1. ¿Imapim yanapawasun Levitico qellqamanta yachayninchik?

JEHOVA DIOSQA munanmi serviqninkunaqa cuerponkupi, kawsakuyninkupi hinaspa Dios serviyninkupipas chuya kanankuta. Achka kutitam Diospa Palabranqa riman chuya kaymanta, astawanraqmi Levitico qellqapiqa. Chay qellqamanta astawan yachayninchikmi yanapawasun chuya kanapaq.

2. ¿Imakunamantam Levitico qellqaqa yachachiwanchik?

² Hebreo rimaypi Moisespa qellqasqan Levitico sutiyoq qellqaqa Bibliapa huk kaqnin qellqam, hinaspa “allinmi yachachiwananchikpaq” (2 Tim. 3:16). Sapa capitulonpim Diospa sutinqa yaqa 10 kutita rikurin. Kay libromanta astawan yachayninchikqa kallpanchawasunmi Diospa chuya sutinta penqaypi mana churanapaq (Lev. 22:32). “Ñoqa [Jehova] Diosmi” niq rimay achka kutita rikurisqanmi, yuyarichiwanchik payta kasukuyqa ancha allin kasqanta. Kay yachachikuypiwan qatiqnin yachachikuypim chuya kanapaq ancha allin yachachikuykunamanta qawasunchik.

3, 4. (1) ¿Imawantaq tupan Aaronpa bañachisqa kasqanqa? (2) ¿Imawantaq tupan churinkunapa bañachisqa kasqanku? (Qaway kay paginapi dibujota.)

³ (Leey Levitico 8:5, 6). Jehova Diosmi Aaronta akllarurqa  sacerdotekunapa jefen kananpaq, churinkunatañataq sacerdotekuna kanankupaq. Aaronqa Jesucristowanmi tupan, churinkunañataqmi hanaq pachapaq cristianokunawan. Ichaqa, ¿imawanmi tupan Aaronpa bañachisqa kasqanqa? ¿Yaqachu Jesuspas bañachisqa kanan karqa? Manam, Jesusqa ‘mana huchayoqmi’ karqa (Heb. 7:26; 9:14). Aaronpa bañasqa kaspan chuyaña kasqanqa tupanmi Diospa qayllanpi Jesuspa chuya hinaspa allin ruwaq kasqanwan. Chaynaqa, ¿imawanmi tupan Aaronpa churinkunapa bañachisqa kasqankuqa?

⁴ Chayqa tupan sacerdotekuna kanankupaq hanaq pachapaq cristianokuna chuyanchasqa kasqankuwanmi. Ichaqa, ¿bautizakusqankuwanchu paykunaqa chuyanchasqa kanku? Manam. Bautizakuyqa manam huchataqa chinkachinchu, aswanqa tukuy sonqowan Diosta servinapaq qokusqanchiktam qawachin. Hinaptinqa, ¿imaynatam chuyanchasqa kanku? Apostol Pablom nirqa Diospa “yachachikuyninwan” kasqanta, chaymi paykunaqa Jesuspa yachachikuyninkunaman hina kawsakunanku (Efes. 5:25-27). Chaynatam paykunaqa chuyanchasqa kanku. ¿Chaynatachu ‘sapaq ovejakunapas’ otaq kay Pachapaq cristianokunapas chuyanchasqa kanku? (Juan 10:16.)

5. ¿Imanasqam nichwan sapaq ovejakunapas Diospa Palabranpa yachachikuyninkunawan chuyanchasqa kasqankumanta?

⁵ Nimusqanchikman hinaqa, kay Pachapi kawsanankupaq suyakuyniyoq sapaq ovejakunaqa otaq ‘achkallaña runakunaqa’ manam tupanchu Aaronpa churinkunawanqa (Apoc. 7:9). Chaywanpas, Diospa Palabranpa yachachikuyninkunawanmi paykunaqa chuya kayta atinku. Arí, rantinchikpi Jesuspa wañukusqanmanta Bibliapa willakusqanpim iñinku, chaymi “tuta punchaw” Diosta servinankupaq kallpanchakunku (Apoc. 7:13-15). Hanaq pachapaq cristianokunawan sapaq ovejakunaqa hinallam kallpanchakunku chuyanchasqa kanankupaq, chaymi haykapipas allinta kawsakunku (1 Ped. 2:12). ¡Maynatachá Jehova Diosqa kusikun chuya  kasqankutawan huk sonqolla kasqankuta qawaspanqa! Paykunaqa Michiqnin Jesusta kasukuspankum qatikunku.

