1. ¿Imaynatam apostol Pablo qawarqa Diosmanta willakunankupaq kallpanchakuqkunata?

APOSTOL Pabloqa anchatam chanincharqa Diosmanta willakunankupaq kallpanchakuqkunataqa. Paymi kaynata qellqarqa: “Yuyarinikumá Dios Taytanchikpa qayllanpi iñiynikichikman hina llamkasqaykichikta, kuyakuynikichikman hina servisqaykichikta hinaspa Señorninchik Jesucristopi confiakuspa ñakariykuna aguantasqaykichikta”, nispa (1 Tes. 1:3). Jehova Diospas atisqankuman hina achkata otaq pisillata ruwaptinkupas, anchatam chaninchan tukuy sonqonkuwan servinankupaq kallpanchakuqkunataqa (Heb. 6:10).

2. ¿Imamantam kay yachachikuypi yachasunchik?

² Ñawpaqpi hinaspa kunan tiempopi iñiqmasinchikkunaqa, tukuytam ruwarqaku Jehova Diosta tukuy tiemponkuwan servinankupaq. Qawasunyá punta cristianokunapa ruwasqankuta. Chaymantapas qawasun kunan tiempopi cristianokunapa tukuy imapi Diosta servisqankuta hinaspa paykunata imayna chaninchanamantapas.

3, 4. (1) ¿Imaynatam punta cristianokunamanta wakinku Diosta servirqaku? (2) ¿Imaynatam tukuy tiemponkuwan Diosta serviq punta cristianokunaqa mantienekuqku?

³ Bautizakusqan qepallatam Jesusqa Diosmanta willakuyta qallaykurqa, chay willakuymi enteron Pachaman chayanan karqa (Luc. 3:21-23; 4:14, 15, 43). Jesus wañukuptinmi apostolninkuna chayta hinalla ruwarqaku (Hech. 5:42; 6:7). Wakin cristianokunam misionero hina Diosmanta willakunankupaq llaqtankumanta pasakurqaku. Felipem Palestina nacionpa achka llaqtankunapi Diosmanta willakurqa (Hech. 8:5, 40; 21:8). Pablopas Diosmanta willakunanpaqmi karu-karu llaqtakunaman rirqa (Hech. 13:2-4; 14:26; 2 Cor. 1:19). Wakin cristianokunapas Bibliapa wakin libronkunatam qellqarqaku otaq yanapaqnin karqaku, paykunamantam karqaku Silvano otaq Silas, Marcos hinaspa Lucas (1 Ped. 5:12). Achka cristianakunañataqmi paykunata yanaparqaku (Hech. 18:26; Rom. 16:1, 2). Griego Rimaypi Qellqasqa Diospa Palabranpim suma-sumaq willakuykuna kachkan chayna qarinchakuq cristianokunamanta, chaymi qawachiwanchik serviqninkunata Jehova Dios imayna waqaychasqanta hinaspa chaninchasqanta.

⁴ ¿Imaynatam tukuy tiemponkuwan Diosta serviq punta cristianokunaqa mantienekuqku? Wakinkum apostol Pablo hina iskay-kimsa punchaw llamkaqku. Paykunaqa manamá iñiqmasinkuna imatapas qoykunankutaqa suyaqkuchu, chaywanpas iñiqmasinkunaqa yanapaqkum (1 Cor. 9:11-15). Wakinkum mikunankupaq wasinkuman pusaqku hinaspa samaykachiqku. Sapakamapas chaynataq llapan iñiqmasinkunapas huk sonqollam yanapaqku (leey Hechos 16:14, 15; Filipenses 4:15-18).

5. ¿Imatam nirqa casarasqa iñiqmasinchikkuna tukuy tiemponkuwan Diosta servisqankumanta?

⁵ Kunanpas achka iñiqmasinchikkunam tukuy tiemponkuwan Diosta servinankupaq kallpanchakunku (qaway  “Imakunapi tukuy tiempowan Dios serviymanta” niqta). ¿Imaynatam qawanku chay ruwasqankuta? ¿Manachu paykunata tapuykuwaq? Willasusqaykiqa anchatachá kallpanchasunki. Qawasun huk iñiqmasinchikpa nisqanta, payqa precursor  regular, especial hinaspa misionerom karqa. Kunanqa huk law nacionpim Betel wasipi llamkachkan. Paymi nin: “Tukuy tiempoywan Diosta servinaypaq tanteasqayqa imamantapas aswan allinmi karqa. 18 wataypi kachkaspaymi iskayrayarqani sichu universidadpi estudianaymanta otaq tukuy tiempoywan llamkanaymanta otaq precursor kanaymanta. Llumpaytam sasachakurqani akllanaypaq. Ichaqa sutillatam qawarqani tukuy tiemponchikwan Jehova Diosta servinapaq kallpanchakusqanchikta pay mana qonqasqanta. Jehova Diospa yachay qowasqantam allinta servichikurqani. Chay ruwaytaqa manam atiymanchu karqa kay Pachapi imapas munaykunata maskaspayqa”, nispa. Señoranpas ninmi: “Maypipas servisqaykupim qawarqaniku Jehova Dios yanapawasqankuta hinaspa waqaychawasqankuta. ¡Manachá Diospa yanapakuynintaqa qawaymankuchu karqa tukuy tiempoykuwan payta mana servispaykuqa! Sapa punchawmi Jehova Diosta agradecekuni servisqaykupi bendeciwasqankumanta”, nispa. ¿Qampas chayna niytachu munawaq?

