1. ¿Imanasqam Jehova Dios Churinwan kuyanakusqanku astawan wiñarqa?

JEHOVA DIOSPA Churin Jesucristom nirqa ‘Taytanta kuyasqanta’ (Juan 14:31, NM). Nirqataqmi: “Dios Taytaqa kuyanmi Churita”, nispan (Juan 5:20). Jesusqa kay Pachaman manaraq hamuchkaspanmi millonnintin watakuna Taytanwan kuska llamkarqa. Payqa Diospa ‘ruraysiqnin maestro hinam’ karqa (Prov. 8:30). Chay millonnintin watakunapim Jesusqa Taytanpa sumaq kayninkunamanta yacharqa, kuyanakusqankupas astawanmi wiñarqa.

2. a) ¿Imatam ruwananchik Jehova Dios kuyawananchikpaq? b) ¿Ima tapukuykunatam qatiqninpi kutichisun?

² Davidmi kaynata takirqa: “Dios Taytalláy, qamqa kallpanchaqniymi kapuwanki, chaymi qamtaqariki kuyakuyki”, nispa (Sal. 18:1). Jehova Dios kuyawasqanchikraykum, ñoqanchikpas chaynallata kuyananchik. Diosta kasukuptinchikqa payqa kuyawasunmi (leey Deuteronomio 7:12, 13). Ichaqa, ¿imaynatam mana rikusqanchik Diostaqa kuyayta atichwan? ¿Ima ninantaq Dios kuyayqa? ¿Imakunaraykum kuyachwan? ¿Imaynatam kuyasqanchikta qawachichwan?

3, 4. ¿Imanasqam runakunaqa Dios kuyayta atichwan?

³ “Diosqa Espiritum”, chaymi rikuyta mana atichwanchu (Juan  4:24). Chayna kaptinpas kuyaytaqa atichwanmi. Bibliapas niwanchikmi Diosta kuyanapaq. Moisesmi Israel runakunata nirqa: “Yupaychasqanchik Tayta Diostam kuyanki tukuy sonqoykiwan, tukuy vidaykiwan hinaspa tukuy kallpaykiwan”, nispa (Deut. 6:5).

⁴ ¿Imanasqam Dios kuyayta atichwan? Kikin Diosmi unanchawarqanchik paymanta yachay munaqta hinaspa kuyakuyniyoqta. Payta reqsispa kuyakuyninchikta qawachispaqa, astawanmi kuyasun hinaspapas kusisqam tarikusun. Chaymi Jesus nirqa: “Mayna kusisqam ‘Diostam necesitani’ niqkunaqa, paykunapamiki Diospa munaychakusqanqa”, nispa (Mat. 5:3). Abraham C. Morrison sutiyoq runam, qellqasqan libropi nirqa runakunaqa haykapipas Diosta maskasqankuta hinaspa paypi creey munasqankuta (Man Does Not Stand Alone). Pay hinam achka runakunapas ninku Diosta yupaychanapaq munayniyoq llapanchik nacesqanchikmanta.

5. ¿Imaynatam yachanchik Dios reqsiy atisqanchikta?

⁵ ¿Atichwanchu Dios reqsiyta? Arí atichwanmi, Diosqa munanmi reqsinanchikta. Chayna kasqantam apostol Pablo qawachirqa Areopago sutiyoq huñunakunankupi runakunaman rimaspan. Chaymantam qawakuq Atenea mamachapa Partenon sutiyoq templon. Chay mamacham Atenas runakunapa patronan karqa. Piensay chaypi kaspayki apostol Pablopa kayna nisqanta uyarisqaykita: “Diosmi unancharqa kay pachatawan tukuy ima kaqkunata [. . .]. Payqa yachanpas manam runakunapa rurasqan wasipichu [. . .]. Huk runallamantam mirachirqa tukuy hinastinpi kaq runakunata chaynapi enteron kay pachapi yachanankupaq, paymi señalarqa haykapim otaq maypim yachanankupaqpas chaynapi llapchaykachakuq hina maskaspanku Diosta tarinankupaq. Payqa manam karupichu ñoqanchikmantaqa kachkan” (Hech. 17:24-27). Qawasqanchikman hinaqa, Dios reqsiytaqa atichwanmi. Kunan tiempopiqa yaqa pusaq millon Testigokunam Jehova Diosta reqsiruspanku tukuy sonqonkuwan kuyanku.

