2009 watapa diciembre killanpim Rusia nacionpi Tribunal Supremo nisqa kaqllamanta nirqa, Taganrog llaqtapi kaq Jehová Diospa testigonkuna chinkachisqa kananmanta hinaspa Huñunakunanku Salonninkupas qechusqa kananmanta. Nirqataqmi 34 qellqanchikkuna mana allin kasqanmantapas. Kay sasachakuymantam Jehová Diospa testigonkunaqa Internetpi willakurqaku. Chaypim rikurirqa achka iñiqmasinchikkunapa sasachakuypi tarikusqankumanta fotokuna, chaypiqa karqakutaqmi warmachakunapas.

Killakuna pasaytam Australia nacionpi Queensland llaqtamanta, Rusia Betel wasiman chayarurqa huk cartapiwan huk caja. Chaytam apachirqaku Internetpi willakuyta qawaq Jehová Diospa testigonkuna. Chay cartapim nirqa: “Kuyasqa iñiqmasillaykuna: Chay nacionpi iñiqmasinchikkuna sasachakuykunapi kaspankupas iñiyninkupi qaqa hina takyasqankumantam churi-wawayku Cody hinaspa Larissa llakipayarikurqaku. Chaymi cartachakunata qellqamurqaku, hinaspapas apachimurqakum Taganrog llaqtapi kaq iñiqmasinchik warmachakunaman achka regalokunata. Paykunaqa munankum karu-karu llaqtakunapipas Jehová Diosta tukuy sonqonkuwan serviq warmachakuna kasqanta yachanankuta hinaspa paykunapi piensasqankutapas. Ancha kuyasqankutam apachikamunku”, nispa.

Regalokunata chaskiruspankum Taganrog llaqtapi kaq warmachakunaqa Australiamanta qellqamuq familiaman agradecekusqankuta qawachirqaku dibujoyoq cartakunata apachispanku. Warmachakunapa kallpanchasqankumanta admirakuspanmi Rusia Betelpi llamkaq huk iñiqmasinchik Codymanwan Larissaman kaynata qellqarqa: “Taksapas-hatunpas lliwmi hukmanyanchik yanqamanta pipas mana allinta rurawaptinchikqa ¿aw? Chaynam Taganrog llaqtapi iñiqmasinchikkunapas tarikunku, mana allinkunata mana rurachkaptinkupas Huñunakunanku Salonninkutam qechurunku. Ichaqa anchatam kusikunqaku huklaw llaqtakunapi paykunapi piensasqankumanta yachaspanku. ¡Anchatam agradecekuykiku kuyapayakuywan qokuykuq kasqaykichikmanta!”, nispa (Sal. 8:2).

Enteron Pachapi Jehová Diospa testigonkunaqa huk sonqollam kanchik, chayna kasqanchikmi yanapawanchik ima sasachakuytapas atipanapaq. Qellqanchikkuna allin otaq mana allin kasqanmanta Juezkuna rimanakuptinkupas, warmallaraq iñiqmasinchikkunaqa kusikuywanmi iñiqmasinkunamanta sientesqankuta qawachinku, manam ima castamanta otaq maylaw nacionmanta kasqankupiqa reparankuchu, chaywantaqmi qawachinku Jesuspa kayna nisqan cheqap kasqanta: “Kuyanakuptikichikqa llapallan runakunam yachanqa discipuloykuna kasqaykichikta” (Juan 13:35).