1923 watapim, George Naish iñiqmasinchikqa Saskatoon llaqtapi tarikurqa, chayqa kachkan Saskatchewan provinciapim (Canadá). 18 metro largoyoq hatun kullukunata qawaspanmi tapukurqa: “¿Imapaqtaq kaykunaqa?”, nispa. Paytañataqmi nirqaku señalpaq hatun torrekunata ruranankupaq, punta kaq hatun guerrapi servichikusqanku kasqanta. Chaymantam iñiqmasinchik Naish willakun kaynata: “Tanteasqayman hinaqa allinmi karqa radiopaq torreta ruranaypaq, chaynapim karqa Diosmanta yachanapaq radio”, nispa. 1924 watapim, chayllaraq uyarikurqa Canadá nacionpi religionmanta radio, sutinmi karqa CHUC.

Canadá nacion yaqa enteron Europa law hina hatun kasqanraykum, ancha allin karqa radiontakama Diosmanta willanapaq. Florence Johnson iñiqmasinchikmi Saskatoon llaqtapi llamkasqanmanta nirqa: “Wayra wasinchik kasqanraykum mana chayay atisqayku lawpi achka runakunaman Diosmanta willayta atirqaniku. Chay tiempopi chayllaraq radio rikurimusqanraykum runakunaqa anchata uyariyta munaqku”, nispa. 1926 watapaqqa Biblia Estudiaqkunapaqqa otaq Jehová Diospa testigonkunapaqqa, tawa llaqtakunapim radionku karqa. *

¿Imamantam wasinkupi uyariqku chay lawpi radio uyariqkunaqa? Uyariqkum Diospaq takikunata, chay lawpi yachaq iñiqmasinchikkunam orquestawan yanapachikuspanku takiqku. Karqataqmi discursokuna hinaspa iñiqmasinchikkunapa Bibliamanta rimasqankupas. Chaykunata ruraq Amy Jones iñiqmasinchikmi yuyarispan nirqa: “Predicasqay runakunamanta wakinmi niwaqku: ‘Qamqa radiopi rimamuqchusmi kachkanki, ¿aw?’”, nispa.

Halifax (Nueva Escocia) lawpi Biblia Estudiaqkunapas, chay tiempopi chayllaraq rikuriq radiotam allinta servichikurqaku, radio uyariqkuna qayaspanku Bibliamanta tapunankupaqpas karqam huk tiempo. Huk iñiqmasinchikmi qellqarqa: “Chay rurasqaykuqa ancha allinpunim karqa. Radio uyariqkuna achkallaña qayamusqankuraykum, qayamusqankupas sasata yaykumuq”, nispa.

 Apostol Pablopa tiempopi hinam, runakunaqa Diosmanta willakuyta mana chaynallatachu uyarirqaku (Hech. 17:1-5). Wakinkuqa anchatam munaqku uyariyta. Piensasun Hector Marshall runapi, payqa radiopim uyarirqa Estudios de las Escrituras nisqa qellqamanta hinaspam soqta librokunata mañakurqa. Payqa nirqam chay librokunata iglesianpi yachachispan domingo punchaw servichikunanmanta. Ichaqa punta kaq librota leeruspanmi iglesianta saqenanpaq tantearurqa. Payqa tukuy sonqonwan predicaqmi karqa, hinaspapas 1998 watapi wañukunankamam Diosman sonqo karqa. Nueva Escocia lawpi John A. MacDonald coronelmi uyarirqa kayna niq discursota: “Diospa Gobiernonmi runakunaman suyakuyta qon”. Paqarinnintintam payqa huk iñiqmasinchikta nirqa: “Cabo Bretón llaqtapi runakunam qayna punchaw uyarirqaku mana haykapipas uyarisqanku willakuyta”, nispa.

Ichaqa manam lliwchu uyariyta munarqaku. Sacerdotekunapas piñasqam karqaku. Halifax llaqtapi catolico runakunaqa Biblia Estudiaqkunapa radiontam chinkarachiyta munarqaku. Religionpi punta apaqkunam gobiernota hikutarqaku, hinaptinmi 1928 watapi gobiernoqa nirqa Biblia Estudiaqkunapa radionta wichqarunanmanta. Chay mana allin rurasqanmantam, iñiqmasinchikkunaqa kayna niq qellqata aypurqaku Who Owns the Air? (¿Pitaq radiopa señalninkunapa dueñon?), niqta. Ichaqa manam gobiernopa imayna piensasqantaqa cambiachiyta atirqakuchu.

Chaywanqa manamá hukmanyarqakuchu Canadá nacionpi Jehová Diospa serviqninkunaqa. Isabel Wainwright iñiqmasinchikmi nirqa: “Qallariypiqa contraykupi kaqkunapa venceruwasqankumanmi rikchakurqa. Ichaqa yacharqanim atipawanankuta Jehová Dios yachaspanqa harkananmanta. Chay pasakusqanwanqa manañam chaynintakamañachu Diospa Gobiernonmanta willanayku karqa”, nispa. Predicanankupaq radiota servichikunankumantaqa, Canadá nacionpi Biblia Estudiaqkunaqa runakunatam wasinkupi watukuyta qallaykurqaku. Imayna kaptinpas huk tiempopim radioqa allinta servikurqa Diosmanta astawan willakunapaq, ‘manam haykapipas kayna willakuyqa uyarikurqachu’. (Canadá nacionpi waqaychasqa kaqkunamanta.)