ISQUN wataymantaqa manañam wiñayta atirqaniñachu. Kunanqa 43 wataypiñam kachkani huk metro sayayniyuqlla. Tayta-mamaymi llamkanaypaq niwarqa chaynapi sayayniymanta mana llumpayta piensanaypaq. Chaymi frutakuna rantikuyta qallaykurqani wasiyku punkupi. Sumaqta pichakuspay churaptiymi achka rantiwaqku.

Ichaqa maynataña llamkaspaypas taksalla kasqaytaqa manam qunqarqanichu. Imatapas rantipakuq rispaymi rantiy munasqayta mana haypayta atiqchu kani, chaywanmi llumpay hukmanyasqa tarikurqani. 14 wataypim ichaqa hawkayayta tarirqani.

Huk punchawmi iskay testigokuna fruta rantiqniy hamurqaku. Bibliamanta yachachiwanankupaq niwaptinkum arí nirqani. Yachachiwarqakum imayna sayayniyuq kasqaywan llakisqa kanaymantaqa Jehova Diosmanta yachay aswan allin kasqanmanta. Chayqa anchatam yanapawarqa. Salmo 73:28 nisqanmi kallpanchawan, chaypim nin: “Sumaqmi Diospa ñawpaqninpi kayqa”, nispa.

Chay watakunapiqa tayta-mamaywanmi Costa de Marfil nacionpi yacharqani. Chaypi kaq runakunaqa manañam qawapayawaqkuchu. Ichaqa Burkina Faso nacionmanmi ripukurqaniku. Chaypi runakuna llumpayta qawapayawaptinkum wasiymantapas lluqsiytaqa mana munaqchu kani. Ichaqa semanakuna pasaytam Jehova Diosmanta yachasqaykunapi yuyaymanarqani. Chay nacionpiqa manam pipas Jehova Diosmantaqa yachachiwaqchu. Chaymi betel wasiman cartata apachirqani pitapas kachamunankupaq, hinaptinmi huk motopi wasiyman chayaramurqa Nani sutiyuq misionera.

Yachasqay lawpiqa callekunam mitullaña karqa chaymi Naniqa sasata chayamuq. Llumpayta paraptinqa astawanraqmi mituchakuq. Chayraykum wakin kutipiqa motonmanta wichiykuq, chaynata sasachakuspanpas manam saqiruwarqachu. Huk kutipim niwarqa huñunakuyman rinaykupaq. Hinaptinmi, runakuna qawapayawanankumanta hinaspa motonpi apawachkaptin mitupi kuchpakurunaykumanta manchakuspay mana ima niytapas atirqanichu. Chaywanpas huñunakuyman rinaykupaqqa arí nirqanim. Yuyarirurqanim kallpanchawaqniy textota, ninmi: ‘Ñuqallayqa Diosllapim hapipakuni’, nispa.

 Chayna risqaykupim achka kutipi motonmanta wichiykurqaniku, ichaqa manam saqirqanikuchu huñunakuyman riytaqa. Ñanpi kaq runakunaqa qawarayawaqkum, huñunakuypim ichaqa kuyakuywan chaskiykuwaqku. Chaymi isqun killallamanta bautizakururqani.

Chaymantapas kallpanchawaqniy textoqa nintaqmi: ‘Ñuqallayqa tukuy ruwasqanmantam willakusaq’, nispa. Chaymi yuyarichiwaq Diosmanta willakunaypaq, ichaqa manchapakurqanim wasin-wasin riytaqa. Diosmanta willakunaypaq chayllaraq lluqsiptiymi uchuypas hatunpas imayna ichisqayta qawawaspanku asikuwaqku. Chaywanmi llumpay hukmanyasqa tarikurqani. Chayta atipanaypaqmi yanapawarqa chay runakunaman Diosmanta yachachiy munasqay.

Diosmanta willakuq rinaypaqmi rantirurqani taksa triciclochata. Wichayninpaman riptiyqa riqmasiymi qipaymanta tanqawaq. Urayninpamanmi ichaqa ankarikuqña kani. Qallariyninpiqa sasachakurqanim Diosmanta willakuytaqa. Tiempo pasasqanman hinam ichaqa 1998 watapi qallaykurqani 70 horataña Diosmanta sapa killa willakuyta.

Achka runakunamanmi Diosmanta yachachirqani chaymi tawa bautizakurqaku. Huknin ñañaypas testigoñam chaywanmi anchata kusikuni. Sasachakuypi tarikuptiypas Diosmanta yachachisqay runakuna iñiyninkupi ñawparisqankumanta yachasqaymi kusichiwan. Huk kutipim universidadpi kaq jovenman wasi punkullanpi Diosmanta yachachirqani. Ichaqa qari iñiqmasinchikmanñam yachachinanpaq saqiykurqani. Tiempo pasasqanman hinam chay jovenqa Costa de Marfil nacionman ripukurqa. Chukchu (paludismo) unquywan unquchkaptiymi Costa de Marfil nacionmanta carta apachimuwasqanta chaskirqani chaypim willawarqa Diosmanta willakuy qallaykusqanta, chaywanmi llumpayta kusikurqani.

Qullqichay kananpaqmi ñuqa hina kaq runakunata yanapaqkuna yachachiwarqaku pacha sirayta. Ichaqa huknin profesoraymi allin llamkasqayta qawawaspan nirqa jabon ruwaytaña yachachiwanankupaq. Chayna yachachiwasqankuwanmi pacha taqsanapaq hinapas bañakunapaq jabonta wasiypi ruwaspa rantikuni. Rantiwaqniykunam jabonniyta rantiwanankupaq hukkunaman willanku. Chaymi rantiwaqniykunapa wasinman motowan apani.

Wasay astawan llumpayta nanawasqanraykum 2004 watapi saqirurqani Diosmanta sapa killa 70 hora willakuyniytaqa. Chaywanpas hinallam Diosmanta willakunaypaq atisqayman hina lluqsini.

Runakunam ninku kusisqallaña kasqayta. Chayna kusisqaqa kawsakuni Diosman astawan asuykusqayraykum (Kaytam willakun Sarah Maiga).