1, 2. ¿Imayna kaytam munanchik? Huk rikchanachiywan willarimuy.

PIPAS fruta rantiq rispanqa, manam hatunllantachu nitaq mana ancha chaninniyuqllantachu akllan. Aswanqa mikunapaq hina allin rikchayniyuqta hinaspa puqusqan kaqtam.

² Diosmanta yacharuspa hinaspa bautizakuruspaqa, iñiyninchikpim puqusqa hina allin yuyayniyuq kayta munanchik. Yuyayniyuq nispaqa manam machu-payayaymantachu rimachkanchik, aswanqa sumaq kayniyuq kaymanta hinaspa Jehova Diospa allin amistadnin kaymantam. Apostol Pablom Efeso llaqtapi kaq iñiqkunata nirqa: ‘Iñisqanchikpipas chaynataq Diospa churin riqsisqanchikpipas llapallanchik wiñaspa hukllaña kasunchik, yuyayniyuq runa hinaña kaspam mana imapapas pisisqan Cristo hina cabal kasunchik’, nispa (Efes. 4:13).

3. ¿Imapitaq kunan tiempopi iñiqkunaqa Efeso llaqtapi kaq iñiqkunaman rikchakunku?

³ Efeso llaqtapi iñiqkunaman apostol Pablo qillqaptinmi  chay llaqtapi achka iñiqmasinkuna yuyayniyuq hinaspa unayña Diosta serviq karqaku. Karqataqmi mana ancha yuyayniyuq iñiqmasinkunapas. Kunan tiempopi iñiqmasinchikkunapas chaynam kachkanku. Achka iñiqmasinchikkunam unay watakunaña Jehova Diosta servichkanku. Ichaqa achkaraqmi yuyayniyuq kanankupaq chayllaraq kallpanchakuchkanku. Paykunamanta wakiqninmi sapa wata waranqantin bautizakuqkuna. Arí, Diosta serviqkunaqa llapanchikmi iñiyninchikpi yuyayniyuq kanapaq kallpanchakunanchik. Chaynaqa, ¿ima niwaqtaq qanmanta? (Col. 2:6, 7).

4, 5. (1) ¿Imakunapitaq mana chaynallachu kanku lliw yuyayniyuq iñiqmasinchikkunaqa? (2) ¿Imapitaq yuyayniyuq kasqankuqa qawakun? (Qaway 3 kaq paginapi dibujota).

⁴ Lliw puqusqa frutakuna mana chay sayayniyuqlla nitaq rikchayniyuqlla kaspankupas, puqusqa kasqankuqa sutillam qawakun. Iñiqmasinchikkunapas manam llapankuchu iñiyninkupiqa chaynalla kanku. Sapakamam hayka watayuq kasqankupi, imayna uywasqa kasqankupi hinaspa imakuna munasqankupipas mana chaynallachu kanku. Chayna kaptinkupas, yuyayniyuq kasqankuqa suti riqsiyllam. ¿Imaynanpi?

⁵ Yuyayniyuq iñiqkunaqa allintapunim Jesucristota qatipakunku (1 Ped. 2:21). Jesusmi kamachiwarqanchik tukuy sunqunchikwan, tukuy vidanchikwan hinaspa tukuy yuyayninchikwan Jehova Diosta kuyananchikpaq. Kamachiwarqanchiktaqmi runamasinchikta kikinchikta hina kuyanapaqpas (Mat. 22:37-39). Yuyayniyuq iñiqkunaqa kay kamachikuykunata kasukunankupaqmi kallpanchakunku. Chaymi, imayna kawsakusqankuwan qawachinku imamantapas astawanqa Jehova Diospa amistadnin kay munasqankutawan runamasinku kuyasqankuta.

6, 7. (1) Kuyakuq kaspankupas, ¿imayna kasqankutawanmi yuyayniyuq iñiqkunaqa qawachinku? (2) ¿Imatam tapukunanchik?

