1. ¿Imaynatam wasin-wasin rispanchik Jesuspa mañakusqanta servichikunchik?

ACHKA runakunam yachanku Diosta imayna mañakunapaq Jesuspa yachachisqantaqa (Mat. 6:9-13). Jehova Diospa testigonkunaqa wasin-wasin rispanchikmi chaymanta sapa kuti runakunaman willakunchik. Arí, chay mañakuypi “munaychakusqayki hamuchun” nisqantam servichikunchik, Diospa kamachikuynin kay allpa pachata sumaq huertaman tikrananmanta yachachinapaq. Chay mañakuypi “sutiki yupaychasqa [utaq chuyanchasqa] kachun” nisqantañataqmi servichikunchik, Dios sutiyuq kasqanta yachachinapaq hinaspa chay sutita chuyanchanapaqpas (Mat. 6:9).

2. ¿Imaynatam yachanchik kuti-kutirispa hina kaqllata mañakuytaqa Jesus mana munasqanta?

² Achka runakunam Diosta mañakuspanku Jesuspa chay yachachisqan mañakuyllata kuti-kutirispa rimanku. Ichaqa, ¿chayta ruwanapaqchu Jesusqa yachachirqa? Manamá. Aswanmi nirqa: ‘Mañakuspaykiqa amam [...] nisqallaykitachu kuti-kutirispa rimanki’, nispa (Mat. 6:7). Huk kutipipas, Diosta mañakunankupaq qatiqninkunata  yachachispanmi Jesusqa huk rimaykunawan yachachirqa (Luc. 11:1-4). Kaymi qawachiwanchik imakunata mañakunapaq Jesus yachachiwasqanchikmanta.

3. ¿Ima tapukuykunatam ruwakuchwan kay yachachikuytawan qatiqninpi kaqta qawaspanchik?

³ Kay yachachikuypi hinaspa qatiqninpim yachasunchik Mateo 6:9-13 nisqanpi Jesuspa yachachisqan mañakuymanta. Chaypaq tapukusun: “¿Imaynatam chay mañakuy yanapawanman Dios mañakuyniy aswan allin kananpaq? ¿Chay mañakuypa nisqanman hinachu kawsachkani?”, nispa.

4. (1) ¿Imatam yuyarichiwanchik “hanaq pachapi Taytayku” nispan Jesuspa mañakusqanqa? (2) ¿Imanasqam kay pachapi kawsanankupaq suyakuyniyuqkunaqa ninmanku Jehova Dios taytanku kasqanta?

⁴ Jesusqa mañakuynintam qallarin “hanaq pachapi Taytayku” nispa. Kay nisqanqa yuyarichiwanchikmi enteron pachapi lliw iñiqmasinchikkunapa Jehova Dios taytan kasqanta (1 Ped. 2:17). Jehova Diosmi wakin iñiqmasinchikkunata akllarqa hanaq pachapi kawsanankupaq. Paykunataqa churinkuna kanankupaqñam akllarqa (Rom. 8:15-17). Ichaqa, ¿imatam nichwan kay pachapi kawsanankupaq suyakuyniyuq iñiqmasinchikkunamanta? ¿Ninmankuchu Jehova Dios taytanku kasqanta? Arí. ¿Imanasqa? Jehova Dios kawsayta hinaspa tukuy imata qusqanraykum. Hamuq tiempopim ichaqa, mana pantaqña kaspanku hinaspa waranqa wata pasayta Diosman sunqu kasqankuta qawachispanku, Diospa churinkunaña kanqaku (Rom. 8:21; Apoc. 20:7, 8).

5, 6. (1) ¿Tayta-mamakunapa ima ruwayninkutaq imamantapas aswan allinqa? (2) ¿Imapaqmi sapa churikuna kikinkumanta kallpanchakunanku? (Qaway 22 kaq paginapi dibujota).

