1-3. ¿Imanasqam huk iñiqmasinchik manapuni iskayrayanchu mañakusqanta Jehova Dios uyarisqanmanta?

LANA sutiyuq precursoram 2012 kaq watapi Alemania nacionta watukurqa. Payqa manam qunqanqachu chay illasqanpi imam pasasqantaqa. Paymi nin iskay mañakuyninkunata Jehova Dios uyarisqanta. Avionkunapa kasqanman trenpi rispanmi, payqa Jehova Diosta mañakurqa pi runatapas yachachinanpaq tariy munasqanmanta. Risqanman chayaruptinmi, niykurqaku illananpaq avionqa qatiqnin punchawtaña lluqsinanmanta. Chay tuta maypi samapakunanpaq qullqin mana haypasqanraykum, Jehova Diosta kaqmanta mañakurqa yanapaykunanpaq.

² Jehova Diosta mañakuyta tukuruptillanmi, huk runa kaynata tapurqa: “Lana, ¿imatam kaypi ruwanki?”, nispa. Chay runaqa ñawpaqpi estudiaqmasinmi karqa, payqa Sudáfrica nacionmanmi illanan karqa. Payta avianankupaqmi mamanwan abuelanqa riysirqaku. Llakinmanta chay iñiqmasinchik  willakuptinmi, paykunaqa wasinkupi samapakunanpaq niykurqaku. Chaymantapas, iñisqanmantawan tukuy tiemponwan Jehova Dios servisqanmantam yachayta munarqaku.

³ Qatiqnin punchawtapas hinallam Lanataqa bibliapa yachachisqankunamanta tapurqaku. Manaraq llaqtanman kutikuchkaspanmi, payqa sutinkuta hinaspa maypi yachasqankuta qillqarqa chay lawpi iñiqmasinchikkuna watukunankupaq. Lanaqa hinallam precursora kachkan hinaspapas manapunim iskayrayanchu mañakusqanta Jehova Dios uyarisqanmantaqa (Sal. 65:2).

4. ¿Imamantam yachasunchik kay yachachikuypi?

⁴ Sasachakuyninchik kaptinqa, chayllam Jehova Diosta mañakunchik. Payñataqmi uyariwanchik hinaspa yanapawanchik (Sal. 34:15; Prov. 15:8). Ichaqa Jesusmi yachachirqa imakunata astawan mañakunamanta. Kay yachachikuypim qawasunchik Jesuspa yachachisqan mañakuymanta tawa kaqkunataraq hinaspa imayna yanapawasqanchikmantapas (leey Mateo 6:11-13).

5, 6. Achka mikunanchikpaq kaptinpas, ¿imanasqam mañakunanchik mikunaykuta quwayku nispa?

⁵ Jesusqa manam “mikuyniyta quway” nispa mañakunapaqchu yachachirqa. Payqa nirqam: ‘Mikunaykutayá kunanpaq quwayku’, nispa. Qawasun imaynatam chayta ruwarqa llaqtan-llaqtan watukuq Victor sutiyuq anciano. Paymi nin: “Jehova Diostam agradecekuniku señoraypiwan wasimanta nitaq mikuymanta mana llakikusqayrayku. Chaykunamanta mana llakikunaykupaqmi iñiqmasinchikkuna yanapawanku. Chayraykum Diosta mañakuni iñiqmasinchikkunapa sasachakuyninku kaptinpas hinalla ñawparinankupaq”, nispa.

⁶ Ñuqanchikpaqqa ichapas achka mikunanchikpaq kan, ichaqa achka iñiqmasinchikkunam wakcha kanku. Wakinkuqa ichapas ima sasachakuypipas tarikunku. Paykunapaqmi mañakunanchik. Chaymantapas atichwanmi imatapas ruwaspa yanapayta. Ichapas kapuqninchikta qunakuykuchwan. Atichwantaqmi Diosmanta willakuy apakunanpaq qullqi quytapas. Yachanchikmi chay qusqanchikwan iñiqmasinchikkuna yanapay atisqanchikta (1 Juan 3:17).