⁶ Kuyakuq kaspapas, ¿imayna kasqankutawanmi yuyayniyuq iñiqkunaqa qawachinku? (Gal. 5:22, 23). Paykunaqa sumaq sunqu, hawkalla hinaspa pacienciakuqmi kanku. Sasachakuypi utaq llakipi tarikuspankupas sunqunkuta tiyachispam llumpaytaqa mana hukmanyankuchu. Imam allin utaq mana allin kasqanmanta yachanankupaqmi bibliata estudianku hinaspam chayman hina ima ruwanankupaqpas tanteanku. Mana hatun tukuspam riqsikunku Jehova Diospa yachachikuyninkunawan kamachikuyninkuna imamantapas aswan allin kasqanta. * Chaymantapas, tukuy sunqunkuwanmi Diosmanta willakunku hinaspam  kallpanchakunku iñiqmasinkunawan huk sunqulla Diosta yupaychanankupaq.

⁷ Jehova Diosta hayka wataña servispapas llapallanchikmi tapukunanchik: “¿Imakunapitaq kallpanchakunay Jesucristo hina aswan yuyayniyuq kanaypaq?”, nispa. Qatiqninpiyá chaymanta yachasun.

8. ¿Imanasqam ninchik: Jesusqa allintam Diospa palabranmantaqa yacharqa, nispa?

⁸ Jesusqa Diospa palabranmantam allinta yacharqa. Payqa 12 watallanpiraq kachkaspanmi, Diospa leyninmanta yachachiqkunawan rimarqa Diospa palabranpi imakuna yachachisqanmanta. Chaypi kaqkunaqa llapallankum uyarayarurqakuraq Jesuspa rimasqanwanqa (Luc. 2:46, 47). Watakuna pasaytam Diospa palabrantaqa astawan yachaywanraq servichikurqa, chaymi chiqniqninkunaqa mana ima niytapas atirqakuchu (Mat. 22:41-46).

9. (1) Iñiyninchikpi yuyayniyuq iñiqmasinchikkuna hina kayta munaspaqa, ¿imakunatam ruwananchik? (2) Bibliata estudiaspanchikqa, ¿imamanta yachanapaqmi kallpanchakunanchik?

⁹ Iñiyninpi yuyayniyuq iñiqmasinchikkuna hina kayta munaspaqa, manam pisi yachasqallanchikwanchu qipananchik. Astawanqa  Jesucristotam qatipakunanchik. Chaypaqqa, bibliamanta astawanraq yachananchikpaqmi kallpanchakunanchik. Yachanchikmá ‘mikuyqa yuyayniyuqkunapaq’ kasqanta (Heb. 5:14). Chaymi bibliapa yachachisqankunataqa imam kaqta yachananchik (Efes. 4:13). Chayta ruwanapaqqa tiempochakuspam bibliata sapa punchaw leenanchik, sapallanchikpi hinaspa ayllunchikwanpas sapa semanam estudiananchik. Bibliata estudiaspanchikqa Jehova Diospa ima piensasqanmanta chaynataq ima sientesqanmanta yachanapaqmi kallpanchakunanchik, hinaspam chaypi yachasqanchikman hina allinta tanteananchik. Chayta ruwaptinchikqa Jehova Dioswan amistadninchikmi astawan kallpanchasqa kanqa.

10. ¿Imaynatam yuyayniyuq iñiqmasinchikkunaqa qawachinku Diospa kamachisqankunata tukuy sunqunkuwan kasukuy munasqankuta?

¹⁰ Bibliapa ima nisqanta allinta yachaspankupas, iñiyninpi yuyayniyuqkunaqa Diospa tukuy ima kamachisqantam tukuy sunqunkuwan kasukuyta munanku. Chaytaqa ruwanku imayna kawsasqankuta, piensasqankuta hinaspa imayna ruwasqankuta saqinanku kaptinpas Diospa munasqanman hina kawsakuspankum. Paykunaqa imayna kawsasqankuta saqispankum Jesucristota qatipakunku, chaymi pay hina allin ruwaq hinaspa Diosman sunqu kanku (leey Efesios 4:22-24). Jehova Diosqa chuya espiritunwanmi yanaparqa bibliata qillqaq runakunataqa. Chaymi bibliata estudiaptinchikqa Diospa chuya espiritun yanapawasun allin yachayniyuq hinaspa kuyakuq kananchikpaq. Chaymantapas Jehova Diospa amistadnin kaytam astawan atisun.