6. ¿Imanasqataq sapa kuti imayna kasqanchikta qawakunanchik?

⁶ ¿Imakunatam yachachiwanchik sacerdotekunapa chuya kasqanku? Achka Biblia estudiaqkunam huñunakusqanchik Salon chuya kasqanmanta hinaspa sumaq allichasqa risqanchikmanta admirakunku. Chaymantapas, yachachiwanchikmi “Diospa orqonman” otaq llaqtanman pipas yaykuyta munaspanqa chuya sonqoyoq kananmanta (leey Salmo 24:3, 4; Is. 2:2, 3). Jehova Diosqa munanmi sonqonchikpi, yuyayninchikpi hinaspa cuerponchikpipas chuya kananchikta, chaypaqmi sapa kuti imayna kasqanchikta qawakunanchik. Chaynata ruwaspam musyakusun imakunapi cambianamanta (2 Cor. 13:5). Jehova Diospa Testigon millakuypaq qalalla kaqkuna qawayman qokuruspanqa, kaynatam tapukunan: “¿Chuya kasqaytachu qawachichkani?”, nispan. Hinaspanñataqmi ancianokunapa yanapakuyninta mañakunan chay mana allin ruwayta saqenanpaq (Sant. 5:14).

7. ¿Imanasqam nichwan Levitico 8:22-24 nisqan Jesuswan tupasqanta?

⁷ Israel llaqtapi sacerdotekuna kayta qallaykuptinmi, Moisesqa Aaronpawan churinkunapa alleq rinrinpi, alleq makinpa maman dedonpi hinaspa alleq chakinpa maman dedonpipas carneropa yawarninwan llusiykurqa (leey Levitico 8:22-24). Chaynata ruwasqanmi qawachirqa imapas ruwayninkupi sacerdotekunaqa kasukunankumanta. Chaynam sacerdotekunapa jefen Jesuspas qatipakunapaq hina karqa hanaq pachapaq cristianokunapaqwan sapaq ovejakunapaqpas. Paypa rinrinqa Diospa nisqankunata chaylla uyariqmi karqa, makinpas Diospa munaynin ruwaqmi karqa hinaspa chakinñataq Diospa ñanninmanta mana haykapipas karunchakuqmi karqa (Juan 4:31-34).

8. ¿Imatam Diospa lliw serviqninkuna ruwananchik?

⁸ Jehova Diospa lliw serviqninkunam qatipakunanchik Jesuspa Diosman sonqo kasqantaqa. Kasukunanchiktaqmi Bibliantakama Diospa kamachiwasqanchiktapas, chaynapim Diospa chuya espirituntaqa mana llakichisunchu (Efes. 4:30). Kawsayninchikpiyá ‘derecho ñanta rurasunchik’ (Heb. 12:13).

9. (1) ¿Imatam nirqaku Diospa Llaqtanpi Punta Apaqkunawan llamkaq iñiqmasinchikkuna? (2) ¿Imaynatam nisqankuqa yanapawanchik hinalla chuya kanapaq?

⁹ Rimasun Diospa Llaqtanpi Punta Apaqkunawan unay watakuna llamkaq iñiqmasinchikkunamanta. Huk kaqninmi nin: “Hanaq pachapaq cristianokunawan llamkay kusikunapaq kaptinpas, wakinpiqa musyakurqanim pantaq runakuna kasqankuta. Chaywanpas, kallpanchakurqanim paykunata kasukunaypaq”, nispa. Hukninpas ninmi: “Jesucristota kasukunapaq kallpanchaq textokuna hinam, 2 Corintios 10:5 nisqanpas allinta  yanaparuwarqa Diospa llaqtanpi punta apaqkunata kasukuspay yanapanaypaq. Chaytam kunankamapas tukuy sonqoywan ruwani”, nispa. Hukninpas ninmi: “Diospa kuyasqanta kuyaq runaqa cheqninmi paypa cheqnisqanta, hinaspam paypa yanapakuyninta maskaspan munasqanman hina kawsakuyta munan. Chayna runaqa kasukuntaqmi Diospa llaqtanpi punta apaqkunapa tukuy nisqantapas”, nispa. Kay iñiqmasinchikqa yuyarintaqmi Nathan Knorr iñiqmasinchik manaraq Diospa Llaqtanpi Punta Apaq kachkaspan allin kasukuq kasqanmanta. 1925 watapim ingles rimaypi kay qellqanchikpa “Nacimiento de la nación” niq yachachikuyninpi lloqsimurqa mosoq yachachikuykuna. Hinaptinmi wakin iñiqmasinchikkunaqa chay yachachikuykunamanta iskayrayayta qallaykurqaku, Knorr iñiqmasinchikmi ichaqa mana iskayrayaspan chaylla kasukurqa. Kay iñiqmasinchikkunapa willakusqankupi yuyaymanayqa yanapawasunmi chuya kayta munaspaqa kasukuq kanapaq.

