1. ¿Imanasqam avionta manejaqkunaqa sapa kuti pawachinankupaq allinta qawananku 30 masnin kaqkunata?

AVIONTA manejaqkunaqa, sapa kuti pawachinankupaqmi 30 masnin kaqkunata qawananku avion allin kasqanta yachanankupaq. Mana chayta ruwaptinkuqa ichapas avionpa imanpas mana allin kasqanrayku pawachkaspan wichiykunman. Achka wataña avionta manejaqkunapas, chaytam sapa pawachinankupaq ruwananku.

2. ¿Imatam lliw cristianokunaqa sapa kuti qawakunanku?

² Qampas avion manejaqkuna hinam isqon kaqkunata ruwanayki allin iñiyniyoq kasqaykita qawakunaykipaq, chaynapi ima sasachakuykuna kaptinpas allinta takyanaykipaq. Chayllaraq otaq achka wataña bautizasqa kaspanchikpas, ancha allinmi imayna iñiyniyoq hinaspa Dios yupaychayninchik imayna kasqanta sapa kuti qawakuyninchikqa. Mana chayta ruwaspaqa, iñiyninchikpim chiriyaruchwan. Bibliam niwanchik: “Pipas qaqa hina sayasqanpaq hapikuqqa cuidakuchunyá wichiykunanmanta”, nispa (1 Cor. 10:12).

3. ¿Imatam Galaciapi kaq cristianokunaqa necesitarqaku?

³ Galaciapi kaq cristianokunaqa necesitarqakum iñiyninkupi imayna kasqankuta qawakuyta. Jesuspa wañukusqanpi iñiqkunaqa atinmankum karqa allintapuni Dios reqsiyta: arí, paykunaqa Diospa churinkunamá kayta atinmanku karqa (Gal. 4:9). Congregacionpim wakinku nichkarqaku Diospa chaskisqan kanankupaqqa Moisespa chaskisqan Kamachikuykunata kasukunankupaq. Ichaqa, manañam Diosqa chay Kamachikuykunataqa servichikurqañachu. Mana judio kaqkunaqa manamá haykapipas chay kamachikuykunata kasukunankupaqqa obligasqachu karqaku. Judio cristianokunawan mana judio cristianokunaqa iñiyninkupim ñawparinanku karqa. Paykunaqa yachanankum karqa Moisespa chaskisqan Kamachikuykunaman hapipakuyqa manaña Jehova Diospa munaynin kasqanta.

4, 5. ¿Imatam Pabloqa Galaciapi kaq cristianokunaman consejarqa, hinaspa imanasqam ancha allin ñoqanchikpaqpas?

⁴ Galaciapi kaq cristianokunaman Pablopa consejasqanmanta Bibliapi qellqasqa kasqanqa ancha allinmi, ¿imanasqa? Chay nisqankunam lliw cristianokunata yanapan Bibliapa cheqap yachachikuyninkunata mana qepanchanankupaq hinaspa ñawpa vidankumanpas mana kutirikunankupaq. Jehova Diosmi apostol Pablota chaynata qellqananpaq yuyaycharqa, chaynapi kunan tiempopi lliw serviqninkuna kallpanchakuspanku iñiyninkupi allinta takyanankupaq.

⁵ Llapallanchikpaqmi ancha allin kanman Jehova Diospa testigon kanapaq imakuna ruwasqanchikmanta yuyariyninchikqa. Chaypaqqa allinmi kanman kay tapukuykunapi yuyaymanay: ¿Yuyarinkichu bautizakunaykipaq imakuna ruwasqaykimanta? ¿Yuyankichu Diosta imayna reqsirusqaykimanta hinaspa paywan reqsisqa kaspayki imayna tarikusqaykimanta?

6. ¿Imamantam qatiqninpi yachasun?

⁶ Arí, lliw cristianokunam bautizakunapaqqa isqon kaqkunata ruwarqanchik. (Qaway  “Bautizakunapaqwan iñiyninchikpi hinalla ñawparinapaq imakuna ruwanamanta” niq recuadrota.) Chay isqon kaqkunata sapa kuti yuyariyninchikqa yanapawasunmi ñawpa vidanchikman mana kutiykunapaq. Imaynam avionta manejaqkunapas sapa kuti pawachinankupaq imayna kasqanta qawanku, chaynam ñoqanchikpas bautizakunapaq imakuna ruwasqanchikmanta sapa kuti yuyarinanchik.

