JULIAN sutiyuq iñiqmasinchikmi willakun piwi churinwan allinta apanakuspa kuskalla imatapas ruwasqankumanta. Ichaqa churinmi qunqaymanta mana allinkunata ruwayta qallaykurqa. Huñunakuypim willakamurqaku manaña Jehova Diospa testigon kasqanta, chaymi Julianta llumpayta hukmanyachirqa. Señoran llumpayta waqaptinmi payqa imayna hawkayachiytapas mana atiqchu. Paykunaqa ninakuqkum: “Imapitaq pantarqanchik”, nispa.

¿Imanasqataq biblia nin Diospa llaqtanmanta pitapas qarqunankupaq? Llumpay llakikunapaq kaptinqa, ¿imanasqataq ninchik Dios kuyakuyninta chaywan qawachisqanmanta? Kay yachachikuypim kay tapukuykunamanta yachasunchik.

Pipas bautizasqa kachkaspan hatun huchaman wichiykuspanqa hinaspa mana wanakuspanqa, Diospa llaqtanmantam qarqusqa kanqa.

Jehova Diosqa yachanmi pantaq runakuna kasqanchikta. Chaywanpas, munanmi kamachikuyninkunata kasukunapaq kallpanchakunanchikta. Chaymi kamachiwanchik kaykunata mana ruwananchikpaq: huchapakuyta, taytacha-mamacha yupaychayta, suwakuyta, runa wañuchiyta hinaspa layqa ruwaytapas (1 Cor. 6:9, 10; Apoc. 21:8).

Jehova Diospa kamachikuyninkunaqa manam llumpay sasachu kasukunapaqqa, aswanmi allinninchikpaq. Huñunakuyninchikpipas hawkam tarikunchik allin runakunapa chawpinpi kaspanchik. ¿Imanasqam chayna tarikunchik? Bautizakuspanchikmi Jehova Diosta nirqanchik kamachikuyninkunata kasukunanchikpaq.

Ichaqa, ¿imam pasanqa bautizasqa kachkaspan pipas hatun huchaman wichiykuptinqa? Ñawpaq tiempopi Diospa wakin serviqninkunam hatun huchakunaman wichiykurqaku, ichaqa manam Jehova Diosqa qipancharurqachu. Davidmi huchapakuyman wichiykurqa hinaspa huk runatapas wañurachirqa,  chaywanpas Diosmi pampachaykurqa (2 Sam. 12:13).

¿Imanasqam pampachaykurqa? Sunqumanta David wanakusqanraykum (Sal. 32:1-5). Kunanpas chaynam, Jehova Diospa testigon hatun huchaman wichiykuspa sunqumanta wanakuptinqa hinaspa manaña kaqmanta huchallikuptinqa, manam Diospa llaqtanmantaqa qarqusqachu kanqa (Hech. 3:19; 26:20). Sunqumanta mana wanakuptinmi ichaqa Diospa llaqtanmanta ancianokuna qarqunmanku.

Ayllunchikta utaq amistadninchikta qarquruptinkuqa yaqapaschá llumpayta llakichiwachwan hinaspa piensachwan qarqunankupaq tanteasqankuqa llumpay mana allin kasqanta. Ichaqa bibliam yachachiwanchik chayqa Diospa kuyakuyninta qawachisqanmanta. ¿Imanasqa?

Jesusmi nirqa: ‘Diospa munasqan yachaqkunam ichaqa yachayniyuq kasqankuta qawachinku ruwasqankuwan’, nispa (Mat. 11:19). ¿Allinpaqchu mana wanakuqkunata Diospa llaqtanmanta qarqusqankuqa? Qatiqninpi chaymanta qawasun.

Jehova Diospa sutintam chuyanchan. Kaywan tupachisun, huk warmacha allinta portakuptinqa runakunapas allintam tayta-mamanmantaqa rimanku. Ichaqa mana allinta portakuptinqa tayta-mamanmantam mana allinta runakunaqa rimanku. Chaynallataqmi Jehova Dioswanpas. Ezequielpa kawsasqan punchawkunapim, wakin nacionkunaqa allinta yacharqaku Israel runakunaqa Jehova Diospa llaqtan kasqanta (Ezeq. 36:19-23). Kunanpas runakunaqa allintam yachanku Jehova Diospa sutinta apasqanchikmanta (Is. 43:10, NM). Diosta kasukuptinchikqa runakunam paymanta allinta rimanqaku. Mana kasukuptinchikmi ichaqa mana allinta Jehova Diosmanta rimanqaku.

