1. ¿Imanasqam Diosmanta willakuspaqa runakunapaq allin kaqkunata ruwayninchikqa ancha allin? Rimarimuy casarasqa iñiqmasinchikmanta (qawariy kay paginapi kaq dibujota).

PASAQ watakunapim Fiyi sutiyoq islapi, casarasqa iñiqmasinchikkuna runakunata invitachkarqaku Jesuspa wañukusqan punchawta yuyarinapaq huñunakuyman. Chay huñunakuymanta huk warmiwan rimachkaptinkum parayta qallaykamurqa. Iñiqmasinchikmi paraguanta chay warmiman qoykurqa llantukunanpaq, payñataqmi señoranpa paraguanwan llantukurqaku. ¡Anchatamá iñiqmasinchikkunaqa kusikurqaku chay warmi huñunakuyman hamusqanmanta! Chay warmiqa manamá yuyarirqachu iñiqmasinchikkuna imakunamanta rimapayasqantaqa, ichaqa yuyarirqam kuyakuyninkuta qawachisqankumanta, chaymi chay huñunakuyman rirqa. ¿Imanasqam casarasqa iñiqmasinchikkunaqa kuyakuyninkuta qawachirqaku? Paykunaqa Jesuspa consejasqantam kasukurqaku.

2. a) ¿Ima consejotam Jesus qorqa? b) ¿Imaynatam kasukuchwan?

² ¿Imatam Jesusqa consejarqa? Paymi nirqa: “Runamasikichik qamkunapaq allin kaqkuna rurananta munaspaqa qamkunapas paykunapaqyá allin kaqkunata ruraychik”, nispa (Mat. 7:12). ¿Imaynatam kasukuchwan chay consejasqanta? Puntataqa  kaynatam tapukunanchik: “Runamasiy rimapayawaptinqa, ¿ñoqawan imayna kanantam munayman?”, nispa. Chaymantañataqmi, runamasinchik imayna tarikusqanta yachaspa allinninpaq kaqta ruwananchik (1 Cor. 10:24).

3, 4. a) ¿Imanasqataq Jesuspa consejasqanta lliw runakunawan kaspa kasukunanchik? b) ¿Ima tapukuykunamantam kay yachachikuypi qawasun?

³ Yaqa llapanpim Jesuspa chayna consejasqantaqa iñiqmasinchikkunawan kaspa kasukunchik. Chayna kaptinpas, manam iñiqmasinchikkunawan kaspallachu kasukunanchikqa. Kasukunanchiktaqmi lliw runakunawan hinaspa cheqniwaqninchik runakunawan kaspapas (leey Lucas 6:27, 28, 31, 35). Jesuspa consejasqanman hina cheqniwasqanchik runakunapaqpas allinkunata ruwana kaptinqa, astawanraqchá allinkunataqa ruwananchik Diosmanta willasqanchik runakunapaqqa. Ichapas, wakinkuqa “wiñay kawsanankupaq [. . .] akllasqa kaqkuna” kanku (Hech. 13:48).

⁴ Chaynaqa, ¿imakunapim reparananchik pimanpas Diosmanta willaspanchik? Kay tapukuykunapim reparananchik: 1) ¿Pikunamantaq willasaq? 2) ¿Maypitaq willasaq? 3) ¿Haykapitaq allinpuni kanman willanaypaq?, hinaspa 4) ¿imaynatam willayta qallarisaq? Kay tapukuykunapi yuyaymanaymi yanapawasun runakunapaq allin kaqkunata ruwaspa Diosmanta willanapaq (1 Cor. 9:19-23).

5. ¿Imakunatam tapukunanchik runamasinchikman Diosmanta willaspa?

⁵ Runakunaqa manam imayna tarikusqankupiwan sasachakuyninkupiqa chaynallachu kanku (2 Cron. 6:29). Chaynaqa, pimanpas Diosmanta willakunapaqqa tapukusun: “Ñoqaman Diosmanta pipas willawaptinqa ¿mana reqsisqan runata hina qawawanantachu munayman, icha reqsisqan runata hinachu?”, nispa. Kay tapukuykunata ruwakuyqa allintam yuyarichiwasun runakuna mana chaynalla kasqankumanta.

6, 7. ¿Imatam ruwananchik Diosmanta willakuptinchik pipas nanay simiwan rimaruwaptinchik?