7. ¿Imaynatam kawsananchik, hinaspa imanasqa?

⁷ Imaynam avion manejaqkunapas sapa kuti pawachinankupaq imayna kasqanta qawanku, chaynam ñoqanchikpas hinalla qawakunanchik iñiyninchikpi imayna ñawparisqanchikta. Pablom Timoteota nirqa: “Chay cheqap yachachisqaykunaman hina yachachispayá iñiyniyoq kaspa kuyakuywan kawsay”, nispa (2 Tim. 1:13). Chay ‘cheqap yachachikuykunaqa’ Diospa Palabranpim tarikun (1 Tim. 6:3). Imatapas dibujayta piensaspanchik yanqa-yanqallataraq ruwasqanchikqa qawachiwanchikñam dibujasqanchik imayna kananmanta. ‘Cheqap yachachikuykunapas’ allintam qawachiwanchik Diospa munaynin ima kasqanmanta. Chaymi qatiqninpi qawasun bautizakunapaq imakuna ruwasqanchikmanta, qawasuntaqmi sichu cheqap yachachikuykunaman hina kawsasqanchikmantapas.

8, 9. a) ¿Imanasqam Diosmanta yachayninchikpi hinaspa iñiyninchikpi hinalla wiñananchik? b) ¿Imanasqam ancha allin iñiyninchikpi wiñayninchikqa, hinaspa imanasqam chayna wiñayninchikta sachapa wiñasqanwan tupachichwan?

⁸ Puntataqa Diosmantam yachananchik, chaymi yanapawasun iñiyniyoq kanapaq. Ichaqa hinallam Diosmantaqa yachananchik, hinallataqmi kallpanchakunanchik iñiyninchik allin takyasqa kananpaq (2 Tes. 1:3). Chaynaqa, bautizakurusqanchik qepamanqa Dioswan amistadninchikqa hinallamá wiñanan.

⁹ Iñiyninchik wiñasqantaqa tupachichwanmi sachakunapa wiñasqanwan. Sachakunaqa hatu-hatuntam wiñarunman uku-ukukama sapiyoq kaspanqa. Rimarisun Libano lawpi cedro sachakunamanta. Chay sachakunamanta wakinmi 37 metro sayayta wiñarunman. Hatu-hatun sapiyoqtaqmi hinaspa rakunpas 12 metroyoqmi (Cant. 5:15). Sachakunaqa chayllam qallariypiqa wiñanku. Sapinkuna astawan mastarikuspan uku-ukuman yaykuptinqa, sachaqa astawanmi rakuchakuspan wiñan. Chayna wiñasqanqa mana musyayllam. Chaynallataqmi iñiyninchikpi wiñasqanchikpas. Biblia estudiayta qallaykuspaqa, chayllam iñiyninchikpi wiñaruspa bautizakuruchwan. Precursor  kaytapas hinaspa congregacionpi huk llamkaykunatapas hayparuchwanmi. Congregacionpi kaqkuna chayta qawaspankuqa anchatamá kusikunku. Tiempopa risqanman hinaqa, yaqapaschá iñiyninchikpi wiñasqanchikqa mana sutillatañachu qawakunman. Chayna kaptinpas, hinallamá iñiyninchikpiwan Diosmanta yachayninchikpi wiñananchik ‘Cristo hina cabal kananchikpaq’ (Efes. 4:13). Chaynata ruwaspanchikmi taksa sacha hinalla kasqanchikmanta, hatun hinaspa raku sacha hina allin takyasqa cristianokuna kasunchik.

10. ¿Imanasqam unay wataña Diosta serviqkunapas iñiyninkupi hinalla ñawparinanku?

¹⁰ Iñiyninchikpi wiñasqanchikqa manamá chayllapiqa takyarunanchu. Diospa Palabranmanta yachayninchik hinaspa iñiyninchikqa sachapa sapin hinam allinta takyachiwanchik. Chay sapikunaqa astawanmi wiñaspan rakuchakunan (Prov. 12:3). Chaytam achka cristianokuna ruwarqaku. Huk iñiqmasinchikmi musyakun kimsa chunka masnin wataña congregacionpi anciano kaspanpas iñiynin hinalla wiñasqanta. Paymi nin: “Astawanmi Diospa Palabrantaqa chaninchani. Leesqayman hinam musyakuni Bibliapa yachachikuyninkunata imakunapi kasukunaypaq. Diosmanta willakusqaytapas astawanmi chaninchani”, nispa.