⁵ Tayta-mamakunaqa churi-wawankutam yachachinanku Jehova Dios taytanku kasqanmanta hinaspa payta imayna mañakuytapas, chay ruwayqa ancha chaninniyuqmi. Sudáfrica nacionpi llaqtan-llaqtan iñiqmasinchikkunata watukuq ancianom kaynata willakun: “Nacesqankumantapacham warmi-churiykunawan sapa tuta Diosta mañakuq kaniku. Wasiypi mana kaptillaymi manaqa. Ima mañakusqayta paykuna mana yuyarispankupas, ninkum mañakuptiy hawka hinaspa kusisqa tarikusqankumanta. Paykuna kikinkumantaña mañakuyta qallaykuptinkum, ñuqaqa uyarinaypaq hina mañakunankupaq nirqani. Chaynapi Jehova Diosmanta ima piensasqankutawan kuyasqankumanta yachanaypaq. Chayqa yanapawarqam sunqunkupi ima kasqanta yachanaypaq. Hinaspam yanapaq kani Jesuspa yachachiwasqanchik mañakuyman hina paykunapas sunqumanta mañakunankupaq. Chaynapi Diosta mañakuyninku aswan allin kananpaq”, nispa.

⁶ Wiñasqankuman hinam, kay iñiqmasinchikpa churinkunaqa Jehova Diospa allin amistadnin karqaku. Kunanqa casarasqañam kachkanku hinaspam llapanku Diosta tukuy tiemponkuwan servinku. Arí, tayta-mamakunaqa churi-wawankutam Jehova Dioswan allin amistad kanankupaq yachachinanku, chay ruwaymi imamantapas aswan allinqa. Ichaqa, paykunam kikinkumanta kallpanchakunanku Jehova Diosta kuyanankupaq hinaspa respetanankupaqpas (Sal. 5:11, 12; 91:14).

7. (1) ¿Imanasqam ancha kusisqa tarikunchik? (2) ¿Imaynatam Diospa sutin riqsisqanchikta hinaspa paypa testigon kasqanchikta chaninchanchik?

⁷ Ancha kusisqamá tarikunchik Jehova Diospa sutinta riqsisqanchikmantawan paypa testigonkuna kasqanchikmanta (Hech. 15:14; Is. 43:10). Jesusqa yachachiwarqanchikmi Diosta kaynata mañakunapaq: “Sutiki chuyanchasqa kachun”, nispa. Chaynata nispaqa munachkanchikmi Diospa sutin chuyanchasqa kananpaq. ¿Imaynatam Diospa sutin riqsisqanchikta  hinaspa paypa testigon kasqanchikta chaninchanchik? Diospa sutinta mana yanqachanapaq yanapakuyninta mañakuspam. Amayá apostol Pablopa tiemponpi wakin iñiqmasinkuna hinaqa kasunchu, paykunaqa manam yachachisqankuman hinachu kawsarqaku. Chaymi apostol Pablo paykunata nirqa: “Qamkunaraykum Diosta kaminku payta mana adoraqkuna”, nispa (Rom. 2:21-24).

8, 9. Diospa sutinta chuyanchananpaq kallpanchakuq iñiqmasinchikta, ¿imaynatam Jehova Dios yanaparqa?

⁸ Jehova Diospa serviqninkunaqa anchatam kallpanchakunchik Diospa sutinta chuyanchanapaq. Qawasun Noruega nacionniyuq huk iñiqmasinchikmanta. Paypa qusan wañukuptinmi iskay watachayuq qari wawanta sapallan uywanan karqa. Paymi nin: “Chay watakunapiqa llumpay sasachakuypim tarikurqani. Sapa punchawmi, yaqa sapa hora Jehova Diosta mañakuq kani kallpanchawananpaq hinaspa mana llumpayta hukmanyanaypaq. Manam munarqanichu imapas mana allin tanteasqaymanta Jehova Diosta satanas kaminanta. Manataqmi munarqanichu Dios qipanchaytapas. Ñuqaqa munarqanim Diospa sutinta chuyanchayta hinaspa kay pacha sumaq huertaman tikrakuptin wawaypas chaypi taytanta rikuykunanta”, nispa (Prov. 27:11).

⁹ ¿Uyarirqachu Jehova Dios kay iñiqmasinchikpa mañakusqanta? Arí. Iñiqmasinkunawan sapa kuti hukllawakusqanraykum kallpanchasqa tarikurqa. Pichqa wata pasaytam payqa huk ancianowan casarakururqa. Kunanmi wawanqa 20 watayuqña hinaspa bautizasqaña kachkan. Hina kay iñiqmasinchikmi nin: “Qusaytam anchata agradecekuni wawayta uywaysiwasqanmanta”, nispa.

