Congregacionmanta qarqosqa runa huñunakusqanchik Salonpi may lawpipas tiyasqanmantaqa manam hukmanyanchikchu. Kay qellqanchikmi cristiano tayta-mamakunata kallpanchan allin rikchakuptinqa congregacionmanta qarqosqa churi-wawankuwan kuskaraq yachaptinku iñiyninkupi yanapanankupaq. 1988 watapi lloqsimuq La Atalaya 15 de noviembre qellqapa 19, 20 paginankunapi nisqanman hinaqa, tayta-mamakunaqa atinmankum churi-wawankuman Bibliamanta estudiachiyta warmallaraq kaspa paykunawan yachaptinraqqa. Chaynapim paykunaqa pantasqankumanta kutimunankupaq kallpanchakunmanku.

Congregacionmanta qarqosqa warmallaraq churi-wawa Salonpi may lawpi tiyanan kaptinpas, manam imananchu tayta-mamanwan kuska qasillalla tiyayninqa. Qarqosqakuna qepallapi mana tiyananku kasqanraykum, mana imananmanchu qarqosqa churi-wawa tayta-mamanwan may lawpi tiyaptinpas. Tayta-mamakuna churi-wawankuta iñiyninpi yanapaq kasqankuraykum, munanmanku huñunakuypi yachachikuykunawan allinta yanapachikunanta. Chaynaqa, ichapas kuska tiyayninku allin kanman may lawpipas tiyanankupaq saqerunankumantaqa.

Ichaqa, ¿imaynataq kanman qarqosqa churi-wawa tayta-mamanwan manaña kuska yachaptinqa? Chayna kaptinqa, ¿manañachu tayta-mamanwan kuska tiyanman? Ñawpaqtam kay qellqa sutillata willakurqa cristiano ayllunkuna qarqosqa kaqkunawan manaña kuska yachaptinkuqa mana hukllawakunankumanta. * Ichaqa, ayllunkunapa waqtanman qarqosqa kaq huñunakuypi tiyaykamuyninqa manam chaynallachu yanqapas-yanqa ayllunkuna paywan kuska tiyananpaq maskaywanqa. Sichu cristiano ayllukuna qarqosqa kaqta Diospa kamachisqanman hina qawaptinkuqa hinaspa mana hukllawakunankupaq Bibliapa kamachisqanta kasukuptinkuqa, manam pipas hukmanyananchu (1 Cor. 5:11, 13; 2 Juan 11).

Manam imananchu qarqosqa runa ayllunpa otaq mayqan cristianopa waqtanpi tiyaptinqa, ichaqa hawkallamá kanan. Maypi tiyananmanta harkakuyqa achka sasachakuykunatam qallarichinman. Sichu iñiqmasinchikkuna hinaspa ayllunkuna qarqosqa kaqwan mana hukllawakunankupaq Bibliapa kamachisqanta kasukuypi kallpanchakuchkanku, hinaspapas manataq iñiqkunapas hukmanyachkankuchu hinaptinqa ama sasachakusunchu may lawpi pipas tiyaptinqa. *