11. ¿Imaynatam Jehova Dioswan allin amistad kayta atichwan?

¹¹ Iñiyninchikpi wiñaspaqa, Jehova Diosmanmi asuykusun Amistadninchikman hinaspa Taytanchikman hina. Diosqa munanmi paywan waqaychasqa, kuyasqa hinaspa amparasqa kananchikta. Chayqa tupanmi huk warmacha kuyasqa taytanwan imayna tarikusqanwan otaq kuyasqanchik amistadninchikwan imayna tarikusqanchikwan. Manam chayllachu Jehova Dioswan allin amistadqa karusunchik. Chayqa tiempopa risqanman hinam kanqa. Hinaptinqa, kallpanchakusunyá sapa punchaw Palabranta leenapaq. Amataq qonqasunchu Willakuq, ¡Rikchariy!, hinaspa huk qellqanchikkuna leeytapas.

12. ¿Imatam ruwananchik Dioswan amistadninchik hinalla allin kananpaq?

¹² Diospa amistadninkunaqa sonqomanta mañakuspanku hinaspa allin amistadniyoq kaspankum iñiyninkupiqa wiñanku (leey Malaquias 3:16). Jehova Diosqa “uyarinmi mañakusqankutaqa” (1 Ped. 3:12). Kuyakuq tayta hinam mañakusqanchikman hina yanapawanchik. Chaymi ‘tukuy tiempo Diosta mañakunanchik’ (Rom. 12:12). Manamá iñiyninchikpi allin takyasqa kaytaqa  atichwanchu Dios mana yanapawaptinchikqa. Kay Pachapi sasachakuykunataqa manataqmi kikillanchikmantaqa atipayta atichwanchu. Dios mañakuyta saqeruspaqa manam atichwanchu paymanta kallpa chaskiytaqa. Chaynaqa, ¿allinchu kachkan Dios mañakuyniki, icha kallpanchakunaykichu aswan allin kananpaq? (Jer. 16:19.)

13. ¿Imanasqam iñiyninchikpi wiñananchikpaqqa ancha allin iñiqmasinchikkunawan hukllawakuyninchik?

¹³ Jehova Diosqa kusikunmi lliw ‘payman hapipakuqkunamantaqa’. Chaynaqa, paymanta yacharuspanchikpas hinallam iñiqmasinchikkunawan huñunakunanchik, paykunapas ñoqanchik hinam Diosta reqsinku (Nah. 1:7). Kay Pachapi mana allinkunallaña kasqanraykum, ancha allin iñiqmasinchikkunawan hukllawakuyninchikqa. Chaynapim llapanchik yanapanakuspa kallpanchanakusun. Iñiqmasinchikkunaqa kuyakuq kananchikpaqwan allinkunata ruwanapaqmi kallpanchawasun (Heb. 10:24, 25). Pablopa niwasqanchikta kasukunapaqqa congregacionpi iñiqmasinchikkunawanmi kananchik. Chaynaqa, amayá saqeychu sapa huñunakuykunaman riytaqa hinaspa chaypi rimarinaykipaq kallpanchakuytapas.

14. ¿Imanasqam sapa kuti huchanchikmanta wanakuspa kutirikunanchik?

¹⁴ Cristianokuna kananchikpaqqa huchanchikmantam wanakurqanchik hinaspapas mana allin ruwasqanchikkunata saqespanchikmi kutirikurqanchik. Ichaqa sapa kutim wanakunanchik. Pantaq runakuna kasqanchikraykum ima huchamanpas wichichkanchik. Huchaqa culebra hinam chaylla kachuruwananchikpaq otaq mana allinman wichiykachiwananchikpaq listo kachkan (Rom. 3:9, 10; 6:12-14). Hinaptinqa, reqsikusunyá huchayoq kasqanchikta. Jehova Diosqa pacienciakunmi ñoqanchikwanqa hinaspapas munanmi mana huchallikunapaq hinalla kallpanchakunanchikta (Filip. 2:12; 2 Ped. 3:9). Chaypaqmi allintapuni yanapawasun tiemponchiktawan kallpanchikta allinta servichikuyninchik hinaspa imapas munasqanchikta qepanchayninchikpas. Huk cristianam nin: “Warmacha kasqaymantapacham Jehova Diosmantaqa yacharqani, ichaqa manam wakinkuna hinachu Jehova Diostaqa qawarqani. Diospi piensaspayqa manchakuqmi kani, hinaspam piensarqani mana haykapipas kusichiy atisqayta”, nispa. Kay iñiqmasinchikqa, tiempopa risqanman hinam sasachakuykunapi tarikusqanrayku iñiyninpi hukmanyarurqa. Paymi nin: “Chaynaqa karqani manam Diosta mana kuyasqayraykuchu, aswanqa mana sumaqta reqsisqayraykum. Ichaqa tukuy sonqoywan mañakuyta qallaykusqaymantam Diosta imayna qawasqayta cambiayta qallaykurqani. Jehova Diosqa warmachata makinmanta pusachkanmanpas hinam sasachakusqaypi kuyakuywan yanapawarqa”, nispa.

