1. ¿Imakunaraykum Jehova Diosta agradecekunanchik?

JEHOVA DIOSMANTAM tukuy imata chaskinchik (Sant. 1:17). Allin michiq hina kaspanmi kawsakunapaq kaqkunata kuyakuywan quwanchik (Sal. 23:1-3). Sasachakuypi kaptinchikpas waqaychawaspanchikmi kallpanchawanchik (Sal. 46:1). Ñuqanchikrayku Jehova Dios tukuy ima ruwasqanpi yuyaymanaspam, Salmos qillqaq hina tarikunchik. Paymi nirqa: ‘Allin kasqanraykuyá Tayta Diosman graciasta quychik’, nispa. Payqa nirqataqmi Diosqa wiñaypaq kuyapayakuq kasqanmanta (Sal. 106:1). Chaynaqa, tukuy chaykunaraykumá Diostaqa agradecekunanchik.

2, 3. (1) ¿Imanasqam ancha allin agradecekuq kayqa? (2) ¿Ima tapukuykunamantam kay yachachikuypi yachasun?

² ¿Imanasqam agradecekuq kananchik? Ñawpaqmantaraqmi Bibliaqa willakurqaña kunan tiempopi runakunaqa mana agradecekuqllaña kanankumanta (2 Tim. 3:2). Achka runakunam Jehova Diosta mana agradecekunkuchu paykunapaq tukuy ima ruwasqanmanta. Millonnintin  runakunam yanqapas-yanqaña imatapas rantinku. Chaywanpas manam kusisqachu tarikunku. Ñuqanchikpas mana agradecekuq kaspaqa Israel runakuna hinam rikuriruchwan. Arí, ñuqanchikrayku Jehova Diospa imapas ruwasqanta mana chaninchaspam paywan amistadninchikta chinkarachichwan (Sal. 106:7, 11-13).

³ Mana agradecekuq kaspaqa, sasachakusunmi imapas sasachakuyninchikta atipanapaq. Allin kaqkunapi yuyaymananamantaqa sasachakuynillanchikpim llumpayta piensasun (Sal. 116:3). Kay yachachikuypim iskay tapukuykunamanta yachasun: ¿Imatam ruwachwan hinalla agradecekuq kanapaq? ¿Imataq yanapawachwan sasachakuykuna kaptin chayllapi llumpayta mana piensanapaq?

4. ¿Imatam ruwachwan agradecekuq kanapaq?

⁴ Kallpanchakunanchikmi Jehova Diosta agradecekunapaqqa. Chaypaqmi yuyaymanananchik ñuqanchikrayku imapas ruwasqankunapi. Chaymantapas chay ruwasqankunawan kuyawasqanchikta imayna qawachiwasqanchikpipas. Chaytam Salmos qillqaqpas ruwarqa. Chaymi kusikuymanta uyarayarqaraq Diospa tukuy ima ruwasqankunawan (leey Salmo 40:5; 107:43).

5. ¿Imaynatam apostol Pablota qatipakuchwan agradecekuq kanapaq?

⁵ Apostol Pablopa agradecekuq kasqanmantam yachachwan. Payqa Diospa imayna yanapasqanpim yuyaymanarqa, chaymi sapa kuti Diosta mañakuspan agradecekurqa. Payqa riqsikurqam manaraq Jehova Diosta serviq kaspa hatun tukuq, maqakuq, iñiqkunatapas ñakarichiq hinaspa paykunata yanqakunamanta kamiq runa kasqanmanta. Chaymi Diosta agradecekurqa pampachaykusqanmanta hinaspa paymanta willakunanpaq saqisqanmantapas (leey 1 Timoteo 1:12-14). Pabloqa agradecekurqataqmi iñiqmasinkunamantapas. ¿Imanasqa? Allin runakuna hinaspa Diosman sunqu kasqankurayku (Filip.  1:3-5, 7; 1 Tes. 1:2, 3). Chaymantapas, agradecekuqmi sasachakuykunapi tarikuptin iñiqmasinkuna yanapasqanmantapas (Hech. 28:15; 2 Cor. 7:5-7). Chaymi Pabloqa iñiqmasinkunata nirqa Diosta agradecekunankupaq hinaspa yupaychana takikunawan kallpanchanakunankupaq (Col. 3:15-17).

