1. ¿Imanasqam Jehova Dioswan amistadninchikta wiñachinanchik?

JEHOVA DIOSPA testigonkunaqa Dioswanmi allin amistad kanchik. Chaytam astawan wiñachinanchik. ¿Imanasqa? Satanaspa munaychakusqanpi yachasqanchikrayku hinaspa pantaq kasqanchikraykum, chaykunam Dioswan amistadninchikta yanqacharunman.

2. (1) ¿Imaynataq amistadkunaqa kanku? (Qaway willakuyta). (2) ¿Imatam ruwachwan Jehova Dioswan amistadninchik astawan wiñananpaq?

² Jehova Diosqa pimantapas aswan allin amistadninchikmi. ¿Munawaqchu paywan amistadniki astawan wiñananta? Chaypaqmi yanapasunki Santiago 4:8, chaypim nin: “Diosman asuykuptikichikqa paypas asuykusunkichikmi”, nispa. Kaypi nisqanman hinaqa Diosmanmi asuykunayki, chaynapi paypas asuykamusunaykipaq. Chaynata ruwaptikiqa, Jehova Dioswan amistadnikim astawan wiñanqa. * Hinaspam qampas  Jesus hina ninki: ‘Payqa chiqapmi [...]. Ñuqam ichaqa riqsini’, nispa (Juan 7:28, 29). Qawasun imakunata ruwaspa Jehova Diosman asuykunamanta.

3. ¿Imaynatam Jehova Dioswan parlachwan?

³ Jehova Diosman astawan asuykuyta munaspaqa, paywanmi parlananchik. ¿Imaynatam chayta ruwachwan? Piensariy kaypi: iskay amistadkuna karu-karupi sapakama yachaspankupas qillqanakunkum utaq qayanakunkum parlariyta munaspankuqa. Chaynatam Jehova Dioswanpas ruwananchik. Ichaqa, ¿imaynatam paywan parlarichwan? Sapa kuti mañakuspanchikmi (leey Salmo 142:2). Payñataqmi rimapayawanchik Bibliantakama. Chaymi payta uyarinapaqqa sapa kuti leenanchik hinaspa leesqanchikpi yuyaymanananchik (leey Isaias 30:20, 21). Jehova Dioswan chaynata parlaptinchikqa, paywan amistadninchikmi astawan wiñanqa. Kaymantam kay yachachikuypi qawasun.

4, 5. (1) ¿Imaynatam Jehova Diosqa Bibliantakama rimapayawanchik? (2) Willarimuy Mateo 6:19, 20 imayna yanapawasqanchikmanta.

⁴ Bibliapa nisqanqa llapanchiktam yanapawanchik. Yanapawanchiktaqmi sapakamatapas Diosman asuykunanchikpaq. Chaypaqqa, Bibliata leespanchik utaq estudiaspanchikmi yuyaymanananchik imayna kasukunapaq. Chayta ruwaspanchikmi Jehova Diosta uyarichkanchik. Hinaspa uyarisqanchik yanapawaptinchikqa, paywan amistadninchikmi astawan wiñanqa (Heb. 4:12; Sant. 1:23-25).

⁵ Mateo 6:19, 20 nisqanpim Jesus nirqa: ‘Kay pachapiqa amayá quri-qullqitaqa huñukuychikchu’, nispa. Kaywanqa nichkan Jehova Diosta puntapi churanapaqmi. ¿Imaynatam kaypi yuyaymanayqa yanapawanchik? Jesuspa chayna nisqanta kasukuptinchikqa Jehova Diosmi kusisqa tarikunqa. Ichaqa mana puntapi churasqanchikta musyakuspaqa, kallpanchakunanchikmi Jehova Diosta puntapi churanapaq. Chayta ruwananchikpaqmi  payqa palabranpi yuyarichiwanchik.

6, 7. (1) ¿Imaynam Jehova Dioswan amistadninchikqa kanqa Bibliata estudiaptinchikqa? (2)  ¿Imapaqmi Bibliata leenanchik?

⁶ Bibliata estudiasqanchikmi yanapawanchik imaynata astawan Jehova Diosta servinapaq. Chayta ruwaspataqmi riqsinchik imayna kasqanta hinaspa kuyawasqanchikrayku imakuna ruwasqankunatapas. Kaykunata yachasqanchikmi yanapawanchik Diosta astawan kuyanapaq. Paypas astawantaqmi kuyawasun. Chaynapim Jehova Dioswan amistadninchikqa astawan wiñanqa (leey 1 Corintios 8:3).

