1, 2. ¿Imaynatam Jehova Diosqa serviqninkunata yachachin?

ÑAWPAQMANTARAQMI Jehova Diosqa serviqninkunata yachachirqa. ¿Imaynata? Wakin serviqninkunawanmi rimarqa angelnintakama hinaspa revelacionnintakama, chaynapi hamuq tiempopi ima pasakunanmanta willananpaq otaq imata ruwanankumanta kamachinanpaq (Num. 7:89; Ezeq. 1:1; Dan. 2:19). Wakinmanñataqmi kay Pachapi serviqnintakama kamachikuykunata qorqa. Ichaqa, willachinanpaq Jehova Dios pitaña servichikuptinpas kasukuqkunaqa achka bendicionkunatam chaskirqaku.

² Kunan tiempopiqa Bibliantakama, chuya espirituntakama hinaspa llaqtantakamam yachachiwanchik (Hech. 9:31; 15:28; 2 Tim. 3:16, 17). Yachachikuyninkunaqa qepanchikmanta pipas “kaymi ñan, chayninta puriychik” nispa niwachkanchikmanpas hinam (Is. 30:21). Jehova Diosqa servichikuntaqmi Jesustapas yachachiwananchikpaq. Paytam churarun ‘allin yuyayniyoq confianza sirviententakama’ iñiqkunata yachachinanpaq (Mat. 24:45). Jehova Diospa kamachikuyninkunataqa kasukunanchikmi, chaynata ruwaspallam wiñay kawsayta haypasun (Heb. 5:9).

3. ¿Imakunataq wichiykachiwachwan Jehova Diospa yachachikuyninkunata mana kasukunapaq? (Qaway kaypi kaq dibujota.)

 ³ Satanasqa yachanmi Jehova Diospa yachachikuyninkunaqa salvawananchikpaq yanapawasqanchikmanta, chaymi mana munanchu kasukunanchikta. Sonqonchikpas engañaruwachwanmi Jehova Diosta mana kasukunanchikpaq (Jer. 17:9). Chayraykum kay yachachikuypi qawasunchik Jehova Diospa nisqanta uyarinapaq imakunawan mana harkachikunamanta. Qawasuntaqmi imayna tarikuptinchikpas Jehova Diosta mañakuyqa paywan allin amistad kanapaq yanapawasqanchikmanta.

4. ¿Imaynatam Satanasqa runakunata pantachin?

⁴ Satanasqa runakunatam pantachin yanqa willakuykunawan (leey 1 Juan 5:19). Chaymantapas, periodico, radio, television hinaspa Internetqa maypiñapas kachkanmi. Tukuy chaykuna yanapawananchikpaq kaptinpas, yaqa llapanpim Jehova Diospa kamachikuyninkunapa contranpi mana allinkunata cheqechin (Jer. 2:13). Arí, qarimasillanwan otaq warmimasillanwan kakuytam allinpaq hapinku. Chayraykum, achka runakuna piensanku huchapakuymanta Bibliapi kamachikuykunaqa sasa kasukunapaq kasqanta (1 Cor. 6:9, 10).

5. ¿Imatam ruwachwan Satanaspa yanqa willakuyninkunawan mana pantarachikunapaq?

⁵ Jehova Diospa kamachikuyninkunata kasukuqkunaqa, ¿imatam ruwanmanku Satanaspa yanqa willakuyninkunawan mana pantarachikunankupaq? ¿Imaynatam yachanmanku imapas allin otaq mana allin kasqanta? Jehova Diospa ‘Palabranta kasukuspankum’ (Sal. 119:9). Diospa Palabranpi lliw nisqankunam yanapawanchik allin otaq mana allin willakuykuna mayqan kasqanmanta yachanapaq (Prov. 23:23). Bibliamanta rimaspanmi Jesus nirqa: “Runaqa kawsanqa [. . .] Diospa llapa rimasqankunawanmi”, nispa (Mat. 4:4). Kaymi yachachiwanchik Jehova Diospa kamachikuyninkunata kawsakuyninchikpi kasukunapaq. Piensariy kaypi: huchapakuy hatun hucha kasqanmanta kamachikuyta Jehova Dios manaraq qellqachichkaptinmi, Joseyqa entienderqa Potifarpa warminwan puñuyqa Diospa contranpi hatun hucha kasqanta. Payqa manamá piensayllapas-piensarqachu Jehova Diosta qepancharuytaqa (leey Genesis 39:7-9). Potifarpa warmin hikutaptinpas, Joseyqa manam paypa nisqantachu uyarirqa aswanqa Jehova Diospa nisqantam. ¿Imatam yachachiwanchik? Imapas allin otaq mana allin kasqanta yachanapaqqa, Jehova Diospa nisqantam kasukunanchik. Manam imaniraqllatapas Satanaspa yanqa willakuyninkunataqa uyarinanchikchu.