⁶ Manataqmi pitapas chayllaqa ninanchikchu “payqa kamikuqmi” nispaqa. Bibliapa nisqanman hina sumaq rimayniyoq kananchikpaq kallpanchakuspapas, wakinpiqa pantaq kasqanchikraykum nanay simiwan rimarunchik (Col. 4:6; Sant. 3:2). Ichapas mana allin tarikusqanchikrayku pitapas nanay simiwan niruchwan, hinaptinqa ¿munachwanchu “payqa kamikuqmi” nispa niwananchikta? Manamá ¿aw? Aswanqa munachwanmi entiendeykuwananchikta. Hinaptinqa, ¿manachu ñoqanchikpas chayna entiendeq kananchik?

⁷ Diosmanta willakuptinchik pipas nanay simiwan niruwaptinchikqa entiendeykunanchikmi. Ichapas chay runamasinchikqa llamkayninpi otaq colegionpi otaq onqosqanwanpas sasachakuchkanman. Achka runakunam qallariypi piñasqallaña kaspanku mana uyariwarqanchikchu, ichaqa tiempopa risqanman hinam hawkalla hinaspa respetakuq kasqanchikta qawaspanku uyariykuwarqanchik (Prov. 15:1; 1 Ped. 3:15).

8. ¿Imanasqam imaymana runakunaman Diosmanta willananchik?

⁸ Imaymana runakunamanmi Diosmantaqa willakunchik. Kay pasaq watakunallamantam Willakuq qellqanchikpi lloqsimurqa “Bibliam vidankuta cambiarurqa” nisqa yachachikuy. Chaypim willakurqa 60 masnin runakunapa vidanmanta. Wakinkum karqaku suwakuqkuna, sinkakuqkuna, maqakuqkuna otaq drogakuqkuna. Wakinñataqmi karqaku gobiernokunapi hapipakuqkuna, religionninpi punta apaqkuna, estudiasqankupi hapipakuqkuna otaq millay kawsaypi tarikuqkuna. Ichaqa, Diosmanta willakuyta uyarispankum Biblia estudiayta qallaykurqaku. Chaymantañataqmi vidankuta tikraspanku Jehova Diospa testigonña rikurirurqaku. Chaynaqa, amayá haykapipas piensasunchu  chayna runakuna Diospa willakuyninta mana chaskinankutaqa (leey 1 Corintios 6:9-11). Aswanqa kaytayá yuyarisun: Diospa willakuyninqa imaymana runakunapa sonqonmanmi chayanman (1 Cor. 9:22).

9. ¿Imanasqam runamasinchikpaq allin kaqkunata ruwaspa Diosmanta willananchik?

⁹ Diosmanta willakuspaqa, ¿maypitaq runakunawan rimanchik? Yaqa llapanpim rimanchik wasinkupa punkunpi (Mat. 10:11-13). Piensasun kaypi: manamá munanchikmanchu wasinchikta pipas qawaykachanantaqa otaq wasinchikpa muyuriqninpi purikachanankutaqa. Arí, llapanchikmi munanchik wasinchikpi mana pipapas imanasqan hawka tarikuyta. Chaynam runamasinchikkunapas wasinkupi kayta munanku. Hinaptinqa, ¿paykunapaq allin kaqkunata ruwaspachu Diosmanta willachkanchik? (Hech. 5:42.)

10. Diosmanta willanapaq runamasinchikta watukuspaqa, ¿imatam mana ruwanachu?

¹⁰ Kunan tiempopi mana allin ruwaykuna astawan mirarusqanraykum, runakunaqa pimantapas manchapakunku (2 Tim. 3:1-5). Chaymi mana imatapas ruwananchikchu ñoqanchikmanta manchapakunankupaqqa. Piensariy kaypi: qanmi Diosmanta willakuspayki runamasikipa wasinpa punkunta takachkawaq. Mana pipas lloqsimuptinqa ichapas uchkuchanta qawakachayta otaq wasinpa muyuriqninpi purikachayta qallaykuwaq. Chayna ruwasqaykiwan, ¿yaqachu chay lawpi runakuna piñarikunmanku? ¿Imatam piensanmanku vecinonkuna? Llapanchikmá kallpanchakunanchik lliw runakunaman Diosmanta willananchikpaq (Hech. 10:42). Diosmanta willasqanchikqa sumaq willakuymá, chaymi munanchik runakuna yachanankuta (Rom. 1:14, 15). Chayna kaptinpas, manamá runamasinchikkuna piñakunankupaq hinaqa imatapas ruwananchikchu. Apostol Pablom nirqa: “Pipas mana urmarunanpaqmi mana allin ejemplotaqa mana qonikuchu chaynapi Señorpaq rurasqaykumanta ama pipas yanqakunata rimanankupaq”, nispa (2 Cor. 6:3). Runamasinchikkunapa wasinman rispanchik imankutapas mana imanaptinchikqa, yaqapaschá Diosmanta uyariyta munanqaku (leey 1 Pedro 2:12).