7. ¿Imamantam Jesusqa yachachirqa mana llumpayta afanakunanchikpaq?

⁷ Diosta mañakunapaq yachachispanmi Jesusqa chaymanta qawachirqa kawsanapaq mana llumpayta afanakunamanta. Paymi nirqa: “Waytakunatapas Dios pachachichkaspanqa ¿manachum qamkunatapas pachachisunkichik? Chaynaqa amayá afanakuychikchu: [...] ‘¿Imawanraq pachakusun?’” nispaykichikqa. Nirqataqmi: “Amayá afanakuychikchu hamuq punchawmantaqa”, nispa (Mat. 6:30-34). Kayna nisqanmi yachachiwanchik tukuy imayuq kanapaq mana llumpayta afanakunapaq. Kusisqam tarikunanchik: maypi yachananchikpaq, llamkananchikpaq hinaspa unquruptinchik allinta tanteanapaq yanapawasqanchikwan.  Ichaqa, ¿ima ancha allin kaqtaraqmi mañakunanchik?

8. ¿Imatam yuyarichiwanchik ‘sapa punchaw mikunaykutayá kunan quwayku’ nisqanqa?

⁸ ‘Sapa punchaw mikunaykutayá kunan quwayku’ nisqanqa yuyarichiwanchikmi Jehova Dios hinalla yachachiwananchikpaq mañakunamanta hinaspa amistadnin kanapaq yanapawananchikmantapas. ¿Imanasqam chaynata ninchik? Jesusmi nirqa: “Runaqa kawsanqa manam mikuyllawanchu aswanqa Diospa llapa rimasqankunawanmi”, nispa (Mat. 4:4).

9. ¿Imanasqam ninchik huchallikuyqa debekuy hina kasqanta?

⁹ Diosta imayna mañakuymanta Jesus yachachispanmi, nirqa: “Huchaykutayá pampachawayku”, nispa (Mat. 6:12; Luc. 11:4). Kaymanta rimaspanmi 1952 watapi kay qillqanchik nirqa Diosta kuyaspa kasukunanchikpaq. Huchallikuspanchikqa debekuchkachwanpas hinam Dioswan kanchik. Kay qillqaqa nirqataqmi Jehova Dios munaspanqa mana amistadninchik kananmanta. Hinaspapas nirqam, huchallikuspa Dios kuyasqanchikta mana qawachisqanchikmanta (1 Juan 5:3).

10. (1) ¿Imanasqam Jehova Diosqa pampachawanchik? (2) ¿Imaynam tarikunchik Jehova Dios ñuqanchikrayku tukuy ima ruwasqanmanta yachaspanchik?

 ¹⁰ Jehova Dios sapa punchaw pampachawananchiktam necesitanchik. Payqa chay ruwaytam atin 2.000 wata ñawpaqtaraq Jesus wañukusqanrayku. Chay sumaq regalo quwasqanchikmantam Jehova Diosta agradecekunanchik. Jesus ñuqanchikrayku mana wañuptinqa, manam huchamantawan wañuymanta librakuytaqa atichwanchu (leey Salmo 49:7-9; 1 Pedro 1:18, 19). “Huchaykutayá pampachawayku” nisqa rimayñataqmi yuyarichiwanchik iñiqmasinchikkunapas Jesuspa wañukusqanwan yanapachikuyta necesitasqankumanta. Jehova Diosqa munanmi iñiqmasinchikkunapi piensananchikta hinaspa Dioswan amistadninkupi imayna kasqankupipas. Chaytam qawachinchik imapipas pantaptinku pampachaspanchik. Yaqa llapanpim pantasqankuqa mana llumpay hatunchu. Iñiqmasinchikkunata pampachaspanchikqa kuyasqanchiktam qawachinchik hinaspa Jehova Dios pampachawasqanchikta agradecekunchik (Col. 3:13).

11. ¿Imanasqam hukkunata pampachananchik?

