1, 2. ¿Imatam Jehova Diosqa qawachiwanchik oveja michiqwan tupachikuspan?

JEHOVA DIOSQA kikinmi oveja michiqwan tupachikun (Ezeq. 34:11-14). Chayna kasqanmi imayna kasqanmanta yachanapaq yanapawanchik. Kuyakuq michiqqa ovejankunatam imamantapas allinta waqaychan. Sumaqllaña pastokunaman hinaspa yakukunapa kasqanmanmi pusan (Sal. 23:1, 2); tuta-punchawmi waqaychan (Luc. 2:8); waqaychantaqmi purun animalkunamanta (1 Sam. 17:34, 35); uñachakunatam marqayninpi apan (Is. 40:11); chinkaruqkunatam maskan hinaspapas onqoqkunatam yanapan (Ezeq. 34:16).

² Ñawpaq israelitakuna chakrapi llamkaq hinaspa michiq runakuna kasqankuraykum, paykunaqa allinta entienderqaku oveja michiqwan imanasqa Jehova Dios tupachikusqanmanta. Ovejakunaqa allin waqaychasqam kananku hawkalla kanankupaq, chaynallataqmi runakunapas Jehova Diospa pusasqan kananku allinlla kawsakunankupaq (Mar. 6:34). Dioswan mana pusasqan kasqankuraykum runakunaqa ñakarinku. Manamá yachankuchu imam allin otaq mana allin kasqanta, chaymi mana allinkunaman wichispanku ‘mana michiqniyoq ovejakuna hina’ chinkanku (1 Rey. 22:17). Jehova Diosmi ichaqa kuyakuywan serviqninkunata imapipas yanapan.

3. ¿Imamantam kay yachachikuypi qawasun?

³ Kunan tiempopaqpas ancha allinmi oveja michiqwan Jehova Diospa tupachikusqanqa. Payqa hinallam serviqninkunata allinta waqaychaspan pusachkan. Qatiqninpim qawasun imayna pusawasqanchikmantawan tukuy imapi imayna yanapawasqanchikmanta. Qawasuntaqmi chayna waqaychawasqanchikmanta paywan imayna kananchikmantapas.

4. ¿Imaynam Jesusqa Diospa ovejankunawan?

⁴ Jehova Diosmi Jesusta churarun iñiqkunapa Uman kananpaq (Efes. 1:22, 23). Pimantapas “allin michiqqa” Jesusmi, payqa tukuypim Taytanta qatipakun. Jesusqa ovejankunata kuyaspanmi allinta waqaychan, ‘paykunaraykum vidantapas qorqa’ (Juan 10:11, 15). Rantinchikpi Jesuspa wañukusqanqa lliw runakunapaqmi ancha allin (Mat. 20:28). Arí, Jehova Diosqa munanmi runakuna Jesuspi ‘iñispanku manaña puchukaspa wiñaypaqña kawsanankuta’ (Juan 3:16).

5, 6. a) ¿Pitam Jesusqa ovejankunata pusananpaq churarqa? b) ¿Imaynam cristianokunaqa kananku Jesuspa churasqan ancianokunawan yanapachikunankupaq? c) ¿Imanasqam astawanqa ancianokunata kasukunanchik?

⁵ ¿Imaynatam Diospa ovejankunaqa Jesucristo Michiqninku kasqanta qawachinmanku? Kikinmi nirqa: “Ovejaykunaqa vozniytam uyarin, ñoqapas paykunataqa reqsinim, chaymi paykunaqa qatiwanku”, nispan (Juan 10:27). Allin Michiqninchikpa nisqanta uyarispaqa, lliw niwasqanchiktam kasukunanchik. Kasukunanchiktaqmi pusawananchikpaq churasqan ancianokunatapas. Jesusqa willakurqam apostolninkuna hinaspa qatiqninkuna paypa ruwasqanta hinalla ruwanankumanta. Paykunaqa hinallam ovejankunata yachachispanku waqaychananku karqa (Mat. 28:20; leey Juan 21:15-17). Diosmanta willakusqanku tukuy hinastinpi apakusqanraykum iñiqkunaqa astawan yapakurqa, chaymi Jesusqa allin yuyayniyoq cristianokunata churarqa michichkaq hina iñiqkunata yanapanankupaq (Efes. 4:11, 12).

