LIBANO lawpi cedro sachakunaqa hatunsum hinaspa sumaqllañam. Aceitunas sachakunam ichaqa taksalla hinaspa qiwisqa hina kanku. Chaywanpas aceitunas sachaqa mana chaylla pakikuqmi hinaspapas waranqa watakamam kawsayta atinman. Sapinkunapas allintam allpa ukupi sapichakun. Kuchuruptinkupas sapinkuna mana chakiruptinqa kaqmantam ikllirimunman.

Kaymi yuyarichiwanchik Diosta serviq Jobpa ima nisqanmanta. Paymi huk sachamanta rimarqa, ichapas aceitunas sachamanta. Nirqam chay sachata kuchuruptinkupas kaqmanta ikllirimunanmanta. Unay tiempoña mana paramuptinpas, pararamuptinqa huktawanmi ‘musuq planta’ hina wiñaramunman (Job 14:7-9). Kaywanmi Jobqa mana iskayrayaspan nichkarqa pay wañukuptin Jehova Dios kawsarichinanmanta (Job 14:13-15).

Chakrapi llamkaq runaqa munanmi kuchusqa sachan kaqmanta ikllimunanta. Chaynallataqmi Jehova Diospas munan serviqninkuna hinaspa achka wañusqa runakunata kawsarichiyta (Mat. 22:31, 32; Juan 5:28, 29; Hech. 24:15). Ñuqanchikpas kawsarimunankutam munanchik. ¡Mayna kusisqachá tarikusun chay punchaw chayaramuptinqa!