1, 2. (1) ¿Imakunamantam Jesusqa amistadninkunaman willarqa? (Qaway kay paginapi dibujota.) (2) ¿Imatam yachananchikpuni ovejakunamantawan cabrakunamanta?

HUK kutipim, Jesusqa amistadnin Pedroman, Andresman, Santiagoman hinaspa Juanman willarqa allin yuyayniyuq confianza sirvientemanta, chunka doncellakunamanta hinaspa wayqapi qullqimanta rikchanachiykunata. Chaymantapas willarqataqmi ‘Diosmanta hamuq runa’ runakunata juzgananpaq hamunanmanta. Kay willakuypi ‘Diosmanta hamuq runaqa’ “llapallan nacionkunamanta” runakunatam iskayman rakin. Huknintam Jesusqa ‘ovejakunawan’ sutichan, huknintañataqmi ‘cabrakunawan’. Kay willakuypiqa kantaqmi ‘reypa’ ‘wawqinkunapas’ (leey Mateo 25:31-46).

² Ñuqanchikpas chay willakuymantaqa yachaytam munanchik. ¿Imanasqa? Jesusmi nirqa wakin runakuna wiñay kawsayta chaskinankumanta hinaspa wakinkunañataq chinkachisqa kanankumanta. Chaymi ancha allinpuni  kay willakuypa ima ninanta yachayninchikqa hinaspa wiñay kawsayta chaskinapaq ima ruwayninchikpas. Allintaqmi kay tapukuykunamanta yachayninchikpas: ¿Imaynatam Jehova Diosqa kay willakuyta entiendenapaq yanapawarqanchik? ¿Imaynatam yanapawanchik Diosmanta willakuyta anchata chaninchanapaq? ¿Pikunataq Diosmanta willakunanku? ¿Imanasqataq ancha allin Diosman sunqu kayqa hinaspa reytawan wawqinkunata yanapayqa?

3, 4. (1) ¿Imakunatam yachananchik ovejakunamantawan cabrakunamanta rikchanachiyta entiendenapaq? (2) ¿Imaynatam kay qillqanchik 1881 watapi yachachirqa ovejakunamantawan cabrakunamanta?

³ Ovejakunamantawan cabrakunamanta rikchanachiyta entiendenapaqqa, kay kimsa tapukuykunamantam yachananchik: ¿Pikunawantaq tupan ‘Diosmanta hamuq runa’, rey, reypa wawqinkuna, ovejakuna hinaspa cabrakunaqa? ¿Haykapitaq ‘Diosmanta hamuq runaqa’ akllanqa pikuna ovejakuna utaq cabrakuna hina kasqankuta? ¿Imanasqam Jesus ninqa wakin runakuna ovejakuna utaq cabrakuna hina kasqankuta?

⁴ Kay qillqanchikmi, 1881 watapi yachachirqa ‘Diosmanta hamuq runaqa’ hinaspa reyqa Jesuswan tupasqanta. ¿Pikunawan tupanachisqam wawqinkunaqa karqa? Qillqanchikpa nisqanman hinaqa reypa wawqinkunaqa tuparqam hanaq pachapaq iñiqmasinchikkunawan hinaspa kay pachata Dios kamachiptin chaypi kawsaq manaña pantaq runakunawanpas. ¿Haykapitaq Jesusqa akllanan karqa pikuna ovejakuna utaq cabrakuna hina kasqankuta? Waranqa wata Jesus kamachiptinmi. Hinaspa ¿imanasqam ninan karqa wakin runakuna ovejakuna hina kasqankuta? Chay runakuna Diospa kuyakuyninta tukuy ima ruwasqankupi qatipakusqankuraykum.

5. ¿Imaynatam kay qillqanchik 1923 watapi yachachirqa ovejakunamantawan cabrakunamanta?

