1, 2. ¿Imatam apostolkunaqa musyakunmanku karqa Jesusmanta?

JERUSALEN llaqtata cuidaqkunam llullu killata rikururqaku, cortepi kaqkunapas yacharuspankum nisan killa qallaykusqanta willakurqaku. Willakuq runakunapas chaymanta willakuytaqa chayllam cheqerachirqaku. Apostolkunaqa yacharqakum Pascua Fiesta punchaw hichpamusqanta. Hinaspapas musyakururqakum manaraq Pascua chayamuchkaptin Jerusalen llaqtaman Jesus riy munasqanmanta.

² Chay punchawkunapim Jesusqa apostolninkunapiwan Jerusalen llaqtaman qepallataña illasqanpi Perea llaqtapi kachkarqaku (Mat. 19:1; 20:17, 29; Mar. 10:1, 32, 46). Nisan killapa punta kaq punchawninmantaqa, chunka kimsayoq punchawkuna pasaytam Pascua Fiestaqa ruwakunan karqa, chayqa kanan karqa 14 kaq punchawpa Inti seqaykuynintam.

3. ¿Imanasqam cristianokunapaqqa Pascuamanta yachayqa ancha allin?

³ Pascua Fiestawan tupaq Señorpa Santa Cenanqa kay watapim apakunqa 14 abril killapi Inti seqaykuyta. Cheqap cristianokunapaqwan Diosmanta yachay munaqkunapaqqa ancha allinmi chay punchawqa kanqa. ¿Imanasqa? Chayta Jesus kamachisqanraykum. 1 Corintios 11:23-25 nisqanpim leenchik: “Entregasqa kasqan tutam Señor Jesus hapiykurqa tantata. Diosman graciasta qoykuspanmi pakiykurqa hinaspam nirqa: Mikuychik, kaymi cuerpoy qamkunarayku entregasqa. Kaynatam rurankichik qamkunapas yuyariwanaykichikpaq”, nispa. Hina chaynallatam ruwarqa vasota hapiykuspanpas.

4. a) ¿Imakunatam tapukunanchik Jesuspa wañukusqan yuyariymanta? b) ¿Imaynatam tanteanku Jesuspa wañukusqan punchaw sapa wata haykapi kananmanta? (Qaway, “2014 watapi Jesuspa wañukusqanta yuyarinapaq” niq recuadrota.)

⁴ Jesusqa watapi huk kutillata chayta ruwanankupaqmi kamachirqa, yaqapaschá qamqa chaypi kayta munachkanki. Chayraykum sapakama tapukunanchik: “¿Imaynatam  chay tutapaq preparakuyman? ¿Imakunatam chaypi servichikunqaku? ¿Imaynataq chay huñunakuy kanqa? ¿Imanasqataq chay huñunakuy, mana qonchuyoq tanta hinaspa vinoqa ancha allin ñoqapaq?”, nispa.

5. ¿Pascua Fiestapaq imakunata alistanankupaqtaq Jesusqa apostolninkunata kamachirqa?

⁵ Pascuata maypi ruwanankupaq apostolninkunata Jesus kamachispanqa, manam cuartota suma-sumaqta allichanankupaqchu nirqa. Payqa munarqa limpio hinaspa lliw paykuna yaykunanpaq hinalla kanantam (leey Marcos 14:12-16). Apostolninkunaqa mana qonchuyoq tantata hinaspa vinotam alistananku karqa. Pascua mikuyta cenaruptinkuñataqmi Jesusqa tantamantawan vinomanta rimayta qallaykurqa. Chaykunatam Jesuspa wañukusqanta yuyarispanku servichikunanku karqa.

6. a) ¿Imatam tantamanta Jesus nirqa Pascuata ruwaruptinku? b) ¿Ima tantatam servichikunku?

⁶ Chay Pascua Fiestapi kaq Jesuspa apostolnin Mateom chaymanta qepaman kaynata qellqarqa: “Jesus[mi] tantata hapiykuspan Diosman graciasta qorqa hinaspam pakiykuspan discipulonkunaman aypurqa: Chaskispa mikuychik, kaymi cuerpoy”, nispa (Mat. 26:26). Chay ‘tantaqa’ mana qonchuyoqmi karqa, chaynatam Pascuapaq servichikuqku (Ex. 12:8; Deut. 16:3). Chayqa ruwasqa karqa yakuyoq trigo harinamantam, manam hinarqakuchu qonchuta, kachita hinaspa hukkunatapas. Mana qonchuyoq kasqanraykum karqa llaspalla, chaki hinaspa chaylla pakikuq. Kunan tiempopiqa, congregacionpi ancianokunam huk kaqninta ninqa manaraq chay huñunakuy chayamuchkaptin chay tantata yakuyoq trigo harinamanta ruwananpaq, chaytaqa ruwanqa as aceitellawanmi. (Mana trigo harina kaptinqa, arroz, cebada, sara otaq huk harinamantam ruwanman.)