11. ¿Imayna runakunapa chawpinpitaq Jesucristoqa kawsakurqa?

¹¹ Jesucristo kay pachapi kaspanqa mana pantaqmi karqa. Tayta-mamanwan wawqi-paninkuna hinaspa lliw runakunam ichaqa pantaqllaña karqaku. Qatiqninkunapas wakinpiqa hatun tukuq hinaspa kikillanpaq munaqkunam karqaku. Chaytam qawachirqaku Jesucristo wañukunanpaqña kachkaptin, paykunam atipanakurqaku pim llapankumanta aswan allin kasqanmanta (Luc. 22:24). Chayna kaptinpas, Jesusqa manam paykunamantaqa iskayrayarqachu iñiyninkupi yuyayniyuq kaspanku Diospa llaqtanta huk sunqulla kanankupaq yanapanankumantaqa. Chaymi chay tutalla Jehova Diosta mañakuspan nirqa: “Taytáy, mañakuchkaykiqa paykuna huklla kanankupaqmi”, nispa (Juan 17:21, 22).

12, 13. (1) ¿Imayna kawsakunapaqmi kallpanchakunanchik? (2) ¿Imam huk iñiqmasinchikta yanaparqa iñiqmasinkunawan huk sunqulla kawsakunanpaq?

¹² Iñiyninpi yuyayniyuq iñiqmasinchikkunaqa Diospa llaqtanpi huk sunqulla kanankupaqmi kallpanchakunku (leey Efesios 4:1-6, 15, 16). Llapanchikmá iñiqmasinchikkunawan huk sunqulla hinaspa hawkalla kawsakunapaq kallpanchakunanchik. Chayta ruwanapaqqa mana hatun tukuqmi kananchik. Sichum huk iñiqmasinchik ima ruwasqanwanpas sienterachiwaptinchikqa, ¿piñakurusunchu?, ¿manañachu rimapayasun? Icha, ¿allinyanakunapaqchu rimaq risun? Iñiyninchikpi yuyayniyuq kaspaqa chayllam ima sasachakuytapas allichasun.

 ¹³ Uwe sutiyuq iñiqmasinchikmanta rimarisun. Payqa, wakin iñiqmasinchikkuna imapipas pantasqankumantam chaylla piñakuq. Chaymi huk punchaw tantearurqa bibliatawan huk qillqakunata servichikuspan Davidpa vidanmanta astawan yachananpaq. ¿Imanasqam Davidpa vidanmanta astawan yachayta munarqa? Davidpas llaqtamasinkunawanmi sasachakuypi tarikurqa, paytaqa kamachiq Saulmi achka kutipi wañurachiyta munarqa. Huk kutipiñataqmi Israel runakuna rumiwan chuqapaspanku wañurachiyta munarqaku. Chaymantapas warmintaqmi paymanta asikurqa (1 Sam. 19:9-11; 30:1-6; 2 Sam. 6:14-22). Tukuy chaykunawanpas Davidqa hinallam Jehova Diosta kuyarqa, paypi hapipakurqa hinaspam llakipayakuqpas karqa. Chaykunata yacharuspanmi Uwe sutiyuq iñiqmasinchikqa musyakururqa Davidta qatipakunanpaq kallpanchakunanmanta, chaymi iñiqmasinkunapa pantasqankuwan piñakunanmantaqa pampachaytaña yacharurqa. Hinaspapas yacharurqam iñiqmasinkunawan huk sunqulla kawsakuytapas. Ñuqanchikpas Uwe iñiqmasinchik hinam kallpanchakunanchik iñiqmasinchikkunawan huk sunqulla kawsakunapaq.

14. ¿Pikunatam Jesucristoqa amistadninkuna kananpaq akllarqa?