⁵ Watakuna pasasqanman hinam, Jehova Diosqa kay yachachikuyta entiendenapaq yanapawarqanchik. 1923 watapa 15 octubre killanpim, kay qillqanchikqa astawan entiendechiwananchikpaq Bibliapa achka versiculonkunata servichikurqa. ¿Piwanmi tuparqa ‘Diosmanta hamuq runaqa’? Jesuswanmi. ¿Pikunawanmi tuparqa reypa wawqinkunaqa? Hanaq pachapaq iñiqmasinchikkunallawanmi. ¿Pikunawantaq tupan ovejakunaqa? Kay pachapi kawsanankupaq suyakuyniyuq runakunawanmi. ¿Haykapitaq Jesusqa ninan karqa ovejakuna hina kasqankuta? Chayqa kanan karqa Jesuspa wawqinkuna kay pachapiraq kaptinkum, manaraq waranqa wata kamachiyta qallaykuchkaptin. ¿Imanasqa? Willakuypa nisqanman hinaqa kay pachapi kawsanankupaq suyakuyniyuq runakunam Jesuspa wawqinkunata yanapananku karqa, chay ruwaytaqa atinmanku karqa kay pachapi kachkaptillankuraqmi. ¿Imanasqam wakinkuqa ovejakuna hina kananku karqa? Qillqanchikqa willakurqam Jesuspi hinaspa Diospa kamachikuynin allin kawsakuyta apamunanpi iñisqankurayku.

6. ¿Imaynatañam 1995 watamanta entiendeyta qallaykurqanchik kay rikchanachiyta?

⁶ Achka watakunam entienderqanchik tukupay tiempopi Diosmanta  willakusqanchikta uyariqkuna ovejakuna hina kasqankumanta, mana uyariqkunañataq cabrakuna hina kasqankumanta. Ichaqa 1995 watapim mana chaynatañachu entienderqanchik. Kay qillqanchikmi Mateo 24:29-31 tupachirqa Mateo 25:31, 32 (leey). Hinaspam yachachirqa Jesusqa llumpa-llumpay ñakariy punchawkunapi hamuspan runakunata juzgananmanta. *

7. ¿Imaynatam kunanqa entiendenchik ovejakunamantawan cabrakunamanta rikchanachiytaqa?

⁷ Kunanqa allintañam entiendenchik ovejakunamantawan cabrakunamanta rikchanachiytaqa. ¿Piwantaq tupan Diosmanta hamuq runaqa hinaspa reyqa? Jesuswanmi. ¿Pikunawantaq tupan reypa wawqinkunaqa? Hanaq pachapaq akllasqa iñiqmasinchikkunawanmi, paykunaqa Jesuswan kuskam hanaq pachamanta kamachimunqaku (Rom. 8:16, 17). ¿Pikunawanmi tupan ovejakunawan cabrakunaqa? Llapallan nacionmanta runakunawanmi. ¿Haykapitaq juzgasqa kanqaku? Llumpa-llumpay ñakariy punchawkunapa tukupayninpim, chayqa hichpallapiñam kachkan. ¿Imaynatam yachakunqa pikunam ovejakuna utaq cabrakuna hina kasqankuta? Kay pachapiraq hanaq pachapaq iñiqmasinchikkunata yanapasqankuman hinam. Jehova Diostam anchata agradecekunchik kay rikchanachiyta entiendenanchikpaq yanapawasqanchikmanta hinaspa Mateo 24 hinaspa 25 capitulokunapi willakuyta entiendenapaq yanapawasqanchikmantapas.

8, 9. ¿Imanasqam ovejakuna hina kaqkunata Jesus nirqa ‘allin ruwaqkuna’ kasqankuta?

⁸ Ovejakunamantawan cabrakunamanta rikchanachiypiqa, Jesusqa manam rimarqachu Diosmanta willakuymantaqa. Ichaqa chay rikchanachiymi yachachiwanchik Diosmanta willakuy ancha allin kasqanmanta. ¿Imaynatam chayta yachanchik?

⁹ Jesusqa manam rimachkarqachu chiqap ovejakunamantachu nitaq cabrakunamantachu, chayqa rikchanachiyllam karqa. Manataqmi nichkarqachu ovejakuna kanankupaqqa pachatawan mikuyta hanaq pachapaq iñiqmasinchikkunaman qunankumantachu nitaq unquptinku utaq presochasqa kaptinku watukunankumantachu. Hinaptinqa, ¿ima niytataq Jesusqa munachkarqa? Ovejakuna hina kanankupaqqa, riqsikunankum karqa hanaq pachapaq iñiqmasinchikkuna Jesuspa wawqinkuna kasqankuta hinaspapas tukupay tiempopim yanapananku karqa. Chaymi Jesusqa nirqa ‘allin ruwaqkuna’ kasqankuta (Mat. 10:40-42; 25:40, 46; 2 Tim. 3:1-5).

