Diosmanta kusisqalla willakunapaq yanapakuykuna
KUNAN tiempopiqa ima llamkaymantapas Jehova Diospa munaychakuyninmanta willakuymi aswan allinqa. Diosmanta willakuspanchikqa paypa rantinpim rimachkanchik, chayqa ancha kusikunapaqmá. Ichaqa, wakinpiqa sasaniraqmi kanman kusikuywan hinalla willakuyqa. ¿Imanasqa?
¿Imatam ruwawaq Diosmanta kusisqalla willakunaykipaq?
Wakin iñiqmasinchikkunaqa runakunata wasinkupi mana tarisqankuraykum mana piwanpas parlayta atinkuchu, chaywanmi hukmanyanku. Runakuna wasinkupi tarikuspankuñataqmi mana uyariyta munankuchu otaq kamikunku. Wakin iñiqmasinchikkunapaqqa Diosmanta willakusqanku lawqa llumpay hatunsum, chaypim Bibliamanta yachay munaqkunata achkata tarinku. Ichaqa hukmanyankum mana llapallankuman haypakusqankumanta piensaspanku. Wakin iñiqmasinchikkunañataqmi unay wataña Diosmanta willakuchkanku, ichaqa Diospa piñakuynin punchaw manaraq chayamusqanwanmi hukmanyanku.
Tukuy kaykunam hukmanyachiwanchikman Diosmanta willakuyninchikpi. Arí, wakinpiqa sasaniraqmi kanqa Diosmanta willakuyqa Satanaspa makinpi kay pacha kasqanrayku (1 Juan 5:19).
Yaqapaschá Diosmanta willakuspanchikqa sasachakuykunapi tarikusunchik. Ichaqa manam iskayrayananchikchu Jehova Dios yanapawananchikmantaqa. ¿Imaynatam Diosmanta kusisqalla willakunchikman? Qatiqninpi qawasun imakuna yanapawananchikmanta.
DIOSMANTA CHAYLLARAQ WILLAKUQKUNATA YANAPASUN
Sapa watam waranqantin runakuna Jehova Diospa testigon kanankupaq bautizakunku. Chayllaraq bautizasqa kaspaykiqa unay wataña bautizakuq iñiqkunamanta anchatam yachawaq. Unay wataña bautizasqa kaspaykiqa, chayllaraq bautizasqa iñiqkunatam yanapawaq. Chayta ruwaspaykiqa anchatam kusikunki.
Jesusqa yacharqam yanapakuyninwan qatiqninkuna allin yachachiq kanankumanta. Chaymi yachachirqa Diosmanta imayna willakunankupaq Luc. 8:1). Kunanpas yanapananchikmi musuq iñiqmasinchikkunata allin yachachiq kanankupaq.
(¿Imaynatam musuq iñiqmasinchikkunata yanapachwan? Pipas allin yachachiq kananpaqqa manamá Diosmanta willakuyllachu yanapanqa. Aswanqa allin yachachiq iñiqmasinchikmi kuyakuywan hinaspa pacienciawan yachachinan. Unay wataña Diosmanta willakuq kaspaykiqa, musuq iñiqmasinchikta yachachiy: Diosmanta imayna willakunanpaq, runakunawan imaynata rimananpaq, qillqanchikkunata imaynata munachinanpaq, Bibliamanta yachay munaqkunaman kaqmanta kutinanpaq hinaspa wasiyuq astawan yachayta munaptin imaynata hinalla yachachinanpaq. Chaymantapas yanapanqam allin ruwasqanmanta kallpanchaykuptiki hinaspa imakunapi astawan kallpanchakunanpaq niptikipas (Ecl. 4:9, 10). Musuq iñiqmasinchik allin yachachiqta qatipakuspanqa, paypas allin yachachiqmi kanqa (Luc. 6:40). Manam manchakunqachu pipas yanapananmanta yachaspanqa.
WILLAKUQMASIKIWAN RIMAY
Anchata kallpanchakuspapas wakinpiqa manam pimanpas Diosmanta willakuytaqa atinchikchu. Chaymi Diosmanta willakuqmasillanchikwan rimayta atinchik. ¿Haykapipas chayna tarikurqankichu? Yuyariy, Jesusqa ‘iska-iskaytam’ qatiqninkunata Diosmanta willakunankupaq kacharqa (Luc. 10:1, NM). Chaynapim ‘kallpanchanakuyta’ atirqaku (Rom. 1:12).
¿Imamantam rimawaq Diosmanta willakuqmasikiwan? Willawaqmi Diosmanta willakusqaykipi sumaq kaqkuna pasasusqaykimanta, Bibliata sapallayki otaq aylluykiwan estudiaspa yachasqaykimanta otaq kallpanchasunaykipaq hina huñunakuypi uyarisqaykimanta. Mana ancha riqsisqayki iñiqmasikiwan Diosmanta willakuspaqa, tapuwaqmi: ¿Imaynatam Jehova Diosta riqsirqanki? ¿Imanasqam mana iskayrayankichu Diospa llaqtanpi kasqaykimanta? ¿Maykunapim Diosta servirqanki?, nispa. Rimawaqchiktaqmi Diosmanta willakusqaykichikpi imakuna pasasusqaykichikmantapas. Chaynapim runakuna mana uyarisuptikichikpas iskaynikichik kallpanchanakuyta atinkichik (1 Tes. 5:11).