6. Jesuspa nisqanman hina, ¿mayqantaq “punta kaq hatun kamachikuy”?

⁶ Jehova Dios kuyayninchikqa tukuy sonqonchikmantam kanan. Huk kutipim fariseo runa Jesusta tapurqa Diospa Kamachikuyninmanta mayqan hatun kasqanta. Jesusñataqmi nirqa: “‘Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan’ nispa. Kaymi punta kaq hatun kamachikuy”, nispa (Mat. 22:34-38).

7. a) ¿Ima ninantaq tukuy sonqonchikwan Diosta kuyayqa? b) ¿Ima ninantaq tukuy vidanchikwan Diosta kuyayqa? c) ¿Ima ninantaq tukuy yuyayninchikwan Diosta kuyayqa?

⁷ ¿Imatam Jesusqa niyta munachkarqa ‘tukuy sonqonchikwan’ Diosta kuyanamanta nispanqa? Huk rimaypiqa tukuy munayninchikwan kuyananchikmantam nichkarqa. Nirqataqmi ‘tukuy vidanchikwan’ kuyanamanta. Huk rimaypiqa imayna kasqanchikwan hinaspa tukuy ima ruwasqanchikwan kuyanamantam nichkarqa. Chaymantapas nirqataqmi ‘tukuy yuyayninchikwan’ kuyanamanta. Chaywanqa nichkarqa tukuy piensayninchikwan hinaspa yachayninchikwan kuyanamantam. Chaynaqa, Jehova Diostaqa tukuy vidanchikwan hinaspa tukuy kapuqninchikwanmi kuyananchik.

8. ¿Imakunata ruwanapaqmi yanapawanchik Diosta kuyayninchikqa?

⁸ Jehova Diosta tukuy sonqonchikwan, tukuy vidanchikwan hinaspa tukuy yuyayninchikwan kuyaspaqa, sapa kutim Palabranta estudiasun, kasukusunmi tukuy niwasqanchikta hinaspapas kusikuywanmi Munaychakuyninmanta willakusun (Mat. 24:14; Rom. 12:1, 2). Dios kuyayninchikmi payman astawan asuykachiwasun (Sant. 4:8). Hinaptinqa, ¿imakunaraykum Diosta kuyananchik? Qatiqninpi wakinmanta qawasun.

9. ¿Imanasqam qamqa Jehova Diosta kuyanki?

⁹ Jehova Diosqa Unanchawaqninchikmi hinaspa tukuy ima qowaqninchikmi. Apostol  Pablom nirqa: “Paypa yanapakuyninwanmi kawsanchikpas, purinchikpas hinaspa kachkanchikpas”, nispa (Hech. 17:28). Jehova Diosmi kay sumaqllaña Allpa pachata qowarqanchik (Sal. 115:16). Qowanchiktaqmi mikuyninchikta hinaspa kawsanapaq tukuy imakunatapas. Chaymi taytacha-mamachakunata yupaychaq Listra llaqtayoq runakunata apostol Pablo nirqa kawsaq Jehova Dios imakunawan reqsichikusqanmanta. Nirqam: “[Diosqa] reqsichikurqam runakunapaq imapas allinta ruraspan. Paymi parachimun poqoy tiempokunapipas allinta ruruchispa, paytaqmi mikunanchikpaqpas chani-chaninta qowanchik chaynapi kusisqa kawsananchikpaq”, nispa (Hech. 14:15-17). ¿Manachu chayrayku Unanchawaqninchik Jehova Diosta kuyananchik? (Ecl. 12:1.)

10. ¿Imaynam tarikunki ñoqanchikrayku Jesuspa wañukusqanwan?