10. ¿Imaynatam ovejakunawan tupachisqa iñiqmasinchikkunaqa Jesuspa wawqinkunata yanapanmanku?

¹⁰ Ichaqa, ¿imanasqam Jesuspa wawqinkunaqa yanapakuyta necesitanku? Ovejakunamantawan cabrakunamanta manaraq willachkaspanmi Jesusqa qatiqninkunawan rimarqa tukupay tiempopi ima pasakunanmanta (Mat. 24:3). Nirqam chay tiempopi Diosmanta willakuy enteron pachapi apakunanmanta (Mat. 24:14). Willarqataqmi wayqapi qullqimanta  rikchanachiytapas. Chay willasqanpim Jesusqa hanaq pachapaq iñiqmasinchikkunata nirqa Diosmanta willakuypi anchata kallpanchakunankupaq. Ichaqa, ¿imaynataq enteron pachapiqa willakunmanku karqa kunan tiempopi pisillaña kaspankuqa? Ovejakunamantawan cabrakunamanta rikchanachiypim, Jesusqa nirqa ovejakunawan rikchanachisqa iñiqmasinchikkuna hanaq pachapaq iñiqmasinchikkunata yanapanankumanta. Chaytaqa manamá paykunata kallpanchaspallankuchu nitaq qullqita quspallankuchu yanapananku karqa, aswanqa kikinkupas Diosmanta willakuspankum.

11. ¿Imatam wakinku tapukunku?

¹¹ Kunanqa pusaq millonñam Jehova Diospa testigonkunaqa kanchik. Ichaqa asllam kanku hanaq pachapaq suyakuyniyuq iñiqmasinchikkunaqa. Paykunamanmi Jesusqa wayqapi qullqita qurqa utaq Diosmanta willakunankupaq kamachirqa (Mat. 25:14-18). Chayraykum ichapas wakinku tapukunmanku: “¿Willakunankuchu Diosmanta kay pachapaq suyakuyniyuq kaqkunapas?”, nispa. Arí, qawasun imakunarayku.

12. ¿Imatam yachachiwanchik Mateo 28:19, 20?

¹² Jesusqa Diosmanta willakunankupaqmi llapallan qatiqninkunata kamachirqa. Kawsarimusqan qipatam, Jesusqa qatiqninkunata kamachirqa Diosmanta willakunankupaq hinaspa paypa tukuy ima yachachisqanta runakunamanpas yachachinankupaq. Chaymi musuq qatiqninkunapas chay kamachikuyta kasukunanku karqa (leey Mateo 28:19, 20). ¿Imatam kayqa yachachiwanchik? Llapanchikmi Diosmanta willakunanchik hanaq pachapaq utaq kay pachapaq suyakuyniyuq kaspanchikpas (Hech. 10:42).

13. ¿Imatam Apocalipsis qillqa yachachiwanchik?

¹³ Apocalipsis qillqam qawachin wakin iñiqmasinchikkunapas Diosmanta willakuypi hanaq pachapaq iñiqmasinchikkunata yanapanankumanta. Apostol Juanmi revelacionninpi qawarqa huk ‘noviata’, paymi runakunata nirqa “kawsachikuq yakuta” tomanankupaq. Chay noviaqa tupanmi hanaq pachamanta Jesuswan kuska kamachimuq 144.000 iñiqmasinchikkunawan (Apoc. 14:1, 3; 22:17). Chay yakuñataqmi tupan ñuqanchikrayku Jesuspa wañusqanwan, chayraykum runakunaqa huchamantawan wañuymanta librasqa kanchik (Mat. 20:28; Juan 3:16; 1 Juan 4:9, 10). Hanaq pachapaq iñiqmasinchikkunaqa runakunatam yachachinku Jesuspa wañusqanwan imayna yanapachikunankupaq (1 Cor. 1:23). Ichaqa chay revelacionpim rikurin kay pachapi kawsanankupaq suyakuyniyuq runakuna. Chay runakunapas ninankum wakin runakuna kawsachikuq yakuta tomanankupaq. ¿Imaynatam chayta ruwanku? Diosmanta willakuspankum.  Qawasqanchikman hinam, llapallanchik Diosmantaqa willakunanchik.

14. ¿Imatam ruwananchik “Jesucristopa kamachikuyninkunata” kasukunapaqqa?