¹¹ Pantaq runakunam kanchik, ichapas chayrayku wakinpiqa sasachakusun iñiqmasinchikkunata pampachanapaq (Lev. 19:18). Iñiqmasinchikpa imapas ruwawasqanchikmanta hukkunaman willakachakuptinchikqa, ichapas wakinkuqa chay iñiqmasinchikpa contranpi churakunmanku. Chayta ruwaspaqa manam huk sunqullañachu iñiqmasinchikkunawanqa kachwan. Hinaspapas chayta allichanapaq mana imatapas ruwaspaqa, manam agradecekuchkanchikchu ñuqanchikrayku Jesuspa wañusqantaqa (Mat. 18:35). Hukkunata mana pampachaptinchikqa manam Jehova Diosqa ñuqanchiktapas pampachawasunchu (leey Mateo 6:14, 15). Jehova Dios pampachawananchikta munaspaqa, kallpanchakunanchikmi mana hatun huchakunata ruwanapaq (1 Juan 3:4, 6).

12, 13. (1) ¿Imam Jesusta pasarqa bautizakusqan qipata? (2) ¿Imanasqam mana pitapas tumpananchikchu ima tentacionmanpas wichiykuspaqa? (3) ¿Imatam Jesus qawachirqa haykapipas Diosta kasukuspan?

¹² Diosta imayna mañakuymanta Jesus yachachispanmi, nirqa: “Amayá tentacionmanqa kachaykuwaykuchu”, nispa. Kaymi yuyarichiwanchik Jesuspa bautizakusqan qipata ima pasasqanmanta. Jehova Diosmi saqirqa Jesusta diablo tentananpaq (Mat. 4:1; 6:13, CQ12). ¿Imanasqam tentananpaq saqirqa? Adanwan Evam Dios kamachiqninku kananta mana munarqakuchu hinaspapas kay tapukuykunatam kutichinan karqa. ¿Imapas mana ruway atiqtachu Jehova Diosqa runakunata unancharqa? ¿Atinmanchu mana pantaq runa Diosman sunqu kayta tentasqa kaspan? ¿Allinchu kanmanku karqa runakuna kikillanku kamachikuptinku? (Gen. 3:4, 5.) Jehova Diosqa chay tapukuykunata kutichinanpaqmi Jesusta kay pachaman kachamurqa. Ichaqa  chay tapukuykunam astawan kutichisqa kanqa hamuq tiempopi. Hinaptinmi, llapallan hanaq pachapi kawsaqkuna hinaspa kay pachapi kawsaqkunapas yachanqaku Jehova Dioslla pimantapas aswan allin kamachiq kasqanta.

¹³ Jehova Diosqa chuyam, chaymi payqa mana pitapas tentanmanchu. Chaytaqa satanasmi ruwan (Mat. 4:3). Ichaqa ñuqanchikmi tanteananchik tentacionman wichiykunapaq utaq mana wichiykunapaqpas  (leey Santiago 1:13-15). Piensarisun Jesuspi: ¿Imatam payqa ruwarqa satanas tentaptin? Chayllam qipancharqa hinaspa nirqa Diospa palabranpa nisqanta. Jesusqa Jehova Diosman sunqu kananpaqmi tanteakurqa. Ichaqa satanasmi huk kutipipas kaqmanta tentarqa (Luc. 4:13). Chaywanpas, Jesusqa hinallam Diosta kasukurqa. Chayta ruwasqanwanmi qawachirqa mana pantaq runa ima sasachakuypiña tarikuspanpas Diosman sunqu kayta atisqanmanta. Ichaqa satanasmi kunanpas hinalla tentawachkanchik Diosta mana kasukunapaq.

14. ¿Imatam ruwananchik tentacionkunaman mana wichiykunapaq?

