1, 2. a) ¿Imatam ruwanqa Diospa Munaychakuyninqa? b) ¿Imanasqam manapuni iskayrayanchikchu hamunanmanta?

PUNTA cristianokunapa tiemponpim 31 watapi, Jesusqa Capernaum llaqtapi kaq huk kaqnin orqopi kachkaspan qatiqninkunata yachachirqa Diosta kaynata mañakunankupaq: “Munaychakusqayki hamuchun”, nispa (Mat. 6:10). Kunanqa achka runakunam iskayrayanku Diospa Munaychakuynin otaq Gobiernon hamunanmanta. Ñoqanchikmi ichaqa manapuni iskayrayanchikchu.

² Chay Munaychakuynintam Jehova Diosqa servichikunqa hanaq pachapi chaynataq kay Pachapi churinkuna huk sonqolla payta yupaychanankupaq. Chayna kananpaq Diospa munayninqa ruwakunqapunim (Is. 55:10, 11). Arí, ¡Jehova Diosqa kunan tiempopipas Rey kasqantam qawachiwanchik! Chayna kasqantam yachanchik pasaq pachak watakunapi imakuna pasakusqanwan. Diosqa millonnintin serviqninkunaraykum hatu-hatun admirakuypaq llamkaykunata ruwachkan (Zac. 14:9; Apoc. 15:3). Ichaqa kaytam yuyarinanchik: Jehova Diospa Rey kasqanqa manamá chaynallachu Jesuspa mañakusqan Diospa Munaychakuyninwanqa. ¿Imanasqataq mana chaynallachu hinaspa imanasqataq ancha allin chaymanta yachayninchikqa?

3. a) ¿Haykapi hinaspa maypitaq Jesusqa kamachiyta qallaykurqa? b) ¿Imanasqam niwaq Diospa Munaychakuynin 1914 watapi kamachiyta qallaykusqanmanta? (Qaway uray patanpi willakuyta.)

³ Manaraq 1900 wata chayamuchkaptinmi, Diosmanta willakuq  Danielpa 2.500 wata ñawpaqtaraq willakusqan astawan entiendekuyta qallaykurqa. Danielmi kaynata willakurqa: “Chay hamuq reykuna gobiernachkaptinmi Hanaq Pacha Dios hatarichinqa mana tuñichiy atina gobiernota”, nispa (Dan. 2:44). Biblia Estudiaqkunam achka watakuna ñawpaqtaraq nirqaku 1914 watapi chay Diospa Gobiernon hanaq pachapi kamachiyta qallaykunanmanta. Chay tiempopi runakunaqa manam iskayrayarqakuchu tukuy imapas aswan allin kananmantaqa. Qellqaq huk runam kaynata nirqa: “1914 kaq watapi runakunaqa kusikuywanmi hamuq tiempokunata suyarqaku”, nispa. Ichaqa, chay watallapim Enteron Pachapi Punta Kaq Hatun Guerra qallaykurqa. Bibliapa willakusqanmá cumplikuyta qallaykurqa. Chaymanta qepaman muchuykuna, terremotokuna hinaspa onqoykuna kasqanmi, sutillata qawachirqa 1914 watapi Jesucristo hanaq pachapi Diospa Munaychakuyninpi otaq Gobiernonpi kamachiyta qallaykusqanmanta. * Jehova Diosqa Churin Jesucristota Rey kananpaq churaruspanmi Rey kasqanta qawachirqa.

4. a) ¿Imatam Jesusqa ruwarqa Rey karuspan? b) ¿Imatawanmi chaymanta ruwarqa?

⁴ Jesus Rey karuspanqa Taytanpa contranpi churakuruq Satanaswanmi pelearqa. Hinaptinmi Jesusqa angelninkunawan kuska hanaq pachamanta Satanastawan demoniokunata wischuramurqaku. Chayraykum hanaq pachapi kusikuy karqa, kay Pachapim ichaqa mana haykapipas rikukusqan llumpay sasachakuykuna qallaykurqa (leey Apocalipsis 12:7-9, 12). Chaymantañataqmi, Jesusqa kay Pachapi qatiqninkuna Diospa munayninta ruwanankupaq iñiyninkuta chuyanchayta qallaykurqa. Qallaykurqataqmi yachachiyta hinaspa Diospa munayninta imayna ruwanankupaq yanapaytapas.

