1, 2. ¿Imatam Jehova Diospa serviqninkunaqa ñawpaqpi hinaspa kunanpas suyanchik?

ACHKA watakunam, Jehova Diospa serviqninkunaqa suyarqaku willakuykuna cumplikunanta. Jeremiaspas willakurqam Juda nacionta Babilonia runakuna puchukachinanmanta. Nisqanman hinam 607 kaq watapi manaraq Jesus hamuchkaptin chay pasakurqa (Jer. 25:8-11). Isaiaspas willakurqam judiokuna Babiloniamanta lluqsinankupaq Jehova Dios yanapananmanta hinaspa llaqtankuman kutinankupaq. Nirqataqmi: “¡Mayna kusisqam llapallan paypi suyaqkunaqa!”, nispa (Is. 30:18). Miqueaspas manam iskayrayarqachu Diospa willakusqankuna cumplinanmantaqa. Chaymi nirqa: ‘Ñuqam ichaqa tayta Diosllapi suyay-suyasaq’, nispa (Miq. 7:7). Pachaknintin watakunataqmi Diospa serviqninkunaqa Mesias  chayamunanta suyarqaku (Luc. 3:15; 1 Ped. 1:10-12). *

² Ñuqanchikpas suyachkanchikmi Diospa willakusqankuna hamuq tiempopi cumplikunanta. Diospa munaychakuyninpiqa Jesusmi kamachinqa hinaspam mana allin runakunatawan ñakariyta chinkachinqa hinaspam llaqtantapas libranqa satanaspa munaychakusqan tukuy mana allinkunamanta (1 Juan 5:19). Diospa piñakuynin punchawqa kayllapiñam kachkan, chaymi qawan-qawanlla kananchik.

3. Unayña Diospa munayninta suyaspaqa, ¿imatam tapukuchwan?

³ Anchatam munachkanchik Diospa munaynin kay pachapi ruwakunanta (Mat. 6:10). Ichaqa achka watakunaña suyasqanchikraykum llumpay unamusqanta piensachwan. Chayna kaptinqa, yaqapaschá tapukuchwan: “¿Hinallachu kunanpas qawan-qawanlla utaq listolla kanay?”, nispa.

4. ¿Imanasqam qawan-qawanlla hinaspa listolla kananchik?

⁴ Bibliapim sutillata niwanchik Diospa piñakuynin punchawta imayna suyanapaq. Jesusmi nirqa: “Qawan-qawanllayá kaychik” hinaspa ‘listollayá kaychik’, nispa (Mat. 24:42; Luc. 21:34-36). Chaymantapas, Diospa llaqtanmi sapa kuti niwanchik qawan-qawanlla hinaspa listolla kaspa Diospa piñakuyninta suyananchikpaq, manataqmi qunqananchikchu Diospa prometewasqanchik sumaq huertatapas (leey 2 Pedro 3:11-13).

5. ¿Imanasqam haykapipas qawan-qawanlla kananchik?

⁵ Punta pachak watapi Diosta serviqkunaqa qawan-qawanllam hinaspa listollam kananku karqa, ñuqanchikqa astawanraqmi chayna kananchik. ¿Imanasqa? Jesusmi kamachiytaña qallaykurqa 1914 kaq watapi, chaymantapacham tukupay tiempopi kawsachkanchik. ¿Imanasqam chaymanta mana iskayrayanchikchu? Jesuspa tukuy ima nisqankuna cumplikusqanraykum. Kunanqa astawanmi mana allinkuna kay pachapi yapakuchkan, hinaspam Diospa munaychakuyninmanta willakuypas enteron pachapi apakuchkan (Mat. 24:3, 7-14). Jesusqa manam nirqachu tukupay punchawkuna hayka tiempo kananmantaqa. Chaymi qawan-qawanlla kananchik, ¿imanasqa? Diospa piñakuynin punchaw haykapi chayamunanta mana yachasqanchikraykum.

6. ¿Imanasqam yachanchik tukuy imapas aswan mana allinraq kananmanta?

