QUEENSLAND (Australia) llaqtapim, 1955 kaq watapi nacerqani. Taytaypa sutinmi Ron, mamaypañataqmi Estelle. Nacesqay qipallatam mamayqa biblia estudiayta qallaykurqa Jehova Diospa testigonkunawan. Payqa qatiqnin watallapim bautizakururqa, taytayñataqmi 13 wata pasaytaña. Ñuqañataqmi bautizakurqani 1968 kaq watapi Queensland sutiyuq llaqtapi.

Warma kasqaymantam librokunata leerqani hinaspa huk rimaykunatapas yachayta munaq kani. Taksallaraq kachkaptiymi tayta-mamayqa carronkuwan apawaqku, ñuqañataqmi leespay riq kani. Yaqachusmi tayta-mamayqa hukmanyasqa tarikuqku mana qawaykachakuspa risqayrayku. Ichaqa, leesqaymi anchata yanapawarqa estudiasqaypi, chayraykum Glenorchy (Tasmania) llaqtapi estudiaptiy achka premiokunata quwarqaku.

Colegiopi estudiachkaptiyraqmi niwarqaku universidadpi estudiaptiyqa qullqiwan yanapawanankumanta. Ñuqaqa anchatam leeq hinaspa estudiaq kani, chaymi tanteanay karqa chay yanapakuy chaskinaymanta utaq manapas. Ichaqa mamaymi Jehova Diosta imamantapas puntata kuyanaypaq yachachiwarqa (1 Cor. 3:18, 19). Chayraykum,  tantearurqani colegiopi estudiayta tukuruspallay precursor kanaypaq. Tayta-mamayqa manam harkakurqakuchu. Chaymi 1971 kaq watapi 15 wataypi precursor karqani.

Qatiqnin pusaq watakunam precursor karqani Tasmania llaqtapi. Chaypim Jenny Alcock sutiyuq sumaq sipaswan casarakurqani. Iskayniykum tawa wata precursor especial karqaniku Smithton hinaspa Queenstown llaqtachakunapi.

1978 kaq watapim, Port Moresby (Papúa Nueva Guinea) lawpi huk law nacionniyuqkunapaqwan asambleaman rirqaniku Jennywan. Manam qunqanichu hiri motu rimaypi huk misioneropa yachachisqanta. Manam imaniraqtapas entienderqanichu, ichaqa misionero kaytam munarqani. Chaynapi huk rimaykunata yachanaypaq hinaspa huñunakuypi yachachispay huk law nacionpi iñiqmasiykunata kallpanchanaypaq. Chaypim tantearqani huk rimaykunata yachaspay Jehova Diosta astawan servinaypaq.

Tasmania llaqtaman kutiptiykum, Funafuti (Tuvalu) islapi misionero kanaykupaq niwarqaku. Chayqa ancha kusikunapaqmá karqa. 1979 kaq watapa enero killanpim chay islaman rirqaniku. Chaypiqa kimsallam Jehova Diospa testigonkuna karqaku.

Tuvaluano rimayta yachayqa sasam karqa, mana diccionariopas nitaq ima yanapakuypas kasqanrayku. Chay rimaypiqa musuq testamento bibliallam karqa. Chaymi kikiykumanta yachanaykupaq tantearurqaniku. Sapa punchawmi 10 utaq 20 palabrakunata yachanaykupaq kallpanchakurqaniku. Ichaqa achka palabrakunata mana entiendesqaykutam musyakurqaniku. Huk kutipim, niyta munarqaniku demoniokunawan rimayqa mana allin kasqanmanta, ichaqa nirqanikum balanzakunata hinaspa tawnakunata servichikuyqa mana allin kasqanta. Chaywanpas hinallam kallpanchakurqaniku chay rimayta yachanaykupaq, achka runakunaman bibliamanta yachachisqaykurayku. Watakuna pasaytam, huk kaqninku niwarqa qallariypiqa mana imaniraqllatapas entiendewasqankumanta.

Chay islapiqa manam cuartokunataqa arriendakuqkuchu, chaymi huk iñiqmasinchikpa wasinpi yacharqaniku. Chayraykum mana munay tuvaluano rimayta rimanayku karqa, chaymi chaylla rimayta yachanaykupaq yanapawarqaku. Ingles rimayta mana ancha rimasqaykuraykum, tuvaluano rimayqa punta kaq rimayniyku hinaña rikurirurqa.