⁶ Apostol Pablom Efeso congregacionpi ancianokunaman qellqaspan nirqa ‘iñiqkunata cuidanankupaq’ Diospa chuya espiritun paykunata akllarusqanmanta (Hech. 20:28). Chaynam kunan tiempopi ancianokunapas chuya espirituwan akllasqa kanku. ¿Imanasqam chaynata ninchik? Pipas anciano kananpaqqa chuya espirituwan yuyaychasqa Diospa Palabranpa nisqantam kasukunan, chaypim nin anciano kanankupaq imakuna ruwanankumanta. Chaynaqa, ancianokunata kasukuspam qawachichkanchik Jehova Diostawan Jesusta respetasqanchikta, paykunam kanku alli-allin Michiqkuna (Luc. 10:16). Chayraykum astawanqa ancianokunata kasukunanchik. Ichaqa manamá chayraykullachu.

7. ¿Imaynatam ancianokuna qamta yanapasunki Jehova Dioswan allin kanaykipaq?

⁷ Iñiqmasinkunata kallpanchaspanku yanapaspankuqa, ancianokunaqa Bibliapa nisqanman hinam ruwanku. Chaynata ruwaspankuqa manamá sapakama vidankupi imayna kawsanankupaq niytachu munanku (2 Cor. 1:24). Aswanqa Bibliapa nisqanta qawachispankum yanapanku, chaynapi allinta tanteanankupaq hinaspa llapallan iñiqkunapi hawkayay kananpaqpas (1 Cor. 14:33, 40). Bibliaqa nintaqmi ancianokunaqa ‘almanchikmanta cuentallikusqankuta’. Kaymi qawachin Jehova Dioswan allin kananchikpaq paykuna munasqankuta. Chaymi “pipas huchallikuruptinqa” otaq huchallikurunanpaqña hina kaptinqa paykunaqa chaylla yanapanankupaq kachkanku (Gal. 6:1, 2; Jud. 22). ¿Manachu kaykunarayku ‘pusawaqninchik runakunata kasukunanchik’? (Leey Hebreos 13:17.)

8. ¿Imaynatam ancianokunaqa Diospa ovejankunata allinta waqaychanku?

⁸ Apostol Pablopas allin michiq kaspanmi Colosas iñiqmasinkunaman kaynata qellqarqa: “Cuidakuychikyá, amayá engañachikuychikchu yachayninkumanta rimaqkunawanqa hinaspa yanqakunalla rimaqkunawanqa, paykunaqa manam Cristomanchu hapipakunku aswanqa runakunapa costumbrenkunallamanmi hinaspa kay pachapi yachachikuykunallamanmi”, nispa (Col. 2:8). Chayna nisqanpas qawachiwanchikmi Bibliapa nisqanman hina ancianokunapa niwasqanchikta kasukunamanta. Paykunaqa rikchan-rikchanllam  kachkanku mana allin runakunamanta waqaychawananchikpaq. Apostol Pedrom willakurqa ‘Diosmanta llulla willakuqkuna’ hinaspa ‘llulla yachachiqkuna’ rikurimuspanku ‘iñiyninpi mana takyaqkunata huchaman urmachinankumanta’ (2 Ped. 2:1, 14). Kunan tiempopi ancianokunapas chayna willakuykunatam qonanku iñiqmasinkunata waqaychanankupaq. Paykunaqa allin yuyayniyoq cristianokunam kanku. Chaymantapas, manaraq ancianokuna kachkaspankuqa sutillatam qawachirqaku Bibliapa yachachisqanta allin entiendesqankuta hinaspa allin yachachisqankutapas (1 Tim. 3:2; Tito 1:9). Hinaptinqa, Diospa ovejankunata pusanankupaqmi ancianokunataqa allinta yanapan yuyayniyoq, allin tanteoyoq hinaspa Bibliawan yachayniyoq kasqanku.

9. ¿Imaynatam Jesusqa kunan tiempopi ovejankunata pusan hinaspa mikuchin?

⁹ Jehova Diosqa llaqtanwanmi enteron Pachapi serviqninkunata mikuchichkaq hina allin yanapakuykunata qowanchik. Bibliapa yachachisqanman hinam qellqanchikkunapi achka yanapakuykuna kan. Wakinpiñataqmi Diospa llaqtanqa ancianokunaman kamachikuykunata qon cartantakama otaq congregacionkunata watukuq ancianontakama. Chaynatam Diospa serviqninkunaqa imakuna ruwanankupaq kamachikuykunata chaskinku.

