1-3. ¿Imataq Pablota yanaparqa Jehova Diospi hapipakunanpaq? (Qaway kay paginapi kaq dibujota).

PUNTA pachak watapi Jesuspa qatiqninkunaqa Roma nacionniyuq runakunawanmi qatikachasqa karqaku. Runakunaqa yanqam tumparqaku runakunata chiqnisqankumanta hinaspa chay llaqtata kañaykusqankumantapas. Achkatam presocharqaku hinaspa wakinkuta purun animalkunaman qaraykurqaku. Wakinkutañataq qirukunapi warkuqku hinaspa llaqtata achkichinankupaq kawsachkaqllata kañaykuqku. Jesuspa qatiqninkunaqa yacharqakum mayqanninkutapas chayna ñakarichinankumanta.

² Chay sasachakuy tiempokunapim Roma nacionpi runakunaqa apostol Pablota presocharurqaku. Payqa tapukurqapaschá wakin iñiqmasinkuna yanapanankumanta. ¿Imanasqa? Huk kutipim presochasqa kaptin mana pipas yanaparqachu. Ichaqa Pablom nirqa Jesusnintakama Jehova Dios yanapasqanmanta hinaspa kallpanchasqanmanta.  Nirqataqmi: ‘Señorninchikqa libraykuwanmi leonmantapas’, nispa (2 Tim. 4:16, 17). *

³ Pabloqa manam iskayrayarqachu Jehova Diospi hapipakunanmantaqa. ¿Imanasqa? Payqa manam qunqarqachu Jehova Diosqa ñawpaqta yanapasqanmanta. Manataqmi iskayrayarqachu chay sasachakuyninpi hinaspa ima sasachakuypiña tarikuptinpas kallpanchananmanta. Chaymi nirqa: ‘Payqa libraykuwanqam llapa mana allin ruwaymantapas’, nispa (2 Tim. 4:18). Pabloqa manamá iskayrayarqachu iñiqmasinkuna mana yanapaptinkupas Jehova Dioswan Jesus yanapananmantaqa.

4, 5. (1) ¿Pitaq haykapipas yanapawasunchik? (2) ¿Imatam ruwanayki Jehova Dioswan amistadniki wiñananpaq?

⁴ ¿Yaqachu haykapipas llumpay sasachakuykunapi sapallayki tarikurqanki? Yaqapaschá llamkaynikimanta patronniki qarqurusunki, unquchkanki utaq ima sasachakuywanpas ñakarichkanki. Mozo-sipas kaspaykiqa, sasachakuypipaschá tarikunki estudiasqaykipi. Chayna sasachakuykunapi tarikuptiki mana pipas yanapasuptikiqa llakisqapaschá tarikunki. Arí, wakin sasachakuykunataqa manamá allichaytaqa atichwanchu. Chayna tarikuspaqa, ¿imatam ruwachwan? Bibliam niwanchik Jehova Diospi haykapipas hapipakunanchikpaq (Prov. 3:5, 6). ¿Atichwanchu paypi hapipakuyta? ¡Arí! Bibliapim achka willakuykuna kachkan serviqninkunata Jehova Dios yanapasqanmanta.

⁵ Sasachakuypi tarikuptiki pipas mana yanapasuptikiqa, ama hukmanyaychu. Sasachakuykunapi tarikuspaykiqa Pablo hina Jehova Diospi haykapipas hapipakuy. Chaymantapas kikikipunim qawanki sasachakuynikipi Jehova Dios imayna yanapasusqaykimanta. Chaymi yanapasunki Jehova Diospi astawan hapipakunaykipaq hinaspa paywan amistadniki wiñananpaqpas.

6. ¿Imanasqam llumpay sasachakuypi tarikuspa Jehova Diospi hapipakuyqa sasa kanman?

⁶ Piensariy llumpay sasachakuypi tarikusqaykirayku hukmanyasqa kasqaykipi. ¿Ñachu Jehova Diospa yanapakuyninta maskaspayki sasachakuynikita allichanaykipaq tukuy imata ruwarqankiña? Chayna kaptinqa, ama llakikuychu Jehova Diosqa yanapasunkim (leey Salmo 62:8; 1 Pedro 5:7). Jehova Dioswan amistadniki hinalla wiñananta munaspaykiqa, paypim tukuy sunquykiwan hapipakunayki. Wakinpiqa chayqa sasam kanman. ¿Imanasqa? Jehova Diosqa manam  llapanpichu mañakusqanchiktaqa chaylla quwanchik (Sal. 13:1, 2; 74:10; 89:46; 90:13; Hab. 1:2).

7. ¿Imanasqam wakinpiqa mana chayllachu Jehova Diosqa mañakusqanchikta quwanchik?