6. ¿Imamantam mana iskayrayachwanchu?

⁶ Manamá llapanchikchu tukuy tiemponchikwan Dios serviytaqa atinchik. Chayna kaptinqa, ama iskayrayaychu servinaykipaq tukuy kallpanchakusqaykita Jehova Dios chaninchasqanmanta. Piensariy Colosas llaqtapi iñiqmasinkunaman apostol Pablo kuyakuyninta apachisqanpi, wakinpataqa sutintaraqmi rimarirqa (leey Filemon 1-3). Arí, Pabloqa chanincharqamá Diosta servinankupaq kallpanchakusqankutaqa. Jehova Diospas chanincharqamá. Chaynallataqmi qampa kallpanchakusqaykitapas chaninchan. Chaynaqa, ¿imaynatam yanapachwan tukuy tiemponkuwan Jehova Diosta serviqkunata?

7, 8. (1) ¿Imatam precursorkuna ruwanku? (2) ¿Imaynatam precursorkunata yanapachwan?

⁷ Punta cristianokuna hinam, kunanpas precursorkunaqa congregacionkunata kallpanchan. Paykunaqa sapa killam 70 horata Diosmanta willakunankupaq kallpanchakunku. Hinaptinqa, ¿imaynatam paykunata yanapachwan?

⁸ Shari sutiyoq precursoram nirqa: “Sapa punchaw Diosmanta willakunaykupaq lloqsisqaykuraykum ichapas piensanmanku mana hukmanyasqaykuta. Ichaqa kallpanchawanankutam munaniku”, nispa (Rom. 1:11, 12). Ñawpaqpi precursora kaq huk cristianapas congregacionninpi precursorkunamantam nirqa paykuna mana samaspanku anchata llamkasqankumanta. Nirqataqmi imallatapas mikuykunankupaq pipas pusaptin otaq imallanpaqpas qollqechata qoptinku anchata agradecekusqankumanta.

9, 10. ¿Imatam wakin iñiqmasinchikkuna ruwarqaku congregacionninkupi precursorkunata yanapanankupaq?

⁹ Precursorkunataqa yanapachwantaqmi paykunawan Diosmanta willakunapaq rispanchik. Bobbi sutiyoq precursoram llakikuspan nin: “Munanikum lunesmanta vierneskama pipas riysiwanankuta”, nispa. Paypa congregacionninmanta huk precursorapas ninmi: “Tardenkunapi Diosmanta willakunapaq pipas riysiwanankupaq tariyqa sasam”, nispa. Brooklyn Betel wasipi llamkaq huk iñiqmasinchikpas precursora kasqanmantam kaynata willakun: “Carroyoq cristianam kaynata niwaq: ‘Mana pipas riysisuptikiqa ñoqata qayaykamuway, ñoqam riysisqayki’, nispa. Pay yanapawasqanraykum precursora kasqaytaqa mana saqerqanichu”, nispa. Shari iñiqmasinchikpas ninmi: “Soltero precursorkunaqa yaqa llapanpim  sapallanku tarikunku predicayta tukuruspankuqa. ¿Atichwanchu familiawan Diosta yupaychananchikpaq tutapi hamunankupaq niyta? Imapas ruwasqanchikman hamunankupaq nisqanchikpas anchatamá kusichinqa”, nispa.

¹⁰ Huk cristianam yaqa 50 wataña tukuy tiemponwan Diosta servin, paymi soltera kaq precursorakunawan kuska Diosta servisqanmanta nin: “Ancianokunam precursorkunata achka kutita watapi watukuqku. Tapuqkum llamkayninkumanta, imayna tarikusqankumanta hinaspa imapas sasachasqanmanta. Sonqomantam yanapaykuyta munawaqku. Imapipas yanapaykuwanankupaqmi wasiykumanpas hamuqku”, nispa. Kay ancianokunaqa Onesiforo sutiyoq cristianotam qatipakunku, payqa familianta yanapanan kachkaptinpas Pablotam yanaparqa (2 Tim. 1:18).

