Willakuq qillqanchikmi (castellano rimaypi), 1951 watapa 15 mayo killanpi lluqsimuq nirqa Bibliapi wakin runakuna, willakuykuna utaq imapas willakusqan hamuq tiempopi imawan utaq piwanpas tupasqanmanta. Ñawpaq qillqanchikkunaqa yachachirqam Diospa serviqninkuna Jeftey, Job hinaspa Rebeca, hanaq pachapaq kaqkunawan tupasqanmanta. Yachachirqataqmi Deborawan Rahabqa ‘achkallaña runakunawan’ tupasqanmanta (Apoc. 7:9). Ichaqa, kay pasaq watakunapim manaña chaynatañachu entiendenchik. ¿Imanasqa?

Wakin willakuykunatam ichaqa kikin Biblia hamuq tiempopi imawan tupasqanmanta yachachin. Apostol Pablom Galatas 4:21-31 nisqanpi rimarqa Agar hinaspa Sara sutiyuq warmikunamanta. Abrahampa sirvientan Agartam tupachin ñawpaq Israel nacionwan. Abrahampa warmin Saratañataqmi tupachin Jehova Diospa warminwan, chayqa hanaq pachapi Diospa llaqtanmi. Huk kutipipas, Pablom nirqa Melquisedecqa Jesuswan tupasqanmanta (Heb. 6:20; 7:1-3). Nirqataqmi willakuq Isaiaswan churinkunaqa Jesuswan hinaspa hanaq pachapaq iñiqmasinchikkunawan tupasqankumanta (Heb. 2:13, 14). ¿Imanasqam mana iskayrayanchikchu kay yachachikuykuna chayna kasqanmanta? Pablo qillqananpaq Jehova Dios chuya espiritunwan yanapasqanraykum.

Bibliapi rikuriq runakuna imawan hamuq tiempopi tupasqanmanta Biblia yachachiwaptinchikpas, manam piensananchikchu imakuna ruwasqanpas tupanachisqa kasqanmantaqa. Pablom willakurqa Melquisedecqa Jesuswan tupachisqa kasqanmanta. Huk kutipim, tawa kamachiqkunata  Abraham guerrapi atiparuptin, Melquisedecqa tantatawan vinota aparqa. Chay ruwasqanqa, ¿imawanpas tupanchu? Pabloqa manam imatapas chaymantaqa nirqachu, chaymi Bibliapa mana tupachisqantaqa mana tupachinanchikchu (Gen. 14:1, 18).

Jesuspa wañukusqan pachaknintin watakuna pasaytam, riqsisqa runakuna Bibliapa lliw willakuyninkunata imawanpas tupachispanku pantarurqaku. Huk riqsisqa qillqam nin religionkunapi punta apaqkuna Bibliapi willakuykuna imawanpas mana tupachisqa kachkaptin tupachisqankumanta. Piensaqkum imaña pasakusqanpas tupanachisqa kasqanmanta. Bibliam willakun Jesus kawsariramuspan qatiqninkunaman rikuriykusqanmanta, hinaspa paykunaqa 153 challwakunata hapirusqankumanta. Chay qillqaqa nintaqmi Bibliamanta wakin qillqaq runakunaqa hayka hapisqanku challwakuna imawanpas tupasqanmanta.

Huk riqsisqa runapas nirqam huk willakuy hamuq tiempopi imawan tupasqanmanta. Huk kutipim Jesusqa pichqa cebada tantawan hinaspa iskay challwakunawan 5 waranqa runakunata mikuchirqa. Chay pichqa tantatam tupachirqa Bibliapa punta pichqa libronkunawan. Chaytaqa nirqa chay tiempopi runakuna trigota cebadamantaqa aswan allinpaq hapisqankuraykum, chaymi nirqa ñawpaq testamentomantaqa musuq testamento aswan allin kasqanmanta. Nirqataqmi chay iskay challwakunaqa kamachiqwan hinaspa sacerdotewan tupasqanmanta. Huk qillqaq runapas rimarqam Jacobqa Esaupa piwi kayninta plato lenteja mikuywan rantisqanmanta. Bibliam willakun chay mikuyqa puka kasqanmanta. Chaymi chay qillqaq runaqa puka mikuy kasqanrayku, tupachirqa Jesuspa yawarninwan hanaq pachaman runakuna rinankupaq rantisqanmanta.

Tukuy kaykuna nisqankuqa manam Bibliapa nisqanwanqa tupanchu. ¿Imanasqa? Biblia ima willakuytapas mana imawanpas tupachiptinqa, runakunaqa manam yachayta atichwanchu imawan tupasqanmantaqa. Chaymi Bibliapuni runakunata, willakuykunata utaq imatapas tupachiptinqa, chay nisqanpi iñinanchik. Mana imawanpas tupachiptinmi ichaqa, mana imawanpas tupachinanchikchu.

Chaynaqa, ¿imaynatam yanapachikuchwan Bibliapa willakuyninkunawanqa? Apostol Pablom Romanos 15:4 nirqa: ‘Bibliapi imapas qillqasqa kaqkunaqa yachananchikpaqmi kachkan. Chaynapi pacienciakuspa hinaspa kallpanchakuspa, confianzallawanña suyananchikpaq’, nispa. Kayqa qillqasqam karqa hanaq pachapaq suyakuyniyuq punta pachak iñiqmasinchikkunapaq, imaynam paykuna yanapachikurqaku, chaynam kunan tiempopi lliw iñiqmasinchikkunapas Bibliapa sumaq yachachikuyninkunawan yanapachikunchik (Juan 10:16; 2 Tim. 3:1).

¿Imatam kayqa yachachiwanchik? Bibliapa yaqa llapallan willakuyninkunaqa manam hanaq pachapaq utaq kay pachapaq suyakuyniyuq iñiqmasinchikkunallapaqchu nitaq huk tiempopi kawsaq iñiqmasinchikkunallapaqchu. Aswanqa chay willakuykunam iñiqmasinchikkunata haykapipas yanaparqa. Rimarisun Jobpa ñakarisqanmanta, paypa ñakarisqanqa manam tupanchu punta kaq hatun guerrapi ñakariq iñiqmasinchikkunallawanchu. Aswanqa tukuy tiempopi kawsaq achkaq iñiqmasinchikkunapas Job hinam ñakarirqaku, ichaqa Jobmanta yachasqankum kallpancharqa. Arí, llapallankumá qawarqaku kuyapayakuywan Jehova Dios paykunata yanapasqanmanta (Sant. 5:11).

Kunan tiempopipas Debora hinam Diosman sunqu achka yuyaq warmi iñiqmasinchikkuna kanku, kantaqmi Eliu hina yuyaysapa mozollaraq achka ancianokunapas. Kachkantaqmi Jeftey hina kallpanchakuq precursorkunapas hinaspa Job hina pacienciakuq iñiqmasinchikkunapas. Anchatam Jehova Diosta agradecekunchik payman sunqu runakunamanta Bibliapi qillqachisqanmanta, chaynapi kallpanchawananchikpaq.

Tukuy kaykunaraykum, qillqanchikkunaqa manaña anchatachu yachachin Bibliapa willakuyninkuna imawan tupasqanmantaqa. Aswanqa imaynata chay willakuykuna kawsakuyninchikpi yanapawasqanchikmantam yachachiwanchik.