Jehova Diosta kuyasqanchikraykum payman qokuspa bautizakurqanchik. Haykapipas payman sonqo kanapaqmi prometekurqanchik, chaymi chay cumpliytaqa munanchik. Ichaqa, Satanasmi chay tanteasqanchikta yanqacharuyta munan (Apoc. 12:17). Diosta servinanchikpaq hinaspa kamachikuyninkunata kasukunapaqmi tantearurqanchik. Ichaqa llakikunapaqmá kanman chay tanteasqanchikta cambiaruspa hamuq tiempopi wiñay kawsayta mana haypayninchikqa.

2.600 masnin watakuna ñawpaqtaraqmi, Babiloniapi kamachiq Nabucodonosor ruwachirqa hatunkaray qorimanta taytachata. Hinaspam kamachirqa chay taytachapa ñawpaqninpi llapallan runakuna qonqorakunankupaq. Chayta mana kasukuqqa rupachkaq hornomanmi wischusqa kananku karqa. Sadrac, Mesac hinaspa Abed-nego sutiyoq mozokunam Jehova Diospa serviqninkuna kasqankurayku payllata kasukuyta munarqaku. Nabucodonosorta mana kasukusqankuraykum paykunataqa rupachkaq hornoman wischuykurqaku. Wañunanku kaptinpas Diosta kasukusqankuraykum librasqa karqaku (Dan. 3:1-27).

Danielpas Jehova Diosta servinanpaq tantearusqantaqa manam cambiarqachu. Payqa yacharqam Dios mañakuchkaqta runakuna qawaruptinqa, leonkunapa machayninman wischuykunanmanta. Chayna kaptinpas, Danielqa kimsa kutikamam sapa punchaw hinalla Diosta mañakuq. Chayna kasukuq kasqanraykum, Jehova Diosqa “leonkunapa mikusqan kananmantaqa libraykurqa” (Dan. 6:1-27).

Kunan tiempopi Jehova Diospa serviqninkunapas kasukuq kanankupaqmi tantearunku. África lawpa huk kaqnin escuelanpim mozo-sipas Testigokuna bandera saludayta mana munarqakuchu. Chaymi directorqa escuelamanta qarqosqa kanankupaq nirqa. Pisi tiempollamantam ichaqa, gobiernomanta estudiachiypi nanachikuq autoridad chay llaqtata watukurqa, hinaspam chay testigokunawan rimarqa. Paykunaqa mana manchakuspam sumaqllata niykurqaku imanasqa banderata mana saludasqankumanta. Chaymantapacham, chay mozo-sipaskunaqa escuelankupi manaña sasachakuypi kaspa hawkaña estudiarqaku.

Qawasun Joseph sutiyoq iñiqmasinchikwan ima pasakusqanmanta. Paypa señoranmi cancer onqoywan qonqayllamanta wañukurqa. Joseph iñiqmasinchikpa ayllunkunaqa respetaqkum wañukuq señoranta pay imayna pampay munasqantaqa. Ichaqa wañukusqan señoranpa ayllunkunaqa manam Testigochu karqaku, chaymi runakunapa costumbrenkunaman hina wañukuqta pampayta munarqaku. Josephmi nin: “Costumbrenkuman hina pampanankuta ñoqa mana munasqayta musyakuspankum, churiykunataña hikutarqaku, ichaqa ñoqa hinam paykunapas tantearqaku. Señoraypa ayllunkunaqa munarqakutaqmi veloriota costumbrenkuman hina wasiypi ruwayta. Ñoqañataqmi nirqani chay ruwayta munaspankuqa huk lawpi ruwanankumanta, wasiypim ichaqa mana. Paykunaqa yacharqakum chay costumbrenkunaqa wañukuq señoraypawan ñoqapa iñisqaykupa contranpi kasqanmanta. Achka kutita paykunawan rimanakusqaykumantañam, veloriota huk lawpi ruwarurqaku”, nispa.

