1, 2. (1) ¿Imanasqam mana iskayrayankichu Jehova Dios kuyasusqaykimanta? (2) ¿Imatam runakunaqa munanchik?

¿ISKAYRAYANKICHU Jehova Dios kuyasusqaykimanta? Rimarisun Taylene sutiyuq iñiqmasinchikmanta. Payqa mana pantaq kananpaqmi llumpayta hikutakurqa, chayraykum llakisqa tarikuq. Achka watakunam, iñiqmasinchikkuna payta kallpancharqa mana chayna kananpaq. Paymi nin: “Jehova Dios mana kuyawaptinqa manachá pipas kallpanchawanmanchu karqa”, nispa. Rimarisuntaq Brigitte sutiyuq iñiqmasinchikmanta. Paypa qusan wañukuptinmi iskay warmankunata sapallan uywanan karqa. Paymi nin: “Satanaspa munaychakusqan pachapi warmakunata uywayqa llumpay sasam, astawanraqmi sapallanchik kaptinchikqa. Ichaqa sasachakuykuna kaptinpas hinaspa llakisqa tarikuptiypas Jehova Diosqa manam haykapipas saqiwarqachu mana aguantay atinaykamaqa. Chaymi mana  iskayrayanichu pay kuyawasqanmantaqa”, nispa (1 Cor. 10:13). Rimarisuntaq Sandra sutiyuq iñiqmasinchikmanta. Payqa mana hampiy atina unquywanmi ñakarirqa. Huk kaqnin asambleapim, mana riqsisqan iñiqmasinchik asuykuspan parlapayarqa. Sandrapa qusanmi willakun chay iñiqmasinchikpa ruwasqanqa iskayninkuta anchata kallpanchasqanmanta. Nintaqmi, iñiqmasinchikkunapa chayna ruwasqankuwan Jehova Diosqa kuyakuyninta qawachisqanta.

² Runakunaqa munanchikmi kuyasqan kayta hinaspa kuyaytapas, chaynatam Jehova Dios unanchawarqanchik. Ichaqa unquruptinchik, qullqimanta sasachakuy kaptin utaq Diosmanta willakuptinchik mana pipas uyariwaptinchikqa hukmanyaruchwanmi. Wakinpiqa Dios mana kuyawasqanchiktapas piensachwanmi. Chayna kaptinqa, yuyarinanchikmi pay ñuqanchikmanta nanachikusqanta hinaspa yanapay munawasqanchiktapas. Diosman sunqu kaptinchikqa, manam haykapipas payqa saqiwasunchu (Is. 41:13; 49:15).

3. ¿Imataq yanapawasun Jehova Dios kuyawasqanchikmanta mana iskayrayanapaq?

³ Rimamusqanchik iñiqmasinchikkunaqa manam iskayrayankuchu sasachakuypiña tarikuptinkupas Jehova Dios yanapasqanmantaqa. Ñuqanchikpas manam iskayrayananchikchu Jehova Dios yanapawananchikmantaqa (Sal. 118:6, 7). Ñuqanchikrayku allin kaqkunata ruwasqanpi yuyaymanaspaqa, manam iskayrayasunchu Jehova Dios kuyawasqanchikmantaqa (leey Salmo 77:11, 12). Kay yachachikuypim qawasunchik Diospa unanchasqanmanta, palabranmanta, payta mañakuymanta hinaspa ñuqanchikrayku churinpa wañukusqanmanta. Qawasunchiktaqmi chaykuna quwasqanchikmanta imayna agradecekunanchikmantapas (qaway “¿Ima ninantaq?”, niq yachachikuyta).

4. Jehova Diospa unanchasqankunapi yuyaymanaspaqa, ¿imatam musyakunchik?

⁴ Jehova Diospa unanchasqankunapi yuyaymanaspam, musyakunchik anchata kuyawasqanchikmanta (Rom. 1:20). Paymi kay pachata tukuy imayuqta quwarqanchik kusisqa kawsananchikpaq. Unancharqataqmi miskita mikunanchikpaq tukuy rikchaq mikunapaq kaqkunatapas (Ecl. 9:7). Diospa unanchasqankuna sumaq kasqanmantam, Canadá nacionniyuq Catherine iñiqmasinchik nin: “Admirakuypaqmi waytakunaqa tiempollanpi ikllirimunku. Alton pawaq animalkunapas huk lawman astakusqankumantam kutimunku. Qintichapas wasiymanmi chayamun mikunanpaq. ¡Jehova Diosqa kuyawasqanchikraykum tukuy allin kaqkunata quwanchik!”, nispa. Taytanchik Jehova Diosqa kusisqam tarikun unanchasqankunata qawaspan hinaspapas munanmi kusisqa kawsananchikta (Hech. 14:16, 17).

