ANDREA sutiyuq iñiqmasinchik bautizakuruptinmi, qusan anchata piñakururqa. * Manam munarqachu huñunakuykunaman rinanta nitaq Diospa sutinta rimanantapas. Jehova Diospa sutinta rimaptinqa piñakuqmi.

Chaymantapas, qusanqa manam munaqchu warmankunaman Jehova Diosmanta yachachinanta nitaq huñunakuykunaman pusanantapas. Chayqa sasamá karqa chay iñiqmasinchikpaqqa, qusanpa mana yachasqallantam warmankunaman Diosmanta yachachiq.

¿Yaqachu qampas chaynapi tarikurqanki? Ichapas aylluyki harkakun Jehova Diospa testigon kasqaykimanta, ima unquywanpas unayña ñakarichkanki, ichapas churi-wawayki utaq qusayki utaq warmiki wañukun, utaq mayqan aylluykipas Diospa llaqtanmanta qarqurachikun. Chayna sasachakuykunapi tarikuspaykiqa, ¿imatam ruwawaq hinalla Diosman sunqu kanaykipaq?

Apostol Pablom nirqa: “Hinallam ñakariykunata aguantanaykichik”, nispa (Heb. 10:36, NM). Chaynaqa, ¿imataq yanapawanchikman mana hukmanyanapaq?

Sasachakuykunawan ñakarispaykiqa, Jehova Diospa yanapakuyninta maskay. Chaypaqqa Diostam mañakuwaq. Chaytam ruwarqa Ana sutiyuq iñiqmasinchik qusan wañukuptin. Paykunaqa 30 watam casado karqaku. Anam nin: “Manam llamkasqanmanta kutimurqachu. 52 watallanpiraqmi karqa”, nispa.

Anaqa llakinta qunqananpaqmi llamkayman qukururqa, ichaqa manam chaywanpas hawkachu tarikurqa. Chaynaqa, ¿imatam ruwarqa? Paymi nin: “Jehova Diosmanmi imayna tarikusqayta waqaspa willakuq kani hinaspa kallpata quwananpaqpas mañakuq kani”, nispa. Kay iñiqmasinchikqa manam iskayrayanchu Jehova Dios yanapasqanmantaqa, mañakusqan qipallatam hawkayayta tarirqa. Yanaparqataqmi Jehova Dios musuq pachapi qusanta kawsarichinanmanta yachasqan (Filip. 4:6, 7).

Jehova Diosqa uyarinpunim serviqninkunapa mañakusqankuta (Sal. 65:2).  Ima necesitasqankutapas qunmi hinalla payta yupaychanankupaq. Arí, qamtapas Jehova Diosqa yanapasunkim sasachakuykuna kaptinpas.

Jehova Diosqa kallpanchawanchiktaqmi iñiqmasinchikkunawan. Qawasun ñawpaq Tesalonica llaqtapi iñiqmasinchikkunamanta. Paykunam llumpay qatikachasqa kasqankuwan ñakarirqaku, chaymi apostol Pablo nirqa: ‘Kunan ruwasqaykichikpi hinayá kallpanchanakuychik hinaspa yanapanakuychik’, nispa (1 Tes. 2:14; 5:11). ¿Imaynatam chayta ruwarqaku? Huñunakuspanku hinaspa kuyakuywan yanapanakuspankum. ¿Imatam ñuqanchikpas ruwachwan paykunata qatipakunapaq?

Diospa llaqtanpim allin amistadkunata armananchik hinaspa kallpanchanakunanchik. Chayqa ancha allinmi, astawanraq sasachakuypi tarikuptinchikqa (Rom. 14:19). Pablopas qatikachasqa hinaspa achka sasachakuyniyuqmi karqa, ichaqa Jehova Diosmi yanaparqa iñiqmasinkunawan. Chaymi Pablo nirqa paykuna anchata kallpanchasqankumanta (Col. 4:10, 11). Chayta ruwasqankuwanmi qawachirqaku Pablota kuyasqankuta. ¿Yuyankichu imatapas nispa utaq ruwaspa iñiqmasikikuna kallpanchasusqaykimanta?

