1, 2. ¿Imapaqtaq hebreo rimaypi Diospa palabranqa chakipa samananta utaq sarupakunanta nisqa rimaykunata servichikun?

JEHOVA DIOSMI nirqa hanaq pachaqa kamachispa tiyanan kasqanta, kay pachañataq chakinta samachinanpaq kasqanta (Is. 66:1). Chaymantapas nirqam: ‘Sarunaytam ancha riqsisqata ruwasaq’, nispa (Is. 60:13). ¿Imaynatam Jehova Diosqa ancha riqsisqata ruwan utaq sumaqyachin sarunantaqa? ¿Imaynatam kayqa yanapawanchik kay pachapi kawsaqkunata?

² Hebreo rimaypi Diospa palabranpi chakipa samananmanta utaq sarupakunanmanta rimaspanqa, rimachkanmi ñawpaq Israel nacionpi templomanta (1 Cron. 28:2; Sal. 132:7, NM). Chay temploqa sumaqmi Jehova Diospaqqa karqa, ¿imanasqa? Chaypim kay pachapi serviqninkuna Diosta yupaychaqku hinaspa hatunchaqku.

3. (1) ¿Imataq yanapawanchik Diosta yupaychanapaq? (2) ¿Haykapimantam qallaykurqa Diosman asuykunapaq tukuy ima ruwasqanqa?

 ³ ¿Imataq yanapawanchik Diosta kunan tiempopi yupaychanapaq? Manam runakunapa ruwasqan hatun wasichu utaq templochu. Chaypaqqa yanapawanchik templowan tupanachisqa kaqmi, kaymi imamantapas astawan Jehova Diosta hatunchan. ¿Imataq chay tupanachisqa temploqa? Diosman asuykunanchikpaq tukuy ima ruwasqanmi. Chayqa rikurirqa ñuqanchikrayku Jesuspa wañusqanwanmi. ¿Haykapimantam tukuy chaykunaqa qallaykurqa? 29 kaq watapim, Jesus bautizakuptin hinaspa sacerdotekunapa jefen kananpaq churasqa kaptin (Heb. 9:11, 12).

4, 5. (1) Salmo 99 nisqanman hina, ¿imatam ruwananchik Diospa serviqninkunaqa? (2) ¿Imatam sapakama tapukunanchik?

⁴ Ancha kusisqam tarikunchik Diosman asuykunanchikpaq tukuy ima ruwasqanmanta. Hinaspapas agradecekusqanchiktam qawachinchik Diospa sutinmanta hinaspa Jesusta ñuqanchikrayku wañunanpaq kachamusqanta runamasinchikkunaman willaspanchik. ¡Kusikunapaqmá kunanqa pusaq millon masnin Diospa testigonkunaqa enteron pachapi payta yupaychachkanchik! Achka runakunam ninku wañukuspankuqa hanaq pachaman rispanku Diosta yupaychanankumanta. Ichaqa ñuqanchikmi yachanchik kunanpuni Jehova Diosta yupaychananchikmanta.

⁵ Jehova Diosta yupaychaspanchikqa ñawpaq tiempopi Diosman sunqu serviqninkunatam qatipakuchkanchik (leey Salmo 99:1-3, 5-7). Paykunam karqaku Moises, Aaron hinaspa Samuel sutiyuq runakuna. Paykunaqa tukuy sunqunkuwanmi Jehova Diosta yupaycharqaku. Kunan tiempopi Jehova Diospa serviqninkunamanta wakinmi kanku hanaq pachapi Jesuswan kamachinankupaq suyakuyniyuqkuna. Paykunam chay tupanachisqa templota utaq chiqap religionta kay pachapi yanapachkanku. Wakinkunañataqmi kanku kay pachapi kawsanankupaq suyakuyniyuq millonnintin runakuna utaq ‘sapaq ovejakuna’, paykunam anchata yanapachkanku hanaq pachapaq kaq iñiqmasinchikkunata (Juan 10:16). Ichaqa sapakamam tapukunanchik: “¿Tukuy sunquywanchu yanapachkani Jehova Diosta yupaychaq chiqap religionta?”, nispa.

6, 7. (1) ¿Imataq pasakurqa Diospa llaqtan rikurisqanmanta manaraq pachak watakuna pasachkaptin? (2) ¿Imataq pasakurqa 1919 watapi?

⁶ Apostol Pablom willakurqa chiqap religionta qipanchaspanku wakinku pantay kaqkunata yachachinankumanta (Hech. 20:28-30; 2 Tes. 2:3, 4). Chay ruwaytam qallaykurqaku Diospa llaqtan rikurisqanmanta manaraq pachak watakuna pasachkaptin. Chayraykum, pikuna Diospa chiqap serviqninkuna kasqankuta riqsiyqa  sasa karqa. Ichaqa achka watakuna qipatam, Jehova Diosqa Jesusnintakama sutillata qawachirqa pikuna chay tupanachisqa templopi yanapakusqankuta.