5. ¿Imaynatawanmi Jehova Diosqa qawachiwanchik kuyawasqanchikta?

⁵ Jehova Diosqa imayna unanchasqa kasqanchikpitaqmi qawachiwanchik kuyawasqanchikta. Paymi unanchawarqanchik  llamkaspa kusisqa tarikunanchikpaq (Ecl. 2:24). Kay allpa pachatapas quwarqanchik churi-wawayuq kaspa huntanapaq, tarpunapaq hinaspa lliw animalkunatapas waqaychanapaqmi (Gen. 1:26-28). Chaymantapas, sumaq kayninkunata qatipakuy atiqtam unanchawarqanchik (Efes. 5:1).

6. ¿Imanasqam Diospa palabran kapuwasqanchikmanta agradecekunanchik?

⁶ Jehova Diosqa kuyawasqanchikraykum palabranta quwarqanchik. Chaymi payta riqsiyta atinchik hinaspa runakunata kuyasqantapas yachanchik, chayraykum agradecekunanchik. Palabranpim Jehova Dios niwanchik Israel runakuna achka kutita pantaptinku imayna tarikusqanmanta. Salmo 78:38 nin: ‘Diosqa kuyapayarqam paykunata. Payqa pampachaykurqam mana allin ruwasqankuta. Manam chinkarachirqachu paykunataqa. Achka kutitam asurichirqa piñakuynintaqa’, nispa. Kaypi yuyaymanaspanchikqa musyakusunmi pantaqña kachkaptinchikpas Jehova Dios kuyawasqanchikta hinaspa ñuqanchikmanta nanachikusqantapas (leey 1 Pedro 5:6, 7).

7. ¿Imanasqam Diospa palabranta chaninchananchik?

 ⁷ Diospa palabrantaqa anchatam chaninchananchik, ¿imanasqa? Jehova Diosmi chaynintakama ñuqanchikta rimapayawanchik. Tayta-mamakuna churi-wawankuwan sapa kuti parlaptinkuqa, astawanmi kuyanakunku hinaspapas manam iskayrayankuchu imamantapas. Jehova Diosta mana rikuptinchikpas hinaspa mana uyariptinchikpas, payqa kuyakuq tayta hinam palabrantakama rimapayawanchik. Chaymi palabranta leespanchikqa kallpanchakunanchik allinta entiendenapaq (Is. 30:20, 21). Chaynapim qawasunchik Jehova Diosqa yanapay hinaspa waqaychay munawasqanchikta. Chaynapitaqmi allinta riqsisun hinaspa astawan paypi hapipakusun (leey Salmo 19:7-11; Proverbios 1:33).

8, 9. (1) ¿Imatam Jehova Diosqa astawan qawan? (2) Willarimuy Jehova Dios pantasqallanchikta mana qawasqanmanta.

⁸ Jehova Diosqa manam pantasqallanchiktachu qawan, aswanqa allin kaqkuna ruwasqanchiktam (2 Cron. 16:9). Chaytam ruwarqa Juda nacionta kamachiq Josafat sutiyuq runawan. Payqa mana allinta tantearuspanmi Israel nacionta kamachiq Acabwan hukllawakuruspan sirio tropakunawan peleananpaq rirqa. 400 willakuq tukuqkunam Acabta nirqaku peleaspa atipananmanta. Ichaqa Diosmanta willakuq Micaiasmi Acabtawan Josafatta nirqa peleaspankuqa vencerachikunankumanta. Chaypunimá pasakurqa, Acabtam wañurachirqaku hinaspa Josafattapas yaqalla wañurachirqaku. Hinaptinmi, Jehova Diosqa willakuq Jehuta kamachirqa mana allin tanteasqanmanta Josafatta anyananpaq hinaspa kaynata ninanpaq: ‘Ichaqa qanmi ruwarqanki allinkunata’, nispa (2 Cron. 18:4, 5, 14-22, 33, 34; 19:1-3).