Tuvalu islapi runakunaqa bibliamanta yachaytam munarqaku, ichaqa manam qillqanchikkuna  karqachu. ¿Imaynatam chay runakunaqa Jehova Diosmanta yachanmanku, takinmanku, huñunakuykunapi rimarinmanku hinaspa bautizakunmankupas? Chay runakunaqa rimayninkupi qillqakunatam necesitarqaku Jehova Diosmanta yachanankupaq (1 Cor. 14:9). Ichaqa tuvaluano rimaytaqa yaqa chunka pichqayuq waranqa runakunallam rimaqku. ¿Yaqachu haykapipas chay rimaypi qillqanchikkuna lluqsimunman karqa? Jehova Diosmi ima piensasqanta kaykunawan qawachirqa: Puntataqa, munanmi ‘lamar quchapa waklawninpi’ kaqkunapas riqsinankuta (Jer. 31:10). Chaymantapas, payqa munanmi ñakariqkunatawan wakchakunata yanapayta (Sof. 3:12).

1980 kaq watapim, betel wasimanta niwarqaku tuvaluano rimayman qillqanchikkunata tikranaykupaq. Chay ruwaytaqa llumpay sasata hinam qawarqaniku, chayna kaptinpas ruwaytam qallaykurqaniku (1 Cor. 1:28, 29). Chay tiempopiqa manam aparatokunaqa karqachu, chaymi autoridadkunamanta rantirqaniku mana luzllawan copiakuna hurquq aparatota. Chaywanmi huñunakuypi estudianaykupaq qillqakunata ruwarqaniku. Ruwarqanikutaqmi tuvaluano rimaypi La verdad que lleva a vida eterna sutiyuq librotapas. Yuyachkaniraqmi tintapa asnayninta hinaspa rupaypi qillqakuna ruwasqaykuta.

Tuvaluano rimayman qillqakunata tikrayqa sasam karqa, manam karqachu diccionariokuna nitaq librokunapas. Ichaqa wakinpim yanapakuykunata chaskirqaniku mana piensayllata. Huk punchawmi Jehova Diospa testigonkunata chiqniq runapa punkunta takaykurqani pantaruspay. Chay runaqa profesor kasqanmantam jubilasqaña karqa. Payqa kaqmantam niwarqa mana watukunaykupaq. Ichaqa manaraq pasakuchkaptiymi niwarqa tuvaluano rimaypi qillqanchikkuna mana entiendekusqanta, hinaspam niwarqa imata ruwanaykupaq. Wakin runakunatapas tapuptiymi, paykunapas hina chaynata niwarqa. Chaymi qillqanchikkuna allichayta qallaykurqaniku. Manam haykapipas suyarqanichu chiqniwaqninchik  runa qillqanchikkunata leenantaqa hinaspa Jehova Dios yanapawanankupaq payta servichikunanmantapas.

Tuvaluano rimaypi chayllaraq lluqsimuq qillqaqa Jesuspa wañukusqanta yuyarinapaq invitacionmi karqa. Qatiqnin qillqañataqmi karqa Diospa gobiernonmanta noticiakuna 30 kaq tratado, chayqa ingles rimaywan kuskam lluqsimurqa. Kusisqam kachkarqaniku runakunapa rimayninkupi qillqanchikkuna kasqanwan. Tiempopa risqanman hinam achka folletokuna hinaspa librokuna tuvaluano rimaypi lluqsimurqa. 1983 kaq watapim, Australia betel wasipi Willakuq qillqa ruwayta qallaykurqaniku tuvaluano rimaypi. Sapa qillqapa paginanmi karqa 24 hinaspa sapa kimsa killamanta lluqsimuq. Runakunaqa anchatam munaqku chay qillqanchikkuna leeyta. Chay rimaypi qillqanchikkuna sapa kuti lluqsimuptinmi radiopi willakuqku, wakinpiqa chay willakuymi aswan uyarisqa karqa. *

¿Imaynatam qillqanchikkunata tikraq kaniku? Puntataqa makillawan qillqaspa maquinawan copiaq kaniku, chaymantapas pantayninkunatam qawaq kaniku. Pantayta tariruspaqa kaqmantam maquinawan qillqaq kaniku. Chaytam ruwaq kaniku mana pantayniyuq kanankama, hinaspañam Australia betel wasiman apachiq kaniku. Chaypim iskay paninchikkuna computadoraman copiaqku. Chay rimayta mana yachasqankuraykum sapakama qillqaqku hinaspa chay ruwasqankuta tupachiqku pantaykuna mana kananpaq. Chaymantam dibujonkunata churaqku qillqanchik sumaq qawakunanpaq hinaspam avionwan apachimuwaqku pantaykunata kaqmanta qawanaykupaq. Chayta kutichiptiykum chayraq qillqapi lluqsimuq.