11. ¿Imatam ruwanku precursor especialkunaqa?

¹¹ Wakin congregacionkunapiqa kanmi precursor especialkuna. Paykunaqa sapa killam pachak kimsa chunka horata Diosmanta willakunku, hinaspapas tukuy imapim congregacionpi yanapakunku. Chayraykum tiemponku manaña haypanchu llamkapakunankupaq. Chaymi tukuy tiemponkuwan Diosmanta hinalla willakunankupaq Betel wasimanta imallankupaqpas as qollqeta chaskinku.

12. ¿Imaynatam precursor especialkunata llapanchik yanapachwan?

¹² ¿Imaynatam yanapachwan precursor especialkunata? Paykunata reqsiq huk ancianom Betel wasipi llamkan, paymi nin: “Ancha allinmi kanman precursor especialkunawan ancianokuna rimayninkuqa, imayna tarikusqankumanta yachayninku hinaspa imayna yanapanankupaq piensayninkupas. Wakin Testigokunam piensanku as qollqeta chaskisqankurayku mana sasachakuyniyoq kasqankuta. Ichaqa, paykunata yanapanapaqqa achkam kachkan”, nispa. Precursor regularkuna hinam, paykunapas anchata agradecekunku Diosmanta willakuq riysiptinchikqa. ¿Atiwaqchu qampas chaypi yanapakuyta?

13, 14. (1) ¿Imaynatam congregacionkuna watukuq ancianokunapi hinaspa señorankupi reparasqanchikta qawachichwan? (2) ¿Imatam qamqa ruwawaq paykunata yanapanaykipaq?

¹³ Congregacionkuna watukuq ancianokunawan señorankuqa iñiyninkupi allin takyasqam kanku, imawanpas mana hukmanyaq hinam rikchakunku. Paykunapas munankum kallpanchananchikta hinaspa Diosmanta willakuq riysinanchikta. Munankutaqmi iñiqmasinkunawan kuska kusirikuytapas. Wakinpiqa llumpayta onqoruspankum hospitalman rinku. Chayna kaptinqa, ¿manachu watukuykuspa imallapipas yanapaykuchwan? ‘Kuyasqa doctor Lucaspas’ allintam Pablotawan puriqmasinkunata kuyakuywan yanaparqa (Col. 4:14; Hech. 20:5–21:18).

¹⁴ Congregacionkuna watukuq ancianokunawan señorankuqa munankutaqmi allin amistadniyoq kayta. Huk kaqninmi kaynata qellqarqa: “Amistadniykunaqa yachankum haykapi kallpanchawayta. Sonqoytam kicharini ñoqapi reparaspan tapuwaptin. Uyariykullawasqanwanmi kallpanchasqa tarikuni”, nispa. Paykunaqa sonqomantamá agradecekunku paykunapi reparasqanchikmanta.

15, 16. (1) ¿Imapim yanapakunku Betel wasipi otaq Asambleakuna Ruwana Wasipi llamkaqkunaqa? (2) ¿Imaynatam yanapachwan chaypi llamkaq iñiqmasinchikkunata?

¹⁵ Enteron Pachapim Betel wasipi otaq Asambleakuna Ruwana Wasipi llamkaqkunaqa  anchata yanapakunku Diosmanta willakuy tukuy hinastinpi apakunanpaq. Congregacionninchikpi otaq yachasqanchik lawpi Betelpi llamkaqkuna kaptinqa, ¿imaynatam paykunata yanapachwan?

¹⁶ Betel wasiman rispankuqa yaqapaschá familiankutawan amistadninkuta saqespanku llakikunku. Chaymi anchata kusikunku Betelpi llamkaqmasinku hinaspa congregacionpi iñiqmasinku allinta chaskiykuspanku amistadninku kanankupaq kallpanchakuptinkuqa (Mar. 10:29, 30). Betelpi llamkaspankupas sapa semanam huñunakunankupaq hinaspa Diosmanta willakunankupaq tiempochakunku. Ichaqa, wakinpim Betelpi huk llamkayninkupas kanman. Chaymi paykunataqa entiendenanchik hinaspam qawachinanchik paykunatawan llamkayninkuta chaninchasqanchikta (leey 1 Tesalonicenses 2:9).

17, 18. ¿Imakunatam ruwanku huk law nacionpi tukuy tiemponkuwan Diosta serviqkunaqa?

¹⁷ Tukuy tiemponkuwan Diosta serviqkunamanta wakinmi huk law nacionkunamanpas astakunku. Yaqapaschá yachananku kanqa huk rimayta, huk costumbrekunata, huk rikchaq mikuyta chaynataq mana llumpay imapas kasqan llaqtakunapi yachaytapas. ¿Imanasqam astakunku? ¿Imakunatam ruwanku huk law nacionpi?