⁷ Wakinpim Jehova Diosqa mana chayllachu mañakusqanchiktaqa quwanchik. Chayta entiendenapaqqa yuyarinanchikmi Jehova Diosqa taytanchik kasqanta, ñuqanchikñataq churinkuna kasqanchikta (Sal. 103:13). Tayta-mamakunaqa manam lliwtachu nitaq chay horallachu warmankupa mañakusqankutaqa qunku. Wakinpim warmakunaqa imatapas mañakuspankuqa, manaña chaymantaqa munankuñachu. Tayta-mamakunaqa yachankutaqmi warmankupa imapas mañakusqanku hukkunapaq utaq kikinkupaq mana allin kasqanta. Warmankupa mañakusqanta chaylla lliwta quspankuqa, paykunapa munasqallantach ruwanmanku. Ichaqa tayta-mamakunam allinta yachanku warmanku imakuna necesitasqankuta, yachankutaqmi haykapi quytapas. Jehova Diospas yaqa chaynatam ruwan. Payqa yachanmi ima necesitasqanchikta hinaspa haykapi quwananchiktapas. Chayraykum mañakusqanchikta Jehova Dios uyarisqanta qawananchikpaq suyananchik (Is. 29:16; 45:9).

8. ¿Imatam Jehova Dios niwanchik?

⁸ Jehova Diosqa yachantaqmi sapakama aguantay atisqanchikta (Sal. 103:14). Payqa necesitasqanchikman hinam kallpanchawasun. Wakinpiqa llumpay llakisqa kasqanchikraykum mana kallpayuq hina tarikusunchik. Ichaqa Jehova Diosmi niwanchik sasachakuyninchik llumpay sasa kaptinqa aguantananchikpaq yanapawananchikmanta (leey 1 Corintios 10:13). Payqa yachanmi imata aguantay atinanchikmanta utaq mana atinanchikmantapas, chayta yachasqanchikmi hawkayachiwanchik.

9. ¿Imatam ruwawaq mañakusqaykita Jehova Dios mana chaylla qusuptikiqa?

⁹ Mañakusqaykita Jehova Dios mana chaylla qusuptikiqa, ama hukmanyaspa suyay. Payqa suyachkanmi haykapi yanapasunaykimanta. Bibliam niwanchik yanapawananchikpaq Jehova Diosqa pacienciawan hinaspa llakipayakuywan suyasqanmanta, allin ruwaq kasqanrayku. Nintaqmi paypi hapipakuspa suyaqkunaqa kusisqa kasqankumanta (Is. 30:18).

10-12. (1) ¿Ima sasachakuykunapim tarikunmanku unquq ayllunkuta yanapaqkunaqa? (2) ¿Imaynam Jehova Dioswan amistadninchik kanqa sasachakuyninchik kaptinpas paypi hapipakuptinchikqa? Linda sutiyuq iñiqmasinchikmanta rimarimuy.

¹⁰ Kay yachachikuypa 2 kaq parrafonpim rimamurqanchik Pabloqa ‘leonmantapas librasqa’ kasqanmanta (2 Tim. 4:17). Sichu Pablo hina qampas llumpay sasachakuypi tarikuspaykiqa, ¿imatam ruwawaq? Jehova Diospim astawan hapipakunayki. Ichapas unquq aylluykita yanapachkanki. Hinaspaqa Jehova Diostachá mañakurqanki kallpanchasunaykipaq hinaspa allinta tanteanaykipaq. * Ama hukmanyaychu Jehova Diosqa  yachanmi imayna tarikusqaykita. Paymi yanapasunki aguantanaykipaq hinaspa payman sunqu kanaykipaqpas (Sal. 32:8).

¹¹ Ichapas wakinpiqa Jehova Dios mana yanapasusqaykita piensawaq. ¿Imanasqa? Yaqapaschá doctorkunaqa unquq aylluykita imayna yanapayta mana atinkuchu. Ichapas aylluyki yanapasunaykita suyarqanki, ichaqa yanapasunaykimantaqa astawanraqmi sasachasunki. Chayna pasasuptikiqa astawanmi Jehova Diosta mañakunayki kallpanchasunaykipaq hinaspa payman hinalla asuykunaykipaqpas (leey 1 Samuel 30:3, 6). Chaymanta, Jehova Dios imayna yanapasusqaykita musyaruptikiqa, paywan amistadnikim astawan wiñanqa.

¹² Rimarisun Linda sutiyuq iñiqmasinchikmanta. * Payqa tayta-mamantam wañukunan punchawkama unquptinku unay tiempo yanaparqa. Nintaqmi qusanwan hinaspa turinwan yanapanankupaq mana ima ruway atisqankuta. Wakinpiñataq llumpayta hukmanyaqku. Ichaqa kunanmi musyakunku Jehova Dios anchata yanapasqanmanta. Manam iskayrayankuchu llumpay sasachakuypi tarikuptinku Jehova Dios kallpanchasqanmantaqa.

13. ¿Imaynatam Jehova Diospi hapipakusqan Rosata yanaparqa?