¡Kunanqa manañamá chaynachu! Kunan tikraqkunaqa manam tikrasqankutaqa apankuñachu cartakuna apaqkunamanqa. Aswanqa kikinkuñam computadorapi qillqanku hinaspa pantaykunatapas allichanku. Yaqa llapanpim, huk iñiqmasinchik paykunata yanapan tikrasqankuta dibujokunawan hukllawananpaq. Chaymantañam internetnintakama apachinku qillqakuna ruwaq betel wasiman.

Watakuna pasaytam Pacífico lawpi achka islakunaman rirqaniku. 1985 kaq watapim Samoa nacionpi betel wasiman rinaykupaq niwarqaku. Chaypim tuvaluano rimayman hinalla tikrarqaniku, hinaspapas yanaparqanikum samoano, tongano hinaspa toquelao rimaykunaman tikranankupaq. * 1996 kaq watapiñataqmi kamachiwarqaku Fiyi nacionpi betel wasiman rispa fiyiano, kiribatiano, nauruano, rotumano hinaspa tuvaluano rimaykunaman tikraqkunata yanapanaykupaq.

Admirakunim pisipanapaq hinaspa sasa kaptinpas tikraqkuna llamkayninkuta kuyasqankumanta. Paykunaqa Jehova Dios hinam munanku runakuna rimayninkupi Diosmanta yachanankuta (Apoc. 14:6). Tongano rimayman Willakuq qillqata tikranapaq tanteachkaspaykum huñunakurqaniku Tonga  islapi lliw ancianokunawan hinaspam tapurqani mayqanninku tikranankupaq. Huk kaqninmi mecanico karqa, payqa allintam llamkayninpi qullqita chaskiq. Chayna kaptinpas, llamkayninta saqispanmi qatiqnin punchawllata qillqanchikkuna tikrayta qallaykurqa. Payqa aylluyuq kaspanpas Jehova Diospi hapipakusqanraykum mana iskayrayarqachu yanapananmanta. Achka watakunam qillqanchikkunata tikrarqa. Jehova Diosqa manam haykapipas paykunataqa saqirqachu.

Enteron pachapi Diospa llaqtanpi punta apaqkuna hinam tikraqkunapas munanku llapallan rimaykunapi qillqanchikkuna kananta, aslla runakuna chay rimayta rimaptinkupas. Huk kutipim Diospa llaqtanpi punta apaqkunata tapurqaniku sichu tuvaluano rimayman hinalla qillqakunata tikranaykumanta. Paykunapa nisqanmi anchata kallpanchawarqa, nirqakum hinalla tikranaykupaq. Chay rimaypi runakuna pisilla kaspankupas Diosmantaqa hinallam yachananku karqa.

2003 kaq watapim, tikraqkunata yanapaspayku llamkarqaniku Fiyi nacionpi betel wasipi. Hina chay watapitaqmi niwarqaku Estados Unidos, Patterson (Nueva York) lawpi Betel wasipi hina chay llamkayllata ruwanaykupaq. Muspaypi hinam tarikurqaniku. ¿Imanasqa? Chaywanqa astawanraqmi yanapanay karqa achka rimaykunaman qillqanchikkunata tikranankupaq. Iskay watam tikraqkunata yanapanaykupaq huk law nacionkunaman illarqaniku.

Kay yachachikuypa qallariypim nirqani 2000 kaq watapi huk huñunakuyman risqayta. Chay watapim, enteron pachapi Diospa llaqtanpi punta apaqkuna musyakururqaku enteron pachapi qillqanchikkunata tikraqkuna yanapakuy necesitasqankumanta. Yaqa llapankum mana haykapipas yachachisqachu karqaku imayna tikranankupaq. Chaymi chay huñunakuy qipallata Diospa llaqtanpi punta apaqkuna tantearurqaku lliw tikraqkuna yachachisqa kanankupaq inglespi qillqakunata allinta entiendenankupaq, tikraypi sasachakuykunata allichanankupaq hinaspa huk sunqulla llamkanankupaq.