6. ¿Imakunaraykutaq qamqa Diosta agradecekuwaq?

⁶ Apostol Pablota qatipakuspaqa, ñuqanchikrayku Diospa imapas ruwasqankunapim yuyaymanasun (Sal. 116:12). Tapukusun: “¿Imakunaraykutaq ñuqaqa Jehova Diosta agradecekuyman?”, nispa. Ichapas Dioswan amistadninchikpi otaq ñuqanchikrayku churinta kachamusqanpi yuyaymanachwan. Yuyaymanachwantaqmi iñiqmasinchikkuna sasachakuyninchikkunapi imayna yanapawasqanchikpi, chaynataq wasinchikpi kaqkunawan huk sunqulla kasqanchikpipas. Hinaptinqa, tukuy chaykunapiyá yuyaymanasun. Chaynata ruwaspanchikqa sapa punchawmi tukuy imamanta Diosta agradecekusun (leey Salmo 92:1, 2).

7. (1) ¿Imanasqataq agradecekunapaq Diosta mañakunanchik? (2) ¿Imakunapim yanapawanchik Diosta mañakuspa agradecekuyninchikqa?

⁷ Diospa tukuy allinkuna quwasqanchikpi piensaspaqa, munasunmi agradecekunapaq mañakuytapas (Sal. 95:2; 100:4, 5). Wakin runakunaqa Diosmanta imatapas chaskinallankupaqmi mañakunku. Ichaqa, Diosqa munantaqmi imapas kapuwaqninchikmanta agradecekunanchikta. Chaynatam ruwarqaku Bibliapi willakusqan Anawan Ezequiaspas (1 Sam. 2:1-10; Is. 38:9-20). Ñuqanchikpas paykunata qatipakuspam ñuqanchikrayku Diospa tukuy ima ruwasqanmanta agradecekunanchik (1 Tes. 5:17, 18). Chaynapim kikinchik kallpanchasqa tarikusun, astawanraq Diosta kuyasun hinaspa paywan allin amistad kasun (Sant. 4:8).

8. ¿Imakunaraykutaq mana agradecekuq rikuriruchwan?

⁸ ¿Imanasqam kallpanchakunanchik Diospa quwasqanchikkunamanta agradecekunapaq? Mana agradecekuq kayta punta tayta-mamanchikmanta chaskisqanchikraykum. Adantawan Evata  Jehova Dios unancharuspanqa, tukuy imatam qurqa kuyayllapaq huertapi wiña-wiñaypaq kawsakunankupaq (Gen. 1:28). Ichaqa, paykunapaq tukuy ima ruwasqantam mana chanincharqakuchu. Aswanqa kikillankupaq munaq kaspankum kaqllatapas chinkarachirqaku (Gen. 3:6, 7, 17-19). Kunan tiempopi runakunapas mana agradecekuqmi kanku. Chaymi chayna kasqanku mana musyayllata inturuwachwan. Hinaspaqa Dioswan amistadninchikta hinaspa llaqtanpi kasqanchiktam manaña chaninchachwanñachu (1 Juan 2:15-17). ¿Imataq yanapawachwan chay runakuna hina mana kanapaq? Jehova Diospa quwasqanchikkunapi yuyaymanaymi, hinaspa chaykunamanta agradecekuymi (leey Salmo 27:4).