⁶ Kunan tiemponchikpipas, tukuy imam aswan mana allin kanqa. ¿Imaynatam chayta yachanchik? Bibliam niwanchik ‘tukupay tiempopi’ runakunaqa aswan mana allin kanankumanta (2 Tim. 3:1, 13; Mat. 24:21; Apoc. 12:12). Chaymi tukuy ima mana allin kaspanpas, aswan mana allinraq kanqa. ¿Nichkanchikchu chaywanqa Diospa piñakuynin punchaw chayamunanpaq llumpay mana allinraq kananmanta?

7. Mateo 24:37-39 nisqanpi yuyaymanaspaqa, ¿imamantam musyakunchik?

 ⁷ Wakinkuqa ninmankupaschá ‘hatu-hatun ñakariy’ punchaw manaraq chayamuchkaptin lliw nacionkunapi yarqay, guerra hinaspa unquykuna kananmanta (Apoc. 7:14). Ichaqa manamá chaynachu kanqa. ¿Imanasqa? Chayna kaptinqa lliw runakunam musyakurunmanku bibliapi willakuykuna cumplikusqanta. Bibliapi mana iñiq runakunapas chaytachá qawanmanku. Ichaqa Jesusmi nirqa yaqa llapan runakuna tukupay punchawkunapi kawsasqankumanta mana musyakunankuta. Nirqataqmi runakuna hawka kawsakuchkaptinku Diospa piñakuynin punchaw qunqayta chayaramunanmanta (leey Mateo 24:37-39). Jesuspa nisqanpi yuyaymanaspaqa, ¿imamantam musyakunchik? Hatu-hatun ñakariy punchaw qallarinanpaqqa, manam tukuy imapas llumpay mana allinraqchu kanan (Luc. 17:20; 2 Ped. 3:3, 4).

8. ¿Imamantam mana iskayrayanchikchu Diospa serviqninkunaqa?

⁸ Tukupay punchawkunamanta Jesuspa willakusqantaqa qawan-qawanlla kaqkunallam musyakunanku karqa. Diospa serviqninkunaqa qawan-qawanllam kachkanchik (Mat. 24:27, 42). Chaymi 1914 watamantapacha qawarqanchik bibliapi willakuykuna imayna cumplikusqanta. Manataqmi iskayrayanchikchu tukupay punchawkunapi kawsasqanchikmantaqa. Jehova Diosqa ñam tantearunña satanaspa munaychakusqan mana allinkunata puchukachinanpaq.

9. ¿Imanasqam qawan-qawanlla hinaspa listolla kananchik?

⁹ Qawamusqanchikman hinam, qawan-qawanlla hinaspa listolla kananchik. ¿Imanasqa? Jesucristota kasukuyta munasqanchikraykum. Chaymantapas, manam iskayrayanchikchu tukupay punchawkunamanta willakusqan cumplikusqanmantaqa. ¿Imanasqam chaynata ninchik? Manam runakunapa imapas nisqankupi hapipakusqanchikraykuchu. Aswanqa bibliapa nisqanman hina willakuykuna cumplikusqanraykum.

10, 11. (1) ¿Imanasqam Jesusqa qatiqninkunata nirqa rikchan-rikchanlla kanankupaq? (2) Diospa piñakuynin punchaw llumpay unamusqanta piensaspanchikqa, ¿imatam ruwananchik? (Qaway 9 kaq paginapi dibujota).

