IMA tiempomantapas kunanmi aswan sasallaña tiempopi kawsachkanchik (2 Tim. 3:1-5). Sapa punchawmi sasachasqa kachkanchik Jehova Dios kuyayninchikpi hinaspa kamachisqanman hina kawsakuyninchikpi. Jesusqa willakurqañam kay sasallaña tiempokuna kananmanta hinaspapas qatiqninkunatam nirqa tukupay tiempokama aguantanankupaq kallpanchananmanta (Mat. 24:3, 13; 28:20). Chaypaqmi Jesusqa allin yuyayniyoq confianza sirvienteta churarqa ‘imam horapi mikuchichkaq’ hina qatiqninkunata iñiyninkupi yanapananpaq (Mat. 24:45, 46).

Allin yuyayniyoq confianza sirviente 1919 watapi churasqa kasqanmantapacham, millonnintin ‘sirvientemasinkunaqa’ achka rimaykunamanta Jehova Diospa llaqtanman yaykuspanku iñiyninkupi yanapasqa kachkanku (Mat. 24:14; Apoc. 22:17). Ichaqa, achka yachachikuykunaqa manam lliw rimaykunapichu tikrasqa kachkan, chaymantapas manam lliw runakunaqa Internetpi kaq qellqanchikkunataqa leeyta atinkuchu. Achkataqmi jw.org nisqanpi videokunatawan qellqakunataqa mana qawayta otaq leeyta atinkuchu. ¿Chayraykuchu nichwan iñiyninkupi allin takyasqa kanankupaq yachachikuykunata mana chaskisqankumanta? Chaymanta allinta entiendenapaq tawa tapukuykunata kutichisun.

Satanasmi Jesusta tentarqa rumikunata tantayarachinanpaq, chaymi Jesusñataq nirqa: “Runaqa kawsanqa manam mikuyllawanchu aswanqa Diospa llapa rimasqankunawanmi”, nispa (Mat. 4:3, 4). ¿Maypitaq Jehova Diospa ‘rimasqankunaqa’ tarikun? Bibliapim (2 Ped. 1:20, 21). Chaynaqa, Jehova Diospa qowasqanchik yachachikuykunaqa Bibliapim tarikun (2 Tim. 3:16, 17).

Jehova Diospa llaqtanpa yanapakuyninwanmi Traducción del Nuevo Mundo de las Santas Escrituras sutiyoq Bibliaqa, llapanpi otaq wakillanpipas 120 masnin rimaykunapi kachkan. Sapa watataqmi hinalla achka rimaykunaman tikrakuchkan. Chaymantapas, millonnintin huk Bibliakunam llapanpi otaq wakillanpipas waranqantin rimaykunapi kachkan. Chayna kasqanqa Jehova Diospa munaynintam qawachin, payqa “munachkanmi llapallan runakuna salvakunankuta hinaspa cheqap yachachikuy reqsinankuta” (1 Tim. 2:3, 4). Hinaspapas, ‘Diospa tukuy ima unanchasqankuna mana pakasqa kasqanraykum’, mana iskayrayachwanchu “Diostam necesitani” niqkunata Jehova Dios llaqtanman pusaykamunanmanta chaynataq necesitasqanku yachachikuykunata qonanmantapas (Heb. 4:13; Mat. 5:3, 6; Juan 6:44; 10:14).

Iñiyninchikpi allinta takyanapaqqa manam Bibliataqa leeyllachu-leenanchik. Aswanqa allintam entiendenanchik hinaspa kasukunanchik (Sant. 1:22-25). Chaytam musyakurqa punta cristianokunapa tiemponpi Etiopia nacionniyoq runa. Paymi Diospa Palabranta leechkarqa, hinaptinmi Felipe tapuykurqa: “¿Entiendenkichu chay leesqaykipa imam nisqanta?”, nispa. Payñataqmi nirqa: “¿Imaynataq entiendeyman mana pipas yachaykachiwaptinqa?”, nispa (Hech. 8:26-31). Chaymi Felipeqa allinta entiendenanpaq yanapaykurqa. Chay runañataqmi kallpanchasqa tarikuspan bautizakururqa (Hech. 8:32-38). Chaynam ñoqanchikpas yanapasqa kanchik. Qellqanchikkunam yanapawanchik Bibliapa yachachisqanta allinta entiendenapaq. Chay yachachikuykuna sonqonchikman chayaptinmi kallpanchasqa tarikunchik kasukunapaq (Col. 1:9, 10).

Diospa serviqninkunaqa qellqanchiktakamam achka mikuyta hinaspa achka yakuta chaskichkaq hina allin yachachisqa kanchik (Is. 65:13). Willakuq qellqam 210 masnin rimaykunapi lloqsimun, chaypim Bibliapa willakuyninkunamanta sumaqta yachachiwanchik. Yanapawanchiktaqmi sasa yachachikuykunata allinta entiendenapaq hinaspa Bibliapa kamachikuyninman hina kawsanapaq. Yaqa 100 rimaykunapitaqmi ¡Rikchariy! qellqapas lloqsimun. Chay qellqam yachachiwanchik Diospa admirakuypaq unanchasqankunamanta hinaspa Bibliapa yachachikuyninkunata imayna kasukunamanta (Prov. 3:21-23; Rom. 1:20). Allin yuyayniyoq confianza sirvienteqa Bibliamanta qellqakunatam qowanchik 680 masnin rimaykunapi. ¿Rakinkichu tiempoykita Bibliata sapa punchaw leenaykipaq? ¿Yaqachu lliw revistakunatawan chayllaraq lloqsimuq qellqakunata leenki?