¹⁴ “Jesucristopa kamachikuyninkunata” llapallan kasukuqkunaqa Diosmantam willakunanku (Gal. 6:2). Jehova Diosqa munanmi llapallan serviqninkuna chay kamachikuyta kasukunankuta. Ñawpaq tiempopipas, payqa munarqam Israel runakuna hinaspa huklaw llaqtayuq runakunapas kamachikuynin kasukunankuta (Ex. 12:49; Lev. 24:22). Kunanqa manañam Moisespa chaskisqan kamachikuykunataqa kasukunanchikñachu. Aswanmi “Jesucristopa kamachikuyninkunata” kasukunanchik hanaq pachapaq utaq kay pachapaq suyakuyniyuq kaspanchikpas. Jesucristopa hatun kamachikuy quwasqanchikmi kuyanakuy (Juan 13:35; Sant. 2:8). Chaymi Jehova Diosta, Jesusta hinaspa runamasinchikkunata kuyananchik. Chaytam qawachisunchik runakunaman Diosmanta willakuspanchik (Juan 15:10; Hech. 1:8).

15. ¿Imaynatam yachanchik llapallan qatiqninkuna Diosmanta willakunankuta Jesus munasqanta?

¹⁵ Wakin qatiqninkunaman Jesuspa nisqankunaqa, llapankupaqmi karqa. Piensarisun, Jesusqa 11 qatiqninkunallawanmi hanaq pachamanta kamachimunankupaq contratota ruwarqa. Ichaqa 144.000 iñiqmasinchikkunam Jesuswanqa kamachimunqaku (Luc. 22:29, 30; Apoc. 5:10; 7:4-8). Kawsarimusqan qipatapas, Jesusqa wakin qatiqninkunallatam  kamachirqa Diosmanta willakamunankupaq (Hech. 10:40-42; 1 Cor. 15:6). Ichaqa punta pachak watapi llapallan qatiqninkunam Diosmantaqa willakurqaku (Hech. 8:4; 1 Ped. 1:8). Arí, kunanpas pusaq millon runakunam Diosmanta willakunchik, Jesuspa chay kamachisqanta kikinchik mana uyarispanchikpas. Chayta ruwasqanchikwanmi paypi iñisqanchikta qawachinchik (Sant. 2:18).

16-18. (1) ¿Imakunatawanmi ruwachwan Diosmanta willakuypi yanapakunapaq? (2) ¿Imanasqam hanaq pachapaq iñiqmasinchikkunata yanapananchik?

¹⁶ Satanasqa hanaq pachapaq suyakuyniyuq iñiqmasinchikkunatam pantarachiyta munachkan. Chaymantapas yachanmi pisi tiempoyuqllaña kasqanta (Apoc. 12:9, 12, 17). Ichaqa manamá harkayta atinmanchu Diosmanta hinalla willakunankutaqa. Kunanqa astawanmi enteron allpa pachapi Diosmanta willakuyqa apakuchkan. Kaymi sutillata qawachin hanaq pachapaq iñiqmasinchikkunata Jesus yanapasqanmanta (Mat. 28:20).

¹⁷ Diosmanta willakuypi hanaq pachapaq iñiqmasinchikkunata yanapayqa ancha kusikunapaqmi. Ichaqa, ¿imakunatawanmi ruwachwan Diosmanta willakuypi yanapakunapaq? Yanapachwanmi qullqita quspanchik hinaspa huñunakuna wasikunatawan Betel wasikunata hatarichiypi yanapakuspa. Yanapakuchwantaqmi ancianokunata hinaspa ‘allin yuyayniyuq confianza sirvientepa’ churasqan iñiqmasinchikkunata kasukuspanchikpas (Mat. 24:45-47; Heb. 13:17).

¹⁸ Kay pachapiraq hanaq pachapaq iñiqmasinchikkunaqa ñam wiñaypaq sellasqaña kanqaku. Hinaptinmi llumpa-llumpay ñakariy punchawkuna qallaykunqa (Apoc. 7:1-3). Chaymantapas Diospa piñakuynin manaraq qallaykuchkaptinmi, hanaq pachapaq iñiqmasinchikkunaqa Jesuswan kuskaña hanaq pachapi kanqaku (Mat. 13:41-43). Ovejakunata hina Jesus akllawananchikta munaspaqa, paypa wawqinkunatam yanapananchik.