7. ¿Imayna vinotam Jesus servichikurqa, hinaspa ima vinokunatam kunan servichikuchwan?

⁷ Mateoqa nirqataqmi: “Vasotapas hapiykuspanmi Diosman graciasta qorqa hinaspam paykunaman haywarqa: Llapaykichik tomaychik”, nispa (Mat. 26:27, 28). Chay hapisqanqa vinoyoq vasom karqa (chay vinoqa manamá uvaspa yakullanchu kanman karqa aswanqa poqosqañam, chay tiempopaqqa achka killakunañam pasarurqa uvas cosechasqankumantaqa). Egiptopi chayllaraq Pascua Fiestata  ruwasqankupiqa manam vinotaqa servichikurqakuchu, chayna kaptinpas Jesusqa manam harkakurqachu Pascuapi vinota tomanankutaqa. Payqa servichikurqam Señorpa Santa Cenanpi. Chayraykum cristianokunaqa Jesuspa wañukusqanta yuyarinapaq huñunakuypi servichikunchik. Ichaqa, ¿ima vinotam servichikunanchik? Jesuspa yawarninwan allinta tupananpaqqa, chay vinoqa manam imawanpas yapasqachu kanan. Puka kaptinqa ima vinotapas servichikuchwanmi, ichaqa beaujolais, borgoña otaq quianti nisqa vinokunam kanan, servichikuchwantaqmi wasipi ruwasqa vinotapas.

8. ¿Imanasqataq cristianokunaqa tantawan vino imawan tupasqanmanta astawan yachayta munanchik?

⁸ Pablopa nisqanman hinaqa, manam apostolkunallachu Señorpa Santa Cenantaqa ruwananku karqa aswanqa lliw cristianokunam. Pablom Corinto llaqtapi cristianokunaman kaynata qellqarqa: “Kay yachachisqaytaqa kikin Señormantam chaskirqani. Entregasqa kasqan tutam Señor Jesus hapiykurqa tantata. Diosman graciasta qoykuspanmi pakiykurqa hinaspam nirqa: Mikuychik, kaymi cuerpoy qamkunarayku entregasqa. Kaynatam rurankichik qamkunapas yuyariwanaykichikpaq”, nispa (1 Cor. 11:23, 24). Chayraykum kunankama cristianokunaqa sapa wata Jesuspa wañukusqanta yuyarinchik hinaspapas tantawan vino imawan tupasqanmantam astawan yachayta munanchik.

9. ¿Imatam runakunaqa piensanku Jesuspa servichikusqan tantamanta?

⁹ Religionniyoq achka runakunam ninku Jesusqa “kaymi cuerpoy” nisqanwan cheqap cuerponmanta rimasqanta, chaymi paykunaqa piensanku tantaqa Jesuspa aychanman tikrakusqanta. Ichaqa manamá chaynachu. * Jesusqa apostolninkunapa ñawpaqninpim  kachkarqa, chaypitaqmi kachkarqa mana qonchuyoq tantapas. Chaynaqa, Jesusqa tupachispallam rimachkarqa, chayna tupachispanmi rimarqa huk kutikunapipas (Juan 2:19-21; 4:13, 14; 10:7; 15:1).

10. ¿Imawanmi tupan Jesuspa wañukusqanta yuyarisqanchik punchawpi tantaqa?

¹⁰ Apostolkunapa qawasqanku tantaqa Jesuspa cuerponwanmi tuparqa. Ñawpaq watakunapim cheqap cristianokunaqa piensarqaku tantaqa hanaq pachapaq akllasqa cristianokunawan tupasqanta, paykunatam Biblia sutichan “Cristopa cuerpon” nispa. Chaynataqa piensarqaku tantata Jesus pakisqanraykum, Bibliam ichaqa nin tullunkunapas mana pakisqa kasqanmanta (Efes. 4:12; Rom. 12:4, 5; 1 Cor. 10:16, 17; 12:27). Ichaqa, Bibliata allinta estudiaspankum musyakururqaku chay tantaqa Jesuspa cuerponwan tupasqanta. Bibliaqa sutillatam willakun aycha cuerponpi Jesus imayna ñakarisqanmanta hinaspa qerupi warkusqa wañukusqanmantapas. Chaymi wañukusqanta yuyarisqanchik punchawpi tantaqa ñoqanchikrayku qosqan cuerponwan tupan (1 Ped. 2:21-24; 4:1; Juan 19:33-36; Heb. 10:5-7).

