Rey Davidmi nirqa: “Diosnilláy, munachkanim munallasqaykiman hina rurallayta. Diosnilláy, sonqollaypim waqaychani qampa yachachisqaykita”, nispa (Sal. 40:8). Kawsakuyninpi llumpay sasachakuykunapi tarikuspanpas, Davidqa Diospa munaynin ruwaytam anchata munarqa. Ichaqa manam payllachu Diostaqa kusikuywan yupaycharqa.

Apostol Pablom qawachirqa Salmo 40:8 nisqan Mesiasmanta otaq Cristomanta rimasqanta. Paymi nirqa: “Kay pachaman Cristo hamuspan[mi] Diosta nirqa: Wañuchisqa animalkunatam mana munarqankichu. Kawsaymanta ofrendakunatam mana munarqankichu, aswanqa cuerpotam rurapuwarqanki. Manam munarqankichu lliw kañasqa animalkunatapas. Manam munarqankichu hucharayku ofrendatapas. Chaymi nirqani: ‘Bibliapim ñoqamanta qellqasqa kachkan, chayman hinam Dioslláy, hamurqani munasqaykita ruranaypaq’”, nispa (Heb. 10:5-7).

Kay Pachapi Jesus kachkaspanmi Diospa unanchasqankunawan kusikurqa. Kusikurqataqmi amistadninkunawan kaspa chaynataq kuyasqan runakunawan mikuspanpas (Mat. 6:26-29; Juan 2:1, 2; 12:1, 2). Ichaqa, aswan allin hinaspa ancha kusikunapaq ruwayninqa karqa hanaq pachapi kaq Taytanpa munayninta ruwaymi. Kikinmi nirqa: “Mikuyniyqa kachamuwaqniypa munasqanta ruwaymi, hinaspa kamachiwasqanta tukuymi”, nispa (Juan 4:34, NM; 6:38). Jesusmantam qatiqninkunaqa yacharqaku cheqap kusikuyqa Diospa munaynin ruwaymanta kasqanta. Chaymi kusikuywan Diospa munayninmanta runakunaman willakurqaku (Luc. 10:1, 8, 9, 17).

Jesusmi qatiqninkunata kamachirqa: “Llapallan nacionpi runakunaman rispayá willamuychik qatiqniykunaña kanankupaq hinaspayá bautizamuychik Taytapa, Churipa hinaspa Chuya Espiritupa sutinpi. Yachachimuychikyá qamkunaman tukuy ima kamachisqayta kasukunankupaq. Sapa punchawmi  ñoqaqa qamkunawan kasaq kay pacha puchukanankama”, nispa (Mat. 28:19, 20). Chayna nisqanta ruwanapaqqa lliw runakunamanmi willananchik maypiña tarikuptinkupas, hinaspapas kaqmanta watukuspam Bibliamanta estudiachinanchik. Chaynata ruwaspam ancha kusisqa tarikusun.

Diosmanta willakusqanchikta runakuna uyariptinkupas otaq mana uyariptinkupas, chay ruwayninchikta imayna qawayninchikmi yanapawasun hinalla kusisqa ruwanapaq. ¿Imanasqataq Diosmanta hinalla willakunchik achka runakuna mana uyariyta munaptinkupas? Yachanchikmi Diospa munayninmanta willakuspa hinaspa runakunaman yachachispa Diosninchiktawan runamasinchik kuyasqanchikta. Ñoqanchikpawan runakunapa vidanmi peligropi kachkan (Ezeq. 3:17-21; 1 Tim. 4:16). Chayraykum qawasun achka iñiqmasinchikkunata kusikuywan hinalla Diosmanta willakunankupaq imakuna yanapasqanmanta.