Josephmi hinalla willakun: “Chayna sasachakuypi tarikuspaymi Jehova Diosta mañakuq kani yanapaykuwanankupaq hinaspa kamachikuyninkunata mana qepanchanaykupaqpas. Mañakusqayta Jehova Dios uyariykuspanmi iñiyniykupi takyanaykupaq yanapawarqaku”, nispa. Josephwan churinkunaqa manam haykapipas piensayllapas-piensarqakuchu Diosta kasukunankupaq tanteasqankuta cambiaytaqa.

32 watapi Pascua fiesta pasayllatam Sidon lawpi Jesus kachkaptin, cananea warmi payman asuykuspan achka kutita mañakurqa warmi wawanmanta demoniota lloqsichinanpaq. Qallariypiqa manam imatapas Jesusqa nirqachu, hinaspam qatiqninkunaman nirqa: “Taytayqa kachamuwan Israel casta chinkasqa ovejakunallamanmi”, nispa. Chay warmi hinalla mañakusqanraykum, Jesus nirqa: “Manam allinchu warmakunamanta tantanta qechuruspa allqokunaman wischuykuyqa”, nispa. Warmiñataqmi ancha iñiyniyoqwan nirqa: “Arí chaynam taytáy, ichaqariki allqokunapas dueñonpa mesanmanta wichiqtaqa mikunmi”, nispa. Chaymi Jesusqa wawanta sanoyachirqa (Mat. 15:21-28).

Chayna ruwasqanwanmi Jesusqa Taytanta qatipakuchkarqa. Jehova Diospas tanteasqantaqa cambianmi imapas cambiana kaptinqa. Qawasun Israel runakunawan ima pasakusqanta. Paykunam qorimanta malta toro taytachata ruwarurqaku, chaymi Diosqa paykunata wañurachinanpaq tantearurqa. Ichaqa,  chayna tanteasqantam cambiarurqa Moises paykunapaq mañakusqanrayku (Ex. 32:7-14).

Apostol Pablopas Jehova Diosta hinaspa Jesusta qatipakuspanmi imayna tanteasqanta cambiarqa. Payqa manam munarqachu Bernabeytawan payta punta illasqankupi saqerusqanrayku Juan Marcos iñiqmasin huk lawkunapi iñiqkunata kallpanchanankupaq riysinantaqa. Ichaqa, watakuna pasaytam Pablo qawarqa Juan Marcosqa yuyayniyoq runaña kasqanta hinaspa tukuy sonqonwan Jehova Diosta servisqantapas. Chaymi Timoteoman kaynata nirqa: “Marcoswanyá hamuychik, yanapawananpaqmi paytaqa munachkani”, nispa (2 Tim. 4:11).

¿Imatam kaymanta yachachwan? Kuyakuq hinaspa pacienciakuq Jehova Dios hinam, ñoqanchikpas imayna tanteasqanchikta wakinpiqa cambiananchik. Ichapas hukkunamanta imayna piensasqanchikta cambiana kanqa. Jehova Dioswan Jesuspas mana pantaq kachkaspankum chayta ruwarqaku. Chaynaqa, huchasapa runakuna kachkaspaqa ¿manachu hukkunapa imayna tarikusqankuta yachaspa paykunamanta ima piensasqanchikta cambiachwan?

Wakinpiqa ichapas Diospa llaqtanpi ñawparinapaq piensasqanchikta cambiana kanqa. Kanmi unayña huñunakuyman hamuq Bibliamanta wakin estudiaqkuna, ichaqa manaraqmi bautizakuyta tanteakunkuraqchu. Wakin iñiqmasinchikkunapas atichkaspam precursor kaytaqa mana munankuchu. Wakin iñiqmasinchikkunañataqmi Diospa llaqtanpi aswan ruwayniyoq kanankupaq mana kallpanchakunkuchu (1 Tim. 3:1). ¿Yaqachu paykuna hina qampas tarikunki? Jehova Diosqa llaqtanpi ñawparinaykitam munan. Chaynaqa, ¿atiwaqchu piensasqaykita cambiaspa astawan kallpanchakuyta Diosta servinaykipaqwan hukkunata yanapanaykipaq?