¹⁴ Jehova Dioslla kamachiq kasqanta Eden huertapi satanaspa iskayrayachisqanqa manam lliwraqchu allichasqa kachkan. Chaymi Diosqa hinallaraq saqin satanas tentawananchikta. Ichaqa yuyarinanchikmi Dios mana tentawasqanchikmanta. Payqa manam ñuqanchikmantaqa iskayrayanchu hinaspapas munanmi yanapawayninchikta. Ichaqa manam hikutawanchikchu payta kasukunapaqqa. Diosqa saqiwanchikmi payman sunqu kanapaq utaq mana kanapaqpas. ¿Imatam ruwananchik tentacionkunaman mana wichiykunapaq? Jehova Diospa allin amistadninmi kananchik hinaspapas sapa kutim mañakunanchik yanapawananchikpaq. ¿Imaynatam uyariwasqanchikta yachachwan?

15, 16. (1) ¿Mayqin tentacionkunatam atipananchik? (2) Tentacionman wichiykuptinchikqa, ¿pipa huchantaq kanman?

 ¹⁵ Jehova Diosqa chuya espirituntam servichikun satanaspa tentawasqanchikman mana wichiykunanpaq. Servichikuntaqmi bibliata hinaspa llaqtantapas tuqllankunamanta willawananchikpaq. Chay tuqllankunam kanman qullqinchikta, tiemponchikta hinaspa kallpanchikta yanqakunapi usuchiy. Qawasun Espen hinaspa Janne sutiyuq casarasqa iñiqmasinchikkunamanta. Paykunaqa Europa lawpim apu nacionpi yachanku. Achka watakunam paykunaqa precursorkuna karqaku mana ancha Diosmanta willakuqkunapa kasqanpi. Ichaqa kunanmi iskay churi-wawayuqña kasqankurayku manaña precursorkunañachu kanku. Espenmi nin: “Kunan mana anchata Diosmanta willakuq lluqsisqaykuraykum, Jehova Diosta sapa kuti mañakuniku tentacionkunaman mana wichiykunaykupaq. Mañakunikutaqmi Jehova Dioswan amistadniyku allin takyasqa kananpaq hinaspa paymanta hinalla kusikuywan willakunaykupaq”, nispa.

¹⁶ Atipananchiktaqmi millakuypaq qalalla kaqkunata qawaytapas. Wakinkum chayta qawanku mana allin pensamientokunata umankumanta mana qurqusqankurayku. Chay tentacionman wichiykuspaqa, manam satanastawan runankunataqa tumpachwanchu. ¿Imanasqa? Paykunaqa manam hikutawachwanchu mana allinkunata ruwanapaqqa. Ichaqa achka iñiqmasinchikkunam chay tentacionta atiparqaku. Chaynaqa ñuqanchikpas atichwanmi atipaytaqa (1 Cor. 10:12, 13).

17. (1) ¿Imatam ruwananchik satanasmanta Jehova Dios waqaychawananchikpaq? (2) ¿Imatam Jehova Dios ruwanqaña?

¹⁷ “Librawaykuyá diablomanta” nispa mañakusqanchikman hina kawsanapaqqa, manam ‘kay pachapi mana allin kaqkunawanqa’ chaqrukunanchikchu (Juan 15:19; 1 Juan 2:15-17). Ñam Jehova Diosqa satanastaqa wichqanqaña hinaspa mana allin kaqkunatapas chinkachinqaña. Ichaqa, yuyarinanchikmi satanas llumpay piñasqa kasqanta, payqa pisi tiempoyuqllañam kachkan. Tukuytam ruwanqa Jehova Dios serviyta saqinanchikpaq. Chaymi Diosta hinalla mañakunanchik satanasmanta waqaychawananchikpaq (Apoc. 12:12, 17).

18. Wiñaypaq kawsayta munaspaqa, ¿imatam ruwananchik?

¹⁸ Wiñaypaq kawsayta munaspaqa, Diosta mañakunapaq Jesuspa yachachisqanman hinam kawsananchik. ¿Imaynata? Mañakunanchikmi Diospa munaychakuynin hamunanpaq, sutin chuyanchasqa kananpaq hinaspa kay pachapi munaynin ruwakunanpaq. Manam iskayrayanchikchu sapa punchaw kawsananchikpaq tukuy ima quwananchikmanta hinaspa Diosman sunqu kanapaq yanapawananchikmantapas.