Ichaqa, manamá Pedro hinaqa kikillanchikpiqa hapipakunanchikchu, aswanqa humilde kaspam reqsikunanchik Diospa yanapakuyninta necesitasqanchikta. Diostam mañakunanchik chuya espiritunta qowananchikpaq, kallpanchakunanchiktaqmi Diosta astawan kuyanapaq chaynapi kamachikuyninkunata kasukuspa sutinta chuyanchanapaq. Ancha allintaqmi kanman runakuna hikutawasqanchikman mana wichiykunapaq ñawpaqmantaraq imayna atipanapaq yachayninchikqa. Chaymi allin kanman tayta-mamakuna churi-wawankuwan Diosta mañakuyninkuqa hinaspa estudiaqmasinkuna imamanpas hikutaptinku imayna atipanankupaq yachachiyninkuqa (2 Cor. 13:7). *

ÑAWPAQPI HUCHALLIKURUSPA ÑAKAKUSQANCHIKMANTA

14. ¿Ima piensananchiktam Satanasqa munan?

¹⁴ Animalkunata hapiq runakunaqa, wakinpiqa chay animalpa purisqan ñanpim hatun rumita otaq hatun kulluta sachapi warkunku. Chaymi purisqanpi imatapas saruruptin chay rumiqa otaq kulluqa qonqayllamanta ñitirun. Chaynallataqmi ñoqanchiktapas ñitisqata hina saqeruwachwan ñawpaqpi huchallikurusqanchikmanta ñakakuyninchikqa (leey Salmo 38:3-5, 8). Satanasqa munanmi huchanchikta Jehová Dios mana haykapipas pampachawasqanchikmanta piensananchikta hinaspa Diospa munayninta mana ruray atisqanchikta piensananchiktapas.

15, 16. ¿Imataq yanapawachwan ñakakusqanchik llumpayta mana ñitiwananchikpaq?

¹⁵ ¿Imataq yanapawachwan ñakakusqanchik mana ñitiruwananchikpaq? Sichu hatun huchaman wichiykuspaykiqa, ancianokunapa yanapakuyninta maskay, chaynapi kaqmanta Jehová Dioswan amistadniki allin kananpaq (Sant. 5:14-16). Tukuyta ruray chay ñakakuynikita chinkachinaykipaq (2 Cor. 7:11). Corregisqa kaspaykiqa ama hukmanyaychu, corregisqa kasqaykiqa qawachinmi Jehová Dios kuyasusqaykita (Heb. 12:6). Kallpanchakuy huchallichisusqayki kaqkunata manaña ruranaykipaq. Wanakuspayki allin ñanman kutiramuspaqa, ama iskayrayaychu Jesucristopa wañukusqanwan huchanchik pampachasqa kasqanmanta (1 Juan 4:9, 14).

¹⁶ Wakinkuqa huchanku pampachasqa kaptinpas hinallam ñakakunku. Chayna tarikuspaykiqa, yuyariy Jesusta saqeruptinku Pedrotawan wakin apostolkunata Jehová Dios pampachasqanmanta. Pampacharqataqmi Corinto congregacionpi millakuypaq hucha rurarusqanmanta qarqochikuq runatapas (1 Cor. 5:1-5; 2 Cor. 2:6-8). Bibliaqa willawanchikmi achka runakuna hatun huchata ruraruspankupas wanakusqankurayku Diospa pampachasqan kasqankumanta (2 Cro. 33:2, 10-13; 1 Cor. 6:9-11).

17. ¿Imaynatam yanapawanchik Jesuspa wañukusqanqa?

 ¹⁷ Sonqomanta wanakuspa yanapakuyninta chaskikuptinchikqa, Jehová Diosqa pampachawaspanchikmi huchanchiktaqa qonqanqaña. Amayá haykapipas piensasunchu Jesuspa wañukuyninwan huchanchik mana pampachasqa kasqantaqa. Chaynata piensaspaqa Satanaspa toqllanmanmi wichiykuchwan. Chayna piensananchikta Satanas munaptinpas, Jesuspa wañukusqanqa pampachanpunim wanakuqkunapa huchantaqa (Pro. 24:16). Jesuspa wañukusqanpi iñiyninchikqa yanapawasunmi ñakakusqanchikwan llumpayta mana ñitichikunapaq, yanapawasuntaqmi tukuy sonqowan, vidanchikwan hinaspa yuyayninchikwanpas Diosta servinapaq (Mat. 22:37).

YACHANCHIKMI “PANTACHIKUQLLAÑA KASQANTA”

18. ¿Imatam rurananchik Satanaspa toqllankunaman mana wichiykunapaq?

¹⁸ Satanasqa munanmi mayqan toqllanmanpas wichiykunanchikta. Ichaqa manamá qonqayllamantaqa wichiykuchwanchu, “ñoqanchikqa yachanchikmi payqa pantachikuqllaña kasqanta” (2 Cor. 2:10, 11). Sasachakuyninchikkunata atipanapaq Diosmanta yachayta mañakuptinchikqa, Satanasqa manam toqllankunamanqa wichichiyta atiwasunchu. Santiagom nirqa: “Mayqannikichikpapas yachaynikichik pisilla kaptinqa Diostayá mañakuychik, payllam qosunkichik. Lliw mañakuqninkunamanqa mana piñakuspam chaninninpi qoykun”, nispa (Sant. 1:5). Yachayta Dios qowananchikpaqqa, kallpanchakunanchikmi Bibliata estudianapaq hinaspa niwasqanchikkunata kasukunapaqpas. Qellqanchikkunaqa sutillatam qawachiwanchik Satanaspa toqllankuna mayqan kasqanmanta, yachachiwanchiktaqmi chaykunaman mana wichiykunapaqpas.

19, 20. ¿Imanasqam mana allinkunata cheqninanchik?

¹⁹ Diosta mañakuspaqa hinaspa Bibliata estudiaspaqa, yachasunmi allinkuna kuyayta chaynataq mana allinkuna cheqniytapas (Sal. 97:10). Yanapawanchiktaqmi mana allin ruraykuna imapi tukusqanpi yuyaymananapaqpas (Sant. 1:14, 15). Chaynapim Satanaspa ima toqllankunatapas qalaypaqta cheqnisun.

²⁰ ¡Mayna kusisqamá kachkanchik Satanaspa toqllanman mana wichiykunapaq Jehová Dios yanapawasqanchikmanta! Diosqa yanapawanchikmi espiritunwan, Palabranwan hinaspa llaqtanwanpas chaynapi Diablomanta librawananchikpaq (Mat. 6:13). Qatiqnin yachachikuypim qawasunchik kawsaqllata hapiruwananchikpaq Diablopa iskay toqllankunamantaraq.

[Willakuy]

[Kay yachachikuypa tapukuyninkuna]

[21 kaq paginapi dibujo]

Imatapas llutanpi rimaspaqa, congregacionpim “ninata ratarachichwan”

[24 kaq paginapi dibujo]

Amayá saqekusunchu ñakakusqanchik llumpayta ñitiruwananchiktaqa