11. ¿Imanasqam agradecekunchik pipas mana una-unayta parlapayawaptinchik?

¹¹ Yaqa llapanchikmi imaymana ruwayniyoq kanchik. Ruwayninchikkunata tiempollanpi tukunapaqqa, allinta tanteaspam tiemponchikta rakinchik (Efes. 5:16; Filip. 1:10). Imapas ruwayninchikta pipas sayarachiwaptinchikqa ichapas hukmanyaruchwan. Chaymi agradecekunchik pipas parlawan mana una-unayta hapiwaptinchikqa. Hinaptinqa, ¿imaynatam runamasinchikpaq allin kaqkunata ruwanapaq Jesuspa consejasqanta kasukuchwan paykunawan rimaspa?

12. ¿Imaynatam yachachwan runakunaman Diosmanta willanapaq watukuyninchik imay hora aswan allin kasqanta?

¹² Yuyaymanasun runakunaman Diosmanta willanapaq imay hora aswan allin kasqanpi. Predicasqanchik lawpi, ¿imay horapitaq runakunaqa wasinkupi tarikunku? ¿Imay horapitaq uyariyta munanmanku? Ancha allinmi kanman paykunapa tiemponku kasqan horapi watukuyninchikqa. Wakin llaqtakunapiqa tarden lawmi aswan allin Diosmanta willakunapaqqa. Yachasqanchik lawpi chayna kaptinqa, ¿atichwanchu chay horakuna wasin-wasin Diosmanta willakuyta? (Leey 1 Corintios 10:24.) Jehova Diosqa bendeciwasunmi runakunapa tiemponku kasqan horapi paymanta willanapaq kallpanchakusqanchikmantaqa.

13. ¿Imaynatawanmi qawachichwan runamasinchikpaq allin kaqkunata ruway munasqanchikta?

¹³ ¿Imaynatawanmi qawachichwan runamasinchikpaq allin kaqkunata ruway  munasqanchikta? Allin uyariwaqninchik runakunata tarispaqa, Diosmantam allinta yachaykachinanchik, ichaqa manam chayraykuchu una-unayta qeparunanchik. Ichapas payqa imatapas ruwananpaq tiemponta rakirqa. Llumpay ruwayniyoq kasqanta niwaptinchikqa ichapas nichwan huk ratochalla rimariykunanchikpaq, hinaspam nisqanchikman hina ruwananchik (Mat. 5:37). Paywan rimayta tukuruspañataqmi niykuchwan haykapi astawan rimanapaq tiempon kasqanta. Wakin iñiqmasinchikkunam kaynata ninku: “Munaymanmi kaqmanta watukamuyta. ¿Munawaqchu manaraq hamuchkaspay telefonowan qayamunayta?”, nispa. Runakunapa tiemponkuman hina rispanchikqa, Pablotam qatipakuchkanchik. Paymi nirqa: “Manam maskani kikiypa allinniytachu aswanqa wakinkunapatam chaynapi salvasqa kanankupaq”, nispa (1 Cor. 10:33).

14-16. a) ¿Imanasqataq runamasinchikta ninanchik imanasqa watukusqanchikmanta? b) ¿Imayna rimay qallarisqantaq congregacionkunata watukuq ancianota yanapan?

¹⁴ Piensariy kaypi: qamtam mana reqsisqayki runa qonqayllamanta qayaramusunkiman hinaspam tapusunkiman ima mikuykuna gustasusqaykimanta. Qamqa yaqapaschá tapukuwaq pi kasqanmanta hinaspa ima munasqanmanta. Ichapas chayrayku paywanqa mana unaytachu rimanki. Ichaqa, chay qayasuqniki runa pi kasqanta reqsichikunman hinaspa nisunkiman allin mikuykunata mikunapaq yachachiypi llamkasqanmanta. Nisunkimantaqmi allin mikuykunata mikunaykipaq yanapakuykuna qosunaykimanta. Chayna kaptinqa, yaqapaschá qamqa astawan uyariykuwaq, ¿aw? Llapanchikmá munanchik pipas rimapayawaspanchik  pi kasqanta niykuwananchikta. ¿Yaqachu chaynata ruwachwan Diosmanta willanapaq runakunata watukuspa?