¹⁸ Wakinkuqa kanku misionerokunam, chaymi tukuy tiemponkuta servichikunku Diosmanta willakunankupaq. Congregacionpi kaqkunapas allintam yanapachikunku paykunapa tukuy yachachikuykuna chaskisqankuwan. Betel wasimantam yanapakuyta chaskinku mikuyninkupaq, pachankupaq hinaspa maypi yachanankupaqpas. Tukuy tiemponkuwan Diosta serviqkunamanta wakinqa Betel wasipi servinankupaqmi rinku. Wakinñataqmi Betel Wasita, Qellqanchikkuna Tikranapaq Wasita, Asambleakuna Ruwana Wasita otaq Huñunakunapaq Salonkunata  hatarichiypi yanapakunankupaq rinku. Chay llamkasqanku nacionpi Betel wasim otaq chaypi kaq congregacionmi mikuyninkuwan, samanankupaq wasiwan hinaspa hukkunawanpas yanapanku. Paykunapas Betelpi serviqkuna hinam, huñunakuyman rinku hinaspa chaypi iñiqmasinkunawan Diosmanta willakunku. Chayna ruwasqankum chaypi iñiqmasinkunata anchata kusichin.

19. ¿Imaynatam tukuy tiemponkuwan Diosta servinankupaq huk law nacionmanta hamuq iñiqmasinchikkunata yanapachwan?

¹⁹ ¿Imaynatam kay iñiqkunata yanapachwan? Huk law nacionman chayraq chayaspankuqa manachá wakin mikuykunataqa mikunqakuchu. Chaymi mikunankupaq pusaspaqa tapuykunanchik ima mikuy munasqankumanta otaq ima mana munasqankumantapas. Chaymantapas, rimayninchikta hinaspa imayna kawsayninchikta yachanankukamayá paykunawan pacienciakusun. Yaqapaschá rimayninchiktaqa unaypi yachanqaku, ichaqa yanapananchikmi imayna rimanankupaq. Ama qonqasunchu, paykunaqa yachaytamá munachkanku.

20. ¿Imaynatam yanapachwan tukuy tiemponkuwan Diosta serviqkunatawan tayta-mamankuta?

²⁰ Yaqapaschá tiempopa risqanman hina wakinkuqa tanteananku kanqa tayta-mamankuta imayna yanapanankupaq. Tayta-mamanku Testigo kaspankuqa yaqapaschá munanqaku churi-wawanku huk law nacionpi hinalla tukuy tiemponkuwan Diosta servinankuta (3 Juan 4). Arí, churi-wawankuqa tukuy imatamá ruwanqaku paykunata yanapanankupaq hinaspa watukunankupaq. Ichaqa, chay tayta-mamakunapa hichpallanpi yachaq iñiqmasinkunaqa paykunatam imapipas yanapaykunmanku. Amayá kayta qonqasunchu: churi-wawankuqa tukuy hinastinpi Diosmanta willakuy apakunanpaqmi anchata yanapakuchkanku (Mat. 28:19, 20). Hinaptinqa, ¿yaqachu qam otaq congregacionniki paykunapa yuyaqña otaq onqoq tayta-mamankuta yanapaykunman?

21. ¿Imaynam tukuy tiemponkuwan Diosta serviqkunaqa tarikunku iñiqmasinku yanapaptin hinaspa kallpanchaptin?

²¹ Tukuy tiemponkuwan Diosta serviy munaqkunaqa manam qollqeraykuchu chay ruwaypiqa kallpanchakunku. Aswanqa tukuy sonqonkuwan Dios serviyta hinaspa runamasinkuna yanapayta munaspankum. Paykunaqa anchatamá agradecekunku imapipas yanapaykusqanchikmanta. Huk law nacionpi Diosta serviq cristianam nin: “Agradecesqa kasqankumanta imallatapas qellqawasqankum qawachiwan kuyawasqankuta hinaspa ruwasqayta chaninchasqankutapas”, nispa.

22. ¿Imatam piensanki tukuy tiempowan Dios serviymanta?

²² Tukuy tiemponkuwan Diosta serviqkunaqa alli-allin kawsakuytam akllakunku. Chayna serviyqa ancha kusikunapaqmá. Paykunaqa tukuy imatam yachanku kunanpas hinaspa mosoq pachapipas allinta kawsanankupaq. Ñam Jehova Diospa lliw serviqninkunaqa sapa punchaw kusisqallaña llamkasunchik. Chaynaqa, yanapasunyá tukuy tiemponkuwan Dios serviqkunataqa hinaspa yuyarisunyá iñiyninkuman hina llamkasqankuta chaynataq kuyakuyninkuman hina servisqankutapas (1 Tes. 1:3).