1, 2. ¿Imaynatam Jehova Diosqa kuyakuq kanapaq yachachiwarqanchik?

ALLIN taytaqa manam rimaspallanchu warmankunataqa yachachin, astawanqa ruwasqanwanmi. Taytan kuyasqanta qawaspankum warmakunapas kuyakuyta yachanku. Chaynatam Jehova Diospas ñuqanchikwan ruwan. Manamá pipas pay hinaqa kuyawanchikchu. Chaymi bibliapi niwanchik puntataqa pay kuyawasqanchikta (1 Juan 4:19). Kuyawasqanchikta qawachiwaspanchikmi kuyakuq kananchikpaq yachachiwanchik.

² ¿Imanasqataq bibliapiqa niwanchik, Jehova Diospuni puntata kuyawasqanchikta? “Huchasaparaq kachkaptinchikpas” churinta ñuqanchikrayku wañunanpaq kachamusqanraykum (Rom. 5:8). Chaytaqa ruwarqa huchamantawan wañuymanta librawananchikpaqmi. Chaywanmi yachachiwanchik kuyakuq hinaspa qukuykuq kananchikpaq (1 Juan 4:10). Chay ruwasqanraykutaqmi amistadnin kaytapas hinaspa kuyasqanchikta qawachiytapas atichwan.

3, 4. ¿Imaynatam Jehova Dios kuyasqanchikta qawachisun?

 ³ Jehova Diospa kuyakuq kayninmi lliw sumaq kayninkunamantapas aswan allinqa. Chaymi Jesucristopas aswan allinnin kaq kamachikuymanta rimaspan nirqa: ‘[Jehova] Diosnikitam kuyanki tukuy sunquykiwan, tukuy vidaykiwan, tukuy yuyaynikiwan hinaspa tukuy kallpaykiwan’, nispa (Mar. 12:30). Jehova Diosqa munan tukuy sunqunchikwan kuyananchiktam. Pitapas utaq imatapas paymanta astawan kuyaspanchikqa llakirachichwanmi. Manataqmi hawa sunqullachu Diostaqa kuyana. Payqa munan tukuy yuyayninchikwan hinaspa tukuy kallpanchikwan kuyananchiktam. Huk rimaypiqa, kuyasqanchiktam imapas piensasqanchikwan hinaspa imapas ruwasqanchikwan qawachinanchik (leey Miqueas 6:8).

⁴ Chaynaqa tukuy vidanchikwan hinaspa tukuy kapuqninchikwanmi Jehova Diostaqa kuyana. Pimantapas hinaspa imamantapas astawanqa payllatam kuyananchik. Pasaq yachachikuypim rimamurqanchik kuyawasqanchikta Jehova Dios imayna qawachiwasqanchikmanta. Kay yachachikuypiñataqmi rimasun Jehova Diosta astawan kuyananchikpaq imakuna ruwananchikmanta hinaspa imaynata qawachinamantapas.

5. ¿Ima ruwaytam munanchik Diospa tukuy ima quwasqanchikpi piensaspa?

⁵ Pipas imallatapas quykuwaptinchikqa, agradecekunchikmi. Chayna agradecekusqanchiktaqa qawachichwanmi quykuwasqanchikta allinta servichikuspa. Apostol Santiagom nirqa: “Diosmantam chaskinchik llapa ima allin kaqkunataqa”, nispa (Sant. 1:17). Chaynamá, Jehova Diosmi kusisqa kawsakunanchikpaq tukuy imatapas quwanchik. Chaykunamantam payta agradecekunchik. Chayna kuyawasqanchikta qawaspanchikmi ñuqanchikpas pay kuyasqanchikta qawachiyta munanchik. ¿Manachu qampas agradecekuyta munanki?

6. ¿Imatam Israel casta runakunaqa ruwananku karqa Diospa kuyakuyninta hinalla chaskinankupaq?

⁶ Jehova Diosqa ñawpaq Israel casta runakunata kuyaspanmi una-unay watakuna tukuy imata kawsakunankupaq qurqa. Qurqataqmi kamachikuykunatapas Diospa munasqanman hina imatapas ruwanankupaq (Deut. 4:7, 8). Diospa kuyakuyninta hinalla chaskinankupaqqa chay kamachikuykunatam kasukunanku karqa. Huknin kamachikuymi nirqa: ‘Chakraykipi punta kaq allin rurutam yupaychasqayki ñuqa tayta Diospa wasiyman apamunki’, nispa (Ex. 23:19). Chaywanmi tukuy ima chaskisqankumanta agradecekusqankuta Jehova Diosman qawachinanku karqa (leey Deuteronomio 8:7-11).