6, 7. ¿Imaynatam Satanaspa mana allin niwasqanchikkunata qepanchachwan?

⁶ Kay Pachapiqa pantay religionkunapa  yachachikuyninkunam llumpayllataña mirarun, chaymi achka runakunaqa manaña munankuñachu cheqap religionta maskaytaqa. Jehova Diosmi ichaqa munan mana sasachakuspalla cheqap kaqta tarinanchikta. Chaypaqqa tanteananchikmi pita uyarinanchikmanta. Manamá atichwanchu chay ratollapi iskay runakunapa rimasqanta uyariytaqa. Imaynam ovejakunapas reqsinku michiqninpa vozninta, chaynam ñoqanchikpas reqsinanchik Jesuspa vozninta. Paytam Jehova Diosqa churarun ovejankunata michinanpaq (leey Juan 10:3-5).

⁷ Jesusmi nirqa: “Uyarisqaykichikpiyá yuyaymanaychik”, nispa (Mar. 4:24). Jehova Diospa niwasqanchikkunaqa sutillamá kachkan. Ichaqa sonqonchiktam kicharinanchik yanapawananchikpaq hinaspa kasukunapaq. Mana cuidakuspaqa Diospa niwasqanchikkunata qepancharuspam, Satanaspa mana allin niwasqanchikkunata kasukuruchwan. Amayá haykapipas saqekusunchu takikuna, videokuna, amistadkuna, profesorkuna hinaspa yachaysapa tukuqkuna kawsakuyninchikta yanqacharunankutaqa (Col. 2:8).

8. (1) ¿Imaynatam Satanaspa toqllankunaman wichiykuchwan? (2) ¿Imataq pasaruwachwan allin ruwasqanchikkunata manaña ruwasqanchikmanta musyakuspa mana kasukuptinchikqa?

⁸ Satanasqa yachanmi mana allin ruway munayniyoq kasqanchikta. Chaykunata pantarachiwananchikpaq servichikuptinqa, sasam kanman Diosman sonqo kayqa (Juan 8:44-47). Ichapas Diosta manaña mañakunchikñachu otaq manaña ñawpaqta hinañachu Diosmanta willakunchik nitaq huñunakuykunamanpas manaña anchatachu rinchik. Tukuy kaykunam qawachiwanchik sonqonchikpi imayna tarikusqanchikta. Chaykunapi mana reparaspa mana kaqpaqpas hapiptinchikqa mana allinninchikpaqmi kanman. Hinaspam pisi-pisimanta Jehova Diospa nisqankunata manaña kasukuchwanñachu. Tiempopa risqanman hinataqmi, mana allin munaykunaman wichiykuspa mana haykapipas piensasqanchikta ruwaruchwan (Rom. 7:15). Ichaqa, allin ruwasqanchikkunata manaña ruwasqanchikmanta musyakuspa, chaylla ruwayta qallaykuspaqa manamá mana allinkunamanqa wichiykusunchu. Chaynaqa, Jehova Diospa niwasqanchikkunata kasukuspaqa manam  pantay willakuykunataqa haykapipas uyarisunchu (Prov. 11:9).

9. ¿Imanasqataq ancha allin mana allin munaykunamanta musyakuspa chaylla cambiayninchik?

⁹ Pipas manaraq aswanyaruchkaptin imawan onqosqanmanta yacharuyqa allinmi kanman hampirunapaq. Ñoqanchikpas mana allin munayninchikkunamanta musyakuspa chaylla cambiaspaqa, manam Satanaspa toqllankunamanqa wichiykusunchu (2 Tim. 2:26). Chaynaqa, ¿imatam ruwananchik piensayninchik hinaspa munayninchik Jehova Diospa munasqanman hina mana kaptinqa? Mana iskayrayaspanchikmi payman chaylla kutirikunanchik hinaspapas Jehova Diospa niwasqanchikkunatam tukuy sonqonchikwan uyarinanchik (Is. 44:22). Imallapipas mana allinta tantearuyninchikqa llumpaytam kay tiempokunapi ñakarichiwachwan. Chaymi ancha allin kanman mana allinkunamanta musyakuchkaspa cambiayninchikqa.

10, 11. (1) ¿Imaynataq hatun tukuq runaqa? (2) ¿Imatam yachachiwanchik Coreypa, Datanpa hinaspa Abirampa imayna kasqanku?