10. ¿Imanasqataq yawarmanta Diospa kamachisqantaqa kasukunanchik?

¹⁰ (Leey Levitico 17:10). Jehova Diosqa Israel runakunatam kamachirqa yawarta ama mikunankupaq. Kunan tiempopi cristianokunatapas kamachiwanchikmi ima yawartapas ama mikunapaq nitaq churachikunapaqpas (Hech. 15:28, 29). Wañuy patanpiña tarikuspapas otaq Diosta mana reqsiq runakuna hikutawaptinchikpas, kasukuytam munanchik Bibliapa chayna kamachiwasqanchiktaqa. Ñoqanchikqa Jehova Diostam kuyanchik hinaspam kasukuyta munanchik. Manam imaraykupas munanchikchu Dios qepanchawananchiktaqa nitaq llaqtanmanta horqowananchiktapas. Arí, yawarta mana chaskisqanchikrayku asikuwaqninchik runakunaqa kanqam, chayna kaptinpas ñoqanchikqa Jehova Diostam kasukuyta munanchik (Jud. 17, 18). ¿Imataq yanapawasun yawarta imaraykupas mana mikunapaq nitaq churachikunapaq? (Deut. 12:23.)

11. ¿Imataq qawachin Hucha Pampachana Punchawpi yawarwan ima ruwasqankuqa mana yanqa ruwaykunalla kasqanta?

¹¹ Hucha Pampachana Punchawpi sacerdotekunapa jefen yawarwan ima ruwananmanta Jehova Diospa kamachisqanmi qawachin yawarmanta ima piensasqanta. Yawartaqa servichikunanku karqa, wanakuq runapa huchanta Jehova Dios pampachanallanpaqmi. Chay punchawpim toropa otaq chivatopa yawarninta sacerdotekunapa jefen baulpa tapanpa ñawpaqninpi challanan karqa (Lev. 16:14, 15, 19). Chaywanmi Jehova Diosqa llaqtanpa huchanta pampachanan karqa. Diosqa kamachirqataqmi ima animalta pipas wañuchispanqa, yawarninta pampaman sutuchispan allpawan tapananpaq. ¿Imanasqa? ‘Runapas otaq animalpas yawarllanwan kawsasqanraykum’ (Lev. 17:11-14). Chaynaqa, yawarmanta Diospa chayna kamachisqanqa, manam yanqa ruwaykunallachu karqa. Pachaknintin watakuna ñawpaqtaraqmi Jehova Diosqa Noeymanwan mirayninkunaman nirqa yawarta mana mikunankupaq (Gen. 9:3-6). ¿Imatam tukuy chaykunamanta yachachwan?

12. Apostol Pablo hebreo cristianokunaman carta qellqasqanman hina, ¿imapaqtaq yawarqa karqa?

¹² Apostol Pablom hebreo cristianokunaman carta qellqasqanpi willakurqa yawarwan huchanchikmanta pampachasqa kasqanchikta. Nirqam: “Leyman hinaqa yaqa llapallanmi yawarwan chuyanchasqa  karqa. Yawar mana challasqa kaptinqa huchaqa manam pampachasqachu kanman”, nispa (Heb. 9:22). Ichaqa animalkunapa yawarninwan hucha pampachayqa manam wiñaypaqchu kanan karqa. Pabloqa willakurqam chay ruwasqankuqa huchasapa kasqankuta Israel runakunaman yuyarichisqanta hinaspa animalkunapa yawarllanwan pasaypaq mana pampachasqa kasqankuta. “Moisespa leyninqa hamuq [. . .] kaqkunapa llantuynin hinallam karqa” (Heb. 10:1-4). ¿Imaynatam huchamanta pasaypaq pampachasqa kachwan?

13. ¿Imaynam tarikunchik ñoqanchikrayku Jesuspa ruwasqanmanta?