Jehova Diosqa yanapawanchiktaqmi Diospa llaqtanpi ancianokunawan. Paykunaqa bibliatam servichikunku kallpanchawananchikpaq hinaspa consejawananchikpaq. Bibliam paykunamanta nin: ‘Sapakamam wayramanta harkachikuna hina kanqa. Paykunam kanqa chaki allpapi mayukuna hina. Paykunam kanqa mana yakuyuq allpapi qaqapa llantuynin hina’, nispa (Is. 32:2). ¡Ancha kusisqamá tarikunchik Diospa llaqtanpi ancianokuna kasqanmanta! Chaymi imapas sasachakuyninchik kaptinqa, paykunawan rimananchik. Paykunam yanapawasun Jehova Diosta hinalla servinapaq.

Chaywanpas, ancianokunaqa pantaqmi kanku (Hech. 14:15). Chaymi mana lliw sasachakuyninchik allichaytaqa atinqakuchu. Ichaqa atinmankum ñuqanchikpaq Diosta mañakuyta, chaymi yanapawasun allin tarikunanchikpaq (Sant. 5:14, 15). Italia nacionpim huk iñiqmasinchik achka wataña unqusqa tarikurqa. Ichaqa chaytaqa atiparqam. ¿Imanasqa? Paymi willakun iñiqmasinkuna sapa kuti watukusqanrayku hinaspa kuyakuyninkuta qawachisqankurayku atipasqanmanta. Chaymi ima sasachakuyninchik kaptinpas Jehova Diosqa kallpanchawanchik ancianokunapa yanapakuyninta maskanapaq.

Sasachakuyninchik kaptinpas hinalla Jehova Diosta serviptinchikqa, payqa yanapawasunmi. Chaymi pasarqa John sutiyuq iñiqmasinchikta. 39 watanpi kachkaptinmi cancer unquyniyuq kasqanta tarirurqaku, ichaqa manam creerqachu chayna watallanpiraq kachkaptin chaywan unqusqanmanta. Payqa anchatam llakikurqa señoranmanta hinaspa kimsa watachayuq warmachanmanta. Paymi nin: “Señorayqa manam warmallaykumantachu nanachikunan karqa, aswanqa ñuqamantawanmi doctorman rinaypaq”, nispa. Chay unquyninmanta hampichikusqanraykum pisipasqa hinaspa sunqu muyuywan karqa. Chaymantapas taytanmi llumpayta unquchkarqa hinaspa wañuy patanpiña kachkarqa, chaymi cuidananku karqa.

¿Imataq Johnta hinaspa aylluntapas yanaparqa? Payqa pisipasqa tarikuspanpas, kallpanchakurqam llapanku Jehova Diosta hinalla servinankupaq. Ninmi: “Wakinpiqa sasam karqa, ichaqa lliw huñunakuykunamanmi riq kaniku hinaspa Diosmantapas willakuq kaniku chaynataq aylluykuwanpas Diosta yupaychaq kaniku”, nispa. Kay iñiqmasinchikmi yacharurqa Diospa amistadnin kayqa ancha allin kasqanmanta. Qallariypi mancharisqa tarikuspanpas Jehova Diospa yanapakuynintam qawarqa, chaymi hawkayachirqa hinaspa kallpancharqa. Johnmi nin payta hina ñuqanchiktapas Jehova Dios kallpanchawananchikmanta. Jehova Diosqa qamtapas yanapasunkimanmi sasachakuynikikunata atipanaykipaq.

Sasachakuykunapi tarikuspaqa apostol Pablopa nisqanta yuyariy. Paymi nirqa: “Hinallam ñakariykunata aguantanaykichik”, nispa. Chaypaqqa, Jehova Diosta mañakuy, iñiqmasikikunamanta ama karunchakuychu, ancianokunapa yanapakuyninta maskay hinaspa Jehova Dios serviyta ama saqiychu. Paymi yanapasunki ima sasachakuypi tarikuptikipas, kunan hinaspa hamuq tiempopipas.