⁷ Jehova Dioswan amistad kayta munaspanchikqa Bibliataqa manam leeyllachu-leenanchik. Jesusmi nirqa: ‘Wiñay kawsayniyuqqa kanku sapallan chiqap Dios kasqaykita riqsiqkunam hinaspa kachamusqayki Jesucristota riqsiqkunam’, nispa (Juan 17:3). Arí, Bibliapi sumaq yachachikuykunata tarispanchikpas, manam chayraykullachu leenanchik. Bibliataqa leenanchik Jehova Diosta allinta riqsinanchikpaqmi (leey Exodo 33:13; Sal. 25:4).

8. (1) ¿Imatam wakin runakunaqa piensanmanku Azariasta Jehova Dios castigasqanmanta leespanku? (2) ¿Imamantam ñuqanchikqa mana iskayrayanchikchu?

⁸ Jehova Diosta allinta riqsispanchikqa, manam iskayrayasunchu wakinpi imanasqa imatapas ruwasqanmantaqa. Yuyaymanasun Juda nacionta kamachiq Azariaspi. Pay kamachiptinmi runakunaqa taytacha-mamachakunata yupaychaqku. Ichaqa Azariasmi Jehova ‘Diospa qayllanpi allin kaqkunata ruwarqa’ (2 Rey. 15:1-5). Chaywanpas Jehova Diosqa lepra unquywanmi castigarurqa. ¿Imanasqa? Bibliaqa manam willawanchikchu 2 kaq Reyes qillqapiqa. Ichapas chayrayku wakin runakunaqa piensanmanku Jehova Dios mana allinta ruwasqanmanta. Ñuqanchikmi ichaqa Jehova Diosta allinta riqsinchik hinaspapas manam iskayrayanchikchu allin kaqta haykapipas ruwasqanmantaqa (Jer. 30:11). Chaymi Azariasta imanasqa Jehova Dios castigasqanmanta mana yachaspanchikpas, manam iskayrayanchikchu allin kaqta ruwasqanmantaqa.

9. ¿Imanasqam Jehova Diosqa Azariasta castigarurqa?

⁹ Bibliaqa willawanchiktaqmi Azariaspa sutin Uzias kasqanmantapas (2 Rey. 15:7, 32). Paymantam Bibliaqa astawan willawanchik 2 Cronicas 26:3-5, 16-21 nisqanpi, chaypim nin Uziasqa Jehova ‘Diospa qayllanpi allin kaqkunata ruwasqanmanta’. Ichaqa nintaqmi chaymanta qipata ‘hatun tukuqllaña rikurirusqanmanta’. Chaymi huk punchaw sacerdotekunapa ruwayninta ruwayta munarqa. Ichaqa 81 sacerdotekunam nirqaku chay ruwayninqa mana allin kasqanta hinaspam harkakurqaku. Azariasñataqmi hatun tukuq rikurirusqanrayku paykunawan piñakuruspa mana kasukurqachu. Kaymanta yachayninchikmi astawan yanapawanchik imanasqa Jehova Dios castigasqanmanta entiendenapaq.

10. (1) ¿Imanasqam mana haykapipas iskayrayananchikchu Jehova Dios allin ruwaq kasqanmantaqa? (2) ¿Imata ruwaptinchikmi Jehova Dioswan amistadninchikqa astawan wiñanqa?

 ¹⁰ Azariasmanta Bibliapa willakusqanmi sutillata qawachiwanchik imanasqa Dios castigasqanta yachanapaq. Ichaqa Bibliapi wakin willakuykunamantaqa manam lliwtachu yachanchik. Chayna kaptinqa, ¿iskayrayasunchu Jehova Dios allin ruwaq kasqanmanta? Icha, ¿hapipakusunchu haykapipas Jehova Dios allin ruwaq kasqanpi? (Deut. 32:4). Bibliaqa allintam yanapawanchik Jehova Diosta astawan riqsinanchikpaq hinaspa paypi hapipakunanchikpaqpas. Payta allinta riqsispanchikqa hinaspa kuyaspanchikqa, manam haykapipas iskayrayasunchu allin ruwaq kasqanmantaqa. Bibliata estudiaptinchikqa, Jehova Dioswan amistadninchikmi astawan wiñanqa (Sal. 77:12, 13).

11-13. ¿Imanasqam yachanchik mañakusqanchikta Dios uyarisqanmanta? (Qaway 15 kaq paginapi dibujota).

¹¹ Jehova Dioswan parlaspanchikqa: alabanchik, agradecekunchik hinaspa yanapakuynintam mañakunchik. Chaymi astawan payman asuykachiwanchik (Sal. 32:8). Jehova Dioswan amistadninchik astawan wiñananta munaspaqa, manam iskayrayananchikchu uyariwananchikmantaqa.