África law Betelpi yanapakuq Ella sutiyoq cristianam Dios serviyninmanta kaynata willakun: “Betel wasipi llamkanaypaq chayraq chayaruspaymi iskayrayarqani qepakunaymanta. Jehova Diostam tukuy sonqoywan serviyta munarqani, ichaqa manam haykapipas familiaymantaqa rakikurqanichu. Chaymi qallariypiqa llumpayta paykunamanta llakikuq kani... Cuartoypi kaq compañerayqa anchatamá kallpanchawarqa, chaymi Betel wasipi qepakunaypaq tanteakurqani.  Chunka watañam kaypi kachkani hinaspapas atisqaykama qepakunaypaqmi tanteakuruni iñiqmasiykunata yanapanaypaq”, nispa.

Wakinpiqa imaynaña kaptinpas tanteasqanchiktam cambiananchik. Qawasun Adanpa churin Cainmanta. Payqa wawqen Abelmanta envidiakusqanraykum llumpayta paywan piñakururqa. Cainpa mana allin ruwananpaq piensasqanta Dios yachaspanmi nirqa amaña piñasqa kananpaq. Diosqa niykurqamá huchaqa ‘punkullapiña vencerunanpaq kasqanta’. Cainqa piñasqa kasqanta cambiananmantaqa, Diospa nisqanta mana kasukuspam wawqenta wañurachirqa (Gen. 4:2-8).

Qawasuntaq rey Uziasta ima pasarusqanmantapas. Qallariypiqa Diosta kasukuq hinaspa paywan allin amistad kaspanpas, tiempopa risqanman hinam hatunchakuq runa rikurirurqa. Bibliapa willakusqanman hinam Uziasqa Diospa templonman yaykuspan inciensota kañayta munarqa, chayqa sacerdotekunallapa ruwananmi karqa. Jehova Diospa contranpi chayta mana ruwananpaq sacerdotekuna niptinpas, payqa hatunchakuspanmi chay ruwananpaq tanteasqantaqa mana cambiayta munarqachu. Aswanqa ‘piñakuruspanmi’ mana kasukurqachu. Chaymi Jehova Diosqa lepra onqoywan castigarurqa (2 Cron. 26:3-5, 16-20).

Cainwan hinaspa Uziaswan ima pasakusqanmi yachachiwanchik imayna tanteasqanchikta cambiayqa ancha allinpuni kasqanta. Rimarisun Joachim sutiyoq iñiqmasinchikmanta. Payqa 1955 watapim bautizakurqa, ichaqa 1978 watapim Diospa llaqtanmanta qarqosqa karqa. 20 wata masnin pasaytañataqmi huchanmanta wanakuspan kaqmanta Jehova Diospa testigon karqa. Imanasqa unay watamantaña Diospa llaqtanman kutimusqanmanta huk anciano tapuptinmi, Joachim nirqa: “Llumpaytam sientikururqani, hinaspapas hatunchakuqmi karqani. Llakikunapaqmi imayna kasqayta cambianaypaq achka watakuna unasqayqa. Diospa llaqtanmanta qarqosqa kachkaspaypas yacharqanim Testigokunalla Bibliamanta cheqap willakusqankuta”, nispa. Joachimqa musyakururqam huchanmanta wanakuspan imayna kasqanta cambiananmanta.

Yaqapaschá wakinpiqa ñoqanchikpas imayna piensasqanchikta hinaspa imapas imayna ruwasqanchikta cambiananchik. Chaytayá ruwasun Jehova Diosta kusichinapaqqa (Sal. 34:8).