Suma-sumaq regalo chaskisqankumanta
NAGOYA (Japón) lawpim, 2013 abril killapa 28 punchawninpi, huk sumaq huñunakuy karqa. Chay huñunakuytam uyarirqaku 210 waranqa masnin runakuna, wakinkum internetnintakama uyarirqaku. Chay huñunakuypim Anthony Morris sutiyuq iñiqmasinchik karqa, payqa Diospa llaqtanpi punta apaqkunamanta huk kaqninmi. Paymi willakurqa La Biblia: el Evangelio según Mateo nisqa musuq qillqa japones rimaypi lluqsimusqanmanta. ¡Kusisqallañamá iñiqmasinchikkunaqa taqllakurqaku!
Chay Mateo libroqa 128 paginayuqmi, hurqusqam kachkan Traducción del Nuevo Mundo niq Bibliamanta. Anthony Morris iñiqmasinchikmi nirqa chay qillqa ancha allin kasqanmanta hinaspa Japón nacionniyuq runakunata yanapananmantapas. ¿Imanasqataq chay qillqaqa ancha allin? ¿Imanasqataq ruwakurqa? ¿Imaynatam chaskirqaku?
¿IMANASQATAQ KAY QILLQAQA ANCHA ALLIN?
Achka runakunam admirakurqaku imayna ruwasqa kasqanmanta. Japones rimaytaqa qillqanmankum urayninpaman otaq kinrayninpamanpas. Yaqa llapan qillqakunatam qillqanku kinrayninpaman castellano rimaypi hina. Jehova Diospa testigonkunapa qillqankunatapas hina chaynallatam qillqanku. Ichaqa chay musuq qillqaqa urayninpaman qillqasqam kachkan, chay lawpi periodicokuna otaq ancha riqsisqa qillqakuna hina. Chayna qillqasqatam mana sasachakuspalla leenku. Chaymantapas Bibliapa sapa paginankunapa hanay patanpi as rimaykunawan qillqasqakunatam, maymi tupasqanpi yana letrawan qillqarunku. Chaynapim leeqkunaqa sutillata qawanku chaypi ima yachachisqanta.
Iñiqmasinchikkuna chay qillqata chaskispankum chaylla leeyta qallaykurqaku. 80 wata masniyuq huk cristianam willakurqa Mateo librota achka kutikama leesqanta, ichaqa chay qillqapa imayna ruwasqa kasqanwanmi, mana sasachakuspalla entienderqa Jesuspa ancha riqsisqa yachachikuyninta. Huk sipas iñiqmasinchikpas willakurqam leeyta chaylla tukurusqanmanta, kinraynanpaman qillqasqa kaqkunata leenanpaq amañasqa kaspanpas. Nirqataqmi uraynanpaman qillqasqa kaqkunata wakin runakuna leey munasqankuta.
JAPÓN NACIONNIYUQ RUNAKUNAPAQ RUWASQA QILLQA
Kay qillqaqa allinmi kanqa Japón nacionniyuq runakunapaqqa. Bibliamanta mana llumpayta yachaspankupas leeytam munanku. Wakinkupaqa manam haykapipas Bibliankuqa karqachu, kunanmi ichaqa Mateo librota leeyta atinqaku.
Ichaqa, ¿imanasqataq Mateo librota akllarurqaku? Bibliamanta pipas willakuptin, Japón nacionniyuq runakuna Jesucristopi piensasqankuraykum. Mateo libroqa willakunmi Jesuspa nacesqanmanta, abuelonkunamanta, Jesuspa ancha riqsisqa yachachikuyninmanta hinaspa tukupay tiempopi imakuna pasakunanmantapas. Japón nacionniyuq runakunaqa kay yachachikuykunamantam yachayta munanku.
Japón nacionniyuq iñiqmasinchikkunaqa kay qillqatam munachinku Diosmanta willakuspanku hinaspa Bibliamanta yachay munaqkunaman kaqmanta watukuspankupas. Huk cristianam nirqa: “Kunanqa manañam llumpay sasañachu runakunaman Bibliata munachiyqa, lluqsimusqan punchawllapim huk runaman qurqani”, nispa.
¿IMAYNATAM KAY QILLQATA CHASKIRQAKU?
Japón nacionpi runakunam sapa kuti ninku: “Kichki punkuntayá yaykuychikqa”, ‘Perlaskunataqa amam qunkichikchu kuchikunamanqa’ otaq “Amayá afanakuychikchu hamuq punchawmantaqa”, nispa (Mat. 6:34; 7:6, 13). Ichaqa achka runakunam mana yachankuchu chay rimaykunaqa Jesucristopa rimasqan kasqanta. Chaymi iñiqmasinchikkunaqa chay rimaykunata qawachinku chay musuq qillqapi, hinaptinmi runakunaqa admirakuspa ninku huk kutillapipas Biblia leeyta munasqankumanta.
Qillqa chaskiqkunaman iñiqmasinchikkuna kaqmanta watukuspankum ninku chaylla leerusqankumanta. ¡Wakinkuqa lliwtamá tukurusqakuña! 60 wata masniyuq runam huk testigota nirqa: “Achka kutikamañam leeruni hinaspapas allintam kallpancharuwan. ¿Yachaykachiwankimanchu astawan Bibliamanta?”, nispa.
Achka runakunapa kasqanpipas iñiqmasinchikkunaqa kay qillqatam munachinku. Kay qillqata chaskiq sipasmanmi huk cristiana internetpi direccionninta qurqa. Huk hora pasayllatam sipasqa iñiqmasinchikman qillqamurqa chay qillqa leeyta qallaykusqanmanta hinaspa astawan yachay munasqanmantapas. Huk semana pasaytañataqmi chay sipasqa Biblia estudiayta qallaykurqa, chaymantañataqmi huñunakuykunaman riytapas qallaykurqa.
Japón nacionpi achka congregacionkunamanmi 1.600.000 chay musuq qillqata apachirqaku. Paykunañataqmi sapa killa waranqa masnin qillqakunata runakunaman aypunku. Chay musuq qillqata ruwaqkunam qallariynin paginapi ninku: “Munanikum kay qillqata leeruspa Bibliamanta astawan yachay munanaykichikta”, nispa.