¹² Wakin runakunam ninku: “Diosqa manam uyarinchu mañakusqanchiktaqa aswanqa allin tarikunallapaqmi  yanapawanchik”, nispa. Ninkutaqmi: “Diosta mañakusqanchikqa sasachakuyninchikpi piensaspa kikillanchik allichanapaqmi yanapawanchik”, nispa. Mañakuyninchik chaykunapaq yanapawaptinchikpas, Jehova Diosqa uyariwanchikmi. ¿Imanasqam chayna kasqanta ninchik?

¹³ Jesuspi piensarisun: payqa manaraq kay pachaman hamuchkaspanmi runakunapa mañakuyninta Jehova Dios uyarisqanta qawarqa. Kay pachapi kaspanñataqmi Jesusqa Diosta mañakurqa hinaspa ima piensasqanta hinaspa imayna tarikusqanta willarqa. Huk kutipim tukuy tuta Diosta mañakurqa (Luc. 6:12; 22:40-46). Qatiqninkunatapas Jesusqa yachachirqam imayna mañakunankupaq. ¿Yaqachu chayta ruwanman karqa mañakusqanchikta Jehova Dios mana uyarisqanta yachachkaspan? Manamá. Payqa yacharqam mañakusqanchikta Dios uyarisqanmanta. Chaymi nirqa: ‘Taytáy, graciastam quyki uyariykuwasqaykimanta. Qamqa siemprem uyariwanki’, nispa (Juan 11:41, 42). Ñuqanchikpas manam iskayrayanchikchu Jehova Dios mañakusqanchikta uyariwasqanchikmantaqa (Sal. 65:2).

14, 15. (1) ¿Imanasqam Jehova Dioswan rimaspaqa ima munasqanchikta mañakunanchik? (2) ¿Imaynatam Carmenta yanaparqa Diosta mañakuynin?

¹⁴ Wakinpiqa manapaschá sutillatachu qawanchik mañakusqanchikta Jehova Dios uyariwasqanchikmantaqa. Ichaqa ima munasqanchikta  mañakuspaqa, sutillatam qawasun uyariwasqanchikta. Hinaptinmi paywan amistadninchikqa astawan wiñanqa. Sunqumanta imakuna llakichiwasqanchikmanta willakuptinchikqa, payqa hichpallanchikpim kanqa.

¹⁵ Rimarisun Carmen sutiyuq iñiqmasinchikmanta. * Paymi llamkachkaspanraq Diosmanta willakuq lluqsiq, ichaqa manam kusisqachu chaytaqa ruwaq. Llamkayninmanta jubilakuruptinmi precursora kananpaq anciano kallpancharqa. Payqa chayta ruwananpaqmi tantearurqa, hinaspam Diosmanta kusikuywan willakunanpaq sapa punchaw Jehova Diosta mañakurqa. ¿Uyarirqachu Diosqa mañakusqanta? Carmenqa kimsa watañam precursora. Paymi willakun Diosmanta sapa kuti willasqanrayku hinaspa iñiqmasinkuna yanapasqanrayku, aswan sumaqtaña yachachisqanmanta. ¡Kunanqa kusisqallañamá Diosmanta willakun! Astawantaqmi Jehova Dioswan amistadninpas wiñarqa. Qawasqanchikman hinam, Diosta mañakuynin kay iñiqmasinchikta yanaparqa Jehova Dioswan amistadnin astawan wiñananpaq.

16, 17. (1) ¿Imatam ruwananchik Jehova Dioswan amistadninchik sapa punchaw astawan wiñananpaq? (2) ¿Imatam qatiqnin yachachikuypi qawasunchik?

¹⁶ Jehova Dioswan amistadninchikqa wiñaypaqmi kanman. Chaypaqqa Bibliatam sapa punchaw estudiananchik, chayqa Diosta uyariy hinam. Chaymantapas, hinallam mañakuspanchik paywan rimananchik. Chayta ruwaptinchikqa Jehova Dioswan amistadninchikmi sapa punchaw astawan wiñanqa. Paypa yanapakuyninwantaqmi ima sasachakuykunatapas atipasunchik.

¹⁷ Diosta sapa kuti mañakuspanchikpas, wakinpiqa sasachakuykunawanmi hinalla ñakarinchik. Ichapas chayrayku Jehova Diospiqa manaña hapipakuchwanñachu. Piensachwanpaschá mañakusqanchikta Dios mana uyarisqanmanta hinaspa payqa manaña amistadninchik kasqanmantapas. Chayna tarikuspanchikqa, ¿imatam ruwananchik? Chaymantam qatiqnin yachachikuypi qawasunchik.