7. ¿Imaynatam kapuqninchikta servichikuchwan Jehova Dios kuyasqanchikta qawachinapaq?

⁷ Ñuqanchikpas, Jehova Dios kuyasqanchiktaqa qawachichwanmi tukuy kapuwaqninchikta quspanchik (Prov. 3:9). Chaytaqa ruwasun enteron pachapi kaq iñiqmasinchikkunata hinaspa yachasqanchik lawpi kaq iñiqmasinchikkunata yanapanapaq qullqinchikta quspanchikmi. Wakiqninchikpa mana achka qullqinchik kaptinpas, llapanchikmi Jehova Dios kuyasqanchikta qawachiytaqa atichwan imallanchikwanpas yanapakuspaqa (2 Cor. 8:12). Ichaqa manamá qullqillanchikwanchu Dios kuyasqanchiktaqa  qawachichwan. ¿Imakunatawanmi ruwachwan?

8, 9. (1) ¿Imaynatawanmi Jehova Dios kuyasqanchikta qawachichwan? (2) ¿Imatam Mikeqa ayllunpiwan ruwarqa?

⁸ Jehova Dios kuyasqanchiktaqa qawachinchiktaqmi paypa nisqankunamanta mana iskayrayaspa. ¿Imanasqam chaynata ninchik? Jehova Diosmi niwanchik kawsakunanchikpaq kaqkunataqa pay quwananchikta. Chaymi Jesucristoqa yachachirqa imamantapas mana afanakunapaq (Mat. 6:31-33). Manam pipas kuyasqan runamantaqa iskayrayanmanchu, chaymi mana iskayrayanchikchu Jehova Dios tukuy nisqankunata ruwananmantaqa. Jehova Dios kuyasqanchiktaqa qawachinchik paymanta mana iskayrayaspam (Sal. 143:8). Chaymi tapukunanchik: ¿Tiempoyta hinaspa kallpayta allinta servichikuspaychu Jehova Dios kuyasqayta qawachichkani? ¿Iskayrayanichu ima necesitasqaytapas sapa punchaw Jehova Dios quwananmanta?, nispa.

⁹ Mike sutiyuq iñiqmasinchikmanta rimarisun. Payqa mozollaraq kasqanmantapacham Diosmanta willakunanpaq huk law nacionman riyta munarqa. Watakuna pasaruptinmi payqa casarakururqa hinaspa iskay churiyuqña karqa. Ichaqa hinallaraqmi Diosmanta willakunanpaq huk law nacionman riytaqa munarqa. Chaypaqmi warminwan hinaspa churinkunawan kuska qillqanchikkunapi leerqaku chayna ruwaq iñiqmasinchikkunamanta. Chaynapim paykunaqa tantearurqaku wasinkuta rantikuruspa taksa wasillapiña yachanankupaq. Negocionpipas as runakunallapaqñam llamkarqa hinaspam yacharurqa internetnintakamalla negocion qawaytapas. Chayta ruwaspam paykunaqa Diosmanta willakunankupaq huk law nacionman astakururqaku. Iskay wataña huk law nacionpi kachkaspankum Mikeqa nirqa: “Kawsakusqaykupim qawarqaniku Mateo 6:33 nisqanqa chaynapuni kasqanta”, nispa.

10. ¿Imanasqam Davidta qatipakuna hinaspa Diospa yachachiwasqanchikkunapi yuyaymanana?

¹⁰ Israel nacionpi kamachiq Davidqa Jehova Diospa unanchasqankunapi hinaspa kamachikuyninkunapi yuyaymanananpaqmi tiempochakuq. Chaymi nirqa: “Diospa atiynillanmantam cielokuna willawanchik”, nispa. Chaymantapas kamachikuyninkunapi yuyaymanaspam nirqa: ‘Tayta Diospa tukuy yachachikuyninqa mana imaniraqllapas fallayuqmi’, nispa. Chaykunapi yuyaymanasqanmi Davidtaqa Diosta astawan kuyananpaq kallpancharqa. Chaymi nirqa: ‘Qamqariki kanki rumi hina amparaykuqniymi. Qamqariki kanki tukuymanta libraykuqnillaymi. Rimasqaykunapas qampa agradoykipaqtaq kachun. Piensasqaykunapas qampa agradoykipaqtaq kachun’, nispa (Sal. 19:1, 7, 14). David hinam ñuqanchikpas Diospa unanchasqankunapi hinaspa bibliapa yachachisqankunapi yuyaymanananchik. Chayta ruwaspam Jehova Dios kuyasqanchikta qawachisun.