10. ¿Imaynatam Jehova Dios sutinta chuyanchanqa?

¹⁰ ¿Imaynatam Jehova Diosqa sutinta chuyanchanqa? Payta qipanchaq lliw runakunata chinkachispanmi (leey Ezequiel 38:22, 23). Hinaptinmi Diosman sunqu runakunaqa mana pantaqña kanqaku. Arí, hanaq pachapi hinaspa kay pachapi kawsaqkunaqa Jehova Diostam yupaychanqaku hinaspa chuya sutintapas hatunchanqaku. Chaynapim ‘Diosña tukuy imakunapipas munaychakunqa’ (1 Cor. 15:28).

11, 12. ¿Imatam Jehova Dios ruwarqa 1876 watapi?

¹¹ Manaraq hanaq pachaman Jesus kutichkaptinmi, qatiqninkuna tapurqaku: “Señorllayku ¿kunanpunichu libranki Israel nacionta ñawpaq hina kananpaq?”, nispa. Ichaqa, Jesusmi nirqa chayta yachanankupaqqa manaraq tiempo kasqanta, aswanmi kallpancharqa Diosmanta willakunankupaq (leey Hechos 1:6-8). Yachachirqataqmi Diospa munaychakuynin hamunanpaq mañakunankuta, nirqataqmi haykapi kamachikuynin qallarinanmanta qawan-qawanlla kanankupaq. Chaymi ñuqanchikpas Jehova Diospa munaychakuynin hamunanpaq hinalla mañakunanchik.

¹² Jehova Diosqa 1876 kaq watapim, serviqninkunata yanaparqa 1914 watapi Jesus hanaq pachapi kamachiyta qallarinanmanta entiendenankupaq. ¿Imaynatam chayta ruwarqa? Chay 1876 watapim iñiqmasinchik Russell qillqarqa “¿Haykapim tukunqa mana judio kaq runakunapa munaychakuynin?” niq yachachikuyta. Chaypim nirqa ‘qanchis watakunamanta’ Danielpa willakusqanqa, ‘mana judio runakunapa munaychakusqan tiempomanta’ Jesuspa willakusqanwan chaynalla kasqanta (Dan. 4:16; Luc. 21:24). Chay yachachikuypim nirqa chay tiempokunamanta willakusqankuqa 1914 watapi tukunanmanta. *

13. (1) ¿Imataq pasarqa 1914 kaq watapi? (2) ¿Imatam qawachin 1914 watamantapacha enteron pachapi tukuy pasakusqan?

¹³ Enteron pachapim 1914 kaq watapi hatun  guerra qallaykurqa. Chaymi achkallaña runakuna yarqaymanta wañurqaku. 1918 watapiñataqmi gripe española nisqa unquywan waranqantin runakuna wañurqaku. Tukuy chaykuna pasakusqanmi Jesuspa willakusqan ‘señalkuna’ kasqanta qawachirqa (Mat. 24:3-8, CQ12; Luc. 21:10, 11). Qawachirqataqmi 1914 watapi Jesus kamachiyta qallaykusqanta. Chay watapim Jesus ‘lluqsirqa vencestin aswanraq vencenanpaq’ (Apoc. 6:2). Arí, hanaq pachamantam satanastawan demoniokunata kay pachaman wischumurqa. Hinaptinmi kay willakuypa nisqan cumplikuyta qallaykurqa: ‘¡Ay, imaynaraq kanqa kay pachapi kaqkunaqa! Diabloqa piñasqallañam uraykaramun qamkunaman, payqariki yachachkanmi pisi tiempoyuqllaña kasqanta’ (Apoc. 12:7-12).

14. (1) ¿Imanasqam Diospa munaychakuynin hamunanpaq hinalla mañakunanchik? (2) ¿Imatam astawan ruwananchik?