Ima huchapakuymanpas wichiykuptinchikqa Jehova Diospa sutinmantam mana allinta runakuna rimanqaku. Diospa kamachikuyninkunata kasukuptinchikmi ichaqa, paymanta allinta rimanqaku. Chaymi apostol Pedro nirqa kasukuq kananchikpaq hinaspa mana allin munaykunawan mana aysachikunanchikpaq. Chaymantapas nirqam Jehova Dios hina chuya kananchikpaq (1 Ped. 1:14-16).

Jehova Diospa testigonkuna mana allinkunata ruwaptinkuqa wakin runakunam yacharunmanku hinaspa mana allinta rimanmanku. Diospa llaqtanmanta qarquchikusqanta yacharuspankum ichaqa musyakunqaku Jehova Diospa testigonkunaqa bibliapa nisqanta kasukusqankuta hinaspa Diospa llaqtanpas chuya kasqanta. Suiza nacionpi huk runam huñunakuyninchik wasiman rispan nirqa Jehova Diospa testigon kayta munasqanta. ¿Imanasqa? Panin huchapakuruptin Diospa llaqtanmanta qarquruptinkum. Chay runaqa admirakurqam Diospa llaqtan chuya kasqanmanta.

Diospa llaqtanmi chuya kanqa. Apostol Pablom Corinto llaqtapi iñiqmasinkunata kamachirqa huchanmanta mana wanakuq runata Diospa llaqtanmanta qarqunankupaq. Mana chayqa mana wanakuq runapa mana allinkuna ruwasqantam iñiqmasinkuna qatipakuyta qallaykunmanku karqa. Pablom chayta tupachirqa aslla qunchu achka masata puquchisqanwan. Chaymi iñiqmasinkunata kamachirqa huchapakuqta Diospa llaqtanmanta qarqunankupaq (1 Cor. 5:6, 11-13).

Pablopa rimasqan chay runaqa mana pinqakuspam huchapakurqa. Chay ruwasqanta qawaspankum iñiqmasinkunapas chay ruwayta  allinpaqña qawarqaku (1 Cor. 5:1, 2). Chay ruwayta hinalla saqiptinkuqa wakin iñiqmasinkunapas chayna huchapakuykunatam ruwayta qallaykunmanku karqa. Kunanpas yaqa chaynam, pipas huchanmanta mana wanakuptinqa hinaspa mana qarquptinkuqa, wakinkum Jehova Diospa kamachikuyninkunata mana kaqpaqpas hapinmankuchu (Ecl. 8:11). Bibliam nin huchanmanta mana wanakuq runaqa ‘yaku ukupi mana rikuylla rumi’ hina kasqanta, chay rumikunaqa wakin buquekunatam yaku ukuman chinkaykachinman (Judas 4, 12, NM). Chaynam huchallikuqkunapas iñiqmasinkunapa iñiyninta yanqacharunmanku.

Huchallikuq wanakunanpaqmi yanapanqa. Jesusmi willakurqa wasinmanta pasakuq mozomanta, payqa llapa herencia chaskisqantam tukururqa hinaspa mana allinkunata ruwarqa. Ichaqa musyakururqam ayllunmanta karupi yachayqa sasa kasqanta. Chaymi wanakuspan wasinman kutirqa. Chayta qawaspanmi taytanqa anchata kusikurqa hinaspa wasinpi chaskiykurqa (Luc. 15:11-24). Kay willakuymi yanapawanchik pipas wanakuspan kutimuptin Jehova Dios imayna tarikusqanta entiendenapaq. Diosqa ninmi: ‘Mana allin ruwaq runapa wañunantaqa manam munanichu. Ñuqaqa munani mana allin kawsasqanmanta wanakuspan kawsanantam’, nispa (Ezeq. 33:11).