¹⁰ Sonqonchikqa Jehova Diosmantam karuncharachiwachwan. Piensarisun hatun tukuypi hinaspa imapas munapayaypi. ¿Imaynatam chayna kayqa Jehova Diospa niwasqanchikkunata uyarinanchikta harkawachwan hinaspa mana allinkunaman aparuwachwan? Hatun tukuq runaqa pimantapas aswan allinpaqmi hapikun. Ichapas piensanman imatapas ruwananpaq derechoyoq kasqanta hinaspa imatapas ruwananpaq mana pipas ninanta. Chayrayku ichapas iñiqmasinkunapa, ancianokunapa otaq Diospa llaqtanpa nisqankunata mana kasukunmanchu. Payqa Jehova Diosmanta karunchakuruspanmi nisqankunata manaña allinta uyarinmanñachu.

¹¹ Israel runakuna chunniqpi kachkaptinkum Corey, Datan hinaspa Abiram, Moisespawan Aaronpa contranpi hatarirurqaku. Hatun tukuq rikuriruspankum munasqankuman hina Jehova Diosta yupaychayta munarqaku. ¿Imatam Jehova Diosqa ruwarurqa? Paykunatawan llapallan mana kasukuqkunatam chinkarachirqa (Num. 26:8-10). Kay willakuymi yachachiwanchik Jehova Diospa contranpi hatariyqa mana allinpi tukusqanta. Yuyarichiwanchiktaqmi ‘runaqa orgulloso rikuriruspan wichiruq kasqanmantapas’ (Prov. 16:18; Is. 13:11).

12, 13. (1) Rimarimuy imatapas munapayay mana allinman apasqanmanta. (2) ¿Imataq pasanman imapas munapayasqanta pipas chaylla mana corregikuptinqa?

 ¹² Kunanñataq rimasun imapas munapayaymanta. Imapas munapayaq runaqa munasqanman hinam imatapas tantean hinaspapas allin kaqkunatam mana kasukunchu. Aram nacion tropakunata kamachiq Naaman lepra onqoyninmanta sanoyaruspanmi Eliseoman regalokunata qoyta munarqa, paymi ichaqa mana chaskirqachu. Eliseopa sirvienten Giezim ichaqa chay regalokunata munapayarqa, chaymi nirqa: “Kawsaq Tayta Diosraykum jurani: Kallpaylla hayparuspaymi imallantapas mañakaramusaq”, nispa. Eliseo mana rikuchkaptinmi Gieziqa kallpaylla pasarqa Naamanta hayparunanpaq hinaspanmi llullakuspan mañakurqa “kimsa chunka kimsayoq kilo qollqetawan iskay mosoq pachakunata”. Llullakurqataqmi Jehova Diosmanta willakuq Eliseotapas. ¿Imam pasarurqa hukkunapa imantapas munapayaq Giezita? ¡Naamanpa lepra onqoyninmi paymanña rataykurqa! (2 Rey. 5:20-27.)

¹³ Imatapas munapayayqa pisi-pisimantam qallaykunman. Pipas chayna kasqanta mana corregiptinqa kawsakuyninpim mana allinman aparunman. Acan sutiyoq runamanta Bibliapa willakusqanmi chayna kasqanta sutillata qawachiwanchik. Acan sutiyoq runam nirqa: “Jerico llaqtamanta qechusqa kaqkunamantam rikururqani kuyayllapaq Babilonia lawmanta kaq capata, iskay chunka kimsayoq kilo qollqeta chaynataq parte kilo pesaq trozo qoritapas. Chaykunata kuyaruspaymi apakurqani”, nispa. Munapayasqanta qepanchananmantaqa, tukuy chaykunata suwakuruspanmi karpanpi pakarurqa. Acan sutiyoq runapa hucha ruwasqanta yacharuptinkum, Josuey nirqa Jehova Dios castigananmanta. Hinaptinmi chay punchawllapi paywan familiankuna rumiwan choqapasqa wañurqaku (Jos. 7:11, 21, 24, 25). Imatapas munapayayqa qonqaymantam mana allinman wichiykachiwachwan. Chayraykum imapas munapayaymanta cuidakunanchik (Luc. 12:15). Wakinpiqa mana allinkunapim piensachwan, yaqapaschá piensachwan huchapakuypi. Chayna kaptinqa piensayninchiktam controlananchik hinaspapas manam saqenanchikchu chay mana allin munapayayninchikkuna huchallikuyman aparuwananchikta (leey Santiago 1:14, 15).

14. ¿Imatam ruwananchik hatun tukuq hinaspa imatapas munapayaq kanapaq sonqonchik tanqawaptinchikqa?