¹⁰ Diosmi Adanmanta chaskisqanchik huchamantawan wañuymanta librawarqanchik (Rom. 5:12). Bibliam nin: “Diosmi kuyawasqanchikta qawachiwarqanchik huchasaparaq kachkaptinchikpas Cristo wañupuwasqanchikwan”, nispa (Rom. 5:8). Sonqomanta wanakuspa chay wañukusqanpi iñiptinchikqa, Jehova Diosmi huchanchikta pampachawasun. ¿Manachu chayqa astawan kuyanapaq yanapawanchik? ¡Anchatamá agradecekunchik ñoqanchikrayku wañunanpaq Churinta kachamusqanmantaqa! (Juan 3:16.)

11, 12. ¿Ima sumaq suyakuykunatam Jehova Diosqa qowanchik?

¹¹ Jehova Diosmi ancha kusikunapaq sumaq suyakuyta qowanchik (Rom. 15:13). Wiñay kawsanapaq suyakuyninchikqa, ima sasachakuykunatapas atipanapaqmi yanapawanchik. Hanaq pachaman rinankupaq suyakuyniyoq cristianokuna wañunankukama Diosman sonqo kaspankuqa, hanaq pachapim ‘wiñay kawsayta’ chaskinqaku (Apoc. 2:10). Diosman sonqo wakin cristianokunañataqmi, kay Pacha sumaq huertaman tikrakuptin chaypi wiñaypaq kawsanqaku (Luc. 23:43). ¿Imaynam tarikunchik chayna suyakuyniyoq kasqanchikwan? Chay suyakuyninchikqa anchatamá kusichiwanchik hinaspa hawkayachiwanchik. Yanapawanchiktaqmi Jehova Diosta kuyanapaqpas, paymantam “chaskinchik llapa ima allin kaqkunataqa” (Sant. 1:17).

¹² Diosmi kawsarimunapaq sumaq suyakuyta qowanchik (Hech. 24:15). Llumpaytamá llakikunchik pi ayllunchikpas wañukuptinqa. Ichaqa, wañuqkuna kawsarimunankupaq suyakuymi allintapuni yanapawanchik ‘mana confianzayoqkuna hina ama llakikunanchikpaq’ (1 Tes. 4:13). Jehova Diosqa anchatam munachkan wañuqkunata kawsarichiyta, astawanraqmi Job hina Diosman sonqo serviqninkunataqa (Job 14:15). Maynatachá kusikusun wañuqkuna kawsarimuspanku kuyasqan ayllunkuwan hinaspa amistadninkuwan tupasqankuta qawaspanchikqa. ¡Jehova Dios kuyayninchikqa llimparinqachá! Hanaq pachapi Taytanchikqa anchatamá kuyawanchik chay sumaq suyakuyta qowaspanchik.

13. ¿Imaynatam yachanchik ñoqanchikmanta Jehova Dios nanachikusqanta?

¹³ Jehova Diosqa ñoqanchikmantam nanachikun (leey Salmo 34:6, 18, 19; 1 Pedro 5:6, 7). Jehova Diosqa yanapanmi serviqninkunataqa chaymi allin waqaychasqa tarikunchik ovejankuna hina kaspanchik (Sal. 79:13). Hamuq tiempopi tukuy ima ruwananmanta willawasqanchikmi, qawachiwanchik ancha kuyawasqanchikta. Diosqa Churin Jesucristontakamam kay Pachapi tukuy mana allinkunata chinkachinqa. Hinaptinmi allin runakunaqa tukuy imapa chawpinpi wiñaypaq hawkayaypi kawsakunqaku (Sal. 72:7, 12-14, 16). ¿Manachu chay suyakuyninchikqa kallpanchawanchik Jehova Diosta tukuy sonqonchikwan, tukuy vidanchikwan, tukuy kallpanchikwan hinaspa tukuy yuyayninchikwan kuyanapaq? (Luc. 10:27.)

14. ¿Imanasqam ancha kusisqa tarikunchik?