⁹ ¿Ima allin kaqkunatam Josafatqa ruwarqa? Kamachiyta qallarispanmi jefekunata, Leviy castakunata hinaspa sacerdotekunata nirqa Juda nacionpi llapallan runakunaman rispa Diospa kamachikuyninkunata yachachimunankupaq. Chay ruwasqanqa allinpim tukurqa, huk nacionpi runakunapas Jehova Diosmantam yacharqaku (2 Cron. 17:3-10). Tiempopa risqanman hina mana allinta Josafat tanteaptinpas, Jehova Diosqa manam qunqarqachu allin kaqkuna ruwasqantaqa. ¿Imatam kaymanta yachachwan? Pantaruspanchikpas Jehova Diosta servinanchikpaq hinalla kallpanchakuptinchikqa, payqa hinallam kuyawasun hinaspapas manam qunqanqachu allin kaqkuna ruwasqanchiktaqa.

10, 11. (1) ¿Imanasqam Diosta mañakuyqa ancha chaninniyuq? (2) ¿Imaynatam Jehova Diosqa kallpanchawasun imayna tarikusqanchikmanta willakuptinchik? (Qaway 3 kaq paginapi dibujota).

¹⁰ ¿Imatam allin taytaqa ruwan churin paywan rimayta munaptin? Warmanta kuyasqanraykum tiempochakun uyarinanpaq hinaspa imayna tarikusqanta yachananpaq. Chaynam taytanchik Jehova Diospas, uyariwanchikmi paywan parlayta munaptinchikqa. Arí, paywan rimayqa ancha kusikunapaqmi.

 ¹¹ Diosta mañakuyqa ancha chaninniyuqmi, ¿imanasqa? Payqa haykapipas uyariwanchikmi amistadninchik kasqanrayku. Kay yachachikuypa qallariyninpim rimamurqanchik Taylene sutiyuq iñiqmasinchikmanta. Paymi nin: “Jehova Dioswanqa imamantapas rimawaqmi”, nispa. Jehova Diosllam uyariwanchik hinaspa entiendewanchik. Imayna tarikusqanchikta payman willakuptinchikqa, yaqapaschá bibliantakama, qillqanchiktakama utaq huk kaqnin iñiqmasinchiktakama kallpanchawasun. Arí, mañakusqanchikta uyarisqanmi qawachin anchata kuyawasqanchikta.

12. (1) ¿Imanasqam ancha allin Diosta mañakusqankumanta bibliapi estudiayqa? (2) ¿Pikunapa mañakusqankutam bibliapi tarinchik?

¹² Bibliapim tarinchik achka runakuna Diosta mañakusqankumanta, chaykunam anchata yachachiwanchikman. Chaymi wakinpi allin kanman chay mañakusqankumanta ayllunchikwan estudiayninchik. Huk kaqninmi kanman hatun challwapa ukunpi Jonaspa mañakusqan (Jon. 1:17–2:10). Estudiachwantaqmi Diospa templota Salomon qispirachispan mañakusqanta (1 Rey. 8:22-53). Chaymantapas, estudiachwanmi Diosta mañakunapaq Jesuspa yachachisqantapas (Mat. 6:9-13). Kay mañakuykunapi yuyaymanaspaqa, aswan allintam mañakuyta yachasun. Manataqmi qunqananchikchu sapa kuti mañakuytapas. Hinaptinqa Diosninchikmi sunqunchiktawan yuyayninchikta waqaychanqa “runakunapa mana entiendey atinan hawkayaywan”. Sapa kuti mañakuspanchikqa, astawanmi qawachisunchik Jehova Diospa kuyakuyninmanta agradecesqa kasqanchiktapas (Filip. 4:6, 7).

13. ¿Imapaqmi yanapawanchik Jesuspa wañukusqanqa?

¹³ Jehova Diosqa churinta ñuqanchikrayku wañukunanpaq kachamuspanmi kuyawasqanchikta qawachiwarqanchik. Paymi ‘wiñay kawsayniyuq kananchikpaq’ chayta ruwarqa (1 Juan 4:9). Apostol Pablom nirqa: ‘Salvakuyta mana atichkaptinchikmi [...] huchasapakunapaq Cristo wañupuwarqanchik. Sasatachá tarichwan pitapas runamasinpa rantinpi wañuqtaqa chay runamasin mana huchayuqña kachkaptinpas. Allin sunqu runapaqqa yaqachusmi huk kaqnin kallpanchakunman paypa rantinpi wañukunanpaq. Ichaqa Diosmi kuyawasqanchikta qawachiwarqanchik huchasaparaq kachkaptinchikpas Cristo wañupuwasqanchikwan’, nispa (Rom. 5:6-8). Ñuqanchikrayku Jesuspa wañukusqanwanmi Diospa ancha kuyakuyninta qawanchik hinaspa amistadnin kaytapas atinchik.