BIBLIATAWAN QILLQANCHIKKUNATA SAPA KUTI ESTUDIAY
Diosmanta kusisqalla willakunapaqqa, sapa kutim Bibliatawan qillqanchikkunata estudiananchik. ‘Allin yuyayniyoq confianza sirvienteqa’ achka yanapakuykunatam quwanchik sapakama estudiananchikpaq (Mat. 24:45). Ichapas maskawaq imakunarayku Diosmanta willakuyqa ancha allin kasqanmanta. Chaykunamantam wakinkunata tarinki “ ¿Imanasqam Diosmanta willakuyqa ancha allin?” niq yachachikuypi.
Chay yachachikuypa ima nisqanpi yuyaymanay. Chaynata ruwaspaykiqa astawanmi Diosmanta willakuyta munanki. Chaymantapas, Bibliapim maskawaq imakunaraykuraq Diosmanta willakuyninchikqa ancha allin kasqanmanta. Chaykunapi yuyaymanaspaqa astawanmi Diosmanta kusikuywan willakunki.
YANAPAKUYKUNAPA NISQANMAN HINA RUWAY
Jehova Diospa llaqtanpi punta apaqkunam sapa kuti kallpanchawanchik wasin-wasin willakuspapas, cartantakama, telefonontakama, callekunapi, achka runakunapa kasqan lawkunapi hinaspa llamkayninkupi Diosmanta willakunanchikpaq. Chaymantapas, tanteachwanmi Diosmanta mana ancha willakusqanchik lawkunaman rinapaq.
¿Atichwanchu Diosmanta chayna willakuyta? Achka iñiqmasinchikkunam chaynata ruwarqaku hinaspapas allinpim tukurqa. Qawasun imakuna ruwasqankumanta.
Diospaq Llamkayninchik qillqapim Bibliamanta estudiota munachinapaq huk yanapakuy lluqsimurqa, chayta ruwananpaqmi huk cristiana tantearurqa. Chay yanapakuyman hinam kimsa llamkaqmasinkunata Bibliamanta yachachinanpaq nirqa. Payqa anchatam kusikurqa chay llamkaqmasinkuna Bibliamanta yachay munasqanwan hinaspa huñunakuykunaman riyta qallaykusqankuwanpas.
Jehova Diospa llaqtanqa kallpanchawanchiktaqmi qillqanchikkunata leespa, pikunapaq hina kasqanpi piensananchikpaq. Estados Unidos nacionpi congregacionkunata watukuq huk iñiqmasinchikmi carrokunapa ruedanmanta ¡Rikchariy! qillqanchikpi leerqa. Chaymi ruedakunata rantikuqkunaman saqinanpaq tantearurqa. Chaymantapas doctorkunapa sasachakuyninmanta rimaq
qillqanchiktam, 100 doctorkunaman warminpiwan saqirqaku. Paymi willakun chaynata Diosmanta willakuptinku runakunaqa qillqanchikkunamanta hinaspa ñuqanchikmantapas astawan yachasqankuta. Nintaqmi chay lawpi runakunata astawan riqsisqankumanta hinaspa kaqmanta watukunankupaq manaña llumpayta sasachakusqankumanta.Huk cristianam Estados Unidos nacionpi Betel wasiman huk cartata qillqarqa, chaypim agradecekurqa Diosmanta telefonontakama willakuy kananpaq tanteasqanku allinpuni kasqanmanta. Paymi willakurqa 86 watanpiña maman kasqanmanta hinaspa llumpayta unqusqanmantapas, chaymi telefonontakama Diosmanta willakuyta atirqa. Chaynapim 92 watanpi payachaman Bibliamanta yachachirqa.
Diosmanta willakunapaq qillqanchikkunapa yanapakuyninkunaqa anchatam yanapawanchik. ¡Chaykunatayá servichikusun! Chaynata ruwaspanchikqa kusisqam Diosmanta willakusunchik.
IMAKUNA RUWAY ATIKUSQANPI KALLPANCHAKUY
Diosmanta willakuyninchik allin kananpaqqa manam achka qillqakunata saqiyllachu, achka runakunata Bibliamanta yachachiyllachu nitaq achka runakunata Diospa llaqtanman pusamuyllachu. Yuyaymanay Diospa serviqnin Noeypi. ¿Hayka runakunatam salvakunankupaq yanaparqa? Wasinpi kaqkunallatam. ¿Imatam chayqa yachachiwanchik? Imamantapas aswan allinqa Jehova Diosman sunqu kaymi (1 Cor. 4:2).
Achka iñiqmasinchikkunam ninku Diosmanta kusisqalla willakunapaqqa, imakuna ruway atisqankupi kallpanchakuy ancha allin kasqanmanta. Ichaqa, ¿imakunapim kallpanchakuna? Chaykunamanta wakintam tarinki “ ¿Imakuna ruwaytam atiwaq?” niq yachachikuypi.
Jehova Diospa yanapakuyninta mañakuy paymanta kusisqa willakunaykipaq. Ruway munasqaykita kallpanchakusqaykirayku hayparuspaykiqa ancha kusisqam tarikunki.
Diosmanta willakuyqa sasaniraqmi wakinpiqa. Ichaqa kanmi achka yanapakuykuna kusisqalla Diosmanta willakunanchikpaq: willakuqmasinchikwanmi rimananchik, Bibliatawan qillqanchikkunatam sapa kuti estudiananchik, Diospa llaqtanpi punta apaqkunapa yanapakuy qusqankuman hinam Diosmanta willakunanchik hinaspapas imakuna ruway atisqanchikpim kallpanchakunanchik. Ichaqa astawanmi kayta yuyarinanchik: Jehova Diosqa paypa testigon kananchikpaq hinaspa paymanta willakunanchikpaqmi akllawarqanchik (Is. 43:10). Chaynaqa, kusikuywanyá Jehova Diosmanta willakusunchik.