Diospa llaqtanpiqa ayllu hinam kanchik. Pipas qarqurachikuspanqa manam ayllunchik hinañachu. Huchallikusqan mana allinpi tukusqanta qawaspan ichapas musyakunman mana allin ruwasqanmanta. Yaqapaschá yuyarinqa Jehova Dioswan hinaspa iñiqmasinkunawanpas allin amistad kasqankumanta. Chaynapi ichapas wanakuspan Diospa llaqtanman kutimunman.

¿Imaynatam Diospa llaqtanmanta qarqusqa kaqkunata yanapachwan kutimunankupaq? Qarqunankupaq ancianokunapa tanteasqankutam mana iskayrayaspa kasukunanchik. Chaywanmi qarqusqa kaqkuna kuyasqanchikta qawachisunchik. Chayta entiendenapaq kaypi piensarisun: iskay runakunam riti urqupi purispanku chinkasqa kachkanku. Hukninmi puñuywan aysachikuchkan, yaqapaschá hukninqa mana puñunanpaq uyanpi laqichunqa. ¿Imanasqa? Puñuruspanqa wañurunmanmi. Chay laqichusqan nanaptinpas kawsananpaqmi yanapanqa. Davidmi yaqa chayna kasqanmanta nirqa: “Allin runa castigawaptinqa allinniypaqmi”, nispa (Sal. 141:5). Davidqa yacharqam chay castigasqan utaq corregisqan nananan kaptinpas allinninpaq kasqanta.

Diospa llaqtanmanta qarquchikuyqa laqichu hinam kanman huchallikuq wanakuspan Jehova Diosman kutirikunanpaq. Chaynam pasarqa Julian sutiyuq iñiqmasinchikpa churinwan, paymantam kay yachachikuypa qallariyninpi rimamurqanchik. Payqa imayna kawsasqanta cambiaspanmi Diospa llaqtanman kutimurqa chunka watamanta. Kunanqa ancianom, hinaspam riqsikun Diospa llaqtanmanta qarqusqa kasqan Diosta kasukunanpaq yanapasqanmanta. Chaymi nirqa: “Corregiwanankutam necesitarqani”, nispa (Heb. 12:7-11).

Ancianokunaqa llakikunkum Diospa llaqtanmanta pitapas qarqunanku kaptinqa. Ichaqa yuyarinanchikmi chay huchallikuq Jehova Diosman kutirikuy atinanmanta. ¿Imaynatam paykunata yanapachwan kutimunankupaq?

Ancianokunaqa Jehova Dios hinam kuyakuq kananku, astawanraqmi pipas manaña Jehova Diospa testigon kananmanta ninanku kaptinqa. Sumaqllata hinaspa  kuyakuywanmi ninanku Diospa llaqtanman kutimunankupaq imakunata ruwanankumanta. Chaymantapas, cambiasqanta qawaspankuqa watukunmankum hinaspa yuyarichinmankum imata ruwaspa kaqmanta Jehova Diospa testigon kananpaq. *

Ayllunkunaqa ancianokunapa tanteasqankunatam respetananku. Chaynata ruwaspankum qarquchikuqta hinaspa iñiqmasinkunatapas kuyasqanta qawachinqaku. Julianmi nin: “Manam haykapipas churiy kuyaytaqa saqirqanichu, ichaqa imayna kasqanmi pirqa hina rakiwarqaku”, nispa.

Iñiqmasinchikkunapas Diospa llaqtanmanta qarqusqa kanankupaq tanteasqantam yanapananku. Chayta ruwaspankum kuyasqankuta qawachinqaku. Chaymi paykunawanqa mana hukllawakunkuchu nitaq rimankuchu (1 Cor. 5:11; 2 Juan 10, 11). Ichaqa qarquchikuqpa ayllunta kuyasqankutam iñiqmasinchikkunaqa qawachinanku. Paykunaqa llumpay llakisqam kachkanku, chaymi mana pipas qawananchu qarqusqata hinaqa (Rom. 12:13, 15).

Julianmi nin: “Wakinpim qarquchikuyqa yanapawanchik Jehova Diosta astawan kasukunapaq. Llumpayta hukmanyachiwaspanchikpas anchatam yanapawanchik. Qarqusqakunata imayna qawanapaq Diospa kamachisqanta mana kasukuptiyqa manam haykapipas churiyqa kutimunmanchu karqa”, nispa.