10. ¿Imatam ancianokunaqa ruwananku pipas Diospa llaqtanmanta karunchakuruptinqa?

¹⁰ Congregacionpi ancianokunaqa iñiqmasinkunata waqaychanankupaq hinaspa  iñiyninkupi yanapanankupaqmi churasqa kachkanku, astawanraqmi iñiyninkupi chiriyaruqkunata otaq hatun huchaman wichiykuqkunata yanapanankupaq (leey Santiago 5:14, 15). Wakinqa Diospa llaqtanmanta karunchakuruspankum Dios serviyninkuta saqerunku. Chayna kaptinqa, kuyakuq ancianoqa tukuy atisqantamá ruwanqa sapakamata maskananpaq hinaspam kallpanchanqa Diospa llaqtanman kutimunanpaq. Jesusmi nirqa: “Hanaq pachapi kaq Taytaykichikpas manam munanchu hukllanpas kay uchuychakuna chinkananta”, nispa (Mat. 18:12-14).

11. ¿Imanasqam wakin iñiqmasinchikkunaqa sasachakunmanku ancianokuna kasukuyta?

¹¹ Jehova Dioswan Jesusqa mana pantaq michiqkunam kanku. Ichaqa manamá chaynachu kanku ancianokunaqa. Chaymi wakin cristianokunaqa sasachakunmanku paykunata kasukunankupaq. Ichapas ninmanku: “Paykunaqa ñoqa hina pantaqmi kanku. ¿Imanasqamá niwasqankutaqa kasukunay?”, nispa. Arí, ancianokunaqa pantaq runakunam kanku. Ichaqa manam allinchu pantasqallankupi reparayqa.

12, 13. a) ¿Imaynam karqaku llaqtanta pusananpaq Diospa servichikusqan runakuna? b) ¿Imanasqam Jehova Diosqa Bibliapi qellqachirqa servichikusqan runakunapa pantasqankuta?

¹² Bibliaqa sutillatam qawachin Diospa servichikusqan runakunapa pantasqankuta. Rimarisun Davidmanta, paymi Israel nacionpi rey kananpaq Diospa churasqan karqa. Ichaqa, aychapa munayninman wichiykuspanmi casada warmiwan huchapakururqa hinaspanmi qosantapas wañurachirqa (2 Sam. 12:7-9). Rimarisuntaq Pedromantapas. Dios serviyninpi achka llamkayniyoq kaspanpas, mana allinkunamanmi wichiykurqa (Mat. 16:18, 19; Juan 13:38; 18:27; Gal. 2:11-14). Chaynaqa, Adanpa hinaspa Evapa tiemponmantapacham mana pipas Jesus hina mana pantaqqa kanchu.

¹³ ¿Imanasqam Jehova Diosqa Bibliapi qellqachirqa servichikusqan runakunapa pantasqankuta? Qellqachirqaqa pantaq runakunawan llaqtanta pusay atisqanta qawachinanpaqmi. Chayna kasqanqa ñawpaqmantaraqmi karqa. Hinaptinqa, manamá allinchu kanman ancianokunapa pantaq kasqankuta qawaspanchik contrankupi rimayninchikqa otaq yanqachayninchikqa. Jehova Diosqa munanmi respetaspa kasukunanchikta (leey Exodo 16:2, 8).

14, 15. ¿Imatam yachachwan ñawpaqpi Jehova Dios llaqtanman kamachikuykunata qosqanmanta?