15. ¿Imatam Jesuswan Jehova Dios qawamuchkanku?

¹⁵ Diospa angelninmi Pedrota hinaspa Jesuspa wakin qatiqninkunata nirqa hinalla Diosmanta ‘runakunaman willakunankupaq’ (Hech. 5:19-21). Diosmanta willakuyninchikpi imayna kasqanchiktam sapa kuti qawakunanchik iñiyninchikpi allin takyasqa kananchikpaq. Jesuswan Jehova Diosqa imayna iñiyniyoq kasqanchiktam qawamuchkanku, hinaspam chaninchanku paymanta willakusqanchikta (Apoc. 2:19). Arí, Diosmanta willakusqanchikqa ancha allinmi kanan vidanchikpiqa.

16. ¿Imanasqam Diosman qokusqanchikpi yuyaymanananchik?

¹⁶ Yuyaymanay Diosman qokusqaykipi. Imamantapas ancha allinmi Dioswan amistadninchikqa. Diosqa reqsinmi paypaq kaqkunataqa (leey Isaias 44:5). Diosta mañakuspayki qawakuy paywan amistadniki imayna kasqanta. Yuyariytaq bautizakusqayki punchawta hinaspa ama qonqaychu ima  punchawpi kasqanmanta. Bautizakusqaykiqa hukkunatam qawachin Jehova Diosman qokusqaykita. Kay ruwasqaykiqa vidaykipi aswan allin tanteasqaykimá.

17. ¿Imanasqam hinalla kallpanchakunanchik Jehova Diosmanta mana karunchakunapaq?

¹⁷ Pablom Galacia lawpi cristianokunaman qellqaspan nirqa allin ruwayta mana amiruspa hinalla kallpanchakunankupaq (Gal. 6:9). Chayna kayqa kunan tiempopi cristianokunapaqpas ancha allinmi. Yaqapaschá qamqa sasachakuykunapi tarikunki, ichaqa Jehova Diosmi yanapasunki. Ama qonqaychu chuya espiritunta mañakuytaqa. Anchatamá kusikunki nanaykunatawan llakikuykunata chinkachispan hawka kawsakuyta Dios apamuptin (Mat. 7:7-11). Kaypi yuyaymanay: pichinchurruchakunata Dios cuidaspanqa, ¿manachum astawanraq qamta cuidasunki kuyaspa payman qokusqaykimanta? (Mat. 10:29-31.) Ima sasachakuypiña tarikuspaykipas, hinalla kallpanchakuy Diosta servinaykipaq. ¡Achka bendicionkunatamá Jehova Diospa reqsisqan kasqanchikmanta chaskisunchik!

18. ‘Diosta reqsiruspaykiqa’, ¿imatam qamqa ruwanayki?

¹⁸ Hinaptinqa, Diosta reqsispayki chayllaraq qam bautizakuruspaykiqa, ¿imatam ruwanayki? Hinalla Jehova Diosmanta yachay, chaynapi iñiynikipi allin takyasqa kanaykipaq. Ichaqa, ¿imatam ruwanayki unay wataña bautizasqa kaspaykiqa? Qampas Jehova Diosmantam hinalla allintapuni yachanayki. Ama haykapipas piensaychu Jehova Diosta reqsiruspa manaña aswan reqsiy necesitasqaykitaqa. Hinaspapas sapa kuti qawariy kay yachachikuypi yachasqanchikta, chaynapim kuyakuq Taytanchik Jehova Diosmanta mana karunchakunkichu (leey 2 Corintios 13:5, 6).