11. ¿Imaynatam Diospa yachachiwasqanchikta servichikuchwan kuyasqanchikta qawachinanchikpaq? (Qaway 27 kaq paginapi dibujokunata).

¹¹ Jehova Diosqa tukuy imatam yachachiwanchik paymanta, unanchasqankunamanta, hamuq tiempopi kusisqa kawsakunanchikmanta hinaspa bibliamanta.  Diosta mana riqsiq runakunam ichaqa runamasinkuta kallpanchanku imamantapas yachayta munaspankuqa universidadpi estudianankupaq. Chayta ruwaqkunaqa as-asmantam Dios kuyayta saqirunku. Jehova Diosqa manamá tukuy imakunamanta yachanallanchiktachu munan, payqa munan imapipas allinta tanteakunanchiktam. Munantaqmi yachasqanchikkunata allinninchikpaq hinaspa hukkunapa allinninpaq servichikunanchikta (Prov. 4:5-7). Chaytaqa ruwachwan huk runakunamanpas Diosmanta imam kaqta yachachispanchikmi, chaynapi paykunapas salvakunankupaq (1 Tim. 2:4). Diospa kamachimuynin ñuqanchikpaq imakuna ruwananmanta achka runakunaman yachachispaqa, runamasinchikta hinaspa Jehova Dios kuyasqanchiktam qawachichkanchik (leey Salmo 66:16, 17).

12. ¿Imatam nirqa huk sipascha sumaq qillqa chaskisqanmanta?

¹² Mozo-sipaskunapas Jehova Diospa tukuy ima qusqanpi hinaspa yachachisqanpim yuyaymananmanku. Chaytam ruwarqa Shannon sutiyuq sipaschapas. Payqa “Devoción piadosa” sutiyuq kimsa punchaw hatun huñunakuyman riptinmi 11 watallanpiraqmi karqa sullkachanñataq 10 watachanpi. Chaypim lliw warmachakunata nirqaku paykunapaq sapaqchasqa lawllapi tiyanankupaq. Chaypi tiyaykuspanmi Shannonqa manchapakustin kachkarqa. Ichaqa, Los jóvenes preguntan niq qillqata chaypi  chaskispanmi llumpayta kusikurqa. Paymi nirqa: “Chaypim qawarqani Jehova Diosqa kuyakuwasqanta. Anchatam agradecekuni kuyayllapaq tukuy imakuna quwasqanmanta”, nispa.

13, 14. ¿Imatam ruwananchik Jehova Dios corregiwaptinchikqa?

¹³ Bibliapim Jehova Dios imayna corregiwasqanchikta tupachin, kuyasqan churinta huk tayta imayna corregisqanwan (Prov. 3:12). ¿Imatam ruwananchik Jehova Dios corregiwaptinchikqa? Hukmanyachiwaptinchikpas, allinpaqmi hapinanchik. Chaynapim yachasun allinkuna ruwayta, hinaspam sunqunchikpi hawkayayta tarisun (Heb. 12:11). Corregiwasqanchik mana gustonchikpaq hina kaptinpas, amayá yanqapaq kasqanta hinaqa qawasunchu nitaq piñakurusunchu. Jehova Diosta uyarispa hinaspa corregiwasqanchikta kasukuspaqa, pay kuyasqanchiktam qawachisunchik.

¹⁴ Malaquiaspa tiemponpi judio casta runakunam Jehova Diosman mana allin ofrendakunata quchkarqaku. Chaymi Diosqa paykunata corregirqa (leey Malaquias 1:12, 13). Achka kutita corregichkaptinpas manam kasukurqakuchu. Chaymi Jehova Diosqa paykunata castigarurqa (Mal. 2:1, 2). ¿Imatam kayqa yachachiwanchik? Corregiwasqanchikta mana kasukuspa utaq yanqapaq kasqanta hina qawaspaqa, Jehova Dioswan amistadninchiktam yanqacharusun.

15. ¿Imayna runataq mana kananchikchu?