⁷ Arí, 1919 kaq watapaqqa, sutillam karqa pikuna chay tupanachisqa templopi yanapakusqankuqa. Paykunaqa Diospa munasqanman hinañam kawsayta qallaykurqaku (Is. 4:2, 3; Mal. 3:1-4). Chaywanmi apostol Pablopa revelacionnin cumplikuyta qallaykurqa. ¿Imatataq chaypi qawarqa?

8, 9. ¿Imataq Pablopa qawasqan ‘paraisoqa’?

⁸ Diospa atiyninwanmi Pabloqa hamuq tiempopi ima pasakunanta qawarqa (leey 2 Corintios 12:1-4). Chaypim qawarqa huk ‘paraisota’. ¿Imataq chay paraisoqa? Yaqapaschá kaykuna: 1) Hamuq tiempopi kay pachapi sumaq huerta (Luc. 23:43). 2) Musuq pachapi Diospa serviqninkunapa hawkalla hinaspa huñulla kayninku. 3) Hanaq pachapi Jehova Dioswan kawsakuy (Apoc. 2:7).

⁹ ¿Imanasqam Pablo nirqa mana rimanan kaqkunata uyarisqanmanta? Manam tiemporaqchu karqa tukuy ima qawasqanta willakunanpaq. Kunanmi ichaqa, Jehova Diospa serviqninkunaqa willayta atichwan runakunaman Diospa llaqtanpi tukuy ima chaskisqanchikmanta.

10. ¿Imanasqa Diospa llaqtanqa paraisopi hina kachkan, hinaspa imataq chay tupanachisqa temploqa?

¹⁰ Qillqanchikkunam sapa kuti riman Diospa llaqtanqa paraiso hina kasqanta. ¿Imanasqa? Jehova Diospa llaqtanpi hawka hinaspa huk sunqulla kasqanchikraykum. Kaymi sutillata qawachin tupanachisqa templopi serviqninkunalla Jehova Diosta yupaychasqankuta. ¿Imataq chay tupanachisqa temploqa? Chayqa tupanmi Jehova Diosta yupaychasqanchikwan, chay ruwaytaqa atinchik Jesus wañukusqanraykum (Mal. 3:18).

11. ¿Ima ruwaytam atinchik pantaq runakuna kaspanchikpas?

¹¹ Pantaq runakuna kaptinchikpas, Jehova Diosmi saqiwarqanchik 1919 watamantapacha llaqtan hawkalla hinaspa huk sunqulla kananpaq yanapakunanchikta. ¿Chaytachu qampas ruwachkanki? ¿Chaninchankichu Jehova Diosta hatunchanaykipaq yanapakuspayki?

12. ¿Imaynatam yachanchik Isaias 60:17 nisqan cumplikusqanta? (Qaway 3 kaq paginapi dibujota).

¹² Watakuna pasasqanman hinam, Diospa llaqtanpi achka cambiokuna karqa. Chaytam Diosmanta willakuq Isaiaspas willakurqa (leey Isaias 60:17). Diospa llaqtanpi mozo-sipaskunaqa hinaspa musuq iñiqmasinchikkunaqa yaqapaschá chay cambiokunamantaqa pipas willaptillan utaq qillqanchikkunapi  leespallanku yachanku. Ichaqa Diosta unay wataña serviq iñiqmasinchikkunam chay cambiokunata qawarqaku. Paykunaqa manam iskayrayankuchu kamachiqninchik Jesucristo Diospa llaqtanmanta nanachikusqantaqa. Chay iñiqmasinchikkunapa willawasqanchikta uyariptinchikqa, Jehova Diospi iñiyninchikmi astawan yapakunqa.

13. Salmo 48:12-14 nisqanman hinaqa, ¿imatam ruwananchik?

¹³ Llapanchikmi Jehova Diospa llaqtanmanta willakunanchik. Ancha admirakuypaqmi mana allin runakunapa chawpinpi iñiqmasinchikkunawan hawkalla hinaspa huk sunqulla kasqanchikqa. Chaymi Diospa llaqtanpi chayna kawsasqanchikmanta ‘qipa wiñaykunaman’ utaq musuq iñiqmasinchikkunaman willakunanchik (leey Salmo 48:12-14).

14, 15. (1) ¿Ima cambiokunam karqa 1970 watapi? (2) ¿Imanasqam chay cambiokunaqa ancha allin karqa?