Ichaqa manam qellqakunallachu kapuwanchik. Diospa llaqtanqa ruwantaqmi Bibliamanta discursokunatapas, chaynapi huñunakuykunapi hinaspa asambleakunapi uyarinapaq. ¿Yanapachikunkichu chay discursokunawan, dramakunawan, demostracionkunawan hinaspa iñiqmasinchikkunata tapusqankuwan? ¡Kusikunchikmá achka yachachikuykunata Jehova Dios qowasqanchikmantaqa! (Is. 25:6.)

¡Manamá! Ichapas Jehova Diospa wakin serviqninkunaqa achka yachachikuykunata chaskinmanku hukkunamantaqa. Piensarisun apostolkunapi. Apostolkunaqa aswan yachachisqam karqaku chay tiempopi Jesuspa wakin qatiqninkunamantaqa (Mar. 4:10; 9:35-37). Ichaqa manam chayraykuchu nichwan chay qatiqninkunaqa iñiyninkupi yarqaymanta hina kasqankutaqa. Paykunapas allin yanapasqamá karqaku iñiyninkupi allinta takyanankupaq hina (Efes. 4:20-24; 1 Ped. 1:8).

Chaymantapas, kay Pachapi Jesus kachkaspan tukuy ima nisqankunawan ruwasqankunaqa manam llapanchu Bibliapiqa tarikun. Apostol Juanmi nirqa: “Achkallañam kachkan Jesuspa tukuy ima rurasqankunaqa, sichu sapakamamanta qellqaptinkuqa piensasqayman hinaqa manachá kay pachapas haypanmanchu llapa libro churanapaq”, nispa (Juan 21:25). Punta cristianokuna hina Jesusmanta mana yachaptinchikpas, Jehova Diosqa tukuytam ruwarqa Churin Jesucristomanta allinta yachaspanchik qatipakunapaq (1 Ped. 2:21).

Piensarisuntaq congregacionkunaman apostolkunapa cartakuna qellqasqankupipas. Pablopa wakin cartakuna qellqasqanmi Bibliapiqa mana tarikunchu (Col. 4:16). ¿Chayraykuchu nichwan iñiyninchikpi allin takyasqa kananchikpaq yachachikuykuna wakillan kasqanmanta? Manamá. Jehova Diosqa yachanmi imam necesitasqanchikta, chaymi qowanchik iñiyninchikpi allin takyasqa kananchikpaq (Mat. 6:8).

Kunan tiempopiqa, ichapas wakin iñiqmasinchikkunaqa rimayninkupi achka yachachikuykunata chaskinmanku hukkunamantaqa. Ichapas qampa rimaynikipiqa as qellqakunalla kan. Chayna kaptinqa ama llakikuychu, Jehova Diosqa qamtapas yanapasunkim iñiynikipi allin takyasqa kanaykipaq. Rimaynikipi kaq qellqakunata estudiay, atikuptinqa riytaq entiendesqayki rimaypi huñunakuykunamanpas. Ama iskayrayaychu, Jehova Diosqa iñiynikipi allin takyasqa kanaykipaqmi yanapasunki (Sal. 1:2; Heb. 10:24, 25).

Internetpi jw.org nisqapiqa Bibliata estudianapaq revistakunatawan achka qellqakunatam leeyta atichwan. Kachkantaqmi ayllupi estudianapaq qellqakuna, chayqa casarasqakunapaq, mozo-sipaskunapaq hinaspa uña warmachayoq tayta-mamakunapaqpas. Rikurintaqmi sapa wata huñunakuykunamanta hinaspa Galaad Escuela tukuruptin willakuykunapas. Kantaqmi hatun desgraciakunamanta otaq iñiqmasinchikkuna sasachakuypi kaptinku abogado testigokunawan imayna allichasqankumanta willakuykunapas (1 Ped. 5:8, 9). Chaymantapas, jw.org nisqantakamam Diosmanta willakuykunaqa chayan Testigokuna qatikachasqa otaq harkasqa kasqan nacionkunamanpas.

Chaynaqa, sichu kapusunki Internet otaq mana kapusunkichu, iñiynikipi allin takyasqa kaytaqa atiwaqmi. Allin confianza sirvienteqa anchatam kallpanchakun sapakama iñiqmasinkuna iñiyninkupi allin mikuchisqa hina kanankupaq. Chaymi mana hikutasqa hinachu tarikunayki jw.org nisqanpi qellqakunata leenaykirayku otaq qawanaykirayku imatapas rantinaykipaq. Ichapas wakin iñiqmasinchikkunaqa chaymanta qellqakunata papelpi horqonmanku mana internetniyoq iñiqmasinchikkunapaq. Chayna kaptinpas, congregacionkunaqa manam hikutasqachu kachkanku chaynata ruwanankupaqqa.

Jesusmi iñiyninchikpi yanapawananchikpaq nisqanta cumplichkan. ¡Anchatamá chaymanta agradecekunchik! Kay sasallaña tiempokunapa puchukaynin hichpallapiña kasqanraykum, Jehova Diospi astawan hapipakunanchik. Payqa ‘imam horapi mikuchichkaq’ hinam haykapipas iñiyninchikpi yanapawasun.