YAQA 200 wata ñawpaqtaraqmi kay runaqa nirqa, periodicopa tukuy ima nisqankunata mana kasunapaq. Kunan punchawpas chaynam pasan internetwan. Imaymana aparatokuna kasqanraykum sapa punchaw imamantapas ñawinchayta atichwan. Chaykunamanta wakiqninqa allin willakuykunam hinaspa imam kaqtam willawanchik, wakiqninmi ichaqa llulla rimaykuna hinaspa mana allinninchikpaqpas kanman. Chaymi mana llapantachu allinpaqqa hapina. Ichapas internetpi kasqanrayku chaypi tukuy ima nisqantaqa allinpaq hapichwan utaq pi amistadninchikpas apachimuwasqanchikrayku. Wakinpiqa cuentokunatapas kaqpaqmi hapiruchwan. Ichaqa bibliapim niwanchik: “Mana yuyayniyuq runaqa imataña nisqankutapas chiqappaqmi hapirun, yachayniyuq runam ichaqa allinta tanteakuykuspan imatapas ruwan”, nispa (Prov. 14:15, CQ12).

Mana allin yuyayniyuq runaqa tukuy ima uyarisqantam allinpaq hapin, yuyayniyuq runam ichaqa sumaqta yachaykuspanraq. Internetpiqa achka willakuykunam yaqa lliw runakuna yachanankupaq hina kachkan, ichaqa yanqa willakuykunallam. Chaynaqa, ¿imatam ruwachwan pipas mana pantachiwananchikpaq? Kay tapukuykunapim yuyaymanananchik: “¿Maypitaq kay willakuyta tarirqani? ¿Imam kaqta willakuq confianapaq lawpichu, icha munasqankuman hina qillqananku lawpichu? ¿Yachakunchu pim chaykuna qillqasqanta? ¿Yaqachu chay willakuykuna yanqa kasqanta qawachinanpaq confianapaq lawkunapi willakuchkan?”. * Allin tanteaqyá kasun (Prov. 1:3). Ima willakuypas iskayrayachisuspaykiqa yaqapaschá yanqa willakuykunalla kanman. ¿Imatam ruwachwan pi runamantapas mana allin rimasqankuta chaskispanchikqa? Chayna kaptinqa tapukunanchikmi: “¿Pitaq kaykunamanta yachananchikta munachkanman? ¿Imanasqataq munanman lliw runakuna kaymanta yachanankuta?”, nispa.

Wakin runakunam internetnintakama utaq celularnintakama willakuykuna chaskisqankutaqa  chaylla lliw amistadninkunaman apachinku. Chaytaqa ruwanku chay willakuymanta mana sumaqta yachaykuspankum hinaspa huk runakunapa allinninpaq utaq mana allinninpaq kasqanpi mana piensaykuspankum. Wakiqninqa ichapas cuento qipi kasqankurayku (2 Sam. 13:28-33). Allinta tantearispam imatapas willakunanchik. Manam munanchikchu mayqan iñiqmasinchikpas nitaq Jehova Diospa llaqtanpas pinqaypi qipanantaqa.

¿Imanasqataq wakin runakunaqa chaskisqanku willakuykunamanta mana allinta yachaykuspanku kaqmanta apachinku? Mana tiempochakuyta munaspankum. Ninkupaschá: “Chayna utaq mana chayna kasqanmanta amistadniykuna yachayta munaspankuqa kikinkuñach maskanqaku”, nispa. Ichapas amistadninkunapapas tiemponkuqa mana kanchu (Efes. 5:15, 16). Chaynaqa, chaskisqayki willakuykuna apachinaykipaq hina kasqanmanta iskayrayaspaykiqa ama apachiychu.