¹⁴ Ancha allinmi pusawaqninchik runakunata kasukuyninchikqa. Yuyarisun Diospa llaqtan llumpay sasachakuypi tarikuptin kamachikuyninkunata qonanpaq Dios pikunata servichikusqanmanta. Israel runakunaqa Egiptomanta lloqsiramuspankum Moisesnintakama hinaspa Aaronnintakama Diospa kamachikuyninkunata chaskirqaku. Chaymantapas, Egipto runakunaman chunka kaq castigota Dios apachiptin Israel runakuna mana wañunankupaqmi, kamachikuyninkunata kasukunanku karqa. Diosmi paykunata kamachirqa mikuyta ruwanankupaq hinaspa wañuchisqanku ovejapa yawarninta wasi punkupa chakaqninmanwan iskaynin sarpunninman hinanankupaq. Diosqa manamá hanaq pachamantachu rimariykamurqa ima ruwanankupaqqa. Aswanqa Israel nacionpi ancianokunatam kasukunanku karqa, paykunapas Moisespa kamachisqantamá kasukurqaku (Ex. 12:1-7, 21-23, 29). Chaynatam Jehova Diosqa Moisestawan ancianokunata servichikurqa llaqtanta pusananpaq. Chaynallataqmi kunan tiempopi ancianokunapas Diospa servichikusqan kanku.

¹⁵ Bibliapa willakusqanman hinaqa, yaqapaschá yuyarinchik serviqninkunaman Jehova Dios kamachikuykunata qonanpaq achka kutipi angelkunata otaq runakunata servichikusqanmanta. Chay kamachikuykunaqa yaqa llapanpim allinpuni karqa salvakunankupaq.  Diosqa chay kutikunapim paykunata saqerqa rantinpi rimanankupaq. Sutinpi rimaspankum llaqtanman willarqaku salvakunankupaq ima ruwanankumanta. ¿Manachu Diosqa chaynata ruwanman Armagedon punchaw chayamuptinpas? Ichaqa, Diospa llaqtanta pusaq ancianokunaqa manamá haykapipas hatunchakuq hinaqa kamachinankuchu.

16. ¿Ima ‘palabrakunatam’ kasukunanchik?

¹⁶ Jehova Diospa llaqtanqa ‘chulla kanchallam’ hinaspapas ‘chulla michiqniyoqllam’, payqa Jesucristom (Juan 10:16). Jesusqa qatiqninkunatam nirqa sapa punchaw tukupay tiempokama paykunawan kananmanta (Mat. 28:20, NM). ¿Imaynatam Jesusqa kunan tiempopi chayna nisqanman hina ruwachkan? Hanaq pachapi Rey kaspanmi tukuy imata controlachkan chaynapi Satanaspa munaychakusqan puchukachisqa kananpaq. Diospa kanchanpi huk sonqolla hinaspa allin waqaychasqa kanapaqqa, uyarinanchikmi ‘qepanchikpi: “Kaymi ñan, chayninta puriychik”, nispa niq palabrakunata’. Chay ‘palabrakunam’ Bibliapa tukuy niwasqanchik hinaspa congregacionpi ancianontakama Jehova Diospa chaynataq Jesuspa niwasqanchikpas (leey Isaias 30:21; Apocalipsis 3:22).

17, 18. a) ¿Imaynam Satanasqa kachkan? b) ¿Imatam Bibliaqa nin salvakuq cristianokunamanta? c) ¿Imamantam qatiqnin yachachikuypi qawasun?

¹⁷ Apostol Pedropa nisqanman hinaqa, Satanasqa ‘leon hinam muyuriqninchikpi purichkan pitapas millpurunanpaq’ (1 Ped. 5:8). Ovejakunata hapirunanpaq muyukachaq yarqasqa animal hinam, Satanaspas iñiyninkupi hukmanyaqkunata otaq chiriyaqkunata hapirunanpaq kachkan. Chayraykum cristianokunaqa iñiqmasinchikkunamanta mana karunchakunanchikchu nitaq Jehova Diosmantapas, ‘paymi allin michiq hina almanchikta michichkan’ (1 Ped. 2:25). Hatu-hatun ñakariypi salvakuq cristianokunamantam Biblia niwanchik: “Carnerom [otaq Jesusmi] paykunataqa harkanqa ovejakunata michichkaq hina, paykunataqa kawsachikuq yakukunamanmi, pusanqa. Waqasqanku weqenkutapas Diosñam pichanqa”, nispa (Apoc. 7:17). ¡Mayna sumaqmi chayna willakuyqa!

¹⁸ Chaynaqa, iñiqkunata pusanankupaq congregacionkunapi ancianokunapa ruwasqankuqa ancha allinmi. Hinaptinqa, ¿imaynatam paykunaqa yachanmanku Jesuspa ovejankunata allin michisqankuta? Chaymantam qatiqnin yachachikuypi qawasun.