ACHKA runakunam “Drama de la Creación”, nisqa videota qawaruspanku nirqaku: “¡Mana qonqanapaqmi!”, nispa. Chay video tiempollanpi ruwakusqanraykum achka runakunapa sonqonpi takyarurqa. Chay videoqa yanapakurqataqmi achka runakuna Diosmanta yachanankupaq, chay qepallamanmi Europa lawpi Diospa serviqninkuna qatikachasqa karqaku Hitler runapa kamachikuyninpi. Ichaqa, ¿imataq karqa “Drama de la Creación” nisqaqa?

1914 watapim Jehova Diospa llaqtan “Foto-Drama de la Creación” nisqa videota chayllaraq qawarurqaku. Chayqa karqa uyarinapaq hinaspa colorniyoq televisionpi hina 8 hora qawanapaqmi. Enteron Pachapim millonnintin runakuna qawarqaku. Chay watallapitaqmi “Drama Eureka” nisqa videopas lloqsirqa, chayqa pisi tiempollapi qawanapaqmi karqa. 1920 watakunapaqqa chay videokunaqa hinaspa maquinakunaqa manañam allinñachu karqa. Runakunam ichaqa qawayta munarqaku. Alemania nacionpi Ludwigsburg llaqtapipas achka runakunam kaynata tapukurqaku: “¿Haykapitaq ‘Foto-Drama’ nisqata qawasunchik?”, nispanku. ¿Imatam ruwanmanku karqa?

Runakuna astawan rikuyta munasqankuraykum Alemania nacionpi kaq Betelpi llamkaqkuna París llaqtamanta grabanapaq maquinakunata, rantirqakutaqmi Leipzig hinaspa Dresde llaqtakunamanta diapositivas nisqatapas. Chay rantisqankumanmi “Foto-Drama” nisqapa allinnin kaq diapositivas nisqata yaparqaku.

Allin tocaq Erich Frost iñiqmasinchikmi videokunapa musicanta ruwarurqa. Chay videopi kaq wakin rimaykuna La Creación nisqa sutiyoq libromanta horqosqa kasqanraykum, “Foto-Drama” nisqaqa “Drama de la Creación” nisqawan sutichakurqa.

Chay videopas 8 horapim tukuq, qawayta tukunankupaqmi achka tutapi qawaqku. Jehova Dios sapa punchaw imakuna unanchasqanmantawan Bibliamanta achka willakuykunatam willakuq, qawachiqtaqmi pantay religionkuna runakunata llumpayta engañasqanmantapas. Chay videom qawachisqa karqa Alemania, Austria, Luxemburgo, Suiza hinaspa wakin nacionkunapi aleman rimayniyoq runakunaman.

Erich Frost iñiqmasinchikmi nin: “Dramata qawaspayku samariptiykum orquestapi tocaqmasiykuna sumaq libronchikkunatawan folletonchikkunata tiyaqkunaman aypuqku. Chaynatam llapallankuman qellqanchikkunata aypururqaniku wasin-wasin predicaspa qosqanchikmantaqa astawanraq”, nispa. Polonia  nacionpi chay videota qawachiq Johannes Rauthe sutiyoq iñiqmasinchikmi yuyarin achka runakuna wasinkuta watukunankupaq maypi yachasqankuta qosqankumanta. Chaynatam achka runakunata tarirqaku Bibliamanta yachachinankupaq.

1930 watakunapiqa “Drama de la Creación” nisqa videota qawanankupaq huñunakusqankupiqa huntay-huntayñam kaqku, lliw runakunam Jehova Diospa testigonkunamanta rimaqku. 1933 watapi Alemania Betelpi kaqkunapa ruwasqanku videomanmi rirqaku yaqa huk millon runakuna. Käthe Krauss sutiyoq iñiqmasinchikmi nin: “Videota pichqa punchaw qawanallaykupaqmi rirqaniku 10 kilometro puriyta hinaspa kutimuyta. Tukuy wayqokunata hinaspa qatakunata rispaykupas tukuy montekunatam rirqaniku”, nispa. Else Billharz iñiqmasinchikpas nintaqmi: “‘Drama de la Creación’ nisqa videota qawasqaymi kallpanchawarqa cheqap kaqta astawan kuyanaypaq”, nispa.

Alfred Almendinger iñiqmasinchikmi willakun: “Mamaymi kusisqallaña Bibliata rantiruspan purgatorio palabrata maskarqa, mana tarispanmi religionninta saqeruspan bautizakururqa”, nispa. Erich Frost iñiqmasinchikmi nirqa “achkallaña runakuna ‘Drama de la Creación’” nisqawan cheqapta reqsisqankumanta (3 Juan 1-3).

“Drama de la Creación” nisqa video astawan runakunaman chayachkaptinmi Europa lawpi Hitler runa kamachiyta qallaykurqa. 1933 wata qallariypim Alemania nacionpi testigokunapa ruwayninkuta yanqachayta qallaykurqaku. Chay watamanta 1945 watapi enteron Pachapi Iskay kaq Guerra tukuykamam Europa lawpi kaq Jehova Diospa testigonkuna qatikachasqa karqaku. Erich Frost iñiqmasinchikmi yaqa 8 wata presochasqa karqa, chaymanta lloqsiruspanmi ichaqa Alemania Betelpi llamkarqa. Mana qonqanapaq “Drama de la Creación” nisqa videom kamas tiempopi ruwasqa karqa. Cheqapmá chay “Drama de la Creación” nisqa videoqa achkallaña cristianokunatam yanaparqa enteron Pachapi Iskay kaq Guerra kaptin iñiyninkupi allinta takyanankupaq. (Alemania nacionpi waqaychasqa kaqkunamanta.)