¹⁵ Jehova Diosta mana riqsiq runakunaqa yaqa llapankum hatun tukuq hinaspa kikillanpaq munaqkuna kanku. Achkam mana munankuchu pipas correginantaqa. Wakinñataqmi manay munastin kasukunku. Ichaqa bibliapim yachachiwanchik ñuqanchikqa mana chayna kanapaq. Ñuqanchikpaq Jehova Dios ima munasqanmantam yachananchik hinaspam kasukunanchik (Rom. 12:2). Llaqtantakamam Jehova Diosqa allinninchikpaq kaqkunata yachachiwanchik. Niwanchikmi warmipas qaripas imayna respetanakunanchikmanta, allin amistadkuna imayna akllanamanta hinaspa kusirikunapaq kaqkunatapas imayna akllakunamanta. Jehova Diospa corregiwasqanchikta kasukuspaqa, yachachiwasqanchikmanta agradecekusqanchikta hinaspa pay kuyasqanchiktam qawachisun (Juan 14:31; Rom. 6:17).

16, 17. (1) ¿Imanasqataq imatapas tanteanapaqqa, Jehova Diospa imam piensasqanmantaraq puntataqa yachananchik? (2) Jehova Diospi hapipakunankumantaqa, ¿imatam Israel casta runakunaqa ruwarqaku?

¹⁶ Warmakunaqa taytankutam maskanku imamantapas harkanankupaq  utaq imapipas yanapanankupaq. Yuyayniyuqña kaspankupas wakinpiqa hinallaraqmi taytankuta maskanku yanapachikunankupaq. ¿Imanasqa? Taytanku paykunamanta aswan yachayniyuq kasqanta riqsikuspankum. Allin tanteaq kaspankupas taytankupa ima piensasqantaraqmi uyariykuyta munanku. Jehova Diospas kikinchik tanteakunanchiktam munan. Ichaqa paypi hapipakusqanchikrayku hinaspa kuyasqanchikraykum yanapawananchikta munanchik. Chaymi imatapas manaraq tanteachkaspaqa, paypa ima piensasqanmanta yachayta munanchik. Yanapawananchikpaq mañakuptinchikqa, chuya espirituntam quykuwanchik imatapas allinta ruwanapaq (Filip. 2:13).

¹⁷ Samuelpa tiemponpim Israel casta runakunaqa Filistea nacion runakunawan guerrapi atipachikuchkarqaku. Hinaptinmi Israel casta runakunaqa Jehova Diosta mana tapuykuspa, kikillankumanta tantearurqaku Diospa contrato ruwasqan baulta guerra kasqanman apanankupaq. Paykunaqa piensarqaku chayta apaspa guerrapi ganaruytam. Kikinkupa piensasqallankuman hapipakuspam Diospa imam piensasqanmanta yachaytaqa mana munarqakuchu. ¿Imapim chayqa tukurqa? Israel castamanta 30.000 soldadokunam chaypi wañururqaku. Hinaspapas Filisteo runakunapa makinpim Diospa contrato ruwasqan baulpas qiparurqa (1 Sam. 4:2-4, 10, 11; leey Proverbios 14:12).

18. Bibliapa nisqanman hinaqa, ¿imatam ruwananchik?

¹⁸ Tukuy sunqunwan Jehova Diosta kuyaq runam, Diospi hapipakuspan kaynata qillqarqa: ‘Diosnillaypim suyasaq ñuqallayqa. Paytaqa alabasaqraqmi ñuqallayqa. Payllam ñuqallaypa salvaqniyqa payllataqmi ñuqallaypa Diosniyqa. Llumpay hukmanyasqam ñuqallayqa kachkani. Chayraykum qanmanta ñuqallayqa yuyarillani’, nispa (Sal. 42:5, 6). ¿Chaynachu qampas sunquykipi tarikunki? Chayna kaptinpas, llapanchikmi kallpanchakunanchik Jehova Diospi hinalla hapipakunanchikpaq. Bibliapim niwanchik: ‘[Jehova] Diosllapiyá confiakuy tukuy sunquykiwanqa. Amayá confiakuychu kikikipa entiendesqallaykipiqa. Tukuy kawsasqaykipiyá yuyariy tayta Diosta. Paymi munasqanman hina kawsachisunki qamtaqa’, nispa (Prov. 3:5, 6).

19. ¿Imaynatam Jehova Dios kuyasqaykita qawachinki?

¹⁹ Qawamusqanchikman hinaqa Jehova Diosmi puntata kuyawarqanchik. Chayta ruwaspam payta kuyanapaqpas yachachiwarqanchik. Chaymi mana qunqaspa yuyaymanananchik, ñuqanchikrayku tukuy ima ruwasqanpi hinaspa kuyawasqanchikpi. Chaynaqa tukuy sunqunchikwan, tukuy vidanchikwan, tukuy yuyayninchikwan hinaspa tukuy kallpanchikwan Jehova Dios kuyasqanchiktayá qawachisun (Mar. 12:30).