5. ¿Imam pasakurqa 1914 watamanta 1919 watapa qallariyninkama?

⁵ Hanaq pachamanta Satanastawan demoniokunata Jesus wischuramusqan qepamanmi, Jehova Diosqa Jesusta kamachirqa qatiqninkunapa iñiyninku imayna kasqanta qawaspan chuyanchananpaq. Chayna chuyanchasqa kananmantam Malaquias willakurqa (Mal. 3:1-3). Chayqa apakurqa 1914 watamanta 1919 watapa qallariyninkamam. * Hanaq pachapi angelkunapiwan huk sonqolla Diosta servinapaqqa chuyam kananchik (1 Ped. 1:15, 16). Manamá chaqrukunanchikchu religionkunapa pantay yachachikuyninkunamanqa nitaq kay Pachapi gobiernokunamanpas.

6. a) ¿Piwanmi Diosqa mikuchichkaq hina iñiyninchikpi yanapawanchik? b) ¿Imanasqam chayqa ancha allin ñoqanchikpaq?

⁶ Chaymantañataqmi Jesusqa Rey kaspan “allin yuyayniyoq confianza sirviente[ta]” akllarurqa. Chay akllasqan sirvientem ‘chulla kanchallapi’ kaq qatiqninkunata tiempollanpi mikuchichkaq hina iñiyninkupi yanapanan karqa (Mat. 24:45-47; Juan 10:16). 1919 watamantapacham chay confianza sirvienteqa “sirvientemasinkunata” tiempollanpi mikuchichkaq hina iñiyninkupi yanapachkan. Paykunamanta achkallaña yanapakuykuna chaskisqanchikmi iñiyninchikta kallpanchawanchik, yanapawanchiktaqmi iñiyninchikpi, kawsakuyninchikpi yuyayninchikpi hinaspa cuerponchikpi chuya kanapaqpas. Allintataqmi yachachiwanchik hinaspa yanapawanchik enteron Pachapi Diosmanta allinta willakunapaqpas. ¿Allintachu yanapachikuchkanchik chay qowasqanchik yanapakuykunawan?

7. a) ¿Ima ancha allin ruwaytam Jesusqa kay Pachapi kachkaspan qallaykurqa? b) ¿Haykapikamataq chayta ruwananku karqa?

⁷ Kay Pachapi Jesus kachkaspan Diospa munayninta ruwayta qallaykuspanmi, kaynata nirqa: “Diospa munaychakusqanmanta allin noticiataqa wakin llaqtakunapipas willakunaymi, chaypaqmi ñoqataqa kachamuwarqa”,  nispa (Luc. 4:43). Diosmanta willakuynintam Jesusqa imamantapas puntapi churarqa, chaytaqa ruwarqa kimsa wata partenkamam. Qatiqninkunamanpas chaynallatam kamachirqa, nirqam: “Rispayá willakamuychik: ‘Diospa munaychakunanmi hichparamunña’”, nispa (Mat. 10:7). Kawsariramusqan qepamanpas Jesusqa chay willakuyta “kay pachapa cantonkama” qatiqninkuna apanankumantam willakurqa (Hech. 1:8). Nirqataqmi tukupay tiempokama chay llamkaypi qatiqninkunata yanapananmanta (Mat. 28:19, 20, NM).

8. ¿Imaynatam Jesusqa Rey kaspan kay Pachapi qatiqninkunata kallpancharqa Diosmanta willakunankupaq?