¹⁴ Apocalipsis 12 capitulonpi willakuymi qawachiwanchik Jesus kamachiyta qallaykuptin llumpay mana allinkuna imanasqa kay allpa pachapi kasqanmanta. Jesus hanaq pachapi kamachiptinpas, kay allpa pachataqa satanasmi munaychakuchkan. Ichaqa ñam Jesusqa mana allinkunataqa chinkachinanqaña, chayta ruwaspanmi vencenqa. Chaymi Jehova Diospa munaychakuyninta hinalla mañakunanchik. Hinallataqmi chay munaychakuyninmanta lliw runakunaman willakunanchik. Chay willakusqanchikmi qawachin Jesuspa kayna nisqanta: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa” (Mat. 24:14).

15, 16. Diospa munaynin kay pachapi ruwakunanpaq mañakuspanchikpas, ¿imatam ruwananchik?

¹⁵ Yaqa 6.000 watakuna qipataqa Diospa munayninmi kay pachapi ruwakurqa. Chaymi Dios nirqa ‘lliw ruwasqankuna sumaqllaña kasqanta’ (Gen. 1:31). Ichaqa Diosta satanas qipancharusqanmantapacham, yaqa lliw runakuna Diospa munaynintaqa mana ruwankuchu.  Chaywanpas, kunanqa pusaq millon masnin Jehova Diospa serviqninkunam munayninta ruwanchik. Diospa munaynin kay pachapi ruwakunanpaq mañakuspanchikpas, chay munayninta ruwanapaqmi kallpanchakunchik. ¿Imaynata? Jehova Diospa munasqanman hina kawsaspa chaynataq runamasinchikkunaman Diosmanta willakuspa.

¹⁶ Qawasun huk misioneramanta. Payqa 1948 kaq watapim bautizakurqa, kunanqa 80 watanpiñam kachkan. Ñawpaqpiqa África lawpim Diosmanta willakurqa. Paymi nin: “Sapa kutim Diosta mañakuni manaraq puchukay punchaw chayamuptin llampu sunqu runakuna payta riqsinankupaq. Mañakunitaqmi yachayta quwananpaq, chaynapi pimanpas willakuptiy sunqunman chayanaypaq. Chaymantapas mañakunim biblia estudiaqkunata hinalla yanapanaykupaqpas”, nispa. Kay iñiqmasinchikqa achka runakunatam yanaparqa Jehova Diosta riqsinankupaq. Qampas riqsinkichá Diosta tukuy sunqunkuwan chayna serviq yuyaq iñiqmasinchikkunataqa (leey Filipenses 2:17).

17. ¿Ima niwaqtaq hamuq tiempopi Jehova Dios tukuy ruwananmanta?

¹⁷ Ñuqanchikqa Diospa enemigonkuna chinkachisqa kanankukamam hinalla mañakusun kay pachapi munaynin ruwakunanpaq. Hinaptinmi millonnintin runakuna sumaq allpapi kawsarimunqaku. Jesusmi nirqa: “Amayá admirakuychikchu, huk punchawmi Diospa Churinpa qayasqanta uyarispanku llapallan wañuqkuna kawsarimunqaku”, nispa (Juan 5:28, 29). ¡Ancha kusikunapaqchá kanqa kuyasqanchik ayllunchikkunapa kawsarimusqankuqa! Jehova Diosmi pichanqa wiqinchikta (Apoc. 21:4). Kawsarimuqkunamantaqa yaqa llapankum mana haykapipas uyarirqakuchu Jehova Diosmanta hinaspa Jesusmanta. Chaymi biblia paykunata sutichan ‘mana allin ruwaqkuna’ nispa. Kusikunapaqmá kanqa Diospa munayninmanta paykunaman willayqa, chaynapi wiñaypaq kawsanankupaq (Hech. 24:15; Juan 17:3).

18. ¿Imatam runakunaqa astawan munanchik?

¹⁸ Hanaq pachapiwan kay pachapim, kaqmanta hawkayay hinaspa kusikuy kanqa Diospa sutin chuyanchasqa kaptin, munaychakuynin hamuptin hinaspa kay pachapi munayninpas ruwakuptin. Lliw runakunam imapas pisipuqninta chaskinqa mañakuymanta Jesuspa yachachisqanpa qallariyninpi nisqankuna ruwakuptin. Qatiqnin yachachikuypim qawasunchik Diosta imayna mañakunapaq Jesuspa yachachisqanpa wakinninmanta.