HUK nacionpi kaq François sutiyoq ancianom willakun: “Autoridadkunata akllanankupaq votacion kasqanmanta punchawkuna pasayllatam autoridadkunapa contranpi runakuna tukuy mana allinta ruwayta qallaykurqaku, hinaptinmi wara-waranqantin testigokuna wasinkuta saqespa lluptikurqaku. Mikuywan hampikunam pisiyarurqa, kaspanpas llumpay qollqepaqmi karqa. Qollqem mana karqachu Bancokunata wichqaruptinku chaynataq qollqe horqonapaq sitiokunapipas tukuruptin”, nispa.

Wasinkumanta lluptispa huñunakunanchik Salonkunapi kaq iñiqmasinchikkunamanmi yanapayninkuta apachimurqaku Betel wasipi llamkaq iñiqmasinchikkuna. Autoridadkunapa contranpi kaqkunaqa cheqninakuspankum carreterakunapi controlayta qallaykurqaku, ichaqa Jehova Diospa testigonkuna mayqen autoridadmanpas mana sayapakusqankuraykum Betel wasimanta carrokunataqa mana harkarqakuchu.

Françoismi willakun: “Huknin Salonman richkaptiykum baleayta qallaykamuwarqaku hinaptinmi balakuna yaqalla hapiruwarqaku. Ñoqayku lawman armayoq huk soldado kallpamusqanta rikuruspaykum carrota chaylla muyurichispa Betel wasiman apurayman kutirqaniku. Jehova Diostam anchata agradecekurqaniku hinallaraq kawsasqaykumanta. Paqarinnintintam chay Salonman chayamurqaku 130 iñiqmasinchikkuna, chaypiqa hawkañam tarikurqaku. Wakinñataqmi Betel wasiman chayamurqaku, chaypim ima necesitasqankutapas qorqaniku chaqwa ruwaq runakuna hawkayananku tiempokama”, nispa.

Chaymantapas nirqam: “Tiempo pasaytam enteron chay nacionmanta iñiqmasinchikkuna tukuy sonqonkuwan agradecekuspanku cartakunata Betel wasiman apachimurqaku. Huklaw llaqtakunamanta kaq iñiqmasinchikkunapa yanapayninta chaskisqankum Jehova Diospi astawan iñinankupaq kallpancharqa”, nispa.

Ima desgraciapas pasaptinqa manam iñiqmasinchikkunataqa “hawkalla rispayá mikumuy hinaspa qonikamuy” nispallachu ninanchik (Sant. 2:15, 16). Aswanqa apostolkunapa tiemponpi cristianokuna hinam ima necesitasqankupipas yanapanchik. Paykunaqa muchuy kananta yacharuspankum, ‘Judeapi iñiqkunaman atisqankuman hina yanapakuyta apachinankupaq’ tantearqaku (Hech. 11:28-30).

Jehova Diosta serviqkunaqa tukuy sonqonchikwanmi ima necesitasqankupipas runamasinchik yanapayta munanchik, ichaqa astawan yanapaytaqa munanchik Jehova Diosmanta yachachiypim (Mat. 5:3). Diosmanta yachachispa yanapanankupaqmi Jesusqa qatiqninkunaman kamachirqa (Mat. 28:19, 20). Chaypaqmi sapakama kallpanchikta, tiemponchikta chaynataq qollqenchikta servichikunchik. Diospa llaqtanpi cuentallikuqkunam qollqe qosqanchikta servichikunku necesitaqkunata yanapanankupaq, ichaqa astawanmi servichikunku Diosmanta allin noticiakuna willakuypi yanapananchikpaq. Chayna yanapakusqanchikwanmi qawachinchik Jehova Diosta chaynataq runamasinchik kuyasqanchikta (Mat. 22:37-39).

Jehova Diospa testigonkunata enteron Pachapi yanapaqkunaqa ama hukmanyaychikchu qollqe qosqaykichiktaqa allin ruwaykunapim servichikuchkanku. ¿Atiwaqchu qollqeyki qoyta necesitaqkunata yanapanankupaq? ¿Atiwaqchu Jesuspa discipulon kanankupaq hukkuna yanapayta? Chaynaqa Bibliapa nisqanman hinayá ‘ama recelaspa qoykuy mañakusuqnikiman. Qoykuyá qoykunaykipaq kachkaptinqa’ (Prov. 3:27).