9. Sasachakuykunawan ñakarispaqa, ¿imanasqataq ancha allin ñuqanchikrayku Jehova Diospa ruwasqankunapi piensayqa?

⁹ Agradecekuq kayqa ancha allintam yanapawanchik sasachakuykunawan ñakariptinchikpas. Wakinpiqa, manam ima ruwaytapas atinchikchu qunqaymanta ima llakipipas tarikuspaqa. Chayqa kanmanmi imawanpas unquruptinchik, pi kuyasqanchikpas wañukuptin, ima desgraciapas kaptin hinaspa qusanchik otaq warminchik hukwan tupakuruptinpas. Ichaqa, ñuqanchikrayku Jehova Diospa ruwasqankunapi piensaymi yanapawasun hinaspa kallpanchawasun sasachakuyninchikta atipanapaq. Qawasun chayna ruwasqanku wakin iñiqmasinchikkunata imayna yanapasqanta.

10. ¿Imaynatam Irina iñiqmasinchikta yanaparqa Jehova Diospa yanapakuyninkunapi piensasqan?

¹⁰ Irina * sutiyuq iñiqmasinchikqa Norteamérica lawpi kaq precursoram. Qusanmi anciano karqa, ichaqa huk warmiwan tupakuruspanmi wawantinta payta saqirurqa. ¿Imataq yanapan Diosta hinalla servinanpaq? Paymi nin: “Anchatam agradecekuni Jehova Dios mana qunqawaspan hinalla yanapawasqanmanta. Sapa punchaw imayna yanapawasqanwanmi musyakuni allin taytayuq kasqaymanta, payqa allinta riqsiwaspanmi waqaychawan. Manamá haykapipas saqiwanqachu”, nispa. Irina iñiqmasinchikqa tukuywanmi ñakarirqa. Ichaqa, sasachakuynillanpi llumpayta mana piensasqanmi yanaparqa allin tarikunanpaq, hinaspa hukkunatapas kallpanchananpaq.

11. ¿Imataq Asia lawpi huk cristianata yanaparurqa hatun sasachakuypi tarikuptin?

¹¹ Kyung-sook sutiyuq cristianam Asia lawpi yachan. Payqa 20 wata masninmi qusanpiwan precursor karqaku. Paytam doctorkuna niykurqaku cancer unquywan kasqanrayku yaqa suqta killallaña kawsakunanmanta. Qusanwan huk  rikchaq sasachakuykunawan kaspankupas, manam haykapipas unquywanqa sasachakurqakuchu. Kikin cristianam nin: “Unqusqaymanta yacharuspaymi muspaypi hinaraq tarikurqani. Wañuyllamantaña piensaspaymi manchakurqani”, nispa. ¿Imataq payta yanaparqa? Hina kikillanmi nin: “Sapa tutam manaraq puñuq richkaspay wasiypa altosninman rini Jehova Diosta mañakuq. Hinaspam punchawpi pichqa allinkuna pasawasqanmanta rimaspay agradecekuni. Chayta ruwasqaymi hawkayachiwan hinaspa kallpanchawan kuyasqayta Jehova Diosman qawachinaypaq”, nispa. Nintaqmi: “Kunanqa yachanim sasachakuyninchikpi Jehova Dios yanapawasqanchikta, hinaspa imapas sasachakuykunamantaqa aswan achka bendicionkuna chaskisqanchikmanta”, nispa.

12. ¿Imataq Jason iñiqmasinchikta yanaparqa warmin wañukuptin?

¹² Jason sutiyuq iñiqmasinchikmi África lawpi huk kaqnin Betel wasipi llamkan. Payqa 30 wata masninñam tukuy tiemponwan Diosta servichkan. Ichaqa, qanchis wata pasaytam cancer unquywan warmin wañukurqa. Payqa llumpaytam hukmanyarqa chay unquywan warmin ñakarisqanmanta yuyarispan. ¿Imataq payta yanaparqa? Paymi nin: “Huk kaqninpim yuyarirurqani warmiywan kuska huk kutipi llumpay kusisqa kasqaykumanta. Chay yuyarisqaymanta Jehova Diosta agradecekuptiymi sunquy tiyaykurqa. Chaymantapacham Jehova Diosta agradecekuni tukuy allinkuna pasawasqankumanta. ¡Mayna allintam yanaparuwarqa hukmanyasqa kasqayta atipanaypaq! Wañukusqan wakinpi llakichiwaptinpas, anchatam Jehova Diosta agradecekuni casado vidaypi kusisqa kawsakusqaymanta hinaspa tukuy sunquwan Diosta kuyaq warmiwan casarakusqaymantapas”, nispa.