¹⁴ Jesucristoqa llapallan runakunawanmi kuyakuqllaña karqa. Paywanqa qaripas, warmipas, warmapas utaq yuyaqpas, kusisqam tarikuqku. Chayna kaspanpas manam lliw runakunawanchu amistadtaqa ruwarqa. Huk kutipim qatiqninkunata nirqa: ‘Qamkunaqa amistadniykunam kankichik kamachisqayta ruwaspaykichikqa’, nispa (Juan 15:14). Jesusqa, payman sunqu kaqkunata hinaspa Jehova Dios kuyaqkunatawan serviqkunallatam amistadninkuna kanankupaq akllarqa. Ñuqanchikpas tukuy sunqunkuwan Jehova Dios kuyaqkunallatam maskananchik amistadninchikkuna kanankupaqqa. ¿Imanasqa?

15. ¿Imanasqataq mozo-sipaskunaqa yuyayniyuq iñiqmasinchikkunapa amistadninta maskananku?

¹⁵ Frutakunaqa rupaywanmi astawanqa puqunku. Iñiqmasinchikkunapa kuyakuyninpas chay rupay hinam. ¿Imanasqa? Chay kuyakuymi yanapawanchik iñiyninchikpi allin yuyayniyuq kananchikpaq. Mozo-sipas kaspaykiqa, ¿tantearunkiñachu vidaykiwan ima ruwanaykita? Allin tanteakuyta munaspaykiqa, Diosta unay watakunaña yupaychaq hinaspa huk sunqulla kawsakuq iñiqmasinchikkunapa amistadninta maskay. Paykunaqa allintam tanteakunaykipaq yanapasunki, kawsakuyninkupi achka sasachakuykunata atipasqankurayku. Paykunapa amistadnintaqmi yanapasunki allin kawsakunaykipaq hinaspa iñiynikipi allin  yuyayniyuq kanaykipaqpas (leey Hebreos 5:14).

16. ¿Imaynatam yuyayniyuq iñiqmasinchikkunaqa sipasllaraq iñiqmasinchikta yanaparqaku?

¹⁶ Helga sutiyuq iñiqmasinchikmi colegionta tukunanpaqña kachkaptin ima pasasqanmanta yuyarin. Estudiaqmasinkunaqa universidadpi estudiay munasqankumantam llumpayta rimaqku, chaynapi allin llamkayta tarinankupaq. Helgam ichaqa yuyayniyuq iñiqmasinchikkunapa yanapakuyninta maskarqa. Paykunaqa yaqa llapankum achka wataña Diosta yupaycharqaku. Helgam nin: “Tukuy tiempoywan Jehova Diosta servinaypaqmi anchata kallpanchawarqa, chaymi pichqa wata precursorapas karqani. Achka wataña pasaruptinpas sipasllaraq kachkaspay chay ruwasqaymantam kusikuni”, nispa.

17, 18. ¿Imatam ruwananchik Jehova Diospa llaqtanpi astawan yanapakunapaq?

¹⁷ Jesucristota hinalla qatipakuspaqa iñiyninchikpim yuyayniyuq kasun, Jehova Diospa aswan amistadninmi kasun hinaspapas tukuy sunqunchikwanmi astawan yupaychayta munasunchik. Chayta ruwaspam Diospa llaqtanpipas astawan yanapakusunchik. Jesucristom qatiqninkunata nirqa: ‘Qamkunapas achkichkaq mechero hina kaychik runakunapa qayllanpi, chaynapi allin ruwasqaykichikta qawaspanku hanaq pachapi kaq taytaykichikta paykunapas alabanankupaq’, nispa (Mat. 5:16).

¹⁸ Qawasqanchikman hinaqa, yuyayniyuq iñiqmasinchikkunam Diospa llaqtanpi allinta yanapakunku. Iñiyninkupi yuyayniyuq kasqankutaqa qawachinkutaqmi allin concienciayuq kaspanku. Chaynaqa, ¿imaynatam yanapawanchik conciencianchikqa allinta tanteakunanchikpaq? ¿Imanasqataq iñiqmasinchikkunapa tanteakusqankutaqa respetananchik? Kaykunamantam qatiqnin yachachikuypi rimasun.