11, 12. a) ¿Imatam Jesusqa nirqa vinomanta? b) ¿Imawanmi tupan Jesuspa wañukusqanta yuyarisqanchikpi vinoqa?

¹¹ Tanta ima ninan kasqanta yachasqanchikmi yanapawanchik vinomanta Jesuspa ima niy munasqanta entiendenanchikpaq. Bibliam nin: “Cenayta tukuruspanñataqmi vasota hapiykuspan nirqa: Kay vasoqa yawarniywan rurasqay mosoq contratom”, nispa (1 Cor. 11:25). Jesusqa vaso nispanqa rimachkarqa vasopi kaq vinomantam. Hinaptinqa, ¿chay vinowanchu mosoq contratota ruwarqa? Manamá. Chay vinoqa Jesuspa yawarninwanmi tupachisqa karqa.

¹² Marcos libropim tarinchik Jesuspa kayna nisqanta: “Kaymi yawarniy, kay mosoq contrato cheqapyachiq yawarniytam chaqchusaq achka runakunapaq” (Mar. 14:24). Jesuspa yawarninmi chaqchusqa karqa achka runakunapa huchanku pampachasqa kananpaq (Mat. 26:28). Chaymi vinoqa Jesuspa yawarninwan tupan. Chay yawarnintakama ‘huchanchikkunata pampachaykuwasqanchikraykum’ salvasqa kayta atichwan (leey Efesios 1:7).

13. ¿Imaynatam Jesuspa wañukusqanta sapa wata yuyarinchik?

¹³ Jehova Diospa testigonkunawan Jesuspa wañukusqanta yuyarinapaq huñunakuyman chayllaraq rispayki, ¿imatam rikunki? Chay huñunakuypa apakunan wasiqa limpio hinaspa sumaq allichasqam kanqa. Ichapas waytakunawan hinasqa kanqa, ichaqa manam ancha chaninniyoq kaqkunawan hinasqachu nitaq fiestapaq hina allichasqachu kanqa. Huk ancianom pisi rimayllapi yachachinqa Jesuspa wañukusqanmanta Bibliapa ima nisqanta. Chay yachachikuymi yanapawasun ñoqanchikrayku Jesucristopa wañukusqanta entiendenapaqwan chaninchanapaq (leey Romanos 5:8-10). Chaymantapas willakunqataqmi Bibliapa nisqanman hina cristianokunapaq iskay suyakuymantapas.

14. ¿Ima iskay suyakuymantam yachasun Jesuspa wañukusqanta yuyarinapaq huñunakuypi?

¹⁴ Aslla cristianokunam hanaq pachaman rinqaku Cristowan kuska kamachimunankupaq, chay cristianokunamanta wakinmi kanku apostolkuna (Luc. 12:32; 22:19, 20; Apoc. 14:1). Diosman sonqo wakin cristianokunañataqmi kay Pachapi wiñaypaq kawsanankupaq suyakuyniyoq kanku. Hinaptinmi Diospa munaynin ruwakunqa kay Pachapi hanaq pachapi hina, chaytam lliw cristianokuna achka watakunaña mañakuchkanku (Mat. 6:10). Bibliam willawanchik sumaqllaña huertapi imayna kawsakunankumanta (Is. 11:6-9; 35:5, 6; 65:21-23).

15, 16. Jesuspa wañukusqanta yuyarinapaq huñunakuypi, ¿imatam tantawan ruwanqaku?

¹⁵ Yachachikuypa tukupayninpiñataqmi ancianoqa ninqa Jesuspa kamachisqanman hina Señorpa Santa Cenanta imayna  ruwanamanta. Yachamusqanchikman hinam mana qonchuyoq tantatawan vinota servichikuna kanqa. Chaykunaqa yachachiqpa waqtanpim mesapi kanqa. Paymi Bibliapi leenqa Jesus apostolninkunawan chayta ruwaspan ima nisqantawan imayna ruwasqanta. Ichapas leenqa Mateo libropa kayna nisqanta: “Jesus[mi] tantata hapiykuspan Diosman graciasta qorqa hinaspam pakiykuspan discipulonkunaman aypurqa: Chaskispa mikuychik, kaymi cuerpoy”, nispa (Mat. 26:26). Jesusmi mana qonchuyoq tantata pakiykurqa waqtanpi kaq apostolninkunaman qonanpaq. Abril killapa 14 punchawninpim qamqa qawanki platopi mana qonchuyoq pakisqaña tantakunata.

¹⁶ Achka platokunatam servichikuna kanqa huñunakuypi lliw kaqkunaman tiempollanpi haywanapaq. Chaypaqqa huk kaqnin iñiqmasinchikmi Diosta puntata pisillapi mañakunqa, chaymantañataqmi mana pitapas sasachaspalla platokunata haywanqaku. Chay tantataqa aschallam mikunqaku otaq manapas, chaynam karqa 2013 watapi Jesuspa wañukusqanta yuyarinapaq huñunakuykunapipas.

17. Jesuspa ruwasqanman hina, ¿imatam vinowan ruwanqaku?

¹⁷ Qatiqninmanñataqmi Mateo libropa kayna nisqanta ruwanqaku: “[Jesusqa] vasotapas hapiykuspanmi Diosman graciasta qorqa hinaspam paykunaman haywarqa: Llapaykichik tomaychik. Kaymi contrato rurasqaypa yawarniy. Chaqchusqam kanqa achka runakunapa huchankunata pampachanaypaq”, nispa (Mat. 26:27, 28). Kaypi nisqanman hinam, vinota haywanankupaqpas puntataqa huk kaqnin iñiqmasinchik Jehova Diosta mañakunqa, chaymantañataqmi huñunakuypi kaqkunaman vinoyoq vasokunata haywanqaku.

18. ¿Imanasqataq Jesuspa wañukusqanta yuyarinapaq huñunakuyman riyqa ancha allin?

¹⁸ Jesuspa nisqanman hinaqa, hanaq pachaman rinankupaq suyakuyniyoq cristianokunallam tantaqa mikunanku chaynataq vinotapas tomananku (leey Lucas 22:28-30; 2 Tim. 4:18). Chayna kasqanraykum chay huñunakuypi yaqa llapallan kaqkunaqa respetowan qawaylla-qawanqaku. Chayna kaptinpas, paykunapaqqa ancha allinmi Jesuspa wañukusqanta yuyarinapaq huñunakuyman riyqa. Chaywanmi qawachinku ñoqanchikrayku Jesuspa wañukusqanta ancha chaninchasqankuta. Chay huñunakuypi kaspankum yuyaymananmanku Jesuspa wañukusqanwan ima bendicionkuna suyawasqanchikmanta. Suyankutaqmi hichpaykamuq “hatu-hatun ñakariymanta” salvakuq ‘achkallaña runakunawan’ kuska kaytapas. Paykunaqa kanqaku ‘pachankutapas taqsaspa Carneropa yawarninwan yuraqyachiq’ Jehova Diospa serviqninkunam (Apoc. 7:9, 14-17).

19. ¿Imatam ruwasunchik Jesuspa wañukusqan punchawta yuyarinapaq, hinaspapas imatam ruwananchik yanapachikunapaq?

¹⁹ ¿Imatam enteron Pachapi Jehova Diospa testigonkunaqa ruwasunchik chay huñunakuypaq? Chay huñunakuypaq iskay-kimsa semana ñawpaqtam atisqanchikman hina achka runakunata invitasunchik. Chaymantapas, manaraq chay huñunakuy chayamuchkaptinmi Bibliata leesunchik 33 watapi Jesus ima ruwasqanmantawan chay punchawkunapi ima pasakusqanmanta. Tukuy atisqanchiktamá ruwananchik chay huñunakuypi kananchikpaq. Kallpanchakunanchiktaqmi takipas manaraq qallarichkaptin chayanapaq, chaynapim lliw invitasqanchik runakunata chaskiyta atisun hinaspapas qallariyninmantapacha tukuy nisqankunatam allinta uyarisun. Allintataqmi yanapachikusun chay huñunakuypi textokunata leena kaptin ñoqanchikpas Biblianchikpi maskaspanchik. Chaymantapas, chay huñunakuypi kasqanchikwanmi ñoqanchikrayku Jesuspa wañukusqanta sonqomanta chaninchasqanchikta qawachisun, qawachisuntaqmi Jesuspa kayna nisqanta kasukusqanchiktapas: “Kaynatam rurankichik qamkunapas yuyariwanaykichikpaq” (1 Cor. 11:24).