¹⁴ Hatun tukuy hinaspa imatapas munapayayqa mana allinmanmi aparuwachwan. Chaymi imapi tukunanmanta yuyaymanayqa yanapawasun Jehova Diospa nisqankunata uyarinapaq (Deut. 32:29). Bibliapiqa Jehova Diosqa manam allin ñanninta rinallanchikpaqchu niwanchik, niwanchiktaqmi chayninta riyninchik allinninchikpaq kasqanmanta hinaspa chay allin ñanmanta karunchakuruspa mana allinpi tukurunanchikmantapas. Sichu sonqonchik tanqawasun hatun tukuq kanapaq otaq imatapas munapayanapaq, hinaptinqa kikinchik hinaspa familianchik imayna tarikunanpim piensananchik. Astawanraqmi piensananchik Jehova Dioswan amistadninchik imayna kananpi.

15. ¿Imatam yachachiwanchik Jehova Diosta sapa kuti Jesuspa mañakusqan?

¹⁵ Jehova Diosqa allin kawsakunanchiktam munan (Sal. 1:1-3). Chaymi yanapakuyninkunata qowanchik kamas necesitasqanchik tiempopi (leey Hebreos 4:16). Jesuspas mana pantaq kachkaspapas Jehova Diostam sapa kuti mañakuq. Chaymi Jehova Diosqa tukuypi yanaparqa. Arí, angelkunatam kachamurqa yanapananpaq, chuya espirituntam qorqa hinaspapas yanaparqam 12 apostolninkunata akllaptin. Chaymantapas, hanaq pachamantaraqmi rimamurqa chaynapi Churin paypa chaskisqan kasqanmanta qawachinanpaq (Mat. 3:17; 17:5; Mar. 1:12, 13; Luc. 6:12, 13; Juan 12:28). Ñoqanchikpas Jesus hinam Jehova Diosman sonqonchikta kicharinanchik (Sal. 62:7, 8; Heb. 5:7). Chaynata ruwaspanchikmi Jehova Dioswan sapa kuti rimasunchik hinaspa sutinta hatunchananchikpaq hina kawsasunchik.

16. ¿Imatam ruwananchik Jehova Diospa nisqankunata uyarinapaq?

¹⁶ Lliw runakunamanmi Jehova Diosqa consejonkunata qowanchik, ichaqa manam pitapas hikutanchu kasukunanpaqqa. Jehova Dios yanapawananchikpaqqa chuya espirituntam mañakunanchik, payqa qoykuwasunmi mañakuptinchikqa (leey Lucas 11:10-13). Chaymantapas Bibliam nin: “Sumaqtayá uyariychik”, nispa (Luc. 8:18). Piensarisun kaypi: millakuypaq qalalla kaqkunata qawachkaspa otaq chayman rikchakuq kaqkunata qawachkaspaqa, yanqachá kanman mana allin munaykunata atipanapaq Jehova Diosta mañakuyqa. Jehova Dios yanapawananchikpaqqa, chuya espiritunpa kasqan lawkunapim kananchik. Yachanchikmi Jehova Diospa espiritunqa huñunakuykunapi kasqanta. Achka iñiqmasinchikkunam huñunakuykunapi Jehova Diospa nisqankunata uyarispanku musyakurqaku mana allin munaykuna sonqonkupi kasqanta hinaspankum cambiarqaku. Chaynapim achka sasachakuykunamanta librakurqaku (Sal. 73:12-17; 143:10).

17. ¿Imanasqataq mana allinchu kikillanchikpi hapipakuyqa?

¹⁷ Piensarisunchik ñawpaq Israel nacionpi kamachiq Davidpi. Payqa mozollaraq kachkaspanmi Filistea nacionniyoq hatunkaray Goliat sutiyoq runata wañurachirqa. Tiempopa risqanman hinataqmi soldado hinaspa Israel nacionpa reynin karqa. Chaymi llaqtanta waqaychaspan hatun ruwaykunapaq allinta tantearqa. Kikillanpi hapipakuspanmi ichaqa sonqonpa munasqanta ruwarurqa. Chayraykum Betsabeywan huchapakururqa hinaspapas qosan Urias wañuchisqa kananpaqmi kamachirqa. Ichaqa, Jehova Dios corregiptinmi Davidqa humillakuspan huchankunamanta reqsikurqa hinaspam kaqmanta paywan amistad karqa (Sal. 51:4, 6, 10, 11).

18. ¿Imataq yanapawasun Jehova Diospa nisqankunata uyarinapaq?

¹⁸ Chaynaqa, 1 Corintios 10:12 nisqanta kasukuspayá kikillanchikpiqa ama hapipakusunchu. Runaqa kikillanchikmanta imatapas allinta tanteayta mana atisqanchikraykum, Jehova Diospa nisqankunata otaq Satanaspa nisqankunata kasukuypi tukuruchwan (Jer. 10:23). Hinaptinqa, hinallayá Jehova Diosta mañakusun hinaspa chuya espiritun yanapawananchikta saqekusun. Arí, Jehova Diospa nisqankunatayá uyarisun.