¹³ (Leey Efesios 1:7). Jesuspa rantinchikpi wañukusqanqa ancha chaninniyoqmi paytawan Taytanta kuyaqkunapaqqa (Gal. 2:20). Ichaqa, manam Jesuspa kamas wañukusqanwanchu huchanchikmanta pasaypaq pampachasqaqa kanchik. Aswanqa wañukuspan kawsariramusqan qepaman Jesuspa ruwasqanwanmi. Chaywanmi Hucha Pampachana Punchawpi tukuy ima ruwakusqanqa tupan. Chay punchawpim sacerdotekunapa jefenqa ofrecesqan animalpa yawarninta karpapa chuyay-chuyay kaq lawninman yaykuspan Jehova Diospa qayllanpipas kachkanman hina qoq (Lev. 16:11-15). Chaynapunim Jesucristopas kawsarimusqan qepata hanaq pachapi Taytanpa qayllanman yaykuspan yawarninpa  chaninninta qorqa (Heb. 9:6, 7, 11-14, 24-28). ¡Mayna kusikunapaqmá chay ruwasqanqa! Chay yawarnin ancha chaninniyoq kasqanpi iñisqanchikraykum, Diosqa huchanchikmanta pasaypaqta pampachawanchik. Chaymi conciencianchikpipas hawka tarikunchik.

14, 15. ¿Imanasqam ancha allin yawarmanta Diospa kamachisqanta allinta yachayninchik hinaspa kasukuyninchik?

¹⁴ Tukuy chaykunaraykum Jehova Diosqa nirqa yawarta amapuni mikunapaq (Lev. 17:10). Pipas yawarwan kawsasqanraykum, Diospaqa ancha chaninniyoqmi yawarqa (Gen. 9:4). Pay hinam ñoqanchikpas yawartaqa chaninchananchik, hinaspa ama mikunapaq kamachiwasqanchiktapas kasukunanchik. Jesucristo ñoqanchikrayku wañukusqanpi iñispallam hinaspa yawarqa Diospaq ancha chaninniyoq kasqanta allinta yachaspallam Dioswanqa allin kasunchik (Col. 1:19, 20).

¹⁵ Qonqayllamantam hatun sasachakuypi mayqanninchikpas tarikuchwan, chaymi wakinpiqa tanteananchik kanqa yawarta otaq yawarpa tawa partenkunapa partechankunata chaskinapaq otaq mana chaskinapaq otaq chayman rikchakuq kaqkunawan hampichikunapaqpas. Manam mayqanninchikpas Jehova Dios llakichiytaqa munanchikchu yawarmanta kamachiwasqanchikta mana kasukuspaqa. Chayraykum ancha allin chayna sasachakuykunapi manaraq tarikuchkaspa Diosta mañakuyninchik hinaspa chaykunamanta sumaqta yachaspa ñawpaqmantaraq tanteakuyninchik. Chaynata ruwaspanchikqa kallpanchasqam tarikusun yawarta churachikunapaq pipas hikutawaptinchik mana kasunapaq. Achka doctorkunawan runakunam allinpaq hapinku yawar churachikuytaqa, chaymi runakunata mañakunku yawarninkuta qonankupaq. Ichaqa, Unanchawaqninchik Jehova Diosllam ninman yawarta imakunallapaq servichikunamanta, payqa ancha chaninniyuqtam yawartaqa qawan. Chaynaqa, yawarmanta Diospa kamachisqantayá kasukusun. Chaymantapas, kawsakuyninchikpi chuya kaspayá qawachisun Jesuspa yawarnin chaninchasqanchikta. Chayllawanmi huchanchikmantaqa pampachasqa kasun hinaspa wiñay kawsaytapas haypasun (Juan 3:16).

16. ¿Imanasqataq chuya kananchik?

¹⁶ Jehova Dios Israel runakunata Egipto nacionmanta libraspanmi nirqa: “Ñoqa [Jehova] Diosmi Egipto nacionmanta horqomurqaykichik Diosnikichik kanaypaq. Chaynaqa chuyayá kaychik ñoqapas chuya kasqayrayku”, nispa (Lev. 11:45). Jehova Diosqa chuya kasqanraykum munarqa llaqtanpas chuya kananta. Chayraykum ñoqanchikpas chuya kananchik. Levitico qellqaqa chaytam sutillata qawachin.

17. ¿Imapim Levitico qellqaqa yanaparuwanchik?

¹⁷ Levitico qellqapi wakin yachachikuyninmanta yachayqa, allintam yanaparuwanchik kay qellqata astawan chaninchanapaq hinaspa chuya kanapaq imanasqa niwasqanchikta entiendenapaq. Chaywanpas kay qellqapiqa kachkanraqmi chuya kanapaq ancha allin yachachikuyninkunaqa. Chaymantam qatiqnin yachachikuypi astawan yachasun.