13. ¿Imataq Sheryl iñiqmasinchikta yanapan llumpayta mana hukmanyananpaq?

¹³ Rimarisuntaq sipasllaraq Sheryl sutiyuq cristianamanta. Paymi 13 watanpi kachkaspan hatun sasachakuypi  tarikurqa Filipinas nacionman llumpay sinchi wayra-para chayaruptin. Chayqa karqa 2013 watapim. Chay llumpay wayra-parawanmi pasaypaqta wasin tuñirurqa. Chaypitaqmi taytan, maman hinaspa kimsa turinkunapas wañukurqaku. ¿Imataq Sheryl iñiqmasinchikta yanapan llumpayta mana hukmanyananpaq? Payqa tukuy allin kaqkunapim yuyaymanan, chaymi yanapan Diosta agradecekunanpaq. Payqa qawarqam llakipi kaqkunata iñiqmasinkuna yanapasqanmanta. Yacharqataqmi enteron pachapi iñiqmasinkuna Diosta paypaq mañapusqankuta. Ninmi: “Anchatam agradecekuni Jehova Diosqa taytay kasqanmanta. Payqa haykapipas yanapawanchikmi”, nispa. Hinaptinqa, allin kaqkunapi yuyaymanaspa Diosta agradecekuspaqa manam llumpaytaqa hukmanyasunchu. Yanapawanchikmi imapas sasachakuykunata atipanapaq (Efes. 5:20; leey Filipenses 4:6, 7).

14. ¿Ima sumaq suyakuytam Diosqa quwanchik? (Qaway 3 kaq paginapi dibujota.)

¹⁴ Ñawpaqmantaraqmi Diospa serviqninkunaqa, Jehova Diosta agradecekurqaku yanapasqanmanta. Israel runakunam Puka lamar quchapi Egipto tropakunawan mana wañuchisqa kasqankumanta takispanku Diosta agradecekurqaku (Ex. 15:1-21). Kunan tiempopi serviqninkunamanmi Jehova Diosqa sumaq suyakuyta quwanchik. Paymi niwanchik tukuy ñakariykunata chinkachinanmanta (Sal. 37:9-11; Is. 25:8; 33:24). ¡Imaynachá tarikusun chiqniqninkunata Jehova Dios chinkachiptin hawkayaypiña kawsakuspanchikqa! Chaymantaqa anchatachá agradecekusun (Apoc. 20:1-3; 21:3, 4).

15. ¿Imatam ruwananchik 2015 watapi?

¹⁵ Manam iskayrayanchikchu 2015 watapipas Jehova Dios tukuy imapi yanapawananchikmantaqa. Chaywanpas yaqapaschá ima sasachakuypipas tarikusunchik. Ichaqa, Jehova Diosqa manam haykapipas saqiwasunchu (Deut. 31:8; Sal. 9:9, 10). Payqa hinallamá imapipas yanapawasun payman sunqu kanapaq. Chaynaqa, Diosmanta willakuq Habacucpa imayna kasqantayá qatipakusun, paymi nirqa: ‘Manaña higos sachakuna waytaptinpas, manaña uvas plantakuna ruruptinpas, manaña aceitunas sachakuna ruruptinpas, chakrakunapi kawsaykuna manaña kaptinpas, kanchakunapi ovejakuna manaña kaptinpas, corralkunapi vacakuna manaña kaptinpas ñuqaqa Tayta Diosraykum kusikusaq. Salvawaqniy Diosraykum kusikusaq’, nispa (Hab. 3:17, 18). Hinaptinqa, Jehova Dios tukuy allinkuna quwasqanchikpiyá yuyaymanasun, hinaspapas kasukusunyá 2015 watapaq akllasqa textotapas, ninmi: Allin Dios kasqanraykuyá Jehova Diosman graciasta quychik, nispa (Sal. 106:1).