¹⁴ Ancha kusikunapaqmi testigon kananchikpaq saqewasqanchikqa (Is. 43:10-12). Jehova Diostam kuyanchik Gobiernonta yanapanapaq  chaynataq ñakariq runakunaman hawkayachikuq willakuykunata apanapaq saqewasqanchikmanta. Chay willakuykunatam mana iskayrayaspa willanchik Diospa Palabranpi hapipakusqanchikrayku. Diospa tukuy nisqankunaqa manam yanqachu (leey Josuey 21:45; 23:14). Qawasqanchikman hinaqa, ñoqanchikrayku tukuy ruwasqanmantam Jehova Diosta kuyananchik. Ichaqa, ¿imaynatam qawachichwan cheqaptapuni kuyasqanchikta?

15. ¿Imaynatam yanapawanchik Bibliata estudiayninchik hinaspa nisqankunata kasukuyninchik?

¹⁵ Bibliatam sapa kuti estudiananchik hinaspam nisqankunata kasukunanchik. Chaynata ruwaspanchikmi qawachichkanchik Jehova Dios kuyasqanchikta hinaspa Palabranwan yanapachikuy munasqanchikta (Sal. 119:105). Bibliam Diosmanta kaynata nin: “Qamqa manam despreciankichu wanakusqa sonqoyoq runataqa”, nispa. Nintaqmi: ‘Pensamientokunapa intusqan kaptiymi qamqa consuelawaspayki kusichiwanki’, nispa. Chayna nisqankunata sasachakuypi tarikuspa leeyninchikqa hawkayachiwasunmi (Sal. 51:17; 94:18, 19). Jehova Dioswan Jesusqa llakipayanmi ñakariqkunataqa (Is. 49:13; Mat. 15:32). Bibliata estudiayqa allintam yanapawanchik Jehova Dios ancha kuyawasqanchikta musyakunapaq, chayñataqmi yanapawanchik payta astawan kuyanapaq.

16. ¿Imanasqam Diosta mañakuyninchikqa yanapawanchik payta astawan kuyanapaq?

¹⁶ Diostam sapa kuti mañakunanchik. Mañakuyqa Diosmanmi astawan asuykachiwanchik, payqa “pipapas mañakusqanta uyariykuqmi” (Sal. 65:2). Mañakusqanchikta Dios uyarisqanmanta musyakuyninchikqa, yanapawanchikmi payta astawan kuyanapaq. Wakinpi ichapas musyakurqanchik mana aguantay atina sasachakuykunapi kananchikta Dios mana saqewasqanchikmanta (1 Cor. 10:13). Wakinpiñataq ichapas musyakurqanchik llumpay llakikuypi tarikuspa Jehova Diosta yanapawananchikpaq mañakuptinchik ‘runakunapa mana entiendey atinan hawkayayta’ qowasqanchikmanta (Filip. 4:6, 7). Chaymantapas, yaqapaschá musyakurqanchik Nehemias hina sonqollanchikpi Diosta mañakuptinchik Jehova Dios uyariwaspanchik imayna yanapawasqanchikta (Neh. 2:1-6). Arí, ‘tukuy tiempo Diosta mañakuspaqa’ chaynataq  imayna uyariwasqanchikta musyakuspaqa, paytam astawan kuyasunchik. Chaymantapas, manam iskayrayasunchu sasachakuypi tarikuptinchik yanapawananchikmantaqa (Rom. 12:12).

17. ¿Imaynatam huñunakuyninchikta qawasun Jehova Diosta tukuy sonqonchikwan kuyaspaqa?

¹⁷ Huñunakuykunaman hinaspa asambleakunamanmi rinanchik (Heb. 10:24, 25). Israel runakunaqa Jehova Diosmanta yachanankupaqmi huñunakuqku, chayqa allinpunim karqa Diospa munasqanman hina yupaychanankupaq hinaspa kamachikuyninkunata kasukunankupaq (Deut. 31:12). Tukuy sonqonchikwan Jehova Diosta kuyaptinchikqa, manam llumpay sasachu rikchakuwasun munayninta ruwayqa (leey 1 Juan 5:3). Chaymi kallpanchakunanchik lliw huñunakuykunaman rinanchikpaq. Amayá qallariypi Dios kuyayninchiktaqa chinkarachisunchu (Apoc. 2:4).