¹⁴ Jehova Diosta unay wataña serviqkunaqa qawarqakum, kay pachapi Diospa llaqtan cambiokunawan sumaqyachisqa kasqanta. Achka watakuna qipatam iñiqmasinchikkunamanta huklla nanachikuq, sapa betel wasimantapas huklla nanachikuq hinaspa enteron pachapi iñiqmasinchikkunamantapas huklla nanachikuq. Chay iñiqmasinchikkunapa yanapaqninkuna kaptinpas, hukllam tanteaq iñiqmasinchikkunapaq, betel wasipaq hinaspa enteron  pachapi iñiqmasinchikkunapaqpas. Ichaqa 1970 kaq watamantam mana chaynañachu karqa. Kunanqa iñiqmasinchikkunapa rantinpim achka ancianokuna tanteanku, sapa betel wasipipas kanmi achka nanachikuqkuna hinaspa enteron pachapi iñiqmasinchikkunatapas Diospa llaqtanpi punta apaqkunam nanachikunku.

¹⁵ Kay cambiokunaqa ancha allinmi karqa Diospa llaqtanpaqqa. ¿Imanasqa? Bibliapa nisqanman hina ruwakusqanraykum. Chayqa Diospa llaqtantam yanaparqa, huk runalla tanteananmantaqa achkaña tanteanankupaq. Sapakama ancianokunapa imayna kasqankum lliw iñiqmasinchikkunata yanapan (Prov. 24:6; Efes. 4:8).

16, 17. Diospa llaqtanpi lliw cambiokunamanta, ¿mayqantaq qampaq aswan sumaq karqa hinaspa imanasqa?

¹⁶ Rimarisun kay pasaq watakunapi wakin cambiokunamanta. Pasaq watakunapim qillqanchikkunaqa aswan sumaq rikchayniyuq hinaspa yachachikuyniyuq lluqsimurqa. Chaymantapas internetpi jw.org nisqatam servichikunchik Diosmanta willakunapaq. Chaymi achka runakunata yanapachkan Jehova Diosta riqsinankupaq. Tukuy kay cambiokunam qawachin runakunata Jehova Dios kuyasqanta hinaspa nanachikusqantapas.

¹⁷ Chaymantapas kusisqam tarikunchik huñunakunapaq cambiokuna kasqanwan, chaynapim tiempochakunchik  sapallanchik utaq ayllunchikwan bibliata estudianapaq. Agradecekunchiktaqmi asambleanchikkunapi cambiokuna kasqanmanta. Sapa watam aswan sumaq asambleanchikkunaqa. Kusikunchiktaqmi Diosta sumaqta yupaychanapaq achka escuelakuna kasqanmanta. Tukuy kaykuna ruwakusqanmi qawachin Jehova Dios llaqtanta yanapasqanta hinaspa sapa kuti astawan sumaqyachisqantapas.

18, 19. ¿Imaynatam yanapakuchwan Diospa llaqtanta sumaqyachinapaq?

¹⁸ Jehova Diosqa saqiwanchikmi llaqtanta sumaqyachinapaq. ¿Imaynatam chaypaq yanapakuchwan? Kusikuywan Diosmanta willakuspa hinaspa yachachispam. Pitapas bautizakunanpaq yanapaspanchikqa, yanapakuchkanchikmi Diospa llaqtan hatunyananpaq (Is. 26:15; 54:2).

¹⁹ Diospa llaqtanta sumaqyachinapaqqa, yanapakuchwantaqmi sumaq kayniyuqkuna kanapaq kallpanchakuspa. Chaynapim achka runakuna Diospa llaqtanman hamunqaku. ¿Imataq runakunata yanapan Diospa llaqtanman hamunankupaq hinaspa Jehova Diosmantawan Jesusmanta yachanankupaq? Yaqa llapanpiqa manam bibliamanta yachasqanchikchu, aswanqa imayna kawsasqanchikmi.

20. Proverbios 14:35 nisqanman hinaqa, ¿imatam ruwananchik?

²⁰ Jehova Dioswan Jesusqa ancha kusisqachá tarikunku serviqninkuna hawkalla hinaspa kusisqa tarikusqankuwan. Ñuqanchikpas kusisqam tarikunchik chaypaq yanapakuspanchik. Ichaqa aswan kusisqaraqmi tarikusunchik kay allpa pachata sumaq huertaman tikraspanchik. Bibliam niwanchik: “Reymi favorecen yuyaywan serviqnin runataqa”, nispa (Prov. 14:35). Chaynaqa, Diospa llaqtanta yuyaywan sumaqyachinapaqyá kallpanchakusun.