¹⁰ Jehova Diospa achka testigonkunam Diospa piñakuynin punchawta unay watakunaña suyachkanku. Ichaqa hayka wataña Diosta servispanchikpas hinallam qawan-qawanlla hinaspa listolla kananchik. Arí, satanaspa munaychakusqanta chinkachinanpaq Jesus hamuptinqa qawan-qawanllam kananchik. Qatiqninkunatapas chayna kanankupaqmi nirqa, ¿imanasqa? Diospa piñakuynin punchaw haykapi hamunanta mana yachasqankuraykum. Nirqataqmi: ‘Huk runa karuman illaruq hinam kanqa. Manaraq illaruchkaspanmi runankunata kamachin wasinmanta nanachikunanpaq hinaspam sapakamaman imam ruwananta qun. Punkupi cuidaqtapas kamachinmi rikchan-rikchanlla kananpaq. Chaynayá qamkunapas wasiyuqpa imay  horam kutimunanta mana yachachkaspaqa listolla kaychik. Ichapas kutiramunqa tutaykuqta utaq chawpi tutata utaq gallo waqayta utaq achikyamuqta. Yanqañataq qunqaymanta chayaramuspay mana suyawachkaqta tariramuykichikman. Qamkunaman willasqaytaqa llapallanmanmi nini, chaynaqa listollayá suyawaychik’, nispa (Mar. 13:33-37).

¹¹ Jesus kamachinanpaq churasqa kasqantam 1914 kaq watapi Diospa serviqninkuna yacharurqaku, chaywanmi musyakurqaku Diospa piñakuynin punchawqa hichpallapiña kasqanta. Chaymi Diosmanta astawan willakurqaku. Marcos 13 kaq capitulonpim Jesus willakurqa sirvientekunapa mana piensasqankuman hina patronnin chayamunanmanta. Astawan unamuptinpas paykunaqa rikchan-rikchanllam suyananku karqa. Kaymi yachachiwanchik unay wataña suyaspanchikpas, manam piensananchikchu Diospa piñakuynin punchaw llumpayta unamunanmantaqa nitaq mana chayamunanmantapas. Chaynaqa hinallayá rikchan-rikchanlla kasunchik.

12. (1) ¿Imatam Habacucqa Jehova Diosta tapurqa? (2) ¿Imatam Jehova Diosqa Habacucta nirqa?

¹² Rimarisun willakuq Habacucmanta. Payqa Jerusalen puchukachisqa kananmantam runakunaman willakurqa. Chaytaqa ñawpaqmantaraqmi wakin willakuq runakunapas willakurqaku. Ichaqa Habacucmi qawarqa runakuna aswan mana allin rikurirusqankuta. Chaymi Jehova Diosta mañakuspan tapurqa: ‘¿Dios taytalláy ¿haykapikamataq mana uyariykuwankichu qayakamusqaytaqa?’, nispa. Jehova Dios Jerusalen llaqta haykapi puchukachisqa kananmanta mana nispanpas, qawan-qawanlla kananpaqmi nirqa, hinaspam kaynata kallpancharqa: “Chayamunqapunim chay punchawqa”, nispa (leey Habacuc 1:1-4; 2:3).

13. (1) ¿Imatam Habacucqa hukmanyaruspan piensanman karqa? (2) ¿Imam pasakunman karqa chaynata piensaptinqa?

¹³ Sichum Habacuc hukmanyaruspan kaynata piensanman karqa: “Unay watañam Jerusalen puchukachisqa kananta suyachkani. Chayqa haykapiya chayamunqa, yanqapaqñam willakuni. Hukkunaña chaytaqa ruwachun”, nispa. Hinaptinqa, ¿imam pasakunman karqa? Manamá Diospa amistadninñachu kanman karqa hinaspapas  wañurunmanchá karqa Jerusalenta puchukachiptinku.

14. ¿Imaynataq musuq pachapi tarikusunchik?

¹⁴ Musuq pachapi kaspanchikqa tukupay punchawkunapi Jehova Diospa nisqan cumplikusqantañam yuyarisun. ¿Imaynam chaywanqa tarikusun? Aswanraqmi mana iskayrayasunchu Jehova Dios wakin nisqankunatapas cumplinanmantaqa (leey Josuey 23:14). Anchatam Jehova Diosta agradecekusunchik piñakuynin punchawta apamusqanmanta chaynataq serviqninkuna qawan-qawanlla hinaspa listolla kanankupaq kamachisqanmantapas (Hech. 1:7; 1 Ped. 4:7).

15, 16. ¿Imanasqam Diosmanta willakunapaq astawan kallpanchakunanchik?