¹⁵ Achka llaqtakunapim runakunaqa munanku imanasqa watukusqanchikmanta willananchikta. Sumaq yachachikuykunata runakunaman apaspanchikpas, wakinpiqa manaraq pi kasqanchikta nichkaspam utqayllaman kaynata tapunchik: “¿Ima sasachakuytataq qamqa kay pachamanta chinkarachiwaq makillaykipi kaptinqa?”, nispa. Chaynata tapuspaqa munanchikmi runamasinchikpa ima piensasqanta yachaspa Bibliawan yanapayta. Ichaqa, sonqonpim runamasinchikqa kaynata tapukunman: “¿Pitaq kay runaqa, hinaspa imanasqam chaynata tapuwan? ¿Imatataq munachkan?”, nispa. Chaynaqa, hawka tarikunanpaqyá kallpanchakusun (Filip. 2:3, 4). ¿Imatataq chaypaq ruwachwan?

¹⁶ Congregacionkunata watukuq ancianotam kayna ruwasqan yanapan: payqa runamasinta rimakuykuspanmi pi kasqanta reqsichikun hinaspanmi ¿Munawaqchu cheqapmanta yachayta?, niq tratadota qoykuspan kaynata nin: “Kay qellqatam runakunaman qochkaniku. Kaypiqa runakunapa tapukusqankuman hina soqta tapukuykunamantam rimachkan. Kaymi qampaq”, nispa. Paypa nisqanman hinaqa, imarayku watukusqanchikmanta willaptinchikmi yaqa lliw runakuna hawka tarikunku hinaspa yaqa llapanpi hinalla parlayta munanku. Chaymantañataqmi chay iñiqmasinchik nin: “¿Yaqachu haykapipas kay huk kaqnin tapukuyninta tapukurqanki?”, nispa. Sichu chay runa huk kaqnin tapukuyta akllaptinqa chay qellqata kichaykuspanmi Bibliapa yachachisqanmanta qawachin. Huk kaqnin tapukuyta mana akllaptinqa kikin iñiqmasinchikmi akllaspan mana hukmanyachispalla hinalla riman. Arí, Diosmanta willanapaqqa manam kaypi rimasqanchikman hinallachu ruwachwan. Chaymantapas, wakin llaqtapi runakunaqa manam rimakuykunallanchiktachu nitaq imapaq watukusqanchikta niykunallanchiktachu suyanku. Imayna kaptinpas, Diosmanta willakusqanchikta uyarinankupaqqa, runamasinchikpaq allin kaqkunatam puntata ruwananchik.

17. ¿Imaynatam runamasinchikpaq allin kaqkunata ruwanapaq Jesuspa consejasqanta hinalla kasukuchwan?

¹⁷ Hinaptinqa, ¿imaynatam runamasinchikpaq allin kaqkunata ruwanapaq Jesuspa consejasqanta hinalla kasukuchwan? Chaypaqqa: runamasinchikkuna mana chaynalla kasqankutam yuyarinanchik. Manam wasinkuta qawakachananchikchu nitaq wasinkupa muyuriqninpi purikachananchikchu. Kallpanchakunanchikmi runakunapa tiemponku kasqan horapi watukunanchikpaq. Chaymantapas, Diosmanta manaraq rimapayachkaspam pim kasqanchikta hinaspa imapaq watukusqanchikta ninanchik.

18. ¿Imanasqam runamasinchikpaq allin kaqkunata ruwaspa Diosmanta willakunanchik?

¹⁸ Runamasinchikpaq allin kaqkunata ruwayqa allinpim tukun. Kuyakuq hinaspa entiendeq kaspanchikqa achki hinam kasun, qawachisuntaqmi Biblia imayna yanapawasqanchikta hinaspapas hanaq pachapi Taytanchiktam hatunchasun (Mat. 5:16). Diosmanta willakuspa runakunapaq allinninta maskaptinchikqa, astawanmi paykunaqa Diosmanta yachayta munanqaku (1 Tim. 4:16). Runakuna uyariwaptinchik otaq mana uyariwaptinchikpas, kusisqamá tarikunchik Diosmanta willakuyninchikta allinta ruwanapaq kallpanchakusqanchikmanta (2 Tim. 4:5). Qatipakusun apostol Pablota, paymi nirqa: “Tukuy imatam rurani Cristomanta allin noticia willakunayrayku hinaspa allin noticiamanta allin kaqkuna chaskinayrayku”, nispa (1 Cor. 9:23). Chaynaqa, Diosmanta willakuspaqa hinallayá runamasinchikpaq allin kaqkunata ruwanapaq Jesuspa consejasqanta kasukusunchik.