18. ¿Ima ruwaypim kallpanchakunchik Diosta kuyasqanchikrayku?

¹⁸ Kusikuywanmi Diosmanta ‘cheqap noticiata’ willakunanchik (Gal. 2:5). Diosta kuyayninchikmi kallpanchawanchik runamasinchikkunaman Jesucristopa Gobiernonmanta willakunapaq, paymi Armagedon guerrapi ‘cheqap kaqkunata defiendenanpaq’ lloqsinqa (Sal. 45:4; Apoc. 16:14, 16). ¡Anchatamá kusichiwanchik Diospa kuyakuyninmanta hinaspa hamuq tiempopi sumaq kawsakuymanta runamasinchikkunaman willayqa! (Mat. 28:19, 20.)

19. ¿Imanasqam agradecekunanchik ancianokunapa yanapakuyninmanta?

¹⁹ Congregacionpi ancianokuna yanapawasqanchikmantam agradecekunanchik (Hech. 20:28). Jehova Diosqa allinninchikta munaspanmi congregacionkunapi ancianokunata churarqa. Paykunam kanku “wayramanta harkachikuna hina”, “chaki allpapi mayukuna hina” chaynataq “mana yakuyoq allpapi qaqapa llantuynin hina” (Is. 32:1, 2). ¡Mayna allinmi sinchi wayra kaptin harkachikunata tariyqa otaq llumpay rupaypi qaqapa llantuyninta tariyqa! Kay tupanachiykunam allinta qawachiwanchik sasachakuykunapi tarikuptinchik ancianokuna imayna yanapawasqanchikta. Ancianokunata kasukuspaqa qawachichkanchikmi: paykunata, Jehova Diosta hinaspa Jesucristota kuyasqanchikta (Efes. 4:8, NM; 5:23; Heb. 13:17).

20. Pipas Dioswan allin amistad kaspanqa, ¿imaynatam Santiago 1:22-25 nisqan kasukusqanta qawachinqa?

²⁰ Jehova Dioswan allin amistad kaspaqa manam uyariqllachu kasun, aswanqa ‘uyarisqanchikman hinam rurasun’ (leey Santiago 1:22-25). ‘Uyarisqanchikman hina ruraptinchikqa’, iñiyninchikmi kallpanchawasun Diosmanta willakunapaq hinaspa huñunakuykunapi rimarinapaqpas. Jehova Diosta tukuy sonqonchikwan kuyasqanchikraykum ‘alli-allin leyta’ otaq lliw mañawasqanchikta kasukunchik (Sal. 19:7-11).

21. ¿Imawanmi tupanachisqa kachkan sonqomanta mañakuyninchikqa?

²¹ Jehova Diosta kuyayninchikqa kallpanchawanchikmi sapa kuti payta mañakunapaq. Israel nacionpi sacerdotekunaqa sapa punchawmi Jehova Diospaq inciensota kañapunanku karqa. Chaymi rey Davidqa Dios mañakuyninta chay inciensowan tupachispan kaynata nirqa: “Kañasqa incienso hinayá mañakuyniypas qayllaykipi kachun. Tardeykuq ofrenda hinayá makillaykuna hoqarisqaypas chaskisqa kachun”, nispa (Sal. 141:2; Ex. 30:7, 8). Chaynaqa, tukuy sonqowan mañakuyninchikqa miski asnaq incienso hinayá Jehova Diospaq kachun (Apoc. 5:8).

22. ¿Imamantam qatiqnin yachachikuypi qawasun?

²² Jesusqa sutillatam nirqa Diosta kuyananchikmanta, nirqataqmi runamasinchikta kuyanamantapas (Mat. 22:37-39). Jehova Diosta hinaspa kamachikuyninkunata kuyaspaqa, runamasinchiktapas kuyasunmi. Chaymantam qatiqnin yachachikuypi qawasunchik.