14, 15. (1) ¿Imaynatam hanaq pachapaq iñiqmasinchikkunata yanapan Jesuspa wañukusqanqa? (2) ¿Imaynatam kay pachapi kawsanankupaq suyakuyniyuqkunatapas yanapan?

¹⁴ Jesuspa wañukusqanwanmi Jehova Diosqa hanaq pachapaq iñiqmasinchikkunata kuyasqanta astawan qawachirqa (Juan 1:12, 13; 3:5-7). Paykunatam Diosqa chuya espiritunwan akllarqa, chayraykum kunanqa churinkunaña kanku (Rom. 8:15, 16). Pablom nirqa paykuna Jesucristowan kuska hanaq pachapi  tiyasqankumanta (Efes. 2:6). Ichaqa, ¿imanasqam chaynata nirqa manaraq llapanku hanaq pachapi kachkaptinkuqa? Hanaq pachapi wiñaypaq kawsanankupaq suyakuyta llapankuman Jehova Dios qusqanraykum (Efes. 1:13, 14; Col. 1:5).

¹⁵ ¿Imaynatam Jesuspa wañukusqanqa yanapan hanaq pachaman mana riqkunataqa? Jesuspa wañukusqanpi iñispankuqa, atinqakum Diospa amistadnin kayta. Hamuq tiempopipas atinqakum Diospa churinkuna hinaña kayta hinaspa kay pachapi wiñaypaq kawsakuytapas. Qawasqanchikman hinam, Jesuspa wañukusqanqa qawachin Jehova Dios lliw runakunata kuyawasqanchikta (Juan 3:16). Diosman sunqu kaptinchikqa sumaq huertapi sumaq kawsakuytam quwasunchik, chayta yachasqanchikmi anchata kusichiwanchik. ¡Manamá pipas Jehova Dios hinaqa kuyawanchikmanchu! Chaymi hinalla tukuy sunqunchikwan qawachinanchik agradecesqa kasqanchikta.

16. ¿Imapim yanapawanchik Jehova Dios kuyawasqanchikpi yuyaymanayqa?

¹⁶ Jehova Diosqa tukuy imapim kuyawasqanchikta qawachiwanchik. Rey Davidmi nirqa: ‘Diosnilláy, ¡mayna suma-sumaqmi qampa piensasqaykikunaqa! ¡Mayna achka-achkam tukuy chaykunaqa! Aqumantapas aswan achkaraqmi chaykunata yupayta munaptiypas’, nispa (Sal. 139:17, 18). Jehova Dios kuyawasqanchikrayku tukuy imakunata ruwasqanpi yuyaymanaspaqa, astawanmi kuyasun hinaspapas kallpanchakusun tukuy sunqunchikwan servinanchikpaq.

17, 18. ¿Imaynatam Jehova Dios kuyasqanchikta qawachichwan?

¹⁷ ¿Imaynatam Jehova Diosta kuyasqanchikta qawachichwan? Puntatam, kusikuywan Diospa munaychakuyninmanta willakuspanchik (Mat. 24:14; 28:19, 20). Chaymantapas, sasachakuykunapi tarikuspa Diosman sunqu kaspanchikmi (leey Salmo 84:11; Santiago 1:2-5). Llumpay sasachakuykuna kaptinpas, Jehova Diosqa yachanmi imayna tarikusqanchikta hinaspam anchata kuyawasqanchikrayku yanapawasun (Sal. 56:8).

¹⁸ Jehova Dios kuyasqanchiktam qawachinchik: unanchasqankunapi yuyaymanaspa, palabranta estudiaspa, payman asuykunapaq mañakuspa hinaspa ñuqanchikrayku Jesuspa wañukusqanpi yuyaymanaspa (1 Juan 2:1, 2). Kaykunata ruwaspanchikqa manam iskayrayasunchu Jehova Dios kuyawasqanchikmantaqa hinaspapas astawanraqmi kuyasunchik.