GUY HOLLIS PIERCE sutiyoq iñiqmasinchikqa Jehova Diospa Llaqtanpi Punta Apaqkunapa huk kaqninmi karqa, paymi 79 watanpi kachkaspan wañukurqa 2014 watapa marzo killanpa 18 martes punchawninpi. Payqa Jesucristopa wawqen kasqanraykum, hanaq pachapiña kachkan (Heb. 2:10-12; 1 Ped. 3:18).

Guy Pierce iñiqmasinchikqa 1934 watapa noviembre killanpa 6 punchawninpim Auburn (California, Estados Unidos) llaqtapi nacerqa. Hinaspañataqmi 1955 watapi bautizakururqa. 1977 watapim Penny sutiyoq kuyasqan warminwan casarakuruspan kuska churi-wawankuta uywarqaku. Chayraykum payqa kuyakuq tayta hina piwanpas karqa. Chaymanta pasaytam 1982 watapi iskayninku precursor kayta qallaykurqaku. 1986 watamanta 1997 watakamañataqmi Estados Unidos nacionpi congregacionkunata watukuq anciano karqa.

Chay watapim Estados Unidos nacionpi Betel wasiman rinankupaq nirqaku. Chaypim payqa Predicacionmanta Encargakuq Oficinapi yanapakurqa. 1998 watapiñataqmi Betelpi Llamkaqkunamanta Encargakuqkunata yanapaspa llamkarqa. Chaymantam 1999 watapa octubre killanpa 2 kaq punchawninpi, huk hatun huñunakuy apakusqanpi willakurqaku Pierce sutiyoq iñiqmasinchikqa Diospa Llaqtanpi Punta Apaqkunapa huk kaqninña kananmanta. Pasaq watakunapim payqa karqa: Betel wasipi Llamkaqkunamanta Encargakuq, Yachachikuykuna Qellqaymanta Encargakuq, Qellqakuna Ruwaypi Encargakuq hinaspa Encargakuqkunamanta Cuentallikuqpas.

Kusisqa hinaspa asichikuq kayninwanmi pipas paywanqa hawka tarikuq. Payqa kuyakuq, humilde, Jehova Diospa kamachikuyninkunata kuyaq hinaspa Diospi hapipakuq kasqanwanmi kuyachikurqa. Paypaqqa intiraqmi mana lloqsimunmanchu Jehova Diospa nisqankuna mana ruwakunanmantaqa, chayta lliw runakuna yachanantam munarqa.

Pierce iñiqmasinchikqa mana pisipaspanmi Jehova Diosta servirqa. Achikyasqanmantapunim tutaykuqkama llamkaq. Tukuy hinastinmanmi rirqa iñiqmasinkunata kallpanchananpaq, payqa tiempochakuqmi Betelpi iñiqmasinkunapaq, yanapakuyninta maskaqkunapaq chaynataq paywan kuska kayta munaq iñiqmasinkunapaqpas. Paytaqa haykapipas yuyarinqakum chaskikuq, allin amistad hinaspa Bibliata servichikuspa kallpanchaq kasqanwan.

Arí, señoranpas, soqta churinkunapas, willkankunapas, willkankunapa churinkunapas chaynataq taytankuta hina kuyaqkunapas kuyakuywanmi yuyarinqaku Guy Pierce iñiqmasinchiktaqa. 2014 watapa marzo killanpa 22 sabado punchawninpim, Diospa Llaqtanpi Punta Apaqkunamanta Mark Sanderson sutiyoq iñiqmasinchik Brooklyn Betel wasipi Pierce iñiqmasinchik wañukusqanmanta discursota qorqa. Chaypim rimarqa Pierce iñiqmasinchikqa hanaq pachapi suyakuyniyoq kasqanmanta, hinaspam Jesuspa kayna nisqanta Bibliapi leerqa: “Taytapa kasqanpiqa achkam kachkan lugarkuna yachakunapaq [. . .]. Allicharamuspaymi kutimusaq qamkuna pusanaypaq chaynapi maymi kasqaypi qamkunapas kanaykichikpaq. Qamkunaqa yachankichikmi mayman risqaytapas, reqsinkichiktaqmi ñantapas”, nispa (Juan 14:2-4).

Kuyakuywanmi yuyarisun Pierce iñiqmasinchiktaqa, payqa allintapunim yacharqa hanaq pachapaq suyakuyniyoq kasqantaqa.