CRISTIANOKUNAPA tiemponmanta ñawpaq 537 kaq watapim Israel runakuna Babilonia nacionmanta lloqsirqaku, chaypim Jehova Dios paykunata yanaparqa Jerusalenman kutispanku imayna ñanninta rinankupaq. Paymi nirqa: “Runakunapaq allichaychik ñanta. Ñanta sumaqta kichaychik. Ruminkunata sumaqta wischuychik”, nispa (Is. 62:10). ¿Imaynatam judiokunaqa chayna nisqanta kasukurqaku? Ichapas wakinku ñawparqaku ñanta allichanankupaq hinaspa sumaqta pampayachinankupaq, chaynapi qepa hamuqkuna mana sasachakuspa rinankupaq.

Israel runakunapa purisqanku ñantam tupachichwan Diospa llaqtanpi ima llamkaytapas haypaywan. Jehova Diosqa munan lliw serviqninkuna mana sasachakuspa iñiyninchikpi ñawparinanchiktam. Chayraykum Palabranpi niwanchik: “Cuidadowanyá puriy. Maymi sarusqaykita qawaspayki. Chaynata ruraspaykiqa segurom kawsakunki”, nispa (Prov. 4:26). Bibliapa chayna nisqanqa manam mozo-sipaskunallatachu yanapan aswanqa llapallanchiktam.

Pipas mozo-sipasmanta rimaspaqa wakinpim ninku “tukuy imapas makillanpim kachkan” otaq “kay Pachapiqa tukuy ima munasqantam haypanqa” nispa. Arí, yaqa llapanpim mozo-sipaskunaqa kanku kallpankupi, chaylla imatapas yachaq hinaspa imatapas haypay munaq. Chayraykum Bibliapas nin: “Mozokunapa kallpanqa paykunapa adornon hinam”, nispa (Prov. 20:29). Sichu huk mozo-sipas yachayninta chaynataq kallpanta servichikunqa Diosta servinanpaq hinaspaqa Diospa llaqtanpim tukuy ima llamkaykunata haypaspan cheqap kusikuyta tarinqa.

Kunan tiempopi runakunaqa mozo-sipaskunapa yachayninkupi hinaspa kallpankupim astawan reparanku. Chaymi Jehova Diosta serviq mozo-sipas colegionpi allinta ñawpariptinqa, profesorninkuna otaq estudiaqmasinkuna hikutanku universidadpi estudianankupaq chaynapi kay Pachapi tukuy imakunata haypanankupaq. Wakinpiqa ichapas allin pukllaq kasqanrayku hikutanqaku chayman qokuspan  reqsisqa kananpaq. ¿Haykapipas chaynapi tarikurqankichu? ¿Yaqachu pitapas chaynapi tarikusqanta qawarqanki? ¿Imataq pi cristianotapas yanapanman allinta tanteananpaq?

Bibliapa yachachikuyninkunam yanapasunkiman allinta tanteanaykipaq. Eclesiastes 12:1 nin: “Mozollaraq kachkaspaykiyá unanchaqnikimanta yuyariy”, nispa. ¿Imaynatam unanchaqnikimanta ‘yuyariwaq’? Hinaspa, ¿imaynatam llapanchikpas chayta ruwachwan?

Rimarisun África lawmanta Eric * sutiyoq iñiqmasinchikmanta. Payqa pelota haytaypim allinta pukllaq, chaymi 15 watanpi kachkaptin nacionninpi pelota haytaqkunapa huk kaqnin kananpaq akllayta munarqaku. Chayna kaspanqa pisi tiempollamantam Europa lawpi aswan yachachisqa kaspan pelota haytaypi ancha reqsisqaña kanan karqa. Ichaqa, ¿yaqachu chayna tanteayqa yanapanman karqa Bibliapa nisqanman hina Unanchaqninmanta yuyarinanpaq? Qawasunchik iñiqmasinchik Eric imata akllakusqanmanta hinaspa chayna tanteakusqan imayna yanapawananchikmanta.

Escuelallapiraq kachkaspanmi Ericqa Jehova Diospa testigonkunawan Biblia estudiayta qallaykurqa hinaspanmi yacharurqa kay Pachapi sasachakuykunata Unanchaqninchik allichananmanta. Yacharurqataqmi Diospa munayninta ruwananpaq tiempontawan kallpanta servichikuynin ancha allin kasqanmanta. Chaymi pelota haytaypi allin reqsisqa kananmantaqa bautizakuruspan iñiyninpi ñawpariyta qallaykurqa. Tiempopa risqanman hinam siervo ministerial karqa, chaymantañataqmi Solterokunapaq Bibliamanta Escuelaman rirqa.