Chayna yachachisqa kasqankuraykum qillqanchikkunaqa sumaq tikrasqa hinaspa achka rimaykunapi kachkan. Misionero kayta qallaykuptiykum 1979 kaq watapi Willakuq qillqaqa 82 rimaykunallapi karqa. Yaqa llapanpim chay rimaykunapi qillqakunaqa ingles rimaymanta qipataña lluqsimuq. Kunanmi ichaqa 240 masnin rimaykunapi Willakuq qillqaqa tikrakun. Yaqa llapan rimaykunapitaqmi ingles rimaywan kuska lluqsimunku. Kunanqa 700 masnin rimaykunapim qillqanchikkunaqa tikrasqa kachkan. Pasaq watakunapiqa manam chayqa atikunmanchu karqa.

2004 kaq watapim, enteron pachapi Diospa llaqtanpi punta apaqkuna tantearurqaku Traducción del Nuevo Mundo bibliata achka rimaykunaman chaylla tikranankupaq. Chayraykum kunanqa achka runakuna bibliata leenku rimayninkupi. 2014 kaq watapim, biblia tikrasqankuqa lliw utaq wakillan 128 rimaykunapi kachkan, wakin rimaykunaman tikrasqankuqa Pacífico lawpim kachkan.

Ancha kusikuywanmi yuyarini 2011 watapi Tuvalu islapi asambleata. Achka killakunañam mana  paramurqachu chay islapiqa, hinaptinmi iñiqmasinchikkuna tanteachkarqaku huk punchawña asamblea apakunanpaq. Ichaqa chay tardellam anchata pararamurqa, hinaptinmi asambleaqa hinalla apakurqa. Chaypim ñuqaqa ancha kusikuywan willarqani Traducción del Nuevo Mundo de las Escrituras Griegas Cristianas sutiyuq biblia tuvaluano rimaypi lluqsimusqanmanta. Chay rimayta aslla iñiqmasinchikkuna rimaspankupas, Jehova Diosmantam sumaq regalota hina chaskirqaku. Asamblea tukuruptinmi kaqmanta parayta qallaykamurqa. Chaymi nichwan chay punchaw Diosmanta iskay regalokunata iñiqmasinchikkuna chaskisqankuta.

Chay asambleapiqa manañam warmiyqa karqachu, chaymi anchata llakichiwarqa. Payqa 2009 kaq watapim wañukurqa 10 wata cancer unquywan ñakarispan. Pay kawsarimuspanqa ancha kusisqachá tarikunqa tuvaluano rimayman Diospa palabran tikrakusqanmanta.

Kunanqa Loraini sutiyuq kuyayllapaq iñiqmasinchikwanmi casarasqa kachkani, payqa Jehova Diospa huk regalonmi. Payqa Fiyi nacionpim betel wasipim qillqakunata tikraspa punta kaq warmiywan kuska llamkarqaku. Kaqmantam casarasqa kachkani Jehova Diosman sunqu hinaspa huk rimaykunata ñuqa hina kuyaq warmiwan.

Kay watakunapim qawarqani lliw runakunata hinaspa mana ancha riqsisqa rimaykunapi runakunatapas Jehova Dios kuyasqanmanta (Sal. 49:1-3). Qawarqanitaqmi qillqanchikkunata chayllaraq chaskispanku hinaspa Jehova Diospaq rimayninkupi takispanku kusisqa tarikusqankutapas. Chaykunapim qawani Jehova Dios runakunata anchata kuyawasqanchikta (Hech. 2:8, 11). Yuyarinim Saulo Teasi iñiqmasinchikpa nisqanta, paymi rimayninpi chayllaraq takispan niwarqa: “Enteron pachapi Diospa llaqtanpi punta apaqkunata niykapuway tuvaluano rimaypi takikunam aswan sumaq uyarikun ingles rimaymantaqa”, nispa.

2005 kaq watapa septiembre killanpim niwarqaku enteron pachapi Diospa llaqtanpi punta apaq kanaypaq, chaytaqa manamá haykapipas suyarqanichu. Qillqanchikkunata manaña tikraspaypas enteron pachapi tikraqkunatam yanapani, chaymantam anchata Jehova Diosta agradecekuni. Ancha kusisqataqmi tarikuni lliw serviqninkunata Dios kuyawasqanchikmanta, kuyantaqmi Pacífico lawpi karu islachakunapi runakunatapas. Yaqa chaynatam Salmo qillqaqpas nirqa: ‘Diosmi gobiernachkan. Kay pachapi kaqkunaqa kusikuchunkuyá. Lamar quchakunapa patanpi yachaqkunaqa kusikuchunkuyá’, nispa (Sal. 97:1).