Yaqa llapanpim sumaqta piensaspa tapukuykunata servichikuyqa ancha allin. Huk punchawmi Amalia sutiyoq iñiqmasinchik huk runata parquepi rikururqa periodico leechkaqta. Asuykuspanmi tapurqa sichu ima allin noticiallatapas leerusqanmanta. Manam niptinmi iñiqmasinchikñataq nirqa: “Ñoqam allin noticiakunata apamuchkayki. Chayqa Diospa Gobiernonmanta willakuymi”, nispa. Chaynata niykuptinmi Bibliamanta astawan yachayta munarqa. Amaliaqa chaynata ruwaspanmi parquepi kimsa runakunata Bibliamanta yachachiyta qallaykurqa.

Janice sutiyoq iñiqmasinchikmi llamkayninpi Diosmanta willakurqa. Willakuq qellqapi huk kaqnin yachachikuymi iskay llamkaqmasinkuna gustarurqa. Hinaptinmi Janiceqa sapa kuti chay qellqakuna lloqsimuptin apananpaq nirqa. Chaynatam ruwarqa chay llamkayninpi cuidaqwanpas, paypas anchatam munaq Willakuq hinaspa ¡Rikchariy! qellqakunapi yachachikuykuna leeyta. Chaymantapas huk llamkaqmi revistakuna mañakuyta qallaykurqa. Janiceqa 11 runakunamanmi sapa kuti revistakunata apan. Paymi nin: “¡Jehova Diosmi bendeciykuwan!”, nispa.

Congregacionkunata watukuq huk iñiqmasinchikmi Diosmanta willakuqkunata yuyarichirqa, wasin-wasin predicaspaqa huk punchaw kutimusaq nispalla ama pasakunamanta. Paymi nirqa chaynata ninamantaqa, wasiyoqta kaynata tapunanchikmanta: “¿Yachayta munawaqchu Bibliamanta imayna yachachisqaykuta?”, nispa. Otaq: “¿Imay punchawtaq hinaspa imay horataq tiempoyki kanman hinalla rimanapaq?”, nispa. Congregacionkunata watukuq iñiqmasinchikmi nirqa chaynata ruwaspanku watukusqan congregacionpi iñiqkuna 44 runakunata Bibliamanta estudiachiyta qallaykusqankumanta.

Ancha allintaqmi runakunaman chaylla otaq iskay-kimsa punchawllamanta kutiyninchikpas. ¿Imanasqa? Chaynata ruwaptinchikmi allin sonqoyoq runakunaqa musyanqaku Bibliata entiendenankupaq cheqaptapuni yanapay munasqanchikta. Huk señoratam  tapurqaku Jehova Diospa testigonkunawan Biblia estudiayta imanasqa qallaykusqanmanta, chaymi pay nirqa: “Estudiaytaqa qallaykurqani kuyakuyninta hinaspa yanapaway munasqanta qawaspaymi”, nispa.

Madaí sutiyoq iñiqmasinchikpas Precursorkunata Yanapaq Escuelaman risqan qepallamanmi 15 runakunata Bibliamanta estudiachirqa, hinaspapas 5 estudiaqkunatañam huk iñiqkunaman saqeykurqa. Wakin estudiaqkunaqa huñunakuykunaman riytam qallaykurqa. ¿Imataq Madaita yanaparqa achka runakunata Bibliamanta estudiachiyta qallaykunanpaq? Precursorkunapaq Escuelaman risqanpim yacharamurqa Bibliamanta yachay munaq runakunata yapamanta hinalla watukuy ancha allin kasqanmanta. Achka runakunata yanapaq huk iñiqmasinchikpas ninmi: “Runakuna Jehova Diosmanta yachanankupaqqa hinallam watukuna”, nispa.

Yachay munaqkunaman kaqmanta watukuspa estudiota qallarichinapaqqa anchatam kallpanchakunanchik. Kallpanchakusqanchikmi ichaqa mana yanqapaqchu kanqa. Sichu Diospa munayninmanta willakuypi astawan kallpanchakusun hinaspaqa runamasinchiktam yanapasun ‘cheqap yachachikuyta reqsinankupaq’, chaynapim salvakuytapas atinqaku (1 Tim. 2:3, 4). Ama iskayrayaychu: Diosmanta willakuyqa hinaspa runakunata Diosman qokunanpaq yanapayqa anchatam kusichiwasunchik.