Pelota haytayta akllakuspanqa ichapas allin reqsisqa hinaspa qollqesapa kanman karqa. Ichaqa yacharqam Bibliapa kayna nisqan cheqap kasqanta: “Apu runapa kapuqninqa mana vencey atina llaqtamanmi rikchakapun. Apu runapa qori-qollqenqa amparakuna alto-alto perqamanmi rikchakapun” (Prov. 18:11). Arí, runapa imamantapas harkaqninman rikchakuq qollqenqa chinkaruq waspiy hinallam. Qollqesapa kayta haypay munaqkunaqa ‘llakillapim’ tukunku (1 Tim. 6:9, 10).

Achka mozo-sipaskunam ichaqa tukuy tiemponkuwan Diosta servinankupaq akllakusqankurayku ancha kusisqa tarikunku. Ericmi nin: “Kunanqa achka precursorkunamanta huk kaqninmi kani. Chaypi kayqa ancha kusikunapaqmi hinaspapas Jehova Diostam anchata agradecekuni allinta tanteanaypaq yanapawasqanmanta chaynataq kusisqa kayta haypasqaymanta”, nispa.

¿Ima niwaqtaq qanmanta? Kay Pachapi kaqkunata haypanaykimantaqa, ¿imanasqataq mana tanteakunkichu precursor kaspayki Jehova Diosta astawan servinaykipaq? (Qaway  6 kaq paginapi yachachikuyta.)

Huk iñiqmasinchikmi señoranpiwan Estados Unidos Betel wasita watukurqaku, paykunam anchata admirakurqaku chay Betelpi llamkaqkuna kusisqa kasqankuta qawaspanku. Chaymanta qepamanmi señoran kaynata qellqarqa: “Tukuy imayoq kawsakuytam amañarurqaniku”, nispa. Ichaqa, paywan qosanmi tantearurqaku Jehova Diosta tukuy tiemponkuwan servinankupaq.

Qallariypiqa, imata ruwanankupaq tanteasqankuqa sasaniraqmi karqa. Huk kutipim ichaqa sapa punchaw Bibliata estudianapaq folletopa nisqanpi yuyaymanarqaku. Chay textom horqosqa karqa Juan 8:31 nisqanmanta, chaypim Jesus nirqa: “Sichu qamkuna seguinkichik nisqaykunata hinaspaqa cheqap discipuloykunam kankichik”, nispa. Chaypi yuyaymanaspankum nirqaku: “Kapuqllanchikwan kawsakunapaq imataña ruwananchik kaptinpas manam yanqapaqchu kanqa”, nispa. Chaymi hatun wasinkuta rantikururqaku, qepancharqakutaqmi mana yanapaqnin kaqkunatapas hinaspankum aslla Testigokunapa kasqan congregacionman astakurqaku. Kunanqa precursormi kanku hinaspapas Salonkunata hatarichiypim llamkanku, yanapakunkutaqmi asambleakuna apakunanpaqpas. ¿Imaynam tarikunku? Paykunam ninku: “Anchatam kusikuniku kapuqllanchikwan kawsakunapaq Jehova Diospa llaqtanpa nisqanta kasukuspayku”, nispa.

Salomonmi nirqa: “Qamqa puntamanyá qaway. Qamqa ñawpaqllamanyá qaway”, nispa (Prov. 4:25). Imaynam carro manejaqkunapas ñawpaqllankuta qawanku, chaynam ñoqanchikpas Diospa llaqtanpi ima llamkaykunata haypananchikpaqqa mana imawanpas harkachikunachu.

¿Ima llamkaykunata haypanaykipaqmi kallpanchakuwaq? Chaykunamanta hukninmi kanman tukuy  tiempoykiwan Diosta serviyniki. Hukñataqmi kanman aslla Testigokunapa kasqan congregacionman otaq congregacionpi achkallaña iñiqkuna kaptinpas huk-iskaylla ancianokunapa chaynataq siervo ministerialkunapa kasqan congregacionman astakuy. ¿Kallpanchakuwaqchu yanapakunaykipaq? Chaypaq ¿manachu tapukuwaq congregacionkunata watukuq ancianota? Sichu karu llaqtapi Dios serviyta munaspaykiqa ima congregacionpi yanapakunaykipaqmi tapukuwaq. *

Kaqmanta rimarisunchik Isaias 62:10 nisqanmanta. Wakin judiokunaqa sinchitachá llamkarqaku ñankunata kichaypi hinaspa allichaypiqa, chaynapi Israel runakuna llaqtankuman hawkalla chayanankupaq. ¿Yanqapaqchu chay ruwasqanku karqa? Manam, Diospa llaqtanqa may risqanmanmi chayarqa. Diospa llaqtanpi ima llamkaytapas haypanaykipaq kallpanchakuspaykiqa ama hukmanyaruychu. Imapas sasachakuykunata atipaspayki Diospa yachayninta hinalla mañakuy. Chaynata ruwaptikiqa Jehova Diosmi yanapasunki ‘maymi sarusqaykita qawaspayki’ ñawparinaykipaq (Prov. 4:26).