Hinalla ñawparinapaq allin yanapakuyqa kanmanmi familianchik, amistadninchik hinaspa iñiqmasinchikkunapa yanapakuyninku.

Huk amistadninchik sumaqllata hinaspa kuyakuywan rimapayawaptinchikqa kallpanchasqam tarikunchik (Prov. 16:24; 18:24; 25:11). Cheqap cristianokunaqa manam kallpanchasqa kayllatachu munanchik. Aswanqa kikinchikmantam ‘sasachakuypi kaqkunata Diospa kallpanchawasqanchikman hina kallpanchananchik’ (2 Cor. 1:4; Luc. 6:31). Antonio sutiyoq iñiqmasinchikmi Bibliapi chay nisqan cheqap kasqanta musyakurqa, payqa México nacionpi congregacionkuna watukuqta watukuq ancianom.

Doctorkunam yawarninpi cancer onqoyta tarirurqaku chaymanta yacharuspanmi payqa anchata llakikurqa. Ichaqa mana valeqpaq hapikusqanta atipananpaqmi kallpanchakurqa. ¿Imaynatam chayta ruwarqa? Payqa yuyariqmi Jehova Diospaq takikunata, hinaspam takispan yuyaymanaq ima nisqanpi. Chaymantapas, anchatam kallpancharqa Jehova Diosman tukuy sonqonwan mañakuynin hinaspa Biblia leeyninpas.

Ichaqa Antonio iñiqmasinchikqa reqsikunmi iñiqmasinkunamanta aswan yanapakuyta chaskisqanmanta. Paymi nin: “Señoraywan llumpay llakisqa tarikuspaykum, congregacionpi anciano kaq aylluykuta qayaq kaniku ñoqaykuwan kuska Jehova Diosta mañakunanpaq. Kay ruwasqaykum anchata kallpanchawaqku. Aylluykupa hinaspa congregacionpi iñiqmasiykunapa yanapawasqankuwanmi hukmanyasqa tarikusqaykuta pisi tiempollapi atiparqaniku”, nispa. ¡Anchatamá payqa kusikurqa kuyakuq hinaspa llakipayakuq amistadkunawan kaspan!

Sasachakuypi tarikuptinchikqa yanapawasuntaqmi Jehova Diospa chuya espiritun, chayqa Pedropa nisqanman hina Diospa qowasqanchikmi (Hech. 2:38). Kayqa sutillatam qawakurqa Pentecostes 33 watapi cristianokuna chuya espirituwan akllasqa kaptinku. Kunan tiempopipas chuya espiritutaqa chaskichwanmi, mañakuchwantaqmi imapipas yanapawananchikpaq. Chaynaqa, sapa kutiyá mañakusun (Is. 40:28-31).

Apostol Pablom achka sasachakuykunata aguantarqa, achka kutipitaqmi wañuy patapi tarikurqa (2 Cor. 1:8-10). Ichaqa manam wañuyta manchakuqchu Jehova Dios yanapananta yachasqanrayku. Paymi qellqarqa: “Alabasunchikyá Señor Jesucristopa Taytan Diosninchikta, payqa llakipayakuq Taytam hinaspa sinchi kallpanchaqninchik Diosmi. Paymi kallpanchawanchik tukuy sasachakuyninchikpi”, nispa (2 Cor. 1:3, 4). Pabloqa manamá ñakarisqankunapiqa llumpaytachu repararqa, aswanqa chay sasachakuykuna pasasqanmi yanaparqa hukkunapa sientesqanta entiendenanpaq. Yanaparqataqmi sasachakuypi kaq runakunata kallpanchananpaqpas.

Qallariypi rimasqanchik Antoniom onqosqanmanta allinyaruspan kaqmanta congregacionkunata watukuq anciano karqa. Payqa iñiqmasinkunamanta anchata nanachikuspanpas, astawanraqmi onqoq iñiqmasinkunata watukunankupaq señoranwan kallpanchakurqaku. Huk kutipim llumpayta onqoq huk cristianota watukuspan yacharurqa manaña huñunakuyman riy munasqanta. Paymanta rimaspanmi nirqa: “Jehova Diostaqa hinaspa iñiqmasinkunataqa anchatamá kuyarqa, ichaqa chay onqosqan llumpayta hukmanyachisqanraykum mana valeqpaq hinaña tarikurqa”, nispa.

Kallpanchananpaqmi chay cristianota Antonio nirqa kusirikunankupaq huñunakuypi Jehova Diosta mañakunanpaq. Mana ruway atisqanta piensaspanpas Jehova Diostam mañakurqa. Antoniom nin: “Suma-sumaqmi mañakusqanqa karqa, chaymanta qepamanmi manaña ñawpaqpi hinañachu tarikurqa. Kaqmantam valeqpaqña hapikurqa”, nispa.

Llapallanchikmi haykapipas ñakarirqanchik. Ichaqa apostol Pablo nisqanman hinam chay sasachakusqanchikkunaqa yanapawanchik hukkunata kallpanchanapaq. Chaynaqa, ñakariq iñiqmasinchikkunapiyá interesakusun hinaspa Jehova Diosta kallpanchaq kasqanta qatipakusun.