¹⁵ Jehova Diosqa llaqtantakama hinalla yuyarichiwasun payta puntapi churananchikpaq. Chaymi yanapawasun hinalla servinanchikpaq chaynataq Diospa piñakuynin punchaw hichpallapiña kasqanta mana qunqanapaq. Manataqmi iskayrayanchikchu tukupay tiempomanta Jesuspa willakusqan cumplikusqanmanta hinaspa mana allin runakuna chinkachisqaña kananmantapas. Chaymi Diospa munayninmanta willakuyqa imamantapas ancha allin (Mat. 6:33; Mar. 13:10).

 ¹⁶ Satanaspa munaychakuyninqa ñam chinkachisqaña kanqa. Chaymi Diosmanta willakuspanchikqa runakunata yanapachkanchik salvakunankupaq. Chay ruwayqa imamantapas ancha allinmi. Kay pasakusqanpi piensariy: 1945 kaq watapim, Alemania nacionmanta huk buquem yaku ukunman chinkakuykurqa, hinaptinmi waranqantin runakuna wañururqaku. Ichaqa casarasqa warmi-qarim mana wañurqakuchu, tiempo pasaytam paykunaqa Jehova Diospa testigon karqaku. Warmi kaqmi yuyarin yaku ukunman buque chinkaykuchkaptin, huk warmi quri-qullqi alhajankunamanta llakikuspa waqasqanta. Ichaqa wakin runakunam yacharqaku runamasinku mana wañunanpaq yanapayqa imamantapas ancha allin kasqanta. Kunanpas runakuna mana wañunanpaqqa, Diosmanta willakunanchikpaqmi astawan kallpanchakunanchik. ¡Tukuytamá ruwayta munanchik runakuna salvakunankupaq!

17. ¿Imanasqam ninchik Diospa piñakuynin punchaw chayamunanpaq makillanpi kasqanta?

¹⁷ Sutillatamá qawanchik bibliapa willakusqankuna cumplikusqanta hinaspa Diospa piñakuynin punchawpas hichpallapiña kasqanta. Arí, ñam Naciones Unidas nisqa hinaspa paykunaman sayapakuq gobiernokunaqa lliw pantay religionkunata chinkachiyta munanqakuña (Apoc. 17:16). ¿Unaytaraqchu suyananchik chaykuna pasananpaq? Manam. Diosmi gobiernokunata kallpanchanqa lliw religionkunata chinkachinankupaq. Jehova Diospaqa makillanpim kachkan haykapi chayta ruwananpaqpas (Apoc. 17:17). Hichpallapiñam kachkan satanaspa munaychakuynin chinkachisqa kananpaqqa. Chaymi kasukunanchik Jesuspa kayna nisqanta: ‘Allintayá qawakuychik, yanqañataqmi viciokunapi, machakuykunapi hinaspa kay pachapi imapas kaqkunapi afanakuchkaqta qunqayllamanta chay punchawkuna tariramusunkichikman’, nispa (Luc. 21:34, 35; Apoc. 16:15). Chaynaqa, qawan-qawanllayá kasunchik Jehova Diosta tukuy sunqunchikwan servispanchik. Chayta ruwaspanchikqa, manam iskayrayananchikchu salvawananchikmanta (Is. 64:4).

18. ¿Ima tapukuytam qawasun qatiqnin yachachikuypi?

¹⁸ Manaraq Diospa piñakuynin punchaw chayamuchkaptinmi, Judaspa kayna nisqanta kasukunanchik. Nirqam: ‘Kuyasqallaykuna, qamkunayá ichaqa wiñaychik suma-sumaq iñiynikichikpi, Diostayá mañakuychik chuya espiritupa yanapakuyninwan. Diospa kuyakuyninpiyá waqaychakuychik señorninchik Jesucristopa wiñay kawsaypaq kuyapayakuyninta suyastin’, nispa (Jud. 20, 21). ¿Imaynatam qawachichwan musuq pachapiña wiñaypaq kawsay munasqanchikta? Kaymantam qawasunchik qatiqnin yachachikuypi.