¹³ Llumpay sasachakuykunapi tarikuspapas Jehova Diospi hapipakuptinchikqa, payqa yanapawasunmi. Chaytam ruwarqa Rosa sutiyuq iñiqmasinchik. Paypa qusanqa Diosta mana serviqmi. Qusanmi paymanta divorciakuchkarqa, hina chay tiempollapitaqmi turinpas llumpayta unqururqa. Iskay-kimsa killamantañataqmi hina chay turinpa warmin wañukurqa. Kaykunam llumpayta llakichirqa Rosataqa. Chaymanta qipallatam precursora karqa, ichaqa qunqaymantam maman wañukurqa. ¿Imataq yanaparqa tukuy chaykunata atipananpaq? Jehova Diosta sapa punchaw mañakuymi hinaspa imataña tanteananpaqpas yanapakuynintam mañakuq. Chayta ruwasqanraykum Jehova Dioswan amistadninqa astawan wiñarqa. Kikinpi utaq hukkunapi hapipakunanmantaqa Jehova Diospi hapipakuytam astawan yacharqa. Imayna yanapasqanta qawaspanmi musyachirqa Jehova Dios uyarisqanta hinaspa haykapipas mana saqisqanta.

14. Diospa llaqtanmanta aylluyki qarqurachikuptinqa, ¿imaynatam Jehova Diosqa yanapasunkiman?

¹⁴ Rimarisun huk sasachakuymantapas. Ichapas aylluyki Diospa llaqtanmanta qarqusqa kanman. Bibliaqa niwanchikmi paykunawan mana rimanapaq (1 Cor. 5:11; 2 Juan 10). Ichaqa aylluykita llumpayta kuyasqaykiraykum, chay kamachikuy llumpay sasa hina kasqanta qawawaq. ¿Imaynatam Jehova Dios yanapasunkiman? Kallpanchasunkim payman sunqu hinaspa kasukuq kanaykipaq. Sasachakuynikikunaqa yanapasunkimanmi  Jehova Diospi astawan hapipakusqaykita qawachinaykipaq.

15. ¿Imanasqam Adanqa Jehova Diosta mana kasukurqachu?

¹⁵ Yuyarisun Adanpa ruwasqanta. ¿Imanasqataq payqa Evapa qusqan frutata mikururqa? Evatam astawan kuyarqa Jehova Diosmantaqa (Gen. 3:6, 17). Adanqa yacharqamá Diosta mana kasukuspanqa wañunanmanta. Chaymi Bibliaqa nin Adanqa mana engañasqa kasqanmanta (1 Tim. 2:14). ¿Imatam kaymanta yachachwan?

16. ¿Pitataq kuyananchik pimantapas astawanqa, hinaspa imanasqa?

¹⁶ Adanpa ruwasqanmi yachachiwanchik pimantapas astawanqa Jehova Diosta kuyanamanta (leey Mateo 22:37, 38). ¿Imanasqa? Diosta kuyasqanchikmi ayllunchikta yanapanqa Diospa llaqtanpi kaptinku utaq mana kaptinkupas. Chaymi, kallpanchakunanchik Jehova Diosta astawan kuyanapaq hinaspa paypi hapipakunapaqpas. Diospa llaqtanmanta aylluyki qarqusqa kasqan llakichisuptikiqa, imayna tarikusqaykimanta Jehova Diosman willakuy (Rom. 12:12; Filip. 4:6, 7). * Sasachakuyniki llumpayta llakichisuptikipas, Jehova Dioswan amistadniki astawan wiñananpaqmi yanapasunkiman. Chaymi allinnikipaq kanqa paypi hapipakuspa kasukuptikiqa.

17. Jehova Diosmanta astawan willakuspaqa, ¿imamantam mana iskayrayasunchu?

¹⁷ ¿Imanasqam Jehova Diosqa Pablota ‘libraykurqa leonmanta’? Kikin Pablom nirqa: “Mana hukmanyaspaymi salvacionmanta willakurqani”, nispa (2 Tim. 4:17). Jehova Diosqa paymanta willakunanchikpaqmi ñuqanchiktapas kamachiwarqanchik. Paypa llamkaqmasinmi kanchik (1 Cor. 3:9; 1 Tes. 2:4). Jehova Diosmanta astawan willakuptinchikqa payqa tukuy imapim yanapawasun (Mat. 6:33). Chaynata ruwaspaqa, manam hukmanyasunchu Jehova Dios yanapawananchikta suyaspaqa.

18. ¿Imatam ruwachwan Jehova Diospa amistadnin kanapaq hinaspa paypi astawan hapipakunapaqpas?

¹⁸ Jehova Dioswan amistadniki astawan wiñananpaqyá kallpanchakuy. Sasachakuyniki llumpay sasa kaptinpas, Jehova Dioswan amistadniki astawan wiñananpaqmi yanapasunkiman. Chaypaqqa, Bibliata sapa punchaw leey, estudiay hinaspa chay leesqaykipi yuyaymananaykipaq tiempochakuy. Amayá haykapipas saqiychu Diosta mañakuytaqa hinaspa paymanta astawan willakuytapas. Tukuy kaykunata ruwaspaykiqa, manam iskayrayawaqchu ima sasachakuynikipipas Jehova Dios yanapasunaykimantaqa.