Tapukuchwantaqmi: “¿Lliw chaskisqay willakuykunatachu chaylla apachini? ¿Yaqachu haykapipas mana allin willakuykuna apachisqaymanta pampachawananpaq pitapas mañakurqani? ¿Pipas niwarqachu chaskisqay willakuykunata amaña apachinaypaq?”, nispa. Amistadninchikkuna imamantapas yachayta munaspankuqa kikinkum maskanmanku. Manam necesitankuchu fotokuna, videokuna hinaspa asichinapaq hina willakuykuna apachinanchiktaqa. Manataqmi huñunakuypi yachachikuykunata grabaruspa nitaq qillqasqanchiktapas apachinanchiktaqchu. * Aswan allinmi kanman imamantapas yachayta munaspaqa sapakama chaymanta rimaq yachachikuyta hinaspa bibliapi textokunata maskayninchikqa, chaynataq huñunakuyman rinapaq estudiayninchikpas.

¿Imatam ruwananchik Jehova Diospa testigonkunamanta internetpi yanqakuna rimasqankuta qawaspanchikqa? Amam ñawinchananchikchu nitaqmi kaqpaqpas hapinanchikchu. Amataqmi hukkunamanqa apachinanchikchu, manachayqa llulla rimaykunatam chiqirachichwan. Chay willakuykuna hukmanyachiwaptinchikqa Jehova Diostam mañakunanchik hinaspam allin yuyayniyuq iñiqmasinchikwan rimananchik (Sant. 1:5, 6; Jud. 22, 23). Jesucristomantapas chaynatam rimarqaku. Chaymi qatiqninkunata nirqa: ‘Ñuqaraykum runakunaqa kamispa ñakarichisunkichik hinaspam contraykichikpi llullakuspa tukuy imatapas nisunkichik’, nispa (Mat. 5:11; 11:19; Juan 10:19-21). Tanteoyuq kaspaqa musyasunmi pipas yanqakuna rimasqantaqa utaq hukkunata pantachiy munasqantapas (Prov. 2:10-16).

Iñiqmasinchikkunamanta imatapas uyarispaqa manam willakachakunanchikchu. Uyarisqanchik chayna kaptinpas manapaschá allinchu kanman hukkunaman willakuyqa (Mat. 7:12). Iñiqmasinchikmanta asikunankupaq utaq pinqaypi qipachinapaq hina willakuspanchikqa mana kuyasqanchiktach qawachichkanchikman. Manataqmi pitapas chayqa yanapanmanchu (2 Tes. 3:11; 1 Tim. 5:13). Wakiqninqa ichapas manaraq munankuchu imapas pasasqanmanta hukkuna yachanankuta. Chayna kaptinqa, tanteasqanman hina haykapipas kikin willakunanpaqmi saqinanchik. Willakuruspaqa iñiqmasinchiktam sasachakuypi churaruchwan.

Kunan willakuykunaqa chayllam chiqirun. Wakinqa allinpaq hinaspa imam kaqta rimaq willakuykunam, wakinñataqmi llulla hinaspa mana allin willakuykuna. Huk runallaman willakuptinchikpas, payqa huk qimchiyllapim achka runakunaman chiqirachinman. Chaymi amistadninchikkunamanqa mana lliw chaskisqanchik willakuykunataqa apachinanchikchu. Bibliapim niwanchik, kuyakuq runaqa imapas uyarisqanta allinpaq hapisqanta. Chayna kaptinpas manam lliw chaskisqanchik willakuykunatachu allinpaqqa hapina (1 Cor. 13:7). Manataqmi chayna kasqanpaqqa hapinachu iñiqmasinchikkunamanta hinaspa Jehova Diospa llaqtanmanta llullakunata rimaptinkuqa. Chayna yanqa hinaspa llulla willakuykunata hatarichiqkunawan chiqichiqkunaqa “llullakuqkunapa taytan” diablotam qatipakuchkanku (Juan 8:44). Chaynaqa, tanteowanmi qawananchik chaskisqanchik willakuykunataqa. Amayá bibliapi kayna nisqantaqa qunqasunchu: ‘Pisi experienciayuq runakunaqa mana tanteoyuqmi kanqaku. Yuyaysapa runakunam ichaqa yachaywan coronasqa kanqaku’ (Prov. 14:18).