⁸ “Diospa munaychakusqanmanta kay allin noticiam” 1919 watamantapacha astawan apakurqa (Mat. 24:14). Jesusmi hanaq pachapi Rey kaspan kamachichkarqa, hinaspam kay Pachapi as qatiqninkunata chuyanchaspan huñururqa. Kay qatiqninkunam enteron Pachapi willakunankupaq Jesuspa kamachisqanta kusikuywan kasukuyta qallaykurqaku (Hech. 10:42). Chayna kasqanmi sutilla qawakurqa 1922 watapa septiembre killanpi, chaypim yaqa 20.000 runakuna Cedar Point (Ohio, Estados Unidos) llaqtapi huk law nacionniyoqkunapaqwan asambleapi huñunakurqaku. Maynatachá kusikurqaku Rutherford iñiqmasinchik “Diospa Gobiernon” nisqa yachachikuypi kaynata niptin: “¡Qawaychik, Reyqa kamachichkanñam! Qamkunam kankichik willakuqninkuna. Chaynaqa willakuychik, willakuychik, willakuychik Reymantawan gobiernonmanta”, nispa. ¿Imatam uyariqkunaqa ruwarqaku? Qatiqnin punchawllatam iskay waranqa cristianokuna Diosmanta willakurqaku, wakinñataqmi chayta ruwanankupaq karuta illarqaku chay asambleapa kasqan lawmanta. Huk iñiqmasinchikmi nirqa: “¡Manam haykapipas qonqasaqchu Diospa Gobiernonmanta willakunaykupaq kallpanchawasqankumanta nitaq chaypi kaqkuna kusisqallaña tarikusqankumantapas!”, nispa. Chaynam achka iñiqmasinchikkunapas tarikurqaku.

9, 10. a) ¿Ima yanapakuykunam kan Diosmanta willakuqkuna allin yachachisqa kanankupaq? b) ¿Imaynatam chay escuelakunawan qampas yanapasqa karqanki?

⁹ Tiempopa risqanman hinam 1922 watapaqqa, 58 nacionkunapi 17.000 masninña Diosmanta willakuqkunaqa karqaku. Ichaqa willakunankupaqqa manam allin yachachisqachu karqaku. Jesusqa allintamá qatiqninkunataqa yachachirqa imamanta, maypi hinaspa imaynata Diosmanta willakunankupaq (Mat. 10:5-7; Luc. 9:1-6; 10:1-11). Chayna ruwasqanman hinam, kunan tiempopipas Jesusqa lliw qatiqninkunaman yanapakuykunata qochkan Diosmanta allinta willakunankupaq (2 Tim. 3:17). Chaytam ruwan congregacionnintakama. Rimarisun Diosmanta Yachachinapaq Escuelamanta, chay escuelawanmi allin yachachisqa kanku enteron Pachapi 111.000 masnin congregacionkunapi kaq iñiqkuna. Huk rimaypiqa qanchis millon masnin iñiqkunam allin yachachisqa kachkanku lliw runakunaman Diosmanta allinta willanankupaq (leey 1 Corintios 9:20-23).

¹⁰ Chaymantapas, achka escuelakunam kan congregacionpi ancianokuna, precursorkuna,  solterokuna, casarasqakuna, misionerokuna, congregacionkunata watukuq ancianokuna hinaspa Betel wasimanta encargakuqkuna señorankupiwan chaypi allin yachachisqa kanankupaq. * Casarasqa warmi-qaripaq Bibliamanta Escuelaman riq cristianokunam agradecekuspanku kaynata nirqaku: “Allin yachachisqa kasqaykuqa allintam yanaparuwarqaku Jehova Diosta astawan kuyanaykupaq hinaspa hukkunatapas allinta yanapanaykupaq”, nispa.

11. ¿Imanasqam Diospa serviqninkunaqa Diosmanta hinalla willakuyta atinchik Satanas contranchikpi hoqarikuptinpas?

¹¹ Satanasqa Diosmanta willakunapaq hinaspa hukkunaman yachachinapaq kallpanchakusqanchiktaqa qawachkanmi. Payqa manam munanchu willakunanchiktaqa, chaymi harkakunanpaq tukuy imata servichikun. Ichaqa manamá atinqachu. Jehova Diosqa Churintam “hatuncharun gobiernaqkunapas, kamachikuqkunapas, atiyniyoqkunapas, munaychakuqkunapas” mana haypay atinankama (Efes. 1:20-22). Chayna kasqantam Jesusqa servichikun qatiqninkunata waqaychananpaqwan pusananpaq. Chayna ruwasqanqa ancha allinmi Taytanpa munaynin ruwakunanpaq. * Diosmanta allin noticiaqa hinallam willakusqa kachkan, chaymi allin sonqoyoq millonnintin runakuna Jehova Diosmanta yachachkanku. ¡Mayna kusikunapaqmi chay llamkaypi yanapakuyqa!

12. Diospa Gobiernon 1914 watapi kamachiyta qallaykusqanmantapacha, ¿imakunataq Diospa llaqtanpi karqa?

¹² Diospa Gobiernon 1914 watamantapacha kamachiyta qallaykuptinmi, Jesusqa qatiqninkunata aswan allinta kunankama yanaparqa Taytanpa munayninta imayna ruwanankupaq (leey Isaias 60:17). 1919 watapim sapa congregacionkunapi huk cristiano akllasqa karqa predicacionmanta encargakunanpaq. 1927 watapiñataqmi sapa domingo punchaw wasin-wasin Diosmanta willakunapaq qallarichisqa karqa. Chaymantapas, ¡maynatachá kusikurqaku iñiqmasinchikkuna 1931 watapi Jehova Diospa testigokuna niq sutiwan reqsichikuyta qallaykuspankuqa! (Is. 43:10-12.) 1938 watapiñataqmi makinkuta hoqarispanku congregacionpi punta apaqkunata akllayninku tukururqa. Chaymantapacham punta apaqkunataqa Bibliapa nisqanman hinaña akllananku karqa. 1972 watapiñataqmi manaña chullallañachu congregacionpi punta apaqqa karqa, aswanqa achka ancianokunañam. Bibliapa nisqanman hina pipas anciano otaq siervo ministerial kanankupaqña kaqkunam, kallpanchasqa karqaku ‘Diospa ovejankunata michiypi’ yanapakunankupaq (1 Ped. 5:2). 1976 watapiñataqmi Diospa llaqtanpi punta apaqkuna llamkayninkuta soqtaman rakinakururqaku, chaynapi enteron Pachapi Diospa Gobiernonmanta willakuy allinta apakunanpaq. Qawasqanchikman  hinaqa, Rey Jesusqa pisi-pisimantam qatiqninkunata allintapuni yanaparqa Diospa munayninta imayna ruwanankupaq.

13. ¿Imaynatam yanapasurqanki pasaq pachak watapi Diospa Gobiernon tukuy ruwasqanqa?

¹³ Yuyaymanay pasaq pachak watakunapi Rey Jesus imakuna ruwasqanpi. Payqa qatiqninkunapa iñiyninkutam chuyancharqa Diospa sutinta apanankupaq. Yanaparqataqmi Diospa Gobiernonmanta willakuy 239 nacionkunapi apakunanpaq, hinaspapas millonnintin runakunatam yanaparqa Jehova Diosta reqsinankupaq. Huñurqataqmi qanchis millon masnin qatiqninkunatapas, paykunaqa Jehova Diospa munayninta ruwanankupaqmi kikinkumanta entregakunku (Sal. 110:3). Arí, Jehova Diosqa Rey Jesuswanmi hatun hinaspa admirakuypaq kaqkunata ruwarqa. Chayna kaptinpas, ¡achkaraqmi ruwananpaqqa kachkan!

14. a) ¿Imatam Diosta mañakuchkanchik: “Munaychakusqayki hamuchun”, nispaqa? b) ¿Ima nintaq 2014 watapaq textoqa, hinaspa imanasqam allinpuni?

¹⁴ Qawamusqanchikman hinaqa, 1914 watapim Jehova Diosqa Gobiernonpi Churinta Rey kananpaq churarurqa. Chayna kaptinpas, “munaychakusqayki hamuchun” niq mañakuyqa manaraqmi tukuypichu cumplikurqa (Mat. 6:10). Bibliaqa willakurqañam Jesus ‘enemigonkunapa chawpinpi munaychakuchkananmanta’ (Sal. 110:2, NM). Satanaspa munaychakusqan kay Pachapi gobiernokunaqa hinallam Diospa Gobiernonpa contranpi kachkanku. Diospa Munaychakuynin hamunanta mañakuspaqa, huk rimaypiqa Jehova Diostam mañakuchkanchik Jesus hinaspa paywan kuska kamachinankupaq 144.000 reykuna kay Pachapi lliw gobiernokunatawan contranpi hoqarikuqkunata chinkachinanpaq. Hinaptinmi Daniel 2:44 willakusqan cumplikunqa, chaypim nin: “Chay gobiernom llapallan wakin gobiernokunata ñutupaspan chinkachinqa”, nispa. Arí, Diospa Gobiernonmi lliw contranpi gobiernokunata chinkachinqa (Apoc. 6:1, 2; 13:1-18; 19:11-21). Chayqa ñam pasakunanpaqña kachkan. Kay 2014 watawanqa ñamá pachak wataña Diospa Gobiernonpa kamachisqanqa. Chaymi allinpuni kanqa Mateo 6:10 nisqanman hina kay watapaq textoqa, ninmi: Gobiernoykiyá hamuchun, nispa.

15, 16. a) ¿Imakunam pasakunqa waranqa wata Jesuspa kamachikuyninpi? b) ¿Imatam Rey Jesusqa kamachikuyninpa tukuyninpi ruwanqa? c) ¿Imaynatam chayta ruwaptin Jehova Diospa munaynin ruwasqa kanqa?

¹⁵ Rey Jesucristo kay Pachapi Diospa contranpi kaqkunata puchukarachispanmi, Satanastawan demoniokunata uku pozoman wischuykunqa waranqa wata chaypi kanankupaq (Apoc. 20:1-3). Chaynata ruwaspanmi Diospa Gobiernonqa Jesuspa wañukusqanpa valorninta servichikunqa, hinaspapas wiñaypaqmi Adanmanta chaskisqanchik huchata chinkachinqa. Jesusqa millonnintin wañukuq runakunatam kawsarichinqa hinaptinmi tukuy hinastinpi Jehova Diosta reqsinankupaq yachachisqa kanqaku (Apoc. 20:12, 13). Eden huerta hinam, enteron kay Allpa pacha sumaqllaña huertaman tikrakunqa. Kasukuq runakunañataqmi mana pantaqña kanqaku.

¹⁶ Waranqa wata Jesucristopa kamachikuynin tukuruptinmi, Jehova Diospa munayninqa ruwasqa kanqa. Hinaptinmi Jesusqa Taytanmanña munaychakusqanta qoykunqa (leey 1 Corintios 15:24-28). Manañam runakunaqa pitapas valekunqakuñachu Jehova Diosman asuykunankupaqqa. Hanaq pachapi hinaspa kay Pachapi lliw churinkunam huk sonqolla Jehova Diosta yupaychanqaku.

17. ¿Imata hinalla ruwanapaqmi kallpanchasqa kachkanchik?

¹⁷ Pasaq pachak watakuna Jesuspa kamachisqanqa sutillatam qawachiwanchik Jehova Dios kamachiq kasqanmanta hinaspa kay Pachapaq munaynin ruwakunanmantapas. Chaynaqa, hinallayá kasukuq serviqninkuna kasunchik, hinallataqyá Diospa Gobiernonmantawan Reyninmantapas willakusun. Arí, ¡manamá iskayrayanchikchu “munaychakusqayki hamuchun